1 KORINTHIAMI 4
4
Khristo wu Apostolmi
1Nonguye ningu kughapesu Khristo khopemi eno Alhou wu tuqhoutsa peithakutsumi kepi ningu ithulu kepue. 2Ike khunoqomi pelo peitha kutsumi shipepuani keno panoqoye pukhubekulumi shi aghimaye sake. 3Ikemu nonguno ishou kughathabeni keu momu timino shichekeu ghola qhemi pesu ishou kughathabeni keulo ighenguno tiye kishinikela ipi akepu kiumu kuhae, niye ilikhi ishou kughathabeju chemoe. 4Niye ilikhi ishou akumou shipuakeu kiumu kumsuamoe, tipauno niye kiumu shipuamoke ipi ipuwuvemlae. Ikemu Ampeu no ishou kughathabe chenike. 5Tighenguno kophepuakeu-do ighimphi loye eno Ampeu no ighimphi kutolo khuu shoumu kughathabe kevilo. Itehiye thime khijehi kusupuani keno Ampeu no akuvulo ikhiphe saghi nani eno amlolo tuqhouno kumsupu akeu kumtsu pano lhaphe piye nani. Tileno timi kumtsu pututa shelo pa sheqhe kepu aghikeu Alhou launo ithulu nani.
6Athikuzumiqo nongu pelo ala shilupenike ghenguno niye hi pivekeutsa kumtsu pesu Apollo ikujo launo kichepiyeve ani. Titoi shikeu lono, “Yepuakeu akivishi jukutolo” ipikeu kiqi nongu pelo ithi peniyeke. Nongu gholo khunomu milakhi jupesu qhezano kutami lakhiu phimove kepu kumoe. 7Khuno nongu pelo kutami nguno nonguye pakutakeu shipe kya? Nonguno akeu thwokha kumtsu Alhou launo ithuluke kumokesha? Tishemaye, nonguno ti ithulukeu shiaghi aye, tiye kumsagho lakhi kumo kehutoi nonguye kushiye qheza cheni kya? 8Nonguye nonguno kiu lunishi keno ti kumtsu ani kesha! Nonguye kinikulu shiluvea kesha. Ningu sumono nonguye kukami shilukhavea kesha! Kuchouno nonguye kukami shinicheke! 9Kughengu ino kumsujukelo Alhou no ningu apostolmi pesu, timi aqha zulono pithivepeniye kideqhivekemiqo toi, ashekhau shi kumtsu piye ani keniae; kughengu ningu kugha pesu, ayeghiqha zulo eno kungumi ngo timiqo zulo qheghuyi jukepu lakhi shivetsu auvekeniake. 10Khristo gholo xuniaye ninguye mbomzumi ke ikemu nonguye Khristo gholo xuakeu lono alokutsumi ke. Ninguye tomo-chhimo kemi ikemu nonguye mtotoikemi ke. Nonguye kutamino qhoqhu gihuke ikemu ninguye thaighake! 11Itehi kutolo ninguye mzuthi tughuthi cheni, ninguye aphimini kuyixu pepu eno ningu heqhibuqhi achenipe eno ninguye kupokichemi ke, 12ninguno ichhe-imeno nipo qechu acheni. Ningu ghushoqhi aye ninguno kumghavetsu cheni, ningu shikighimeqhi aye ninguno kutu uve cheni; #Aposto 18.3 13ningu vilo atsa lhoksa piaye ninguno akumthsa shi khochile cheni. Itehi kutolo ninguye ayeghiqha tubatuzu shiauvetsua eno thwokha kumtsu xine xukupuu shiauvae.
14Niye nongu shikukujoni aye hipau yepuwu amoe, ikemu nonguye iti- anuli kuchou toi shi-ghi nongu kutsuputhuni kehuke. 15Kughengu nonguno Khristo gholo xukuqhalu akeulo alaghi kichekipiyemi phikhakumla aghie pimu nonguye apuh kutomo kuhake. Kughengu nonguno Khristo gholo xukuqhalu akeulo ino nongu papuh shipuani, tiye lokivipu tsa nongu lau ino sughikeu vechewonoke. 16Ikehu nongu ghi itoi shilopi ino nongu qhuiniju ani. #1 Kori 11.1; Fili 3.17 17Hipau ghenguno niye nongu lau Timothi puwu ani. Ampeu gholo xukuqha pesu akeulo paye ino pukhubekulu eno ino kimiye chekeu nuke. Khristo gholo xukuqhape akeulo ino pepimhechekeu, khipaqo pesu ino aqha kukuhou kumtsu lau shika cheni keno pano tipaqo pesu nongu vilo pithikithe tsu nani. 18Nongu gholo khamiye ino nongu putsa ighimo nani kepi kumsu puzu akuchhoma shi akhani. 19Ikemu Ampeu pulou shiaghiaye, niye itheno nongu lau ighi nani, eno hi akuchhomashi akeqono pikeu tsa kumono panonguw shikulupu kuka kiu ani keno tileno ino jutsu nani. 20Kughengu Alhou yehkipeye atsapi kumono mlakulupu-kuka ke. 21Nongu pulouye khikhiu shipe nishi kya? Niye akihepu-su pesu ighilepi keo moaye kimiyekeu ngo mtsha-ivukeu mlo xapusu nongu lau ighilepi kya?
Iliyochaguliwa sasa
1 KORINTHIAMI 4: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.