Miteko 26
26
1Vano Agripa aamweerela Pawulo:“Nyuwo munootthuniheriwa wuuluma ni wiixaakihawanyu.” Vahoolowaya Pawulo aapaka eneneero ni ntata, anapacera wixaakihawawe eeraka: 2“Mwene Agripa, koohakalala weera ti ohoolowanyu kingweraaka wiixaakiha olelo soowootheriwasaka sootheene sa aYuda. 3Koohakalalatho weera nyuwo moosuwela nnenesene ikhovelelo sa aYuda ni milattusaya. Tivawo kinoovekelani weera mukiiwe ni ovilela. 4aYuda ootheene ansuwela moota kikhanlaaka okhuma enamwanaaka, elapo kiyariwaaka nitho oYerusaleemu. 5Awo aakisuwela okhuma khalayi ni yatthuna, anoowera okhalela onamoona weera, ntoko muFarisi*, kaatthara makhalelo a mpatta wa ediinaahu orino malamulo oolipaxa. 6Vano kinthorihiwa niwoko na nroromelonaka mwa yeeyo Muluku aaroromelihalaawe makholowaahu. 7Ela ti yoororomelihiwa singwehereraaya ipuumbasahu muloko ni piili weera ekwaniheriwe, simulapaka ni nthiti Muluku ohiyu ni othana. Ti niwoko na nroromelo nna, amwene, kinootheriwaaka ni aYuda. 8Heeni nyuwo muhingweraanyu ororomela weera Muluku onaavenyereriha akhwiiye? 9Miyotho kaaviriyeliwa weera waatthuneya opaka sootheene singwereya weera kiphwate Nsina na Yeesu a oNasarete. 10Ti yeeyo kaapankaaka nnenesene oYerusaleemu. Kaahaavonyera mukaliposo ootteela ancipale ni ikuru sa ahooleli a asaserdoti*, ni yaathoriheliwaaya okhwa, miyotho kaahaakhulela yeeyo. 11Imaara sincipale kannarowa muSinagogani* weera kaattaruxe, ni keerera waanyesereriha oveiha. Waakhalelawaka isara yaawo, kannarowa isidade sa ilapo sikina weera kaattharatthare. 12Mukwaha mmoha keera kirowaka oDamasku ni ikuru ni otthuniheriwa wa ahooleli a asaserdoti*. 13Wookwanaka nsuwa vamuru, amwene, kireene mphironi, kaahoona mukhwipimwaka ni mukhwipi wa asikhwaaka waara omoha wa wiirimu, waanre woopwaha nsuwa. 14Ootheene yaamorela vathi ni kaahiiwa nsu naakeerela vaHeberi: ‘Sawuli, Sawuli, heeni nyuwo munkisoondaanyu? Mungwana vasiiyoniwene ni eniyoorweeleni yoovoreiya paahi.’ 15Vano kaakoha: ‘Taani Nyuwo, Apwiya?’ Apwiya yaakaakhula: ‘Ti Miyo, Yeesu, mwa Yoowo munimuttharattharaanyu. 16Vano muvenye ni mweemele. Miyo kohiixoonihera wa nyuwo weera kookhaliheni murumeiyi ni namoona a seiyo nyuwo moonnaanyu sa Miyo ni seiyo kineeraaka kiwoonihereni. 17Miyo nkoovuluxeni wa mulokwaanyu muneenaanyu ni wa amalapo, wa yaawo Miyo kinimoorumihani 18weera mwahule maithwaaya ni mwaatatuxe wa epiphi, waara. Aani, kinimoorumihani wa yaawo weera mwaavuluxe wa ikuru sa Satana ni weera emutthare Muluku, ni hiiho yaakhele elevelelo ya sootthekasaya ni nipuro vamoha ni yaawo atteelihiwe niwoko na nroromelo mwa Miyo.’ 19Hiiho, mwene Agripa, nkaakhanle oohiiwelela moonelo wa wiirimu. 20Woopacera kaahaalaleera yaawo yaari oDamasku; vahoolowaya yaawo yaari oYerusaleemu ni oYudeiya woothewene, nitho wa amalapo, kiweerelaka weera erukunxe murima ni ehokoleele wa Muluku epakaka miteko sinoonihera orukunxawaya murima wa ekhaikhai. 21Tivawo aYuda yaakitthunkaaya Mpaani mwa Muluku ni yaaheerera okiiva. 22Koheetta ni ekhavihero ya Muluku mpaka nihuku na olelo, ni mwaha wa yeeyo kiri va, ni kinnaakhalela onamoona asitokweene nitho asikhaani. Miyo nkinghima etthu ekina, ehikhanle yeeyo maprofeeti ni Moisesi yaahimmaaya weera yaarwa okhumelela: 23weera Kristu aarwa ohaawa ni areene oopacera ovenyerera mookhwaani, aarwa olaleiya waara wa mulokwaawe muneenaawe ni wa amalapo.” 24Ehuhuweene yeele, Festo aahooceeliha wiixaakiha wa Pawulo, eeraka ni nsu ntokotoko: “Nyuwo Pawulo, munkhwa anepa. Oxutterawanyu wincipale wohooruuhelani anepa!” 25Pawulo aamwaakhula: “Atokweene Festo, miyo nkinkhwa anepa, ni yeeyo kinghimaaka ti ya ekhaikhai ni ya miruku sooreera. 26Amwene ala ansuwela nnenesene itthusene seiya, ni kinoowera waaleela nnenesene. Vekhaikhai, miyo kinuupuwela weera aasuwela soothesene seiya kinghimaaka, niwoko khasikhumelenle wiiphiini. 27Amwene Agripa, munaaroromela maprofeeti? Koosuwela weera aani.” 28Vano Agripa aamweerela Pawulo:“Nyuwo munuupuwela weera mwa ehuhu ekhaani munoowera okiviriyela othatuwa muKristu?” 29Pawulo aamwaakhula: “Hata mwa ehuhu ekhaani, naari yincipale, kinimuvekela Muluku weera khamuhiyono nyuwo paahi, menetho ootheene ankiiwa olelo ethatuwe ntoko miyo, ohiya onyooro ola.” 30Aaheemela mwene, ni guvernadori ni Berenisi vamoha ni yoowo, nitho yaawo yaakilaathiye ni yaawo. 31Evenyaka munthukumanoni mwa othoriha, yaaheerelana yaaworu: “Mulopwana ola kheewo opankaawe yoophwanela okhwa, naari okaliposo.” 32Agripa aamweerela Festo: “Owo ahaamutthunne Seesari, saano ataphuliweene.”
Iliyochaguliwa sasa
Miteko 26: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
