Asat 23
23
1Neing'ode ꞉Paulo inia kiguana ee lpayiani nejoki, <<Lalachera lainien, kore te nkichon ai pooki ana metabaki ana parri naa kamusoo ajo meatae hoo naakurreki tekue Nkai.>> 2Nejoki ꞉laitainoni kitok la lasar oji Anania lolo tung'ana ooitachoo tabata Paulo, metoocho nkutuk. 3#Mat 23:27,28Nejoki ꞉Paulo, <<Ikiwoch iyie Nkai, iyie oitaakino! Iti iyie lorika kinguanare ana nairirikino tee nkitanapat e Nkai, kake nitigila iyie nenia nkitanapat, payie ijo maatoochi nanu?>>
4Kore lolo ooitachoo tabata Paulo nejo, <<Iyie oitorioki adek laitainoni le Nkai kitok la lasar?>> 5#Nai 22:28Nejoki ꞉Paulo, <<Lalachera lainien, eitu duo ayielou ajo kera laitainoni kitok la lasar, amu keigero too Lkigerot Sinyat ajo, <Mijo ntoki torno te lkitok oitore ltung'ana linono.> >>
6 #
Asat 26:5; Lpi 3:5 Kake kore amu keyielo Paulo ajo, kore lbata lenche naa Sadukayo nera lkulie Lparisayo, nebuak ening'ito pooki ejo, <<Lalachera lainien, kara nanu Lparisayoi, nara nkerai ee Lparisayo. Naa kaayewuaki aaiguanare tankaraki nairuk ajo keatae mpiunoto ee lootuata.>> 7Kore payie ejo nejia, neikarnyasa Lparisayo o Sadukayo, nejing'u woro kitok atua ninche. 8#Mat 22:23; Mrk 12:18; Luka 20:27Amu kore apa Sadukayo naa kejo meatae mpiunoto to lootuata, nemeatae lmalaikani tanaa ltauja torrok, kake kore Lparisayo naa keiruk aajo keatae pooki. 9Nejing'u ninche lolemilemi kitok atua, neinyuototo laiteng'enak loo nkitanapat le mbata ee Lparisayo aitacheyie oleng inia duata ee Lparisayo nejo, <<Meatae ntoki torno nikidolita tele tung'ani. Keidimai naa ltau tanaa sii lmalaika oirorie ninye?>> 10Neaku inia nchankar kitok, neguretu laduo kitok loo sikarini pooki ootalakua duo Paulo, ejo kebaki naa keichu lolo tung'ana ninye. Nejoki sikarini meyau ninye teinie nabokata atua inia kampi enche.
11Kore inia kuarie neipung'oki Laitoriani Paulo nejoki, <<Togolo! Kore ninkuna payie imbalie sipata ee mbaa naipirita nanu te Yerusalem, naa meata ajo mimbalie abaki too ltung'ana ootii Rrom.>>
Lmumai oarieki Paulo
12Kore payie eikienyu nenya Lyiaudi lmumai pee menya ndaa nemematicho, ana metara Paulo metua. 13Naa kore apa ꞉lolo tung'ana oaatama ilo mumai, naa kerepaa artam. 14Nepuo netii laitainok kutuaa la lasar o lpayiani loo Lyiaudi nejoki, <<Ikitama iyioo lmumai tenebo, aajo mikinchamicham ntoki mara ikitara Paulo metua. 15Naaku naa, kore ntae laitainok kutuaa la lasar o nkiguana ee lpayiani, enterewaki taata lkilikuai lkitok loo sikarini pooki lene meitodoki ntae ninye, intaakinono ijoijo payie ing'uraa aasipu mbaa naadung'okinyieki ninye nkiguana. Naa kore ewuon eitu ebau ninye ene, naa ikiterretenete iyioo payie kiar ninye metua.>>
16Kore payie ening ꞉layieni le nkanache Paulo inia, nelo atua kampi ee sikarini neliki ninye. 17Neipotu ꞉Paulo lkitok obo loo sikarini pooki nejoki, <<Tiriko ele barnoti netii lkitok oitore ntae, amu keata lkilikuai lenye.>> 18Nerik netii ilo kitok nejoki, <<Kaaipuotua nanu ilo tung'ani oyeena oji Paulo, aomon maayaki iyie ele barnoti, amu keata mbae nikiliki.>>
19Neibung ꞉ilo kitok ooitore sikarini pooki ilo barnoti nkaina, neikonyi aiwuang'ie nejoki, <<Nyo dei kiyieu nikiliki?>> 20Nejoki, <<Ketachamaitie ꞉Lyiaudi payie kiomon iyie iyau Paulo teisiere tekue kiguana ee larikok loo Lyiaudi, eji payie eitoki aaiparu mbaa enyena oleng. 21Kake mincho ꞉ninche kisapaki, amu ketijing'a lbata lenche oorepaa artam nkurruna aanyu ninye payie ear metua. Naa ketama lmumai tenebo ejo menya ndaa tanaa emat ntoki ana metara ninye metua. Keidipa aaterretenata paa iyie ake eanyuta nchoo ninche inia nayieu.>> 22Nejoki ninye ilo barnoti mechomo kake neitaarriyian ajoki, <<Meata ltung'ani liliki ajo ikimbalakinyie ana bae.>>
Ewaki Paulo Kaisaria
23Neipotu ꞉ilo kitok loo sikarini pooki, lkutuaa oare lenyena kunini nejoki, <<Entegelu sikarini ip are oopuo tee nkejek nigelulu aitoki ntomoni sapa loo mbartan o ip are loo mperria, mechomo Kaisaria saai uni e nkuarie. 24Nirotokiki abaki Paulo mbartan naadir, nintabakiki ninye eserian Pelikis ooitore ana nkop e Isirael.>>
25Neiger ilo kitok loo sikarini pooki mpalai ajo inchi:
26Kore ana palai, naa nanu Kilaudio Lisias oigero.
Kairoroki naa iyie Pelikis lkitok oayanyiti.
27Kore ele tung'ani naa keibung'a ꞉Lyiaudi nenyokita aajo entar, kake nairrachu o sikarini lainien namitu, amu kayewuo apa ayielou ajo kera ltung'ani oigero to nkop ee Rroman. 28Naa kore apa amu kayieu nayielou larrabal oaatayie Lyiaudi ninye, naicho meitodouni aayau tekue inia kiguana ee larikok lenche. 29Nayielou ajo kore larrabal oaatayieki ninye naa nchankar tankaraki nkitanapat enche. Kake eitu adol ntoki teinia nadung'okinyieki ninye lkiye tanaa payie eeni te jila. 30Kore payie aaibalakinyieki aajo ketipika ninche loseg oaarie ninye metua, nareuu nabokata nitii. Natilika lolo oaatayie ninye larrabal mikitiliki iyie payie itum atudung'oki nkiguana.
31Neas lolo sikarini inia natiakaki aaya Paulo kuarie ana metabai lkerenket le Antipatiris. 32Kore mparri naijipu inia, neicho ꞉laaduo sikarini oare kutuaa lolo sikarini loo mbartan mewa Paulo Kaisaria, nechuko ninche aapuo kampi nawuenie te Yerusalem. 33Kore payie ebaya lolo sikarini oayaita Paulo Kaisaria, neicho ilo kitok loo Rroman oitore nkop e Isirael inia palai naigerokaki, neitabaki ninye Paulo. 34Neisom ninye inia palai, neipar Paulo le nkop nara. Kore payie eyielou ajo Kilikia eing'uaa 35nejoki, <<Kore lomon linono naa kaning'u nkata napuonu lolo likiatayie larrabal.>> Nejo meirritae Paulo taatua inia aji naaitorichiere apa Erode.
Iliyochaguliwa sasa
Asat 23: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
