Epacerero 48
48
Yakobe onaareeliha anamwane a Yoseefe
1Eviraka ehuhu ekina, aaheereliwa Yoseefe: “Atithinyu anoovoreiwa.” Vano aarowa owoona aakuxaka anamwanaawe eeli, Manaxe ni Efrayimi. 2Yakobe aaheereliwa: “Mwaninyu Yoseefe ohoorwa owoonani. Yixrayeli aahiilipihera, anakilaathi vakaamani. 3Yakobe aamweerela Yoseefe: “Muluku a ikuru sootheene aahiixoonihera oLuzi, mweelaponi ya oKanaani ni weiwe aakireeliha 4akeerelaka: “Kinimoovahani ekhapira etokotoko ni mwa nyuwo nsikhumelele miloko sincipale. Nkivahe ekhapiraanyu elapo ela ntoko yawaya wa mahuku ootheene. 5Vano, anamwaniinyu eeli mwaayanraanyu wExipitu kihinaaye orwa nno eniisuweliwe ntoko awaka. Efrayimi ni Manaxe eniikhale awaka ntoko araaya awaka Rubeni ni Simeyoni. 6Anamwane eniiyariwe vahoolowaya eniikhale awawo; awo eniyaalikeliwe mpuumbani sa Efrayimi ni Manaxe yaphiyera ehuhu yoowaakhela yoohiyeriwa. 7Miyo kihokolowaka oPadan, wa othananawaka Rakheli aahookhwa mweelaponi ya oKanaani, hiyo nlelo nireene ni mukwaahaahu naattamelaka wEfrata. Vano kaamvitha vaavaale, mukerekhere ephiro enkela wEfrata, eyo tiiyo oBeteleheemu.” 8Yakobe awoonakaru anamwane a Yoseefe, aakoha: “Alasa taani?” 9Yoseefe aawaakhula atithawe: “Ti anamwane Muluku okivanghaawe wenno.” Yixrayeli aaheera: “Mukiruuhele va weera kaareelihe.” 10Yixrayeli maithwaawe yaari ookotakota niwoko na wuuluvala ni khaawera woona nnenesene. Tivawo Yoseefe aawaattamihenraawe anamwanaawe, ni atithawe yaahaabeca, enaakhubaara. 11Vano Yixrayeli aamweerela Yoseefe: “Nkuupuwelela weera nkoonetho ekhovaawo, ni vano Muluku ookitthunihera owoonatho anamwanaawo.” 12Vahoolowaya Yoseefe aahaavenxasa mmakuthanimwaya, ni aahuuramela vathi ohoolowawe. 13Yoseefe aahaakuxa ooweeli – Efrayimi moono mulopwana vakhiviru wa moono muthiyana wa Yixrayeli ni Manaxe moonowaawe muthiyana vakhiviru wa moono mulopwana wa Yixrayeli ni aawaattamihera. 14Wa soothesene, Yixrayeli aahookola moono woolopwana aniikaathera vamuru wa Efrayimi aarookhalaru mukhaani ni avirikanyihaka nyoono, aahiikaathera moono woothiyana vamuru wa Manaxe aarookhalaru ntthaara. 15Vano aamureeliha Yoseefe eeraka: “Muluku aareelihe anamwane ala. Makholowaaka Abrahaamu ni Isaki yaamurumeela Muluku Owo, ni Owo aari Mukukhulaaka mahuku ootheene mpaka olelo. 16Aani, ti Mulukweene Yoowo aari ndyelo okivulunxe wa soonanara sootheene. Ekhale oowiitthaniwa mwa nsinanaka ni masina a atithaka Abrahamu ni Isaki nitho ekhalaneke ekhapira etokotoko mweelaponimu.” 17Yoseefe awoonakaru atithawe emwiikaatheraka ntata na woolopwana vamuru wa Efrayimi, khaahakalanle. Tivawo aavanraawe moono wa atithawe eerelaka oceendya vamuru wa Efrayimi aronghaka wa Manaxe. 18Yoseefe aaweerela atithawe: “Hoye tiithi! Ntthaara ti nna. Mwiikaathere ntatananyu na woolopwana vamuruwawe. 19Mene atithawe yaakhootta yeeraka: “Koosuwela, mwanaka. Miyo koosuwela. Owotho anaathatuwe muloko. Anaakhaletho mutokweene mmoha. Wa soothesene, munneiye mukhaani anaakhale mutokweene ompwaha yoowo ni ekhapiraawe eniithatuwe miloko sincipale.” 20Nihuku nne Yakobe aahaareeliha eeraka: “Muloko wa aYixrayeli onuuvarele muteko masinaanyu weera ereelihaneke ni masu: ‘Muluku oopakeeni nyuwo ntoko ompankaawe Efrayimi ni Manaxe.’ Hiiho aamunnuwiha Efrayimi amuhiyanyihaka Manaxe. 21Woottharelana Yixrayeli aamweerela Yoseefe: “Miyo kihanle vakhaani okhwa, mene Muluku anaakhale ni nyuwo ni anoohokoloxereni elapo ya makholowaanyu. 22Weenre okhalaka muhooleli a axunneiyo, kinimoovaha elapo ya onyaakoni kaakunxaaka wa awAmori ni ekatanaaka ni nyuurasaka.
Iliyochaguliwa sasa
Epacerero 48: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.