Asat 22
22
1Nejo, <<Lalachera lainien o loo papa, entuur nkiyiaa nikinchocho mairoro ang'oroo koon.>> 2Kore payie ening ꞉ninche aajo nkutuk enche eirorita Paulo, neitoki aagira oleng aainining ninye. Nejoki Paulo, 3#Asat 5:34–39<<Kara nanu Lyiaudii otiiwuaki te lkerenket le Tarso otii Kilikia, kake ele kerenket le Yerusalem atubulunyie nanu. Kore sii, naa kaaiteng'ena ꞉Gamaliel aipidaki taatua nkitanapat e lmakui lang, natonyuaa oleng aas nayieu Nkai ana sii ntae tana parri. 4#Asat 8:3, 26:9–11Naitama sina lolo oiruko ana Oitiei ng'ejuk e Nkurukoto, lewa o ntomonok, aaibung nairriki jila naar abaki metuata. 5Naa keata laitainoni kitok la lasar o ilo kiama pooki loo larikok loo Lyiaudi sipata aajo nejia etiu. Kaaichoo abaki mpala mayaki lalachera loo Lyiaudi ootii Damasikas naaitodolu ajo kaaichooki nkitoo naibung'ie lolo le inia Oitiei e Nkurukoto, nayau Yerusalem eena payie eitemei.
6<<Kore aibung'uta nkoitiei alo, matejo saai ile e mparkiji natinyikaka Damasikas, neipung'u nabokata wong'an napi te chumata, naaitoong taa mbat pooki. 7Nanang nkop, naning ltoilo laajoki, <Saulo! Saulo! Aanyo payie kintamita sina?> 8Najoki, <Aa ng'ae dei ira iyie, Laitoriani?> Naawoliki ajoki, <Kara Yeso le Nasaret, ilo lintamita sina.> 9Kore lolo laairukurukore naa ketoduaa wong'an, kake eitu ening ltoilo le ilo laairorie.
10<<Najoki, <Laitoriani, nyo naa aas?> Naajoki, <Inyuo chomo Damasikas, naa kore iti inie, nikilikini ntokitin pooki nikitegelakaki apake payie ias.> 11Naa kore amu kaaitomodoo inia pijan e wong'an nkonyek, naaibung ꞉lolo laatii tenebo nkaina aarik ana matabai Damasikas.
12<<Neatae apa teinie ltung'ani obo oji Anania ourie Nkai aibung nkitanapat enyena, nerrepita ninye ꞉Lyiaudi pooki oaamanya inie. 13Nelotu natii, naaitache tabata naajoki, <Lalache lai Saulo, todolichoi aitoki!> Kore ake teinia kata naabolo nkonyek naing'or ninye.
14<<Naajoki, <Kore Nkai ee lmakui lang naa ikitegelua iyie teyielo yieunoto enye, nidol ilo openy sipat nining rerei le nkutuk enye. 15Amu ilo iyie aliki ltung'ana pooki sipata ee nenia baa nitoduaa o nitining'o te ninye. 16Naa nyo taata iyanyita? Inyuo ntacho payie kimpatisi, neitukori ng'ok inono, iimpot nkarna enye.>
17-18<<Kore atuchukie alo Yerusalem, naomonito taatua nkaji e Nkai nadol Laitoriani atuwuana kaidetidetita, aairorie aajoki, <Inyuo! Tesioi tung'ai Yerusalem taata amu meng'amaa sipata niata naaipirita.> 19Najoki, <Laitoriani, kore kulo tung'ana naa keyielo aajo kajing'aa apa atua Sinagogini aaibung naar lolo pooki likiruko iyie. 20#Asat 7:58Naa kore abaki mparri nari Sitepano olikorita apa sipata ino, kaitacho nanu teinie atachamayie metari ninye metua, nairrita nankan e lolo oorita ninye.> 21Kake naajoki ꞉Laitoriani, <Inyuo, amu kaairruaya iyie lkulie oreren otii nkopi naalakua.> >>
22Kore ilo turrur neinining Paulo ana metejo nejia, nebuak oleng nejo, <<Iwa ele tung'ani! Tara metua! Amu Meyiere payie etii te keper nkulupo.>>
23Kore ebuakita ltung'ana, neburkuchu nankan enche, neisuaaki nkulupo siwuo, 24nejo ilo kitok loo sikarini meawae Paulo atua kampi ee sikarini, aaiparichere eidong'i tee lichen meteyielo ilo kitok ajo aanyo payie ebuaakita ꞉ilo turrur ninye to ngoro aiko nejia. 25Kore eteena aache ninye payie etum aaidong'o, nejoki ꞉Paulo likae kitok oitache teinie kini ta laduo kitok loo sikarini, <<Amaa, keichiaakino tee nkitanapat e Rroman teneidong'i ltung'ani oigero nkop ee Rroman eitu eiguanareki?>>
26Kore payie ening ilo kitok ana, nelo aliki lkitok lenye ajoki, <<Nyo iyasita? Amu kore ele tung'ani naa loo Rroman!>> 27Nelo ilo kitok loo sikarini pooki netii Paulo neipar ajoki, <<Tilikaki, ira iyie ltung'ani oigero nkop ee Rroman?>> Nejoki, <<Ee, kara.>> 28Nejoki ꞉ilo kitok, <<Katalaa apa nanu ropiyiani kumo payie aaku ltung'ani oigero nkop ee Rroman.>> Nejoki ꞉Paulo, <<Kara nanu ltung'ani oigero nkop ee Rroman amu kaatiwuaki eigero ntoiwuo ainien nkop ee Rroman.>>
29Kore ake payie ening ꞉lolo sikarini ootiakaki meiparichere ninye inia, neinyuototo aapuo. Neiputukuny laduo kitok ooitacheki lkulie sikarini pooki payie eyielou ajo keteena ltung'ani oigero nkop ee Rroman.
Paulo tekue nkiguana ee larikok loo Lyiaudi
30Kore mparri naijipu inia neyieuu ilo lkitok oitacheki sikarini pooki neyielou asipu ajo aanyo payie eyieu ꞉Lyiaudi nedung'okini Paulo nkiguana. Nejoki lkutuaa laa laitainok la lasar o lolo kulie pooki ootii atua inia kiguana ee larikok loo Lyiaudi metutumoto. Neyau Paulo meitacho tekue ninche.
Iliyochaguliwa sasa
Asat 22: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
