MIKA 6
6
MOKUNA VI.
1 ʻO ko Iēhova hakakā ʻana me kona poʻe kānaka, no ko lākou aloha ʻole. 6 ʻO ka mea e hōʻoluʻolu ai i ke Akua. 9 ʻO ka leo o Iēhova e hoʻolohe ʻia. 10 ʻO ke aʻo ʻana i kā ʻIseraʻela no ka hewa a no ka hoʻomana kiʻi.
1¶ E hoʻolohe mai ʻoukou ʻānō i ka mea a Iēhova i ʻōlelo mai ai;
“E kū i luna, e hakakā i mua o nā mauna,
A e hoʻolohe nā puʻu i kou leo.
2“A hoʻolohe ʻoukou, e nā mauna i ka hoʻopaʻapaʻa o Iēhova,
A me ʻoukou nā kumu paʻa o ka honua;
No ka mea, he hoʻopaʻapaʻa ko Iēhova me kona poʻe kānaka,
A e hoʻopaʻapaʻa nō ia me kā ʻIseraʻela.
3“E kuʻu poʻe kānaka, he aha kaʻu i hana aku ai iā ʻoe?
He aha kaʻu i hoʻoluhi ai iā ʻoe? E hōʻike mai iaʻu.
4“No ka mea, ua lawe mai au iā ʻoe mai ka ʻāina ʻo ʻAigupita mai,
A ua hoʻōla au iā ʻoe ma ka hale o nā kauā mai;
A ua hoʻouna aku au i mua ou iā Mose, iā ʻAʻarona, a me Miriama.
5“E kuʻu poʻe kānaka, e hoʻomanaʻo ʻānō
I ka mea a Balaka, ke aliʻi o Moaba, i noʻonoʻo ai,
A i ka mea hoʻi a Balaʻama ke keiki a Beora i ʻōlelo mai ai iā ia,
Mai Sitima mai a Gilegala;
I ʻike ʻoukou i ka pono o Iēhova.”
6¶ Me ke aha lā wau e hele aku ai i mua o Iēhova,
A kūlou iho i mua o ke Akua Kiʻekiʻe?
E hele anei au i mua ona me nā mōhai kuni,
Me nā keiki bipi o ka makahiki hoʻokahi?
7E ʻoluʻolu anei ʻo Iēhova i nā tausani hipa kāne?
A me ka ʻumi tausani muliwai ʻaila?
E hāʻawi anei au i kuʻu makahiapo no kuʻu hala,
I ka hua o kuʻu kino no ka hewa o koʻu ʻuhane?
8Ua hōʻike mai nō ia iā ʻoe, e ke kanaka, i ka mea maikaʻi;
A he aha ka mea a ke Akua i kauoha mai ai iā ʻoe,
Ke ʻole e hana i ka pono, a e aloha i ka lokomaikaʻi,
A e hoʻohaʻahaʻa i ka hele ʻana me ke Akua?
9¶ Ke kāhea mai nei ka leo o Iēhova i ke kūlanakauhale,
A ʻo ka mea naʻauao e ʻike i kou inoa;
“E hoʻolohe ʻoukou i ka hoʻopaʻi ʻana, a me ka mea nāna ia i hōʻike mai.
10“ʻAʻole anei, i kēia wā, nā waiwai hewa
Ma ka hale o ka poʻe hewa,
A me ka ʻepa ʻuʻuku e hoʻowahāwahā ʻia?
11“E maʻemaʻe anei au me nā mea kaupaona hewa,
A me ka ʻaʻa paona hoʻopunipuni?
12“No ka mea, ua piha kona poʻe kānaka waiwai i ka hana ʻino,
A ua ʻōlelo wahaheʻe kona poʻe kānaka,
A ua hoʻopunipuni ko lākou alelo ma ko lākou waha.
13“No ia hoʻi, e hoʻonāwaliwali au iā ʻoe, ma ka hahau ʻana iā ʻoe,
Ma ka hoʻoneoneo ʻana iā ʻoe no kou hewa.
14“A e ʻai iho ʻoe, ʻaʻole e māʻona;
Aia nō i loko ou ka maʻule ana;
A e lawe aku ʻoe, ʻaʻole e hoʻopakele,
A ʻo ka mea āu e hoʻopakele ai,
ʻO ia kaʻu e hāʻawi aku no ka pahi kaua.
15“E lūlū iho nō ʻoe; akā, ʻaʻole ʻoe e ʻohi mai;
E hehi iho ʻoe i nā ʻoliva, ʻaʻole naʻe e poni ʻia ʻoe i ka ʻaila;
A i ka waina hou, ʻaʻole naʻe ʻoe e inu i ka waina.
16“No ka mea, ua mālama ʻia nā kānāwai o ʻOmeri,
A me nā hana a pau a ko ka hale o ʻAhaba,
A ua hele ʻoukou ma ko lākou manaʻo;
No laila, e hoʻolilo aku ai au iā ʻoe i neoneo,
A i kona poʻe kānaka i mea hoʻowahāwahā ʻia;
A e lawe ʻoukou i ka hōʻino o kuʻu poʻe kānaka.”
Iliyochaguliwa sasa
MIKA 6: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.