Miteko 23
23
1Pawulo, awehexexaka eSineedriyu*, aaheera: “Axunnaka, mpaka olelo koheetta vamaithoni wa Muluku ni murima wooreera wootheene.” 2Vahoolowaya, mutokweenexa a asaserdoti* Ananiya aahaalamulela yaawo yaamwaattamenle Pawulo weera emane eyanowaawe. 3Vano Pawulo aamweerela: “Muluku anoovulaliheni, exiri yootteelihiwa! Mukilaathiye vawo weera mukithorihe ni malamulo, mene mulamulelaka weera kivulalihiwe, munkhootta malamulo.” 4Yaawo yaamwaattamenle Pawulo yaamweerela: “Nyuwo muntthuna omuruwana mutokweenexa a asaserdoti*?” 5Pawulo aawaakhula: “Axunna, nkaasuwenle weera owo ti mutokweenexa a asaserdoti*, niwoko yoolempwa: ‘Muhimuulumele yoonanara mutokweene a mulokwaanyu.’” 6Vano Pawulo, asuwelaka weera akina a yaawo yaari aSaduki* ni akinatho aFarisi*, aakhuwela eriyari ya eSineedriyu*: “Axunna, miyo ti muFarisi*, mwaana a muFarisi*. Miyo kinthorihiwa niwoko kinroromelaaka mwa ovenyerera wa akhwiiye!” 7Eeraka hiiho, waakhuma onyakulihana otokotoko variyari wa aFarisi* ni aSaduki*, ni muthukumano waakawanyeya. 8Vano, aSaduki* anxuttiha weera khoowowo ovenyerera, hata andyelo, hata minepa, mene aFarisi* annaakhulela itthusene seiya sootheene. 9Waakhala onyakuleleya otokotoko, ni akina a anamawera a nlamulo* yaari aFarisi* yaaheemela ni yaapacera waakhulana: “Khanimphwanya etthu yoonanara mwa mulopwana ola. Taani asuwenle – apaale munepa, hoye hoye ndyelo uuluma ni yoowo?” 10Waakhulana waatepaxa, moota wooweera mutokweene a anakhotto aahoova weera Pawulo aarowa omeyanyiwa ni yaale. Aalamulela weera anakhotto erowe ni emuvenxe ni ikuru variyariwaya ni emuronghe mukwarteli. 11Ohiyu wa oxaawaya Apwiya emwaattamelaka yoowo yaamweerela: “Mulipihe murimaanyu! Ntoko mwaakhalenlaanyu onamoona mwaha wa Miyo oYerusaleemu, hiihotho ontthuneya okhalela onamoona oRooma.”
Ovaanela omwiiva Pawulo
12Oxawaaya, aYuda yaamvaanelela Pawulo ni yaalipelaxa weera khayaarwa eca, naari ewura, ehinaaye omwiiva Pawulo. 13Yaari woopwaha asilopwana miloko mixexe yaavaanenle yeeyo. 14Vano, erowaka wa ahooleli a asaserdoti* ni asitokweene a aYuda, yaaweerela: “Noolipelaxa weera khaninrowa oca nihimwiivale Pawulo. 15Vanonto, nyuwo ni eSineedriyu* mumvekele mutokweene a anakhotto weera owo aruuhiwetho ohoolowanyu, munleelaka weera muntthuna wiiwa nnenesene itthu sootheene sa makhalelowaawe. Hiyo nnikhale oolikaneene weera nimwiive ahinaaye ophiya va.” 16Vano musuluwaawe Pawulo, mwaana a murokoriye, iiwalaawe sa ovaanela iwe, aarowa mukwarteli ni aamuthalihera sootheene iye Pawulo. 17Owo aamwiitthana mmoha a kenturiyoni* ni aamweerela: “Munronghe mmiravo ola wa mutokweene a anakhotto, owo ookhalano etthu yoomuleela.” 18Hiiho owo aamurongha wa mutokweene a anakhotto, ni kenturiyoni* aamweerela: “Pawulo namatthukiwa ookiitthana ni ookivekela weera kooruuheleni mmiravo ola niwoko ola ookhalano etthu yoowooleelani.” 19Mutokweene a anakhotto aamvara mmiravo ni ntata, aamurowano wiiphiini ni aamukoha: “Ontthuna okileela eheeni?” 20Owo aamwaakhula: “aYuda aavaanela weera yoovekeleni waaronghela Pawulo, awo yiixeeraka antthuna waasaasa osuwela nnenesene nthowa na makhalelowaawe. 21Muhiviriyeliwe, niwoko woopwaha asilopwana miloko mixexe aniireherera weera emwiipithele Pawulo. Awo aalipela weera khaanrowa oca, hata owura ehinaaye omwiiva Pawulo. Vano awo ahiireherera, ewehereraka weera mwaakhulele nivekelonaya.” 22Mutokweene a anakhotto aamulaxera mmiravo ni aamweerela: “Ohimuleele mukina weera weyo wookileela yeeyo.”
Pawulo onthaamiheriwa oSesareya
23Owo aawiitthana eeli a kenturiyoonaawe* ni aahaalamulela: “Mwaareherere anakhotto macira meeli ni anamweettiha ikavalu* miloko mithannamiili ni anakhotto a mavaka macira meeli, weera erowe oSesareya ohiyuweene yoola epiphi ekumanneene. 24Mureherere ikavalu* weera Pawulo awele ni akuxiwe ari mukumi aronghiwaka wa guvernadori Felisi.” 25Mutokweene a anakhotto aalepa ekaratta ni masu ala: 26‘Klawudiyu Lisiya wa guvernadori oosuwanyeyaxa Felisi: Salaama. 27Mulopwana owo aavariwa ni aYuda ni yeera emwiive, miyo ni anakhottwaaka naatthimakenlaahuwo, nnamvuluxa, niwoko kaasuwela weera owo ti muRooma. 28Kitthunaka osuwela heeni yaamootheraaya, kaamurongha oSineedriyuniwaya*. 29Kaahoona weera owo aahootheriwa mwaha wa malamulowaaya, mene khayaakhanle etthu yooreera omoothera yoophwanela okhwa, naari okaliposo. 30Kileeliwaka weera aYuda akina yaavaanela omwiipithela, kohoorumihelani woowaakuveya nyuwo oottittimiheyaxa. Koolamulelatho weera anamootheraawe yooleeleni yeeyo araayano ni yoowo.’ 31Anakhotto, ekwaniheraka otthunawawe, yaamurongha Pawulo ohiyuweene yoole, ni yaaphiya wAntipatride. 32Oxaawaya, yaahaahiya anamweettiha a ikavalu* emuhoolaka ni yaawo, akina yaahokoleela mukwarteli. 33Ephiyaka oSesareya anamweettiha a ikavalu*, yaamvaha ekaratta guvernadori ni yaamvahereratho Pawulo. 34Guvernadori aasoma ekaratta ni aamukoha weera aari a elapo heeni. Aleeliwaka weera aari a oSilisiya, 35aamweerela: “Etthweene yeela nkireherere anamootheraanyu yaarwaaka.” Vano aalamulela weera Pawulo alipeleliwe empa etokotoko ya Herodi.
Iliyochaguliwa sasa
Miteko 23: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
