Miteko 24
24
Wiixaakiha wa Pawulo ohoolo wa Felisi
1Eviraka mahuku mathanu, mutokweenexa a asaserdoti* Ananiya, vamoha ni asitokweene akina a aYuda ni namwaakiha mmoha Tertulo, yaahoorwa oSesareya ni yaamuleela guvernadori soomootherasaya Pawulo. 2Pawulo iitthaniwaka, Tertulo aamuthalihera Felisi makhalelo a aYuda, eeraka: “Hiyo nookhala mwa murettele ehuhu yincipale niwoko na nyuwo, ni malamulelowaanyu aaruuha ehuhu yooreeraxa wa mulokwaahu. 3Aani, mwa itthu sootheene ni mipatta sootheene, Felisi oottittimiheyaxa, ninnaakhela yeeyo ni otthapela wincipale. 4Wa soothesene, nihilekelaka, kinoovekelani weera muniiwe vakhaani. 5Nohoona weera mulopwana ola ooxupaxupa, niwoko onruuha onyakulihana variyari wa aYuda a ilapo sootheene. Owo ti muhooleli a nihusiho noolokottha na aNasarete, 6ni mpaka aaheerera oveiha Empa ya Muluku, tivawo nimutthukalaahu. 8Nyuwo mwamukohakoha, munimoonelela weera soowoothera iya sootheene nnimpakelaahu, ti sa ekhaikhai.” 9aYuda yaahaakhulela yoowoothera, eroromelihaka weera seiya saathalihiwe saari sa ekhaikhai. 10Guvernadori amuthoonyeraka eneneero weera uulume, Pawulo aahima: “Koosuwela weera okhuma khalayi mpaka olelo, nyuwo muri mphuki a muloko ola, tivawo kiniixaakiha ni oweherera. 11Wookhweya munoowera woona weera ehivinre mahuku muloko ni meeli, miyo kaarowa oYerusaleemu olapa. 12Anamootheraaka khayaakiphwannye kaakhulanaka ni mutthu Mpaani mwa Muluku, hata kaaseseraka atthu ancipale muSinagogani*, naari nipuro nikina na musidade. 13Hata vakhaani khaangwera owaakhulelani nyuwo soowoothera ankipakelaaya miyo. 14Wa soothesene, kinooleelani weera kinimulapa Muluku a makholowaahu ntoko namatthara a Ephiro mwa yeeyo awo aniitthanaaya nihusiho noolokottha. Kinroromela sootheene sinaakhulela ni nlamulo ni yeeyo elempwale mmaprofeetani. 15Vano, mwa Muluku kookhalano owehererawene weiwo ntoko wa atthu ala, weera onuukhale ovenyerera wa oororomela ni oohiroromela. 16Tivawo kinaasaasaaka mahuku ootheene weera kikhale ni murima wooreera vamaithoni wa Muluku ni wa atthu. 17Siviraka iyaakha sikina, kaahoorwatho oYerusaleemu weera kivahe soovaha wa mulokwaaka, ni koonihere sooveleela. 18Kaapakaaka yeeyo, kirapihiweene, awo yaakiphwanya Mpaani mwa Muluku. Khaayaariwo atthu ancipale vamoha ni miyo, naari nkaapanke etthu yoonyakulihana. 19Aakhalatho aYuda akina a elapo ya wAsiya yaatthuneya weera ekhale ohoolowanyu ni yoonihere soowootherasaya, awo yaari yaakhalanne etthu ni miyo. 20Hoye hoye awo ari va, antthuneya othaliha etthu yoonanara heeni yaaphwannyaaya wa miyo kaaronghiwaaka oSineedriyuni*, 21ohikhanle etthweene ela: Kuulumalaaka ni yaawo, kaakhuwela keeraka: ‘Ti mwaha wa ovenyerera wa akhwiiye miyo kinthorihiwaaka olelo ohoolowanyu.’” 22Vano Felisi, mwa yoowo aasuwenle nnenesene Ephiro, aamaliha mwaha ole ni aaheera: “Aphiya mutokweene a anakhotto Lisiya, nkilakele mwahaanyu.” 23Vano aamulamulela kenturiyoni* weera amuthokorore Pawulo, mene weera amutaphule vakhaani ni weera aatthunihere asinthamwenaawe omurumeela. 24Eviraka mahuku makina, Felisi ni amwaariye Drusila, aari muYuda, aarumiha omwiitthana Pawulo, ni aamwiiwa uulumaka sa nroromelo mwa Kristu Yeesu. 25Uulumaka Pawulo sa waakhuleliwa ni Muluku, sa wiisuumaaliha ni sa othorihiwa oneera orwe, Felisi aahoova ni aamweerela:“Waatta! Vaanaano va, mpwaheke. Kaphwanya ehuhu, nkiwiitthanenitho.” 26Ehuhuweene yeele aatthuna mmurimanimwawe weera Pawulo amvahe musurukhu. Tivawo annarumiha omwiitthana imaara sincipale ni uuluma ni yoowo. 27Siviraka iyaakha piili, Felisi aamwaakhela Porsiyo Festo ntoko namukalambaawe. Wa soothesene, atthunaka waasiveliha aYuda, Felisi aamuhiya Pawulo okaliposo.
Iliyochaguliwa sasa
Miteko 24: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
