Miteko 22
22
1“Axunna ni asitiithi, mwiiwe vano wiixaakihawaka.” 2Yiiwaka weera uuluma ni nuulumo na eHeberi, yaamaala vancipale. Vano Pawulo aaweerela: 3“Kiri muYuda kiyariwe oTarso, elapo ya oSilisiya, mene kihuwiwe musidadeni yeela. Kaaxuttihiwa nnenesene ni Gamaliyeli munlamuloni noolipaxa na makholowaahu, kimukhalelaka nthiti Muluku ntoko muraanyu nyuwo ootheene olelo. 4Kaahaattharatthara anamatthara a Ephiro ela mpaka okhwa kaatthukaka alopwana ni athiyana, kaavonyeraka mukaliposo. 5Mwa yeeyo mutokweenexa a asaserdoti* ni muthukumano wootheene wa asitokweene onoowera okhalela onamoona. Wa yaawo kaaphwanya ikaratta wa axunna a oDamasku, ni kaarowa mpaka wu weera kaaruuhe atthu awo ntoko ootthukiwa oYerusaleemu weera ettaruxiwe. 6Vano, wookwana nsuwa vamuru, keera kaattamelaka oDamasku, ni woowaakuveya, waara otokotoko waarweenle wiirimu waamwaleela mukhwipimwaka. 7Kaamorela vatthayani ni kaahiiwa nsu nimoha naakeerenle: ‘Sawuli, Sawuli, heeni munkisoondaanyu?’ 8Vano kaakoha: ‘Apwiya, Nyuwo taani?’ Ni Awo yaakaakhula: ‘Miyo ti Yeesu a oNasarete, mwa Yoowo nyuwo munimusoondaanyu.’ 9Yaawo yaakihoolale yaahoona waara iwe, mene khayiiwexenxe nsu na Yaale yuulumale ni miyo. 10Hiiho kaahaakoha: ‘Keereke hai, Apwiya?’ Vano Apwiya yaaheera: ‘Muvenye ni mwavolowe oDamasku, ni weiwo mmuleeliwe yeeyo entthuneya opaka.’ 11Yaawo yaari vamoha ni miyo yaakeettiha ekivarenleene moono mpaka oDamasku, niwoko nkaawera woona mwaha wa otutha wa waara. 12Mulopwana mmoha iitthaniwa Ananiya, mulopwana oneetta moota woororomeleya mwaha wa nlamulo ni oottittimihiwa ni aYuda ootheene ankhala weiwe, 13aahoorwa wa miyo, ni akaattamelaka, aakeerela: ‘Munna Sawuli, moonetho.’ Ehuhuweene yeele kaawera woona. 14Vano owo aakeerela: ‘Muluku a makholowaahu aahoothanlani nyuwo weera musuwele otthunawawe, mmoone Oororomeleya ni mwiiwe masu a eyanowaawe. 15Nyuwo mmwikhale namoonaawe wa atthu ootheene, mukhalelaka onamoona sa itthu seiya moonnaanyu ni mwiiwalaanyu. 16Vano, heeni mumpisaanyu? Muvenye, mupatisiwe ni murapihe sootthekasanyu, mwiitthanaka Nsinanawe.’ 17Ni yaakikhumelela miyo kihokolowaka oYerusaleemu ni keera kivekelaka Mpaani mwa Muluku, kaakomoka mMunepani, 18ni kaawoona Apwiya yaakeerenle: ‘Mwaakuveke! Mukhume oYerusaleemu woowaakuveya, niwoko atthu a wenno kheerwa yaakhulela onamoonaanyu mwaha wa Miyo.’ 19Kaaweerela: ‘Apwiya, alopwana awo ansuwela weera kaakhovelela orowa muSinagogani* sootheene weera kaatthuke ni kaawaxule ootheene yaaroromenle mwa Nyuwo. 20Nitho yaariheyaaya ephome ya namoonaanyu Stefano, miyo kaari weiwe kaakhulelaka wiiva iwe, kithokororaka ikuwo sa yaale yaamwiivale.’ 21Vano Apwiya yaakeerela: ‘Murowe, Miyo nkoorumiheni ottaiwene, wa amalapo.’”
Pawulo muRooma
22Atthu ancipale yaamwiiwa Pawulo mpaka aahimmaawe yeeyo. Vano yaakhuwela: “Mumvenxe mulopwana ola wa elapo ya vathi! Khaphwanenle okhala ni okumi!” 23Ekhuwelaka, yaarula soowarasaya evonyeraka ntthupi osulu, 24ni mutokweene a anakhotto aalamulela weera Pawulo aronghiwe mukwarteli, awaxuliwe ni akohakohiwe weera amusuwelihe niwoko na heeni atthu yaamukhuwelelaaya moota ole. 25Emutthukaka yoowo weera awaxuliwe, Pawulo aamweerela kenturiyoni* aari weiwe: “Munnatthuniheriwa ongwaxula muRooma ahinaaye owo othorihiwa?” 26Iiwaka yeeyo, aarowa ni aamuleela mutokweene a anakhotto eeraka: “Mmweere hai? Mulopwana ola ti muRooma.” 27Vano aarowa wa Pawulo, anamukoha: “Mukileele nyuwo muRooma?” Owo aamwaakhula: “Aani, ti miyo.” 28Mutokweene aamweerela: “Miyo kaaliva musurukhu mwincipale weera kikhale muRooma.” Pawulo aamwaakhula: “Kaakhenle okhalawaka muRooma okhuma oyariwawaka.” 29Yaawo yeera emukohakohe, yaamuhiya woowaakuveya. Mutokweene yoole aahoopihiwa aasuwenlaawe weera aamutthuka muRooma.
Pawulo ohoolo wa eSineedriyu*
30Oxaawaya, woonaka weera mutokweene a anakhotto aatthuna osuwela nnenesene nthowa Pawulo ootheriwaawe ni aYuda, aamutaphula ni aalamulela waathukumanyiha ahooleli a asaserdoti* ni eSineedriyu* yootheene. Vano, amuruuhaka Pawulo, aamoonihera wa yaawo.
Iliyochaguliwa sasa
Miteko 22: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
