1 KORINTHIAMI 2
2
Khristo Kros Ghili Asheshu
1Athikuzumiqo, kughou ino nongu lau ighikeno, niye atsa pikithi momu asuqe kighithi lono Alhou wu mzamughaleyi keu kuchou pikulha ighike kumoe. 2Kughengu niye nongu gholo akeloye Jisu Khristo eno pano kros lo thivekeu nguno kutauye kiumu ithipe nishimokeu ino xathaluvae. 3Ino nongu gholo akelo niye tomo-chhimokeu, msa-ighukeu eno khokhoshi ae; #Aposto 18.9 4eno itsapi ngo ino asheshukeulo zukide kudakeu tsa eno timi suqekighithi peithamoe, ikemu Alhou Ghungu kuka shipe piyekeu ino peithake. 5Ike nongu kupuluye timi suqekighithi shou bepemono Alhou kuka shou bepeni kehuke.
Alhou Suqekighithi
6Tishimu akupululo tekhoyive kemiqo viloye asuqe kighithi tsa pesu picheni; ikemu tiye hipa yeghilo suqekighithi momu hipa yeghilo ayehkipemi kuka kumoe, tipaqo kukaye hauvenikeu kuka ke. 7Ino piakeu suqekighithiye Alhou tuqhou suqekighithike, tiye timi launo kusupe puachekeu ke, ayeghiqha lhomphi lono Alhou no ningu kimthe jukuvupu shitsunike kughuqhikeuke. 8Hipa yeghilo ayehkipemi lakhinomu hipau suqekighithi mthake. Panonguno hipau ithi ke aye panonguye akimthe jekipi Mipeu kros lo yedapithi moni cheke. 9Ikemu kuchoyesulo ishi yepuani,
“Timi khunomu ithumla aphikeu, momu chimla aphikeu thime,
momu timi mlolo kumsuphemla aphikeu thime,
khunoqono Alhou kimiyecheni keno tipanoqo ghenguno Alhou no kutope puani.” #Isa 64.4 10Ikemu Alhou no pa Ghungu vechewo thime hipaqo ningu lau pephepiyevae. Aghungu no thwokha lhekide kudaju cheni, Alhou kukughu thonheyi kusupuakeu kutolo. 11Kughengu timi lakhiye, pa nguagha pa lou akeu likhino pa lhoaye ghili ithitoi cheni, tihutoi Alhou Ghungu likhino Alhou lhoaye kumtsu ithi anike. 12Ninguye hipa yeghilo ngu-agha ithuluke kumoe, ikemu Alhou launo puwukeu Ghungu ithuluke, tishianguno Alhou no kumghagho tsukeu kumtsu ningu pelo ithipeni yeke. 13Ikehu ninguye timi suqekighithino shikakeu tsaqo pesu pichemoe, ikemu Aghungu Kimthe no shikakeu tsaqo pesu picheni, kuchou nguagha ghili pesu Aghungu ghokulumiqo kimghipiye cheni. 14Ikemu Aghungu Kimthe sumono xuchekemiye Alhou Ghungu launo kumghagho ighilu chemoe. Pa ghenguno tipaqoye mbomzuke eno paye tipaqo ithikuthumlae, kughengu Aghungu likhino tipaqoye amekuapu kiu keno kiqiphelu cheni. 15Aghungu Kimthe no sasu xuchekemiye ajeli kumtsulo amekuapu kiukeno kiqiphelu keu acheni, ikemu kutami khunomu pano amekuapu akeu kiqiphelumlae. 16Kuchoyesulo ishi yepuakeu toi,
“Kughengu khuuno Ampeu kukumsu ithi ani keno pa vilo akukumsu tsukile kulupu kya?”
Ikemu ninguye Khristo kukumsu pesu achekemike. #Isa 40.13
Iliyochaguliwa sasa
1 KORINTHIAMI 2: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.