Yenesis 20
20
Ebraham ye Abimelek
1Ebraham amaakpọñ ndo akaa ubeñ ukañ Nekef akedʌñ ke ufọọd Kades ye Sọọ. Anye amaadʌñ etək ini ke Kera, 2ndin ke udo ke Ebraham aketañ abaña Sera anwaan amọ, ate, “Anye ado ayịneka mmi awonwaan.” Ndin Abimelek adidem Kera amaadọñ ekekoot Sera anyʌñ adat anye anie. 3Ado Abasi amaabịne Abimelek ke ndab akonayio keed akebo anye, “Afo amekama ñkpa isọn ke ntak awonwaan a-afo abenne do, sia anye ado anwaan ufọk ndọ.”
4Idaha ntoro, Abimelek ikisañake ikpere anye, ndin anye amaabo, “Abọọñ, afo ayaasobo idịd i-miidueghe isob? 5Ado nte Ebraham ikimbooho miin, ‘Anye ado ayịneka mmi awonwaan,’ Sera ñko anyʌñ ambo miin, ‘Anye ado ayịneka mmi awodeen’? Ami ñkenam ñkpọ ami ke eti esịd ye afia ubọk.”
6Ndin Abasi amaabọọrọ anye ke ndab ate, “Ntoro ke ado, ami mmediọọñọ ke afo akenam ñkpọ ami ke eti esịd, ado anam ami ñyemme nọ afo andue miin. Ntak ado anam ami ñkiyakka afo atuuk anye. 7Idahami saana anwaan awo yaak nọ anyọñ abịne andinie, sia ebe ado prọfed, ndin anye ayaabọñ akam unọ fiin ndin afo ayaadu uwem. Ado adieke afo umuuyakka anye anyọñ, ana afo adiọọñọ ke afo ye afịd se afo anie eyaekpañña.”
8Ubakusen edem usen, Abimelek amaakoot afịd mme adaaha amọ abono, ndin ke anye amaakedọkkọ ammọ se ikitịppe, idem amaanekke anyeñ ammọ. 9Ndin Abimelek amaakoot Ebraham asịn ke ufọk abo, “Nsoo ke afo inam ñnyịn ntom? Ami udue die fiin nọ afo aben utọ ekamba ufen ami ansọk miin ye abio mmi? Afo amennam miin mme ñkpọ se imiikpinaaha annam.” 10Abimelek amaanyʌñ abịp Ebraham, “Ntak afo akenamma utọ ñkpọ ami-e?” 11Ebraham amaabọọrọ, “Ami ñkebo idem mmi nte, ‘Ke akpanikọ mbaak Abasi ibaaha ke itie ami, ndin ammọ eyaeñwot miin ke ntak anwaan mmi.’ 12Ke adinekke ntañ, anye ado ayịneka mmi, ete mmi abon anye, ado idooho eka mmi aman anye; ndin anye adido anwaan mmi. 13Ndin ke ini Abasi akebooho ñkpọñ ufọk ete mmi, ami mmaabo anye, ‘Naña afo akeme adiñwọt miin ima mfo ado ami: Afịd itie se ñnyịn ikaa, ana afo abo, “Anye ado ayịneka mmi awodeen.” ’ ”
14Ndin Abimelek amaaben edọñ ye enañ ye ifʌn ideen ye ibaan akenọ Ebraham, anyʌñ ayaak Sera anwaan amọ anọ anye. 15Abimelek amaadian do abo, “Se isọñ mmi do ke iso mfo, dʌñ ke nte afo ama.”
16Ke ukañ Sera anye amaabo, “Ami ñyaanọ ayịneka mfo awodeen mbaak silfa#20:16 Ñkpọ nte kilokram 12 tọsịn keed. Ami ado ke ntak ndudue e-ekenamma ye afo ke iso afịd awo e-ekebaaha ye afo; ikpe u-utoppo fiin afịd-afịd.”
17Ndin Ebraham amaabọñ akam anọ Abasi, ndin anye amaakọk Abimelek, anwaan amọ ye mme ifʌn ibaan amọ nọ ammọ emaana eman nditọ, 18sia Abọọñ amaanam ibaan ke ufọk Abimelek etre uyommo idịb ke ntak Sera, anwaan Ebraham.
Iliyochaguliwa sasa
Yenesis 20: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.