MIKA 4
4
MOKUNA IV.
1 He wānana no ka pōmaikaʻi o ka ʻekalesia i nā lā ma hope. 9 Ka pōmaikaʻi o Ziona ma hope o kona hōʻino ʻia, a e luku ʻia kona poʻe ʻenemi.
1¶ A i nā lā ma hope e hoʻokūpaʻa ʻia ka mauna o ka hale o Iēhova, ma luna o nā mauna,
A e hoʻokiʻekiʻe ʻia ʻo ia ma luna o nā puʻu; a e holo nā kānaka i ona lā.
2A e hele nā lāhui kanaka he nui, a e ʻōlelo aku,
“E hele mai, a e piʻi aku kākou i ka mauna o Iēhova,
A i ka hale o ke Akua o Iakoba;
A e aʻo mai ia iā kākou i kona mau ʻaoʻao,
A e hele kākou ma kona mau alanui.”
No ka mea, e hele ke kānāwai mai Ziona aku,
A ʻo ka ʻōlelo a Iēhova mai Ierusalema aku.
3A e hoʻoponopono nō ia i waena o nā kānaka he nui,
A e aʻo aku i nā lāhui kanaka ikaika, lōʻihi loa aku;
A e kuʻi lākou i kā lākou mau pahi kaua i ʻōʻō palau,
A i kā lākou mau ihe i pahi paʻipaʻi;
ʻAʻole e hāpai ka lāhui kanaka i ka pahi kaua kūʻē i ka lāhui kanaka,
ʻAʻole hoʻi e aʻo hou lākou i ke kaua.
4A e noho kēlā kanaka kēia kanaka ma lalo o kona kumu waina,
A ma lalo o kona lāʻau fiku,
ʻAʻohe mea nāna e hoʻomakaʻu mai;
No ka mea, ʻo ka waha o Iēhova o nā kaua, kai ʻōlelo mai.
5No ka mea, e hele nā kānaka a pau,
ʻO kēlā kanaka kēia kanaka ma ka inoa o kona akua,
A e hele kākou ma ka inoa ʻo Iēhova ko kākou Akua, ia ao aku ia ao aku.
6¶ “I kēlā lā,” wahi a Iēhova,
“Hōʻuluʻulu au i ka mea ʻoʻopa,
A e hoʻākoakoa i ka mea i hoʻokuke ʻia aku,
A i ka mea aʻu i hoʻokaumaha ai.
7“A e hoʻolilo au i ka mea ʻoʻopa i koena,
A i ka mea i hoʻokuke lōʻihi ʻia aku, i lāhui kanaka ikaika;
A e noho aliʻi ʻo Iēhova ma luna o lākou ma ka mauna ʻo Ziona,
Mai ia manawa aku, a i ka wā mau loa aku nō.
8“A ʻo ʻoe, e ka hale kiaʻi o ka poʻe holoholona,
Ka puʻu o ke kaikamahine a Ziona,
E hele mai nō ia i ou lā,
ʻO ke aliʻi ʻana ma mua;
E hele mai ke aupuni i ke kaikamahine o Ierusalema.
9¶ “ʻĀnō, no ke aha lā kou uwē nui ʻana?
ʻAʻole anei he aliʻi i loko ou?
Ua make anei kou kākāʻōlelo?
No ka mea, ua loʻohia ʻoe e ka ʻeha, e like me ka wahine nahu kuakoko.
10“E haʻalulu, a e kuakoko,
E ke kaikamahine o Ziona,
Me he wahine hānau lā;
No ka mea, ʻānō e hele aku ʻoe mai ke kūlanakauhale aku,
A e noho ʻoe ma ke kula,
A e hele aku ʻoe a Babulona;
A ma laila e hoʻopakele ʻia ʻoe;
Ma laila e hoʻōla mai ai ʻo Iēhova iā ʻoe
Mai ka lima mai o ko ʻoukou poʻe ʻenemi.
11“ʻĀnō hoʻi, ua nui nā lāhui kanaka i ʻākoakoa kūʻē mai iā ʻoe,
Ka mea e ʻōlelo ana, ‘E hoʻohaumia ʻia ʻo ia,
A e nānā aku ko kākou maka i Ziona.’
12“Akā, ʻaʻole lākou i ʻike i nā manaʻo o Iēhova,
ʻAʻole i ʻike lākou i kona noʻonoʻo ʻana;
No ka mea, e hoʻākoakoa ʻo ia iā lākou, me he pūʻā lā ma kahi hehi palaoa.
13“E kū i luna, a e hehi iho, e ke kaikamahine o Ziona;
No ka mea, e hoʻolilo aku au i kou pepeiaohao i hao,
A e hoʻolilo hoʻi au i kou mau māiʻuʻu wāwae i keleawe;
A e kuʻi iho ʻoe a liʻiliʻi nā kānaka he nui;
A e hoʻolaʻa aku au i kā lākou loaʻa no Iēhova,
A i ko lākou waiwai no ka Haku o ka honua a pau.
Iliyochaguliwa sasa
MIKA 4: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.