1 KORINTHIAMI 3
3
Alhou Kumlakishimi
1Athikuzumiqo, niye Aghungu lono xuchekemi putsa kehutoi nongu putsamlae, tishinike zuqhu inapughami timi vilo toi eno anga kughunu vilo toi nongu putsa kepu shivae. 2Niye akumto chuqupu kumono akichhizu pesu nongu loji kepu shivae, kughengu nonguno akumto chuqupu chumlake. Itehimu nonguye tipau chumla aphike, #Ibri 5.12-13 3kughengu nonguye inapughami qhemilo xu aphike. Kughou nongu dolo anhekushu eno mutomushu keu ani keno, nonguye inapughami aqhemi kekumo kesha? Eno inapughami paphi lono xuanike kumokesha? 4Kughengu nongu gholo khamino, “Niye Paul laumike,” ipi aye, kutami khamino, “Niye Apollo laumike” ipi keu huye nonguye inapughami paphi kekumo kesha? #1 Kori 1.12
5Maye, Apollo ye kushikemi eno Paul ye kushikemi kya? Ninguye aqemiqoke,Ampeu no pututa shelo akumlapu kophetsu puani, eno ningu vechewo nonguno pululuke. 6Ino abo shosu, Apollo no azu pusuke, ikemu abo thuwulupe keuye Alhou noke. #Aposto 18.4-11,24-28 7Ikehu shosukeu pina azu pusukeu pinamu akhoto kumoe ikemu Alhou likhino akhoto ke, kughengu pano abo thuwulupeke. 8Abo shosukeu timi ngo azu pusukeu timi pama dolo kutuqukeu kiumu kuhae, pututano mla-sukeu qhemi pututa jume Alhou launo ithulu nani. 9Kughengu ninguye Alhou ghenguno kumtsa mla kuqha chekemi akusamike, eno nonguye Alhou nowu akialu ke.
10Alhou no kupukini itsukeu peitha puzu aki kishimi shitsami lakhi toi shieno ino aboqha hu qhawoke, ikemu kutamino tipau shou shipuku ani. Pututano paye tipau shou kishi shipuku nikeno jukutokupuyi masakeu ani. 11Kughengu aboqha khikhi qhave akeno tiye Jisu Khristo ke, tipau nguno alauye kutau boqha khunomu qhamlae. 12Timi khamino shunayi momu tsandiyi momu akughupu-tu peithano aboqha shou aki shipuku aghiluvi ikemu kutamiye asu momu atsani momu aghijini peitha puaghiluvi. 13Timi lakhikhi kumla asachu kemokeno piyeni aphi, tiye Khristo ipeghikeu Tsalanino tipau pephepiye nani, kughengu tipa Tsalaniye ami gholono ipeghi nani eno milakhi khino kiutoikeu kumla mla puaghi nikeno asachu kemokeno amino ghu puzu kimchitsu nani. 14Khuno kumla aboqha shou shipuku keu pitipuha mlanikeno tipanoye asaxu lakhi ithulu nani. 15Ikemu khuno kumla pitipuhaveni keno paye asaxu ithumlave nani, ikemu pa ampiye ami hechesu polu akeshi kethono xalu nani. 16Nonguye Alhou chineki ke eno Alhou Ghungu no nongu lolo acheni kepi nonguye mtha kesha? #1 Kori 6.19; 2 Kori 6.16 17Timi khunono Alhou chineki kutsa-kungoni keno Alhou no pa kutsa- kungo nani. Kughengu Alhou chinekiye akimthe ke, eno nonguye achineki tipauke.
18Timi khumu alikhi ampi pishiqhi kepu kumoe. Nongu gholo khualano paye hipa yeghi gholalo asuqe kighithimi kepi kumsu aghi aye, paye asuqekighithimi kuchou shinike ghenguno mbomzumi lakhi shivekepue. 19Kughengu hipa yeghilomino kiu pesu asuqe kighithi kepi picheni keno Alhou zulo tiye mbomzuke. Tiye kuchoyesulo ishi yepuake toi, “Alhou no alokutsumiqo panoqo muqukini lono meluve cheni” #Job 5.13 20eno kuchoyesu kutaulo ghi ishi yepuani, “Alhou no asuqe- kighithimi kukumsu ithi anike tipaqoye abokumsake.” #Leshe 94.11 21Ikehu khumu timi pukhupe qheza pekevilo. Kughengu thwokha kumtsu nongu wuke: 22Paul na Apollo na Pitor na ayeghiqha na akuxu na akithi na itehi akeu na ighinikeu pinamu thwokha kumtsu nongu wuke; 23eno nonguye Khristo wuke, eno Khristo ye Alhou wuke.
Iliyochaguliwa sasa
1 KORINTHIAMI 3: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.