Asat 24
24
Eiguanareki Paulo tekue Pelikis
1Kore payie eich mperot imiet, nedoyio Anania laitainoni kitok la lasar alo Kaisaria tenebo o lkulie arikok loo Lyiaudi o lautaroni loo nkitanapat oji Tertulo, neyau mbaa naatayie Paulo tekue Pelikis. 2-3Kore payie eipotuni Paulo, neng'asu Tertulo alimu tekue ilo kitok, nenia baa pooki naatayie Paulo ejo, <<Ikiata nache kitok nikichamaa nchere, kore tankaraki iyie Pelikis lkitok lang le nkanyit naa ikutumo seriani kitok, niyaka sii kulo tung'ana mbaa ng'ejuko supati ta ramat ino, to ng'oji pooki o taa mbaa pooki. 4Naa kore naa payie maaitoki ainaurie, kaaomon iyie ting'iria tining'o iyioo to ndorropo.
5<<Kore ele tung'ani naa ikitoduaa aajo kera lmang'antita loo ltung'ana. Keinyoyie ng'olng'ol taatua Lyiaudi to nkop pooki ee Rroman, nera sii larikoni lo turrur ooirukurukore nkiteng'ena e lapa tung'ani lo lkerenket le Nasaret. 6Ketejo abaki ninye ntarruoi nkaji e Nkai, kake nikumbung. 8Naa kore tinimparichiere, naa indim atisipu te ninye nenia mbaa pooki nikiatayie ninye.>>
9Kore abaki Lyiaudi ootii inie, naa ketijing'a atua kulo omon netachamaitie.
Eiroro Paulo ang'oroo koon
10Kore payie eroj ilo kitok ninye meiroro nejo Paulo, <<Kayielo ajo kore taa larin kumo, ang'asu apake o taata naa itaa iyie ladung'oni le nkiguana lele orere, naaku kaitieu airoro atong'oroi koon. 11Indim atisipu ajo eitu eim mperot tomon oare ailiepa nanu alo asai Nkai te Yerusalem. 12Neitu aikarnyasare nanu abaki ltung'ani obo taatua nkaji e Nkai, anaa ainyoyie ng'olng'ol tee Sinagogini tanaa taatua ilo lkerenket. 13Nemeidim kulo tung'ana abaki taata aaitodolu sipata ee nenia baa naatayie nanu. 14Kake kaibalie ajo kara loirukurukore inia oitiei e nkurukoto najo ninche nkiteng'ena e sapare. Naa kore teinia oitiei naisiaai Nkai ee lmakui lang. Nairuk sii mbaa pooki naaigero tee nkitanapat o naigero too mbukui ee loibonok le Nkai. 15Kaata nanu siligi ta Nkai, ana naata sii kulo tung'ana, nchere keitipiu ꞉ninye loosipat o lamara loosipat too lootuata. 16Naaku kore nkata pooki, kanyok metaa kaning ta ltau lai ajo meata naakurrieki tekue Nkai o tekue ltung'ana.
17 #
Asat 21:17–28
<<Kore atibiko lkuti arin eitu alotu Yerusalem, nachukunyie aitabaki ltung'ana lainien nkichoorot e reto, nalotu sii aitaki Nkai lasar. 18Kore aasita inia, naatum lolo tung'ana atama ntasim naaitarropilieki ta nkaji e Nkai. Nemeatae ltung'ana ooiturrurrote tanaa ooing'olng'olete te inie. 19Kake ketii apa lkulie Yiaudi ooing'uaa Asia nkaji e Nkai inia kata, naa tanaa duo ketii ene tekue iyie anata elimu tanaa keata ntoki naarum. 20Naa tanaa mara nejia nchoo elimu kulo tung'ana ootii ene ntorno naatumieki apa aaigunare ꞉nkiguana ee larikok loo Lyiaudi. 21#Asat 23:6Meitoki aatumie mara ntoki nabo ake natobuaa aajo tekue ninche ajo, <Kaaiguanareki anapar tankaraki nairuk mpiunoto ee lootuata.> >>
22Kore Pelikis oyielo aiteeng mbaa naipirita nkiteng'ena najo ltung'ana Nkoitiei ng'ejuk e Nkurukoto, neitacheyie inia kiguana nejo, <<Kore payie elotu Lisias, lkitok loo sikarini pooki, nadung kulo omon.>> 23Neitarriyian inia kata ꞉Pelikis likae kitok loo sikarini metirripo Paulo, kake neicho metaa keata mpaach nadolie ltung'ana lenyena, neret ninye.
24Kore payie eim nkuti perot, nelotu Pelikis o ntomononi enye naji Durusila ntito ee Lyiaudi neipotu Paulo, neinining elimu netiu nkurukoto taatua Kristo Yeso. 25Kore elikita ꞉Paulo ninye mbaa naipirita sotua oipida o Nkai o nkiboroto e koon o nkiguana e Nkai nalotu Kenya, neguretu Pelikis nejo, <<Maitabaki taa ene taata! Chomo metaa kore tanaitoki atum mpaach, naaipuotu.>> 26Kore eyia naa keata ꞉ninye lderro ajo keidim Paulo nerop ninye, naa tankaraki inia payie eipotua ninye nkatitin kumo anyayie lomon.
27Kore payie eim larin oare, nejing Porkio Peseto mpaach ee Pelikis, naa kore tankaraki nayieu apa ꞉Pelikis neiting'id Lyiaudi, neing'uaa Paulo eena.
Iliyochaguliwa sasa
Asat 24: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
