Epacerero 33
33
Okumana wa Esawu ni Yakobe
1Yakobe oonaka weera Esawu aneera akhuveelaka ni asilopwana macira maxexe, aahaakawanyiha asinamwane a Leya, Rakheli ni arumeiyi eeli asithiyana. 2Aawiikaathi arumeiyi ni anamwanaaya ohoolo, Leya ni anamwanaawe, vahoolowaya, ni Rakheli ni Yoseefe woomalihera. 3Owo muneenaawe aarowa ohoolo ni, awaattamelaka amunnawaawe, aahaakokhorela imaara ithannapiili. 4Esawu aamutthimakela Yakobe, anamukhubaara muxikomwawe, anambeeca. Vano awosa yaahiinla. 5Esawu aahula maithwaawe, anawoona asithiyana ni asinamwane, anamukoha: “Alesa taani?” Yakobe aawaakhula: “Alesa ti anamwane Muluku omvanghaawe murumeiyaanyu.” 6Arumeiyi asithiyana ni anamwanaaya yaamukhuveela enamukokhorela. 7Vahoolowaya Leya ni anamwanaawe yaahoorwa, enamukokhorela. Wookisera, aaphiya Yoseefe ni Rakheli, enamukokhorelatho. 8Esawu amukoha: “Entaphulela eheeni muhuwo wootheene ole kiphwannyaaka mphironi?” Yakobe aamwaakhula: “Weera kaakheleliwe nnenesene ni nyuwo, apwiya.” 9Wa soothesene, Esawu aaheera: “Munnaka miyo kookhalano mwincipale. Wiithokororele yeeyo eri yawawo.” 10Mene Yakobe aanyeserera: “Hoye! Mwatthuna okoonihera murima wooreera, mwaakhelele yoovahaaka. Vano, woona ekhovaanyu onlikana ntoko woona ekhove ya Muluku ni, ohiya toko yeeyo, nyuwo mookaakhela nnenesene. 11Mwaakhelele yoovaha muruuheliwaanyu. Muluku ookiruweriha mpaka miyo kookhalano, sootheene kintthunaaka.” Yakobe aamunyeserera mpaka Esawu aahaakhelela. 12Esawu aaheera: “Nrowe nipwaheke ni miyo kinimoohoola. 13Wa soothesene, Yakobe aamweerela: “Apwiyaaka moosuwela weera asinamwane ala aakhulumuwa ni ontthuneya wuupuwelela ikhondoolo ni imombe singwaamwiha axaanaaya. Nanyeserihaxa weetta hata nikhalaka nihuku nimoha paahi, onookikhwela muhuwaaka wootheene. 14Tivawo, apwiyaaka, muroweke ohoolo wa murumeiyaanyu ni miyo kinimoottharani ottuli, keettaka vakhaani vakhaani vamoha ni muhuwaaka nitho anamwane mpaka kineeraaka kiphiye wa apwiyaaka oSeyiri.” 15Esawu aaheera: “Vanonto, okitthunihere woohiyera asilopwana akina.” Yakobe aamukoha: “Aheeni apwiyaaka? Waakheleliwawaka nnenesene, wookikwana.” 16Nihuku nenenenne, Esawu aahokoleela oSeyiri. 17Wa soothesene, Yakobe aarowa oSukota, weiwo aatenkaawe empaawe ni nikhoola na muhuwaawe. Tivawo, nipuro nne nniitthaniwaaya Sukota. 18Ahokolowaka oPadan-Arami, Yakobe aaphiya oowoopoweene oXekhemi oKanaani ni aakonenle vakhiviru wa esidade. 19Aathuma mpatta wa ematta weiwo aakungaawe iheemasawe ni makhoobiri ncira a eparatha*, aathumiheriwe ni anamwane a Hamori, atithawe Xekhemi. 20Vano vaavaale aahaateka altaari* ni aahaatteha Eli Elohe* Yixrayeli.
Iliyochaguliwa sasa
Epacerero 33: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.