Mga Taga-Roma 6
6
Patay sa Sala pero Buhi tungod kay Cristo
1Karon ano ang aton masiling? Magapadayon bala kita sa pagkabuhi sa sala, agod nga ang kaayo sang Dios magdugang? 2Indi ina mahimo! Napatay na kita sa sala—ti ano pa abi ang pagpadayon naton sa pagkabuhi sa sala? 3Kay nakahibalo gid kamo sini: sang ginbautisohan kita sa paghiusa kay Cristo Jesus, ginbautisohan man kita sa paghiusa sa iya kamatayon. 4Gani,#Col. 2:12. sa aton pagpabautiso, ginlubong kita upod sa iya, kag nagpakig-ambit sang iya pagkamatay, agod nga, subong nga si Cristo ginbanhaw gikan sa mga minatay sang makatilingala nga gahom sang Amay, kita man magkabuhi sang isa ka bag-o nga kabuhi.
5Kay kon nahiusa kita sa iya pagkamatay sa amo man nga bagay magahiusa kita upod sa iya pagkabanhaw. 6Kay nakahibalo kita nga ang aton daan nga kinaugali napatay upod kay Cristo sa krus, agod nga malaglag ang gahom sang aton makasasala nga kinaugali, kag agod nga indi na kita mangin-ulipon sang sala. 7Kay kon ang isa ka tawo mapatay, hilway na sia sa gahom sang sala. 8Kon napatay kita upod kay Cristo, nagatuo kita nga magakabuhi man kita upod sa iya. 9Kay nakahibalo kita nga ginbanhaw si Cristo halin sa mga minatay kag indi na gid mapatay liwat—ang kamatayon wala na sing gahom sa iya. 10Ang kamatayon nga iya ginkamatay sing makaisa gid lang, amo ang kamatayon sa sala, kag ang kabuhi nga iya ginakabuhi karon amo ang kabuhi nga nahiusa sa Dios. 11Sa amo man nga bagay kabiga ninyo ang inyo mga kaugalingon subong patay sa sala, pero nagakabuhi sa Dios sa inyo paghiusa kay Cristo Jesus.
12Ang sala indi na dapat maggahom sa inyo mamalatyon nga mga lawas, agod indi na ninyo matuman ang inyo lawasnon nga mga kailigbon. 13Indi man ninyo pag-itugyan ang bisan ano nga bahin sang inyo lawas sa sala, agod gamiton para sa malaut nga mga tinutuyo. Sa baylo, itugyan ninyo ang inyo bug-os nga kaugalingon sa Dios, subong mga tawo nga ginbuhi halin sa mga minatay, kag itugyan man ang inyo bug-os nga lawas sa iya, agod gamiton para sa matarong nga mga tinutuyo. 14Kay ang sala indi dapat maggahom sa inyo. Wala kamo nagakabuhi sa idalom sang kasugoan, kundi sa idalom sang kaayo sang Dios.
Mga Ulipon sang Pagkamatarong
15Ano karon? Magapakasala bala kita, tungod kay indi na kita sa idalom sang kasugoan, kundi sa idalom sang kaayo sang Dios? Indi ina mahimo! 16Kay nakahibalo gid kamo nga kon ginatugyan ninyo ang inyo mga kaugalingon subong mga ulipon sa pagtuman sang isa ka agalon, matuod gid nga mga ulipon kamo sang inyo ginatuman—ayhan sang sala, nga ang resulta sini amo ang kamatayon, ukon sang pagkamatinumanon, nga ang resulta sini amo ang pagpakamatarong sa atubang sang Dios. 17Pero salamat sa Dios! Kay sang una anay mga ulipon kamo sang sala, pero karon gintuman ninyo sa inyo bug-os nga tagipusoon ang mga kamatuoran nga yara sa pagtulon-an nga inyo nabaton. 18Ginhilway na kamo sa sala kag nangin-ulipon kamo sang pagkamatarong. 19Mahapos nga mga tinaga ang ginagamit ko, tungod kay mahuyang pa kamo. Sang una anay gintugyan ninyo sing bug-os ang inyo mga kaugalingon subong mga ulipon sang kailigbon kag kalautan para sa malaut nga mga tinutuyo. Sa amo man nga bagay, karon dapat ninyo itugyan sing bug-os ang inyo kaugalingon subong mga ulipon sang pagkamatarong para sa balaan nga mga tinutuyo.
20Sang mga ulipon pa kamo sang sala, ang pagkamatarong wala nagagahom sa inyo. 21Ti, ano nga kaayuhan ang inyo nakuha sang paghimo ninyo sang mga butang nga inyo karon ginakahuya? Ang resulta sadto nga mga butang amo ang kamatayon! 22Pero karon, nahilway na kamo sa sala kag mga ulipon na kamo sang Dios. Ang kaayuhan nga inyo nabaton amo ang kabuhi nga nahalad sing bug-os sa Dios, kag ang resulta sini amo ang kabuhi nga wala sing katapusan. 23Kay ang kamatayon amo ang bayad sang sala, pero ang regalo sang Dios amo ang kabuhi nga wala sing katapusan sa paghiusa kay Cristo Jesus nga aton Ginoo.
Iliyochaguliwa sasa
Mga Taga-Roma 6: MBBHIL12
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Maayong Balita nga Biblia © Philippine Bible Society, 2012
