LOMA 8
8
Ko te Ola i te Agaga
1E seai nei se fakasalaga mo tino kola ko ola fakatasi mo Keliso Iesu. 2Me i te tulafono o te Agaga tela ne aumai ne ia te ola i te 'sokotasi mo Keliso Iesu, ko oti ne fakasaoloto ne ia au#8.2: au; i nisi lomiga e isi i ei koe; ko nisi e isi iei tatou. mai i te tulafono o te agasala mo te mate. 3Ko te mea tela ko se mafai ne te Tulafono o fai, ona ko te feitu vaivai faka te foitino; ne fai ne te Atua. A te Atua e fakamalepe ne ia te agasala i te tino, i te uga mai o tena Tama tonu, tela ne vau i te foitino agasala o fakagata te agasala. 4Ne fai ne te Atua, ko te mea ko latou kola e amiotonu kae manako ki te Tulafono, ke fia'fia ki a tatou kola e ola faka te Agaga, kae se ko te ola faka te foitino. 5Me ko tino kola e ola faka te foitino, e mafaufau faka te foitino. Ko tino foki kola e ola faka te Agaga, e mafaufau foki faka te Agaga. 6Ko te tuku atu otou mafaufau ke pulea ne te mea e manako ki ei te foitino, ka iku eiloa ki te mate; ka ko te tuku atu otou mafaufau ki te mea e manako ki ei te Agaga, ka iku ki te ola mo te filemu. 7Tela la, ko fai te tino mo fili ki te Atua, manafai e pulegina tona mafaufau ne manakoga faka te foitino; i te mea e se fakalogo ki te tulafono a te Atua, kae tonu eiloa me se mafai o fakalogo ki ei. 8Ko latou kola e fakalogo ki olotou feitu faka te foitino, e se mafai ne latou o fakafiafia te Atua.
9Kae ke se ola koutou ki te mea e fakatonu atu ei te otou feitu faka te foitino ke fai; kae ke ola koutou ki te mea e fakatonu atu ne te Agaga ke fai; manafai eiloa e tonu e nofo i a koutou te Agaga o te Atua. Ko te tino tela e se nofo i a ia te Agaga o Keliso, e se kau a ia mo ia. 10Kafai ko ola koutou i a Keliso, e tiga eiloa te 'mate otou foitino ona ko te agasala, kae ola eiloa otou agaga#8.10: A te Agaga se ola ki a koe; io me a tou agaga e ola. ona ko te amiotonu. 11#1Koli 3.16Kafai te Agaga o te Atua, tela ne fakatu ake ne ia a Iesu mai te mate e ola i a koutou, tela la, ka tuku atu ki otou foitino 'mate a te ola, ne ia tela ne ana fakatugina a Keliso Iesu mai te mate, e alatu i te Agaga tela e nofo mau i a koutou.
12Tela la e oku taina, a tatou ne tino kaitalafu, kae ke se ola tatou e pela mo te mea e manako ki ei a te feitu faka te foitino. 13I te mea, kafai e ola koutou faka te foitino, ka 'mate koutou; kae kafai e ola faka te Agaga, ka tamate ne koutou otou uiga agasala, ka ola ei foki koutou. 14Ko latou kola e takitaki ne te Agaga o te Atua, ko tama kona a te Atua. 15#Kala 4.5-7#Male 14.36; Kala 4.6Me i te Agaga tela ne tuku atu ne te Atua ki a koutou, e se fakapologa ne ia koutou io me fakamatakutaku ne ia koutou, kae ne fai ne ia koutou ke fai mo tamapuke a te Atua, kae i te mana o te Agaga e kalaga ei tatou ki te Atua penei, “Tamana! toku Tamana!” 16Ko te Agaga eiloa tela e molimau mai ki agaga o tatou, me i a tatou ko fanau a te Atua. 17Ona ko tatou ko ana fanau, ka maua ne tatou a fakamanuiaga ne tausi ne ia mo ana tino, kae ka maua foki fakatasi ne tatou mo Keliso a mea kola ne tausi ne te Atua mō Keliso, i te mea, kafai e kau fakatasi tatou mo fi'taga o Keliso, ka kau fakatasi foki tatou mo ia i tona 'malu.
Ko te 'Malu i Aso Fakamuli
18I toku manatu i o'tou fi'taga i aso nei, e se mafai lele eiloa o fakatusa ki te 'malu tela ka fakaasi mai ki a tatou. 19A mea katoa ne faite, ko fakatalitali fua i te fia lavea o te Atua ko fakaasi mai tena fanau. 20#Kene 3.17-19Me ko fakatakavale a mea katoa ne faite ke se aoga, e se i tena loto eiloa, ka ko te Atua ne manako ke pena. Kae isi eiloa se fakamoemoega tenei: 21me ka fakasaoloto a mea katoa ne faite mai te pologa mo te iku vale, ki te kau fakatasi i te saolotoga 'malu o te fanau a te Atua. 22Me e iloa ne tatou i mea katoa ne faite, ne ma'nava fi'ta; e pela eiloa mo te 'mae o te fafine fanau, ke oko mai eiloa ki aso nei. 23#2Koli 5.2-4Kae se gata fua i mea ne faite; a tatou foki kola ne maua ne tatou te Agaga, ko te meaalofa muamua a te Atua; e ma'nava fi'ta foki tatou i a tatou eiloa, ka koi fakatalitali tatou ke fai mo tamapuke a te Atua; ko te fakaolataga tena o'tou foitino. 24Me ko te fakamoemoe ne fakaola ei tatou; kae kafai e matea ne tatou te mea e fakamoemoe tatou ki ei, e se se fakamoemoega tonu tena. Ko oi la te tino e fakamoemoe ki te mea e matea ne ia? 25Kae kafai e fakamoemoe tatou ki te mea e se matea ne tatou, e fakatalitali eiloa tatou ki ei mo te kufaki.
26E pena foki te Agaga, ne vau o fesoasoani ki mea e vaivai ei tatou. I te mea e se iloa ne tatou me ai a e 'tau ei o 'talo tatou; ka ko te Agaga eiloa e fautua mō tatou, i te fita tela ko se mafai o fakamatalagina ki pati. 27Ka ko ia tela e mafai ne ia o iloa a kanoloto o tino katoa, pela foki a mafaufauga o te Agaga, me i te Agaga e fautua mō Kelisiano, e pela eiloa mo te loto o te Atua.
28I te mea e iloa ne tatou i te Atua e galue fakatasi mo tino kola e a'lofa ki a ia,#8.28: i mea katoa a te Atua e galue mo te 'lei o tino kola e alofa ki a Ia; i nisi lomiga e isi i ei a mea katoa e galue mo te lei o latou kola e alofa ki te Atua. ko latou eiloa kola ne kalagagina mo tena galuega. 29Me i a latou ko oti ne ana filifiligina, ko leva ne fakamavae keatea ne ia ke fai latou pela mo tena Tama, ko te mea ke fai te Tama mo toekimua ki taina talitonu katoa. 30Tela la, ko latou kola ne ana filifiligina muamua; ne ana kalagagina foki latou, ka ko latou foki kola ne ana kalagagina, ne ana takuamiotonugina foki latou, ka ko latou foki kola ne ana takuamiotonugina, ne ana faka'malugina.
Ko te Alofa o te Atua i a Keliso Iesu
31Se a la te pati a tatou ka fai ki te mea nei? Kafai te Atua e mo tatou, ka ko oi la e 'teke ki a tatou? 32Ne seki taofi ne ia tena Tama mai i a tatou, kae ne tuku atu ke fai mo taulaga mo tatou! Ne tuku mai mo tatou tena tama, e a, e seki tuku mai ne ia a mea katoa mo tona loto fiafia? 33Ko oi ka 'moli ne ia ki te tulafono a tino filifilia a te Atua? Ko te Atua e toe taku mai eiloa ne ia me se 'se latou. 34E isi la se tino e mafai ne ia o fakasala latou? Ko Keliso Iesu tela ne mate, io me ko ia tela ne fakatuake ki te ola, kae nofo i te feitu fakaatamai tela ko te feitu taua o te Atua o fautua mo tatou. 35Ko oi la ka mafai ne ia o 'vae tatou mai te alofa o Keliso? Ko te puapuaga, ko te faigata, ko te fakasaua, ko te oge, ko te mativa, ko fakalavelave fakamataku, me ko te mate? 36#Sala 44.22E pela mo muna a te Tusi,
“Ko tamate matou i aso katoa ona ko koe;
Ko taku foki matou ne mamoe ka tamate.”
37E seai, e ui eiloa i mea katoa konei, e isi se manumalo katoatoa o tatou; e alatu i a ia tela ne alofa mai ki a tatou! 38I te mea e iloa tonu ne au, e seai se mea e mafai ne ia o 'vae tatou mai i te alofa tenei: me ko te ola io me ko te mate; me ko agelu io me ko pule o te lagi; me ko te malosi; me ko te taimi nei me ko te taimi ka oko mai; 39io me ko mea i luga me ko mea i lalo, e seai lele se mea e tasi ne faite ka mafai ne ia o 'vae tatou mai i te alofa o te Atua i a Keliso Iesu te tou Aliki.
Iliyochaguliwa sasa
LOMA 8: Tusi Tapu
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Tuvalu Revised Bible © Bible Society in the South Pacific
