Yenesis 30
30
1Ke ini Ratiel akekịtte ke imọ imanna ayịn inọ Yekọb, anye amaafịbe ufịb ye ayịneka amọ. Ndin anye amaabo Yekọb, “Nnọ miin nditọ imiidooho ami ñyaakpa!”
2Yekọb amaayat esịd ye anye anyʌñ abo, “Nte ami ndo Abasi, a-anamma nọ afo umuumanna nditọ?”
3Akema Ratiel amaabo, “Se Bilha mi, ayịnufọk mmi. Naa ye anye nọ anye aman nditọ annọ miin nọ ami ñko ñnyʌñ ntọọñọ ubon nto anye.”
4Ndin anye amaaben ayịnufọk amọ Bilha anọ Yekọb nte anwaan. Yekọb amaanaa ye anye, 5ndin Bilha amaayommo idịb anyʌñ aman ayịn awodeen anọ Yekọb. 6Akema Ratiel amaabo, “Abasi amaakpe ikpe mmi; amaanyʌñ akop ebeeñe mmi anyʌñ annọ miin ayịn awodeen.” Ke ntak ami anye amaasio anye anyịñ Daan.#30:6 Daan awuọ anye atoppo 7Bilha ayịnufọk Ratiel amaatịmme ayommo idịb anyʌñ aman ayọhọ ayịn awodeen iba anọ Yekọb. 8Akema Ratiel amaabo, “Ami mmenwana akpọsọñ anwan ye ayịneka mmi, ndin mmenwana ñkan.” Ndin anye amaasio anye anyịñ Naftali.#30:8 Naftali awuọñọ anwan mmi
9Ke ini Lia akekịtte ke imọ imaitre uman nditọ, anye amaanyʌñ aben ayịnufọk amọ Silpa anọ Yekọb nte anwaan. 10Silpa ayịnufọk Lia amaanyʌñ aman ayịn awodeen anọ Yekọb. 11Akema Lia amaabo, “Nsoo utọ ekamba mfọniso!” Ndin anye anọ anye anyịñ Kad.#30:11 Kad akeme adiwuọñọ mfọniso me udịmekọñ
12Silpa ayịnufọk Lia amaaman ayọhọ ayịn awodeen iba anọ Yekọb. 13Akema Lia amaabo, “Esịd annem miin die ntom! Ibaan eyaeñkoot miin inemesịd.” Ndin anye amaasio ayịn anyịñ Asaa.#30:13 Asaa awuọñọ daara
14Akema ke ini idọk, Rubịn amaawuọ akaa inwañ anyʌñ akekịt mme eto mandrek a-adooho ibọk ima, a-anye akebenne asọk eka amọ Lia. Ratiel amaabo Lia, “Mbọk nnọ miin ubaak eto mandrek ayịn mfo.”
15Ado Lia amaabo anye, “Ado nte ikuyʌkkọke fiin adikimbọọ miin ebe? Nte afo ayambọ eto mandrek ayịn mmi ñko?”
Ratiel amaabo anye, “A-afọn, Yekọb akeme adina ye afo akonayio mfịn ke mandrek ayịn mfo.”
16Ndin Yekọb akenyọñ inwañ adi ndubiayio ado, Lia amaawuọ abịne anye, anyʌñ akedọkkọ Yekọb ate, “Ana afo ana ye ami. Ami mmudat fiin utom ke ntak mandrek, ibọk ima ayịn mmi.” Ndin anye amaanaa ye anye ke akonayio ado.
17Abasi amaakpañ utọñ anọ Lia, ndin anye amaayommo anyʌñ aman ayọhọ ayịn awodeen ition anọ Yekọb. 18Akema Lia amaabo, “Abasi annọ miin utịb, sia ami mmaben ayịnufọk mmi nnọ ebe mmi.” Ndin anye amaasio anye anyịñ Isaka.#30:18 Isaka awuọñọ utịb
19Lia amaamaana ayommo idịb anyʌñ aman ayọhọ ayịn awodeen itiokeed anọ Yekọb. 20Akema Lia amaabo, “Abasi ayaak nsọñudua enọ annọ miin. Idahami ebe mmi ayañkama miin ke ukpono, sia ami mmeman nditọ ideen itiokeed nnọ anye.” Ndin anye amaasio anye anyịñ Sebulọn.#30:20 Sebulọn awuọñọ ukpono
21Akemaana anye amaaman ayịn awonwaan keed anyʌñ asio anye anyịñ Daina.
22Akema Abasi amaatoiyo Ratiel, akpañ utọñ anọ anye anyʌñ anam anye adʌk idịb. 23Ndin anye amaayommo anyʌñ aman ayịn awodeen anyʌñ abo, “Abasi aben asuenne mmi afep.” 24Ndin anye amaasio anye anyịñ Yosef,#30:24 Yosef awuọñọ yak anye adian anyʌñ abo, “Abọọñ akpekap adian ayịn awodeen mfen annọ.”
Udịmedọñ Yekọb Atọt
25Ke Ratiel amaakeman Yosef, Yekọb amaabo Leban, “Nsio miin unyọñ ndin nọ ntịmme ñnyọñ isọñidʌñ mmi. 26Nnọ miin ibaan ye nditọ mmi, ke utom a-ami ñkenamma unọọ, ndin ami ñyaanyọñ. Afo amediọọñọ ibad utom añkenamma unọọ fiin.”
27Ndin Leban amaabo anye, “Adieke adooho ami mmekịt mfọn ke iso mfo, mbọk suuk tie. Ami mmekịt ke ñkukịd ke Abọọñ andiọñ miin ke ntak mfo.” 28Anye amaadian, “Siak ekọmudua mfo, ke ami ñyaukpe.”
29Yekọb amaabo anye, “Afo amediọọñọ naña ami ñkenam utom unọ fiin ye naña ufene mfo akeba ke idak ukpeme mmi. 30Etək se afo akenie mbemiso ami ndi amaaditọt anekke awak, ndin Abọọñ amaudiọñ fiin ke mme itie akeedodo a-ami ñkebaaha. Ado idahami, ini akee ke ami ndiinam ñkpọ nnọ ufọk mmi?”
31Ndin Leban amaabịp, “Nsoo ke ana nte ami unọ fiin?”
Yekọb amaabọọrọ anye, “Kunnọọ ñkpọ ndomokeed, ado adieke adooho afo ayaanam ñkpọ keed ami annọ miin, ñyaakaa iso mbọọk mme udịmedọñ mfo, ñnyʌñ ñkpeme ammọ: 32Yak ami nsaña ke atu udịmedọñ mfo mfịn ami ñnyʌñ nsịññe afịd edọñ se inie ñkem me ntọi ke idem, afịd mbubịd nditọ edọñ ye afịd ebod ye ntọi me ñkem ke idem. Ammọ ediido utịb utom mmi. 33Ndin akpanikọ mmi ayaado ntiense annọ miin ke ayioiso, ini keed akeedodo a-afo adiighe adise utịb a-afo akeñkpeeghe miin. Ebod akeedodo a-annieghe miin i-imiinieghe ñkem me ntọi, me ñyịn edọñ akeedodo i-imiinieghe abubịd ñkem, yak edat nte ekeyeeyịp.”
34Leban amaabo anye, “Ami mmenyịmme, yak ado naña afo atañ.” 35Kpa ukem usen ado anye amaasịññe afịd akpoebod se ikinie ñkem me ntọi ke idem ye afịd uman ebod se ikinie ñkem me ntọi ke idem (afịd se ikinie mfia ke idem) ye afịd nditọ edọñ se idoñño mbubịd, ndin abon ammọ anọ nditọ amọ nọ ese anyen. 36Ndin anye amaanam isañ usen ita ke ufọọd amọ ye Yekọb, ke ini Yekọb akaaha iso abọọk nsʌhọ ufene Leban.
37Akema, Yekọb amaaben nsek ñkọk eto pọpla, eto mmansañ mbakara ye ñkaña eto anam mfia udʌk ato ammọ ke adiyaara ñkpa edem ñnyʌñ nsioño mfia esịd ñkọk eto ado. 38Ndin anye amaadọñ mme nsiib ado ke udiọhọ mmọọñ, nọ ana nnen-nnen ke iso mme ufene ke ini ammọ ediighe edinwọñ mmọọñ. Ke ini mme ufene eyemme ayaara ndin enyʌñ edi adinwọñ mmọọñ, 39mme ufene emaeyịre enyʌñ eyommo ke iso mme ñkọk eto ado. Ndin ammọ emaeman nditọ e-ekenieñeke ntọi me nduud me e-ekedọọñọke ñkem ke idem. 40Yekọb amaasịññe nditọ ufene ami abon ke idem ammọ, ado ayaak mbon ako esaña nnen-nnen ebịne mbon e-enieñeke ñkem ye abubịd idem e-ekedoññoke ake Leban. Ke ntom anye amaabakka ufene anọ idem amọ anyʌñ atre isịn ammọ ke atu mme ufene Leban. 41Ini akeedodo a-mme asọñ idem uman eyemme ayaara, Yekọb ayaaben mme ñkọk eto adot ke usịnudia a-anaaha ke iso mme ufene nọ ato do ammọ eyịre enyʌñ eyommo ke ñkpere mme ñkọk eto ado, 42ado adieke mme ufene edooho mbon se idem amem, anye idiinịmme ammọ ke itie ado. Ke ntoro mme unam se idem amem ekenie Leban ke ini mbon se isọñ idem ekenieghe Yekọb. 43Ke usʌñ ami Yekọb amaakaa iso anekke aforo anyʌñ anie uwak ufene, nditọufọk ibaan ye ideen, ye mme kamel ye dọñki.
Iliyochaguliwa sasa
Yenesis 30: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.