MIKA 5
5
MOKUNA V.
1 He wānana no ka hānau ʻana, a me ke aupuni o Kristo. 6 No ka māhuahua ʻana, no ka maʻemaʻe ʻana, a me ke kuʻikahi ʻana o kona ʻekalesia; a me ka luku ʻana o kona poʻe ʻenemi.
1¶ “ʻĀnō, e hoʻākoakoa ʻia ʻoe, e ke kaikamahine o ka poʻe hao wale;
Ua hoʻopilikia ʻia kākou;
E hahau mai lākou i ka luna kānāwai o kā ʻIseraʻela me ke koʻokoʻo ma ka pāpālina.
2“A ʻo ʻoe, Betelehema ʻEperata,
Ka mea ʻuʻuku i waena o nā tausani o Iuda,
Mai loko mai ou e hele mai ai i oʻu nei,
Ka mea e aliʻi ana i loko o kā ʻIseraʻela;
Ma mua mai kona puka ʻana, mai ka manawa kahiko loa mai.”
3No ia hoʻi, e hoʻolilo aku ʻo ia iā lākou,
A hiki i ka manawa e hānau ai ka mea e hānau ana;
A laila hoʻi, e hoʻi hou mai ke koena o kona mau hoahānau
I nā mamo a ʻIseraʻela.
4A e kū mai nō ia, e hānai ma ka ikaika o Iēhova,
Ma ka mana o ka inoa ʻo Iēhova kona Akua;
A e noho iho lākou;
No ka mea, ʻānō e nui auaneʻi ʻo ia
A hiki i nā palena o ka honua.
5A ʻo ia ka Mea e maluhia ai,
I ka manawa e hele mai ai ko ʻAsuria, ma ko kākou ʻāina;
A i ka wā e hele ai ia i loko o ko kākou mau hale aliʻi,
A laila, e hoʻokūʻē kākou iā ia i nā kahu hipa ʻehiku,
A me nā aliʻi, nā kānaka ʻewalu.
6A e ʻai lākou i ka ʻāina ʻo ʻAsuria, me ka pahi kaua,
A i ka ʻāina ʻo Nimeroda ma kona mau wahi komo;
A e hoʻopakele nō ia mai ko Suria mai,
I ka wā e komo mai ia i loko o ko kākou ʻāina,
A i ka wā e hehi iho ia ma loko o ko kākou mau mokuna.
7¶ A ʻo ke koena o Iakoba
I waena o nā lāhui kanaka he nui,
E like ia me ka hau mai o Iēhova mai,
Me ka ua ma luna o ka weuweu,
Ka mea kali ʻole no ke kanaka,
ʻAʻohe hoʻi e hoʻokaʻulua no ke keiki a ke kanaka.
8A lilo ke koena o Iakoba
I waena o ko nā ʻāina ʻē,
I waena o nā lāhui kanaka he nui,
E like me ka liona i waena o nā holoholona o ka ulu lāʻau,
E like me ka liona ʻōpio i waena o ka ʻohana hipa;
No ka mea, i kona hele ʻana aʻe,
Hehi iho i lalo, a e haehae wale,
ʻAʻohe mea nāna e hoʻopakele.
9E hoʻokiʻekiʻe ʻia kou lima ma luna o kou poʻe kūʻē mai,
A e hōʻoki ʻia aku kou poʻe ʻenemi a pau.
10¶ “A i kēlā manawa,” wahi a Iēhova,
“E ʻoki aku au i kou poʻe lio mai waena mai ou,
A e luku aku au i kou poʻe hale kaʻa.
11“A e ʻoki aku au i nā kūlanakauhale o kou ʻāina,
A e hoʻohiolo au i kou mau wahi paʻa a pau.
12“A e ʻoki aku i ka poʻe ʻanāʻanā mai kou lima aku,
ʻAʻole ʻoe e mālama hou i nā kupua.
13“A e ʻoki aku au i kou mau kiʻi kālai ʻia,
A i kou mau kiʻi mai waena mai ou,
ʻAʻole hoʻi ʻoe e hoʻomana hou aku
I ka hana a kou mau lima.
14“A e hoʻokuke aku au i kou mau kiʻi akua mai waena mai ou,
A e luku aku au i kou mau kūlanakauhale.
15“A e hoʻopaʻi aku au me ka huhū a me ka inaina i nā lāhui kanaka,
Ka mea a lākou i lohe ʻole ai.”
Iliyochaguliwa sasa
MIKA 5: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.