Epacerero 35
35
Yakobe onghokoleelatho oBeteli
1Muluku aamweerela Yakobe: “Mvenye nno ni mwamake oBeteli, ni wu mwamutekele altaari* Muluku, mwa Yoowo iixoonihenre wa nyuwo mwaatthawaka amunnawaanyu Esawu.” 2Yakobe aaweerela yaawo a vaatewawe nitho yaawo aaraaweno: “Mwiitapuxe wa miluku sa anamarwa siri variyariwanyu. Mwiitteelihe ni muceendye ikuwo. 3Nrowe nithaamele oBeteli. Kintthuna kamutekelewo altaari* Muluku okikhavihenre miyo kaaraaka moothananani, ni okihoonle mmapuroni moothemwene miyo keettaaka.” 4Yaamvaha Yakobe miluku sootheene sa anamarwa yaarinaaya, ni axiveeve yaawanraaya. Vano Yakobe aathipela sootheene muxerexere mwiri wa ekarivalyu* waattamela wa oXekhemi. 5Awo ettimulakaru, Muluku aahaaruuhela amaki a isidade iye yaavinraaya woova vancipale, moota wooweera khaawo aatthimakenle anamwane a Yakobe. 6Yakobe ni ootheene yaari ni yoowo yaaphiya oLuzi, eyo tiiyo oBeteli, elapo ya oKanaani. 7Weiwe aamutekela altaari* Muluku, anatteha nipuro nne El-Beteli, niwoko iwe Muluku aahiixoonihera wa yoowo aatthawaawe amunnawaawe. 8Vano Debora, murumeiyi a Rebeka, aahookhwa, anavithiwa vathi wa mwiri wa ekarivalyu* waattamela oBeteli. Tivawo Yakobe aattenghaawe nipuro nne Aloni Bakuti. 9Ahokoleelaka Yakobe oPadan Aram, Muluku aahiixooniheratho wa yoowo, anamureeliha, 10amweerelaka: “Nsinananyu ti Yakobe, mene vano khamurwa mwiitthaneliwatho Yakobe; nsinananyu nnikhale Yixrayeli.” Hiiho aamutteha Yixrayeli. 11Aamweerelatho: “Miyo ti Muluku a ikuru sootheene. Muyaraneke ni mwaandyeereraneke. Vano muloko, aani mpaka miloko sincipale, nsikhumelele mwa nyuwo, ni eniikhale mamwene variyari wa ekhapiraanyu. 12Elapo kaamvanghaaka Abrahaamu ni Isaki, kinoovahanitho nyuwo, ni kinoovaha mooteene yoowo ekhapirwaanyu.” 13Vahoolowaya Muluku aawela wa nipuro nne uulummaawe ni yoowo. 14Yakobe aaheemexa nrimbu na nluku vanipuroni nenenenne Muluku aamuulumannaawe, anamiinela yooveleela yoowura ni aattikitthela makhura. 15Yakobe aatteha nipuro nne Muluku uulummaawe ni yoowo Beteli.
Okhwa wa Rakheli
16Yaattimula oBeteli, ni exuurakamelanneene ni wEfrata, Rakheli aapacera oyara ni mahooxo matokotoko. 17Woowoona hiiho, namayariha aamweerela: “Muhoove, mookhalano va mwaana mulopwana mukina!” 18Vano ahaleelaka okhwa, aamutteha mwaana ole Ben-Oni, mene atithawe yaamuttenghe Benyamini. 19Rakheli aahookhwa, anavithiwa mukerekhere ephiro enrowa wEfrata, eyo tiiyo oBeteleheemu. 20Yakobe aaheemexa nrimbu vanihiyeni na Rakheli, ni mpaka olelo va nrimbu nne nri ekanyero ya nihiye na Rakheli. 21Yixrayeli aattimulatho, anakunga eheemaawe ohoolo wa oMigedal Ederi. 22Amankeene nlelo elapweene yeele, Rubeni aamukonano Biliya, ekuxo ya atithawe. Yixrayelitho aasuwela yeeyo. Yakobe aakhalano anamwane muloko neeli.
Anamwane a Yakobe
23Yaayariwe ni Leya yaari Rubeni, nttharanawe Yakobe, Simeyoni, Leevi, Yuda, Isakari ni Zebuloni. 24Yaayariwe ni Rakheli yaari Yoseefe ni Benyamini. 25Yaayariwe ni Biliya, murumeiyi a Rakheli, yaari Dani ni Nafitali. 26Yaayariwe ni Zilipa, murumeiyi a Leya, yaari Gadi ni Axeri. Ti yaala anamwane a Yakobe yaayareliwe oPadan Aram. 27Vahoolowaya Yakobe aarowa waaxekura atithawe, Isaki, oMamre, vakhiviru ni oHeberoni, eyo tiiyo oKiriyati. Ti weiwo Abrahaamu ni Isaki yaamankaaya. 28Isaki aakhalano iyaakha ncira ni miloko mithannamiraru sa okumaawe. 29Okhwiiye akwaaxeiyeene, anavithiwa athukumanyihiwaka vamoha ni makholowaawe. Vano, anamwanaawe, Esawu ni Yakobe, yaamvitha.
Iliyochaguliwa sasa
Epacerero 35: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.