Epacerero 34
34
Onyakulihana wa anamwane a Yakobe ni atthu a oXekhemi
1Emaara emoha, Dina, mwaana a Leya aamuyarenlaawe Yakobe, aavenya weera aasuwele asithiyana a elapo ele. 2Vano, Xekhemi, mwaana a Hamori, muHivi, aalamula elapweene yeele, aamoona, anamvara ni ikuru, anamukoniha. 3Murimaawe waasivelaxiwa ni Dina, mwaana a Yakobe, ni aamusivela mwaamwali ole, anamuulumano amunyeengaka. 4Tivawo Xekhemi aarongwaawe waaleela atithawe Hamori eeraka: “Mwakuurele mwaamwali ole weera kimuthele.” 5Yakobe aasuwelaawe weera mwaniye Dina aaveihiwa, anamwanaawe yeera ereene ntuphini ni muhuwo. Tivawo aaweherenraawe emaalelo mpaka ohokolowawaya. 6Hamori, atithawe Xekhemi, yaarowa wuuluma ni Yakobe. 7Ehokolowakaru anamwanaawe Yakobe ntuphini, ni esuwelaka sootheene, yaathananaxa ni onyoonyiwa. Niwoko Xekhemi aapaka etthu yoowuulihaxa muru oYixrayeli woomukoniha mwaana a Yakobe – etthu ehineeriwa! 8Hamori aaweerela: “Mwanaka, Xekhemi, oosivelaxiwa ni mwaninyusa. Dyoontte, mmwinnyerere owo weera amuthele. 9Nithelaneke yoohiru. Munivaheke anamwaniinyu asithiyana, ni nyuwo mwaakuxeke awihu. 10Mwiitekiheke ni hiyo. Elapwaahu moohuleliwa nyuwosa. Mmakekemo, mumpakekemo nakoswaanyu ni mphwanyeke sawinyusene.” 11Xekhemi aahaavekela atithawe ni axirokoriye Dina: “Dyoontte mwaakhulele. Miyo kiri oolikaneene woovahani yeeyo nyuwo muneeraanyu mukivekele. 12Hata mwaandyeereraka muttengo nitho yoovaha wa omutthomera, kinimoolivani yeeyo muneeraanyu mukivekele. Paahi mukivahe mwaamwali ola weera kimuthele.” 13Anamwanaawe Yakobe yaahaakhula yaalokotthasaka Xekhemi ni atithawe, Hamori, mwaha woomukoniha murokoraya Dina. 14Vano yaaheera: “Khoongwereya opaka yeeyo nimvahereraka murokorihu wa mulopwana oohiineliwa. Napaka yeeyo, eniikhale yoonuuliha muru. 15Hiyo nnaakhulele yoohimaanyu ni yoohimaahu: weera nyuwosa mwaakhulele wiineliwa asilopwanaanyu ootheene, ntoko ekhovelelowaahu. 16Vahoolowaya, nneeraahu noovaheeni, anamwanaahu ni nnithelelaneke ni awinyu. Hiyo nnimakeke ni nyuwosa, ni nnikhale muloko mmoha paahi. 17Mwaahaakhulela wiineliwa, ninoomukuxa murokorihu nipwaheke.” 18Vano, yoohimaaya yaamureera Hamori ni mwanawe Xekhemi. 19Xekhemi, mmiravo oottittimiheyaxa a ootheene a vaate wa atithawe, khaalekenle okwanihera yaavekenlaaya, niwoko vekhaikhai aamutthunaxa mwaana a Yakobe. 20Hamori vamoha ni mwanawe Xekhemi yaarowa vamulako wa esidade weera yuulume ni atthwaaya yeeraka: 21“Atthu awo ti a murettele. Mwaatthunihere weera emakeke mweelaponimwahu, ni muumu empakeke nakoswaaya ni hiyo, niwoko nookhala nipuro nookwana wa yaawo. Vano naatheleke anamwanaaya, ni awo yaatheleketho awihu. 22Vano, awo eniilikane okhala ni hiyo ntoko muloko mmoha, naakhulela weera asilopwanaahu ootheene yiineliweke ntoko awotho yiinelingwaaya. 23Muupuwelele weera mihuwosaya, inamasaya, sooreelasaya ni iyuumasaya soorikaxa sinoowereya okhala sawihu. Vano naakhuleleke otthunawaya weera awo ekhaleke ni hiyo.” 24Atthu ootheene yaathukumanne vamulako wa esidade yaahaakhulela masu a Hamori ni Xekhemi, ni asilopwana ni asimiravo ootheene a esidade ele yaahiinelasiwa. 25Eviraleene mahuku mararu a wiineliwa, nlelo ehaawaka ovoreya wa wiineliwa, anamwane eeli a Yakobe, Simeyoni ni Leevi, axirokoriye Dina, yaakuxa ikatanasaya, enavolowa musidadeni ehihovelaka etthu, enawiiva asilopwana ootheene. 26Vanonto yaamwiiva ni ikatana Hamori vamoha ni mwanawe Xekhemi, enamukhumiha Dina mpaani mwa Xekhemi, enapwaha. 27Asinamwane akina a Yakobe yaavolowa musidadeni ni eviraka saaraaya mittembo, yaahuhula esidade weiwo murokoraya aaveihingwaawewo. 28Yaakuxasa ikhondoolo, imombe, abuuru ni sootheene saari musidade ni mmatta. 29Yaahaakuxa asithiyana, anamwane, mihakhusaya sootheene nitho sootheene yaaraayano mmampaani. 30Yakobe aamweerela Simeyoni ni Leevi: “Nyuwosa mookiwayawayiha mukiruuhelaka osoondiwa ni aKanaani ni aPerizi, asimwaneene muumu. Hiyo nri vakhaani ni awosa yatakansa ikurusaya, ni yanirweela miyo ni amusaaka nniiphwatiwe.” 31Awo yaamwaakhula: “Wookhala nnene murokorihu omukhaliha ntoko puuta?”
Iliyochaguliwa sasa
Epacerero 34: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.