Yenesis 29
29
Yekọb Adisịm Padan Aram
1Akema Yekọb amaamaana atọọñọ isañ amọ anyʌñ adiwuọ isọñ usakkautịn. 2Anye amaakịt ube mmọọñ ke mben abioinwañ, ndin udịmedọñ ita emaenaa ke mben mmọọñ ado, sia ekenọ ammọ mmọọñ ke ube ado. Itiad ekedatta ekʌp ke ube mmọọñ ado amaakpon. 3Emaesitañ afịd udịmedọñ ebon itie keed, mme akpemeedọñ eyaekpat itiad esio ke inua ube mmọọñ enyʌñ enọ mme ufene mmọọñ enwọñ. Ndin emaema, ammọ eyaemaana eben itiad ekʌp ke inua ube mmọọñ ado.
4Yekọb amaabịp mme akpemeedọñ ate, “Nditọeka mmi, ndufo eto uke?”
Ammọ emaebọọrọ, “Ñnyịn ito Haran.”
5Anye amaabo ammọ, “Emediọọñọ Leban, ayeyịn Nahọ?”
Ammọ emaebọọrọ, “Ii, ñnyịn imidiọọñọ anye.”
6Akema Yekọb amaabịp ammọ, “Idem a-asọñ anye?”
Ammọ emaebo, “Ii, idem asọñ anye, ndin se Ratiel, ayịn amọ awonwaan, adiighe mi ye mme edọñ.”
7Yekọb amaabo ammọ, “Se, utịn asʌk afofiop; ini ikemme se etañ udịmedọñ ebon itie keed. Nọ ammọ mmọọñ enwọñ nyʌñ tịmme ben ammọ kaa ke nọ mbid eta.”
8Ammọ emaebọọrọ ete, “Ñnyịn idiikanna inam ntoro, tutu emaebono afịd udịmedọñ ke itie keed enyʌñ ekpat itiad esio ke inua ube mmọọñ. Idaha ado ndin ke ñnyịn idiinọ mme edọñ mmọọñ.”
9Ke anye akesʌkkọ atatañ ikọ ye ammọ, Ratiel amaadi ye mme edọñ ete amọ, sia anye akedo akpemeedọñ. 10Ke ini Yekọb akekịtte Ratiel ayịn ayịneka eka amọ Leban, ye mme edọñ Leban, anye amaawọññọ akaa akekpat itiad asio ke inua ube mmọọñ, anyʌñ anọ mme edọñ ayịneka eka amọ mmọọñ. 11Ndin Yekọb amaatʌm Ratiel inua anyʌñ adịppe uyio atua ayịd. 12Yekọb amaadọkkọ Ratiel ke imọ ido ayịn ayịneka ete amọ Ribeka. Ndin Ratiel amaafeghe akaa aketañ anọ ete amọ.
13Leban akesʌk akokop etob abaña Yekọb, ayịn ayịneka amọ, anye amaasọsọp awuọ akesoobo ye anye. Leban amaafat Yekọb, atʌm anye inua, anyʌñ adat anye anyọñ ufọk amọ, ndin Yekọb amaatañ afịd mme ñkpọ ami anọ anye. 14Ndin Leban amaabo anye, “Afo ado abʌk ye iyiib mmi.”
Yekọb adọ Lia ye Ratiel.
Ke Yekọb amaakedʌñ ye anye ke ukpa afiọñ keed, 15Leban amaabo Yekọb, “Sia adooho afo ado imaan mmi, ado ana nte afo anam utom annọ miin ke mfọn? Tañ se idiido utịb utom mfo nnọ miin.”
16Ndin Leban amaanie nditọ ibaan iba; anyịñ adiaha akedo Lia, ndin anyịñ ñnwa akedo Ratiel. 17Lia akenie mmeem-mmeem anyen, ado Ratiel akenie uyaiya idem anyʌñ ayaiya adise. 18Yekọb amaama Ratiel anyʌñ abo, “ñyaanam utom unọ fiin ke isua itiaba ke iwuod etək abọikpa mfo Ratiel.”
19Leban amaabo Yekọb, “A-anekke afọn ami adiben anye unọọ fiin utu ke mben anye nnọ awodeen mfen. Dʌñ mi ye ami.” 20Ndin Yekọb amaanam utom ke isua itiaba nọ ato do anye adọ Ratiel, ado anye akekịt mme isua ado nte ibad-ibad usen ke ntak ima a-anye akenieghe anọ Ratiel.
21Akema Yekọb amaabo Leban, “Nnọ anwaan mmi. Ini mmi ayọhọ akem, sia mmeyem adinam ima ye anye.”
22Ndin Leban amaakoot afịd mbon abio abon anyʌñ anam usọrọ. 23Ado ke ndubiayio amaakedisịm, anye amaaben ayịn amọ Lia asọk Yekọb, ndin Yekọb amaanam ima ye anye. 24Leban amaanyʌñ aben ayịnufọk amọ Silpa anọ ayịn amọ Lia nte ayịnufọk.
25Ayio akesiere, se Lia mi! Ndin Yekọb amaabo Leban, “Nsoo ñkpọ ke afo annam miin ntom? Ami ñkenam utom unọ fiin ke iwuod Ratiel, ikidooho ntoro? Nsoo ido ntak a-afo akembiañake miin?”
26Leban amaabọọrọ anye ate, “Idooho ido ñnyịn mi adinọ ñnwa ndọ mbemiso adiaha. 27Kweeñe ñkpọndọ ayịn awonwaan ami udua anyem; amaakem ñnyịn iyaunọ ñnwa ikọrọ, ke aditịmme nnam utom ke isua itiaba mfen.” 28Ndin Yekọb amaanam ado. Anye amaakweeñe udua anye ado ye Lia, ndin Leban amaanọ anye ayịn amọ Ratiel nte anwaan amọ. 29Leban amaanyʌñ aben ayịnufọk amọ Bilha anọ ayịn amọ Ratiel nte ayịnufọk. 30Yekọb amaanam ima ye Ratiel ñko, ado ima a-anye akenieghe anọ Ratiel amaakpon akan ima a-anye akenieghe anọ Lia. Ndin anye amaanam utom anọ Leban ke isua itiaba mfen.
Nditọ Yekọb
31Ke ini Abọọñ akekịtte ke ima ikibaaha inọ Lia, anye amaanọ anye ukeme adiyommo idịb, ado Ratiel ikiinieghe ayịn. 32Lia amaayommo idịb anyʌñ aman ayịn awodeen. Anye amaasio anye anyịñ Rubịn,#29:32 Ke usem Hibru, Rubịn atie nte awuọ anye a-akịt ukuud mmi ndin anye amaabo, “Sia Abọọñ amaakịt ukuud mmi. Ke akpanikọ ebe mmi ayamma miin idahami.”
33Anye amaamaana ayommo idịb, ndin ke ini anye amanna ayịn awodeen anye amaabo, “Sia Abọọñ amaakop ke awo immaaha miin, anye annọ miin anye ami ñko.” Ndin anye amaasio anye anyịñ Simiọn#29:33 Simiọn awuọñọ andikob.
34Anye amaatịmme ayommo idịb, ndin ke ini anye amanna ayịn awodeen anye amaabo, “Idahami ebe mmi ayaanekke adiana ye ami, sia mmeman nditọ ideen ita nnọ anye.” Ndin emaesio anye anyịñ Lifai.#29:34 Lifai atie nte ado a-ayịreke
35Anye amaatịmme ayommo idịb, ndin ke ini anye akemanna ayịn awodeen anye amaabo, “Ini anye ami ami ñyaatooro Abọọñ.” Ndin anye amaasio anye anyịñ Yuda.#29:35 Yuda atie nte a-anyʌñ akeme adiwuọ itooro ke usem Hibru. Ndin anye amaatre uman nditọ.
Iliyochaguliwa sasa
Yenesis 29: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.