Yenesis 28
28
1Ndin Aisik amaakoot Yekọb adiọñ, anyʌñ anọ anye item ate, “Kuudọ awonwaan Kenan. 2Kaa ini keed ke Padan Aram,#28:2 A-adooho ke Adoro usobutịn Mesopotemia ke ufọk ete eka mfo Betuel. Dat anwaan nọ idem mfo ke udo, ke atu nditọ ibaan Leban, ayịneka eka mfo. 3Yak Abasi Andikponñkan#28:3 Ke usem Hibru Abasi Andikponñkan ado El-Sadai udiọñ fiin anyʌñ anam afo atọt anyʌñ awak ke ibad tutu afo akappa ado atutu awo. 4Yak Abasi unọ fiin ye nditọ mfo adidiọñ e-ekenọọhọ Ebraham, nọ ato do afo adat isọñ a-afo adʌññọ ke esịd nte asenawo nte inie mfo, isọñ A-Abasi akenọọhọ Ebraham.” 5Akema Aisik amaanam Yekọb adakka akaa isañ amọ, ndin anye amaanyʌñ akaa Padan Aram, akaa abịne Leban ayịn Betuel awo Aram, ayịneka Ribeka, a-akedooho eka Yekọb ye Isọ.
6Isọ amaadidiọọñọ ke Aisik amaadiọñ Yekọb anyʌñ anam anye akaa Padan Aram nọ akedọ anwaan ke udo, ndin ke ini anye akediọññọ anye ama, anye amaanyʌñ anọ anye item ate, “Kuudọ awonwaan Kenan,” 7ndin ke Yekọb amaakop item ete ye eka amọ anyʌñ adakka akaa Padan Aram. 8Isọ ndin amaadidiọọñọ ke ibaan Kenan ikinemme ete amọ Aisik esịd; 9ndin Isọ amaadika Ismeel anyʌñ akedọ Mahalad, ayịneka Nebaiyọd a-akedooho ayịn awonwaan Ismeel ayịn Ebraham, adian ke mme ibaan a-anye amaakenenie.
Ndab Yekọb ke Beteel
10Ndin Yekọb amaakpọñ Beeseba akaa ke Haran. 11Ke anye amaakewuọ itie keed, anye amaatre isañ anyʌñ anaa ke ndo ke akonayio, sia utịn amaasop. Anye amaanyʌñ aben itiad keed ke itie ado, asịn nte udodiwuod anyʌñ anaa ke ndo adaiya. 12Ndin anye amaadappa ndab, anyʌñ akịt abeed naña ada ke isọñ, anyọñ abeed ado anyʌñ awuọ hefịn, ndin mme enyere Abasi ekesʌk edọdọọk, usʌk esọsọiyọ. 13Ke anyọñ abeed ado Abọọñ amaada, anyʌñ abo, “Ami ndo Abọọñ, Abasi ete mfo Ebraham ye Abasi Aisik. Ami ñyaunọ fiin ye nditọ mfo isọñ a-afo abaaha ke esịd. 14Ubon mfo adiitie nte ntọñ ke isọñ, ndin afo ayaatara awuọ usobutịn ye ke usakkautịn, awuọ adoro-adoro ye usuuk-usuuk. Ndin afịd mme awo ke ederimbod eyaenie adidiọñ uto fiin ye nditọ mfo. 15Ami mmọdo ye afo, ñyaanyʌñ ukpeme fiin ke afịd itie nte afo akaa, ñyaanyʌñ udat fiin ntịmme ndi ke itie isọñ ami. Ami nduukpọññọ fiin tutu ami nnam se ñnwọñọ unọọ fiin.”
16Ke ini Yekọb amaakedemme ke idab, anye amaakere ate, “Ke akpanikọ Abọọñ mmọdo ke itie ami, ndin ami ñkidiọọñọke mbaña.” 17Ndịk amaanam anye ndin anye amaabo, “Itie ami anie ataa ndịk! Itie ami idooho itie mfen ikan ufọk Abasi; anye ami ado inuaatob hefịn.”
18Ke usiere edem usen Yekọb amaaben itiad a-anye akedatta nte udodiwuod awuuk nte adaaha, anyʌñ aduọk adan ke anyọñ itiad ado. 19Anye amaasio itie ado anyịñ Beteel#28:19 Beteel awuọñọ ufọk Abasi, akpesʌkado abio ado a-anye akesikereke Luus.
20Ndin Yekọb amaanam akaaña, ate, “Adieke Abasi adiiba ye ami inyʌñ iñkpeme miin ke usʌñ isañ a-ami ñkaaha mi, inyʌñ innọ miin ndidia ye afọñ se nsịne; adieke anye 21anamma ami ntịmme ñnyọñ ufọk ete mmi ke ifuuro, Abọọñ ayaado Abasi mmi, 22ndin itiad a-ami ñwuuhọ mi nte adaaha ayaado ufọk Abasi, ndin ami ñyaanọ Abasi itie keed ke mbaak duob ke afịd se anye annọọ miin.”
Iliyochaguliwa sasa
Yenesis 28: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.