Miteko 25
25
Othorihiwa ohoolo wa Festo
1Eviraka mahuku mararu woophiya elapo ele, Festo aarowa oSesareya mpaka oYerusaleemu, 2yaarwiyaaya ahooleli a asaserdoti* ni aYuda oottittimiheyaxa vahoolowawe, emooniheraka soomootherasaya Pawulo. 3Yaamvekelaxa Festo weera athaamiheriwe Pawulo oYerusaleemu evaanelaka omwiipithela Pawulo mphironi weera emwiive. 4Festo aawaakhula: “Pawulo ootthukiwa oSesareya, ni miyo muneenaaka kihanle vakhaani orowawo. 5Erowe vamoha ni miyo asitokweene akina a nyuwo ni weiwo yathalihe soomoothera mulopwana owo, waari weera vekhaikhai aapaka etthu yootapanyiha.” 6Areene ni yaawo mahuku mathannamararu, naari mahuku muloko, aarowa oSesareya ni oxaawaya aathukumanyiha muthukumano ni aalamulela weera Pawulo aruuhiwe vahoolowawe. 7Pawulo iixooniheraka, aYuda yaarwiiye oYerusaleemu yaamurukureera, emootheraka soowoothera soowoopiha, awo, yahaawenraaya waakhulela. 8Vano Pawulo aahiixaakiha eeraka: “Kheewowo etthu kaatapanyihenraaka aYuda ni nlamulonaya, naari ni Empa ya Muluku, hoye hoye Seesari.” 9Festo, atthunaka waasiveliha aYuda, aamukoha Pawulo: “Nyuwo moolikana weera murowe oYerusaleemu ni weiwo mwathorihiwe ohoolowaka mwaha wa soowoothera iya?” 10Pawulo aamwaakhula: “Vano miyo kiri ohoolo wa muthukumano wa nipuro noowuuluma milattu na Seesari, wenno ontthuneya weera kithorihiweke vaava. Kheewo etthu yoonanara kaapakenlaaka aYuda, ntoko musuwenlaanyu nnenesene. 11Kaarino nthowa noopaka etthu yoophwanela okhwa, nkinkhootta okhwa. Vaheera soowoothera kinootheriwaaka ni aYuda saahikhanle sa ekhaikhai, khaawo ophwanenle weera akivaherere wa yaawo. Kintthuna woonihera wa Seesari!” 12Awiiwelelaka anamalakaawe, Festo aaheera: “Nyuwo mootthuna wa Seesari; wa yoowo mmwirowe!”
Festo onimvekela olaka mwene Agripa
13Eviraka mahuku makina, mwene Agripa ni Berenisi yaaphiya oSesareya weera emuulumihe Festo. 14Woonaka weera awo yaakhalawo mahuku mancipale, Festo aamuthalihera mwene makhalelo a Pawulo, eeraka: “Ookhala va mulopwana mmoha Felisi aamuhingyaawe ootthukiweene. 15Kaarongwaka oYerusaleemu, ahooleli a asaserdoti* ni asitokweene a aYuda yaamoothera, yoowo, ekivekelaka weera athorihiwe. 16Miyo kaaweerela weera kheehiyono ekhovelelo ya aRooma omttaruxa mutthu ahinaaye owo wiixoonihera mwaneenaawe ohoolo wa anamootheraawe, ni ahinaaye okhalano ehuhu yoowiixaakiha sa soowoothera animpakelaaya. 17Erwaaka va awo vamoha ni miyo, nkaalekelihale mwaha ola. Kaathukumanyiha muthukumano oxaawaya ni kaalamulela weera mulopwana owo ooniheriwe. 18Anamootheraawe yeemelaka weera yuulume, khayaamoothenre naari yoonanara emoha miyo kaawehereraaka. 19Ohiyanawaya, yaavirikanyiha ni yoowo sa mipatta sikina sa ediinaaya, ni sa Yeesu mmoha okhwiiye, mwa Yoowo Pawulo aanyesereraawe weera ori ni okumi. 20Nkaasuwenle moota woowehaweha nyaha iye, tivawo kaamukonghaaka owo aari aalikanne orowa oYerusaleemu weera athorihiwewo mwaha wa soowoothera iya. 21Atthunaka Pawulo weera akhale ootthukiweene mpaka mwaha ola olakeliwa ni Seesari, kaalamulela weera akhale mukaliposo mpaka miyo kineeraaka kimurumihele Seesari.” 22Vano Agripa aamweerela Festo: “Miyotho kaatthuna omwiiwa mulopwana owo.” Owo aamwaakhula: “Munoomwiiwa omaalo.”
Pawulo ohoolo wa mwene Agripa
23Oxaawaya Agripa ni Berenisi yaahoorwa ni ovuwawaya otokotoko, ni yaavolowa mpaani mwa nyaha sa othorihiwa vamoha ni asitokweene a anakhotto ni atthu oosuwanyeyaxa a esidade. Munlamuloni na Festo, Pawulo aaruuhiwa. 24Vano Festo aaheera: “Mwene Agripa ni atthu ootheene ari va ni hiyo, mmoone mulopwana ola! aYuda ootheene a wenno ni a oYerusaleemu yannakivekela mwaha wa ola, ekhuwelaka weera owo khaphwanenletho okhala ni okumi. 25Kaahoonatho weera khaapanke naari etthu emoha yaaphwanela okhwa. Wa soothesene, niwoko owo aatthuna woonihera wa Seesari, kaalakela omurumiha oRooma. 26Vanonto, nkinono etthu ya ekhaikhai yoowaalepela atokweene a oRooma. Tivawo, miyo kimuruuhalaaka ohoolowanyu, woopwahaxa ohoolowanyu, mwene Agripa, weera kimalihaka okohakoha, miyo kinoowera olepa etthu. 27Khoonreera omurumiha namatthukiwa kihithalihaka nnenesene soowootheriwasawe.”
Iliyochaguliwa sasa
Miteko 25: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
