Yenesis 19
19
Esobo Sọdọm ye Komora
1Enyere iba emaekewuọ Sọdọm ke ndubiayio, ndin Lọọd aketie ke inuaatob abio. Ke ini anye akekịtte ammọ, anye amaadakka ada akesoobo ye ammọ, anyʌñ asuuk iso amọ ke isọñ. 2Ndin anye amaabo, “Mbọọñ mmi, mbọk ikanna iso idi ufọk ayịnufọk ndufo. Ndufo ekpaediyie ukod enyʌñ esuuk enaa akonayio ami, ndin ñkpọñ ubakusen ndufo ekaa iso ke isañ ndufo.” Ammọ emaebọọrọ, “Iyoo, ñnyịn idiina ke afe abio akonayio ami.” 3Ado Lọọd amaanekke ayiire ndin ammọ emaekeene anye ekedʌk ufọk amọ. Anye amaanam ndidia anọ ammọ, uyo se yiis imiisịneke, ndin ammọ emaedia. 4Mbemiso ammọ ekedaiya, afịd ideen ke afịd efaak ke abio Sọdọm, iwaad ye ñkpoonawo, emaekanna ufọk ado ekʌk. 5Ammọ emaekoot Lọọd ebo, “Mmọ ideen e-ekedʌkkọ ubịne fiin akonayio ami? Sịññe ammọ inọ ñnyịn nọ inaa ye ammọ.”
6Lọọd amaawuọ akekịt ammọ ke esiin, abet usʌñ 7anyʌñ akebo, “Iyoo, mme ufan mmi. Ikiinam utọ ibak ami. 8Se, ami mmenie nditọ ibaan iba a-adooho tọọñọ anam inaaha ye awodeen. Yak nsio ammọ isọk ndufo nọ enam ye ammọ se ndufo ema. Ado ikiinam ideen ami ñkpọ ndomokeed, sia ammọ edo isenawo mmi, ndin ana ami ñkpeme ammọ.”
9Ammọ emaebọọrọ anye. “Dakka ke usʌñ ñnyịn, awo ami akedi mmi nte asenawo, ndin idahami anye ayem adido abiideikpe! Ñnyịn iyainam nọ adiọọk ye afo akan ammọ.” Ammọ emaekaa iso efaaña ye Lọọd enyʌñ edaaña ekaa edibiat udọk.
10Ado ideen ado ke esịd ufọk emaenyan ubọk edʌt Lọọd esịn ke ufọk enyʌñ ebet usʌñ. 11Ndin ammọ emaetọ afịd ideen ekedaaha ke inuausʌñ ufọk ado nnan, anam ammọ ikimọọnọke inuausʌñ ufọk aba.
12Ideen iba ado emaebo Lọọd, “Amenie awo ndomokeed mfen mi, mme ebe ayịn, nditọ ideen me nditọ ibaan, me awo ndomokeed ke isọñabio ami a-adooho ake mfo? Sio ammọ kpọñ abio ami, 13sia ñnyịn iyaisobo abio ami. Akpọsọñ aseeme a-atooho abio ami abịne Abọọñ a-akpon eti-eti, ado asịn anye idọñ ñnyịn nọ idisobo anye.”
14Ke ntoro, Lọọd amaawuọ aketañ ikọ ye mme ukod amọ, e-ekeyemme edidọ nditọ ibaan amọ. Anye amaabo ammọ, “Isọp idem iwuọ ikpọñ abio ami, sia Abọọñ ayaasọp asobo isọñ abio ami!” Ado mme ukod amọ ekekere ke anye atọ ndọk.
15Ke usiere, mme enyere emaekpak Lọọd, ete, “Sọp idem! Ben anwaan mfo ye nditọ mfo ibaan iba e-ebaaha mi wuọ, imiidooho eyaisobo ndufo idaha ediimia abio ami ufen.” 16Ke ini anye akemeeñeke, ideen ado emaemʌm anye ubọk ye ubọk anwaan amọ ye ubọk nditọ ibaan amọ iba, enyʌñ edat ammọ esio ke abio ado ke ifuuro, sia Abọọñ amaanie mbọm abaña ammọ. 17Ideen ado ekesʌk esosio Lọọd ye mbon ufọk amọ, awo ammọ keed amaabo, “Ifeeñe iyem itọñ uwem ndufo! Ikiise edem, ikiinyʌñ ituak ida ke itie ndomokeed ke unaisọñ! Ifeeñe ikaa mme ikpọabod, imiidooho eyaisobo ndufo!”
18Ado Lọọd amaabo ammọ, “Iyoo, mbọk, mbọọñ mmi! 19Ayịnufọk mfo a-akịt mfọn ke iso ndufo#19:19 Ke usem Hibru ado afo, ndin ndufo#19:19 Ke usem Hibru ado afo emeñwọt miin uwak mfọnido ke ndufo edinnịm miin uwem. Ado ami ndiikanna mfeghe ñka mme ikpọabod; nsobo ami ayansịm miin, ndin ami ñyaakpa. 20A-ba etək-etək abio a-adaaha akpere akem se ñkpefeghe ñka. Yak ami mfeghe ñka do, ndin eyaenyaaña uwem mmi.” Anye ado ataa etək-etək abio.
21Ndin enyere amaabo anye, “A-afọn, ami mmenyịmme ebeeñe mfo; ndiisoboke abio a-afo atañña abaña do. 22Ado sọp idem feghe kaa do, sia ami ñkemeke adinam ñkpọ ndomokeed tutu afo asịm do.” Ntak ado anam ekekoot abio ado Soa.#19:22 Soa awuọñọ etək
23Lọọd atikisịm Soa, utịn amaasakka ke abio ado. 24Ndin Abọọñ amaanam ikañ adep nte edịm ke Sọdọm ye Komora, ikañ a-atooho Abọọñ awuọ ke mme hefịn. 25Ke ntoro anye amaasuan mme isọñabio ado ye afịd unaisọñ, asobo afịd se idu uwem ke isọñabio ado, dian ye afịd se ikitịppe ke isọñ. 26Ado anwaan Lọọd amaakanna anyen ase edem, anyʌñ akappa ado adaaha inʌñ.
27Ubakusen edem usen Ebraham amaademme anyʌñ atịmme akaa itie a-anye akedaaha ke iso Abọọñ. 28Anye amaakanna anyen ase ukañ Sọdọm ye Komora, utịd afịd isọñ unaisọñ, ndin anye amaakịt nte akpọsọñ nsʌñikañ awuọ ato isọñabio ado nte nsʌñikañ a-atooho ñkpọdiọhọ ikañ.
29Ke ini Abasi akesoboke mme abio unaisọñ, anye amaatoiyo Ebraham, amaanyʌñ asio Lọọd ke afanekọñ a-akedisịmme mme abio a-Lọọd akedʌññọ.
Lọọd ye Nditọ Amọ Ibaan
30Lọọd ye nditọ amọ ibaan emaekpọñ Soa ekedʌñ ke mme ikpọabod, sia anye akekoppo ndịk adidʌñ ke Soa. Anye ye nditọ amọ ibaan iba ekedʌñ ke abaitiad. 31Usen keed adiaha Lọọd amaabo ñnwaeka ate, “Ete ñnyịn a-asọñ, ndin awodeen ibaaha mi se isịn ñnyịn idịb nọ iman nditọ naña ido ado ke afịd iso isọñ. 32Yak inam nọ ukọd anaam ete ñnyịn, ndin ñnyịn ina ye anye, ke ntoro ñnyịn iyaimʌm anyịñ ubon ñnyịn ikama ito ete ñnyịn.” 33Akonayio ado, ammọ emaenọ ete ammọ ukọd, ndin adiaha amaadʌk akena ye ete amọ. Lọọd ikidiọọñọke idaha a-adiaha amọ akedinaaha ye anye me idaha anye akedakkake ada.
34Edem usen adiaha ado amaabo ñnwaeka, “Akonayio a-akeboiyoke ami ñkenaa ye ete ñnyịn. Yak ñnyịn imaana inọ anye ukọd akonayio ami, ndin afo ayaakaa akena ye anye nọ ato do anyịñ ubon ñnyịn asʌk aba ato ete ñnyịn.” 35Ndin akonayio ado, ammọ emaemaana enọ ete ammọ ukọd, ndin ñnwa Lọọd amaakena ye ete amọ. Lọọd ikidiọọñọke idaha a-ñnwa amọ akenaaha ye anye me idaha anye akedakkake ada.
36Ndin nditọ ibaan Lọọd iba emaeyommo idịb enọ ete ammọ.
37Adiaha ado amaaman ayịn awodeen, anyʌñ asio anye Mọb;#19:37 Mọb atie nte ikọ Hibru a-adooho ete anye ado ete mbon Mọb ayio mfịn. 38Ñnwa amaanyʌñ aman ayịn awodeen, anyʌñ asio anye Ben-Ammi#19:38 Ben-Ammi awuọñọ ayịn awodeen ubon ete mmi; anye ado ete mbon Amọn#19:38 Ke Hibru mbon Amọn ado Bene-Ammọn ayio mfịn.
Iliyochaguliwa sasa
Yenesis 19: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.