1 KORINTHIAMI 1
1
1Alhou pulou vechewo Jisu Khristo wu apostolmi shipenike kuluvekeu Paul, eno ningu thikuzuu Sosthene pamano Korinthia lo Alhou kukuhou akemi lau ye ani. 2Aqha kumtsulo ningu Mipeu Jisu Khristo gholono nonguye shikimtheluve kemi eno Alhou timiqo shipenike kuluvekemike. 3Ningu paPuh Alhou eno Ampeu Jisu Khristo kudauno kupukini ngo alokiqipu nongu shou apeniu.
Khristo lono Kukumgha
4Jisu Khristo vechewo Alhou kupukini nongu tsukeu ghenguno, niye pulhapuju shikimthikeu Alhou tsu acheni. 5Kughengu Khristo gholo kimepe akeu vechewo nonguye thwokhalo kinimi shilupeke, atsapi kumtsulo eno akighithi kumtsulo, 6tiye Khristo ghili pesu ashepe shikeu nongu gholo mutotoi alupekehuke. 7Tighenguno ningu Mipeu Jisu Khristo pephe piyenichekeu nonguno khe-a kelo, nonguye angu-agha akumghagho lakhimu ithulukhamokeu shiamoe. 8Pano ashekha kutolo nongu pelo mutotoi penani, tishianguno ningu Mipeu Jisu Khristo Tsala ighikelo nonguye kuqu mono aghi penani. 9Alhou ye pukhubekuluke, pa Nu Jisu Khristo, ningu Mipeu gholo kuposhulukeu apenike pano nongu kulukeu Lhou huke.
Akukuholo Kijethakeu
10Athikuzumiqo niMpeu Jisu Khristo kuka akeu vechewo ino nongu qhuiniju anike, nongu kumtsuno kuptsa kuqhalulo eno nongu gholo kijethakile keu apekevilo; ikemu akukumsulo eno kughathalu keulo aphiphishi kuqhakulu shilo. 11Kughengu Khloyis no-sholokumi khamino ivilo mutsuqheyi piveake, nongu ithikuzumiqo gholo mutomushu keu aniepike. 12Ike ino hi piakeuye kutau kumo puzu nongu gholo pututa shelo ishi pikeu ani: “Niye Paul laumike,” “Niye Apollo laumike” “Niye Pitor laumike,” momu “Niye Khristo laumi ke” ipikeu akhani. 13Khristo ye kijethapiniyive akesha? Paul no nongu ghenguno kros lo thi kesha? Nonguye Paul je lono baptiz shikesha? 14Ino Alhou shikimthi anike Krispa ngo Gayia pama nguno alauye niye nongu milakhimu baptiz shitsu puamoe. 15Ikehu timi khunomu ino ijelo nongu baptiz shitsu kepi pipemoke. 16(Kumchomaghi, niye Stefana ngo pa kibolomi ghi baptiz shitsu kena; ikemu tinguno alauye kutami khumu ino baptiz shitsukemo keno mthavae.) 17Kughengu Khristo ye ipelo timi baptiz shipenike ipuwuke kumoe ikemu lokivipu sutsa pikulha penike ipuwuke, eno timi suqekithi tsa peitha puzu pikulhalo pimoe, kughengu tishinikeloye Khristo no kros lo thikeu lono akuka ipeghikeu pukhulevetsu nosakehue.
Khristo ye Alhou Suqekithi eno Alhou Kuka
18Kughengu puhave nichekemi ghenguye Khristo no kros lo thikeu ghili pikulhakeuye mbomzu tsake; ikemu ningu khunoqomi xaluve akeno tiye Alhou kuka ke. 19Tighenguno kuchoyesulo ishi yepepuani:
“Ino asuqekithimi suqekithi shipuhavetsu nani,
Ino akighithimi muqu lutsumove nani.” 20Tishiaye asuqekithiu khile ani kya? Momu akighithiu khile ani kya? Momu hipa yeghilomi gholo kighe kithiu khile ani kya? Alhou no hipa yeghilomi suqekighithi pesu mbomzu shivetsuke kumo kesha? 21Tighenguno Alhou no pa suqekighithi lono ayeghilo timiqo pelo panoqo suqekighithi vechewo Alhou ithikepu shitsumove. Tishinike zuqhulo ninguno mbomzu sutsa pesu asheshu keu vechewo khunoqomino ti pulukeno tipanoqo xalupe nikeuno Alhou pulou shiaghive. 22Judamino amchipu khucheni eno Grikmino asuqekighithi phucheni, 23ikemu ninguno Khristo kros lo yedavekeu pesu asheshu cheni. Judami ghenguno tiye shokukho kepushive eno Judakumomi ghenguno tiye anikha tsa shive; 24ikemu Alhou no khunoqomi kuluve akeno, Judami na Grikmi pinamu, atsapeye Khristo ke, pano Alhou kuka eno Alhou suqekithi ke. 25Kughengu Alhou wu mbomzu kepi chekeu huye timi suqekighithi nguno akighithiuke, eno Alhou wu mutomokeuye timi kukakumto nguno akumtou ke.
26Tighenguno athikuzumiqo, Alhou no nongu kulukeu kumsukuto julo. Ayeghilo kuxu kiqiloye nongu gholo kutomono ithishekemi kumoe, nongu gholo kutomono timi ghusukulumi kumoe, momu kutomono kijemi kumoe. 27Ikemu asuqekighithimi shikukujo nikehu ayeghilomino aghuzu nikha kepi pichekeqo Alhou no puthaputsano kishelue; eno akumtomi shikukujo nikehu Alhou no puthaputsano ayeghilomino tomo-chhimo kepi pichekeqo kishelue. 28Ayeghilomino khipaqo jukunatha eno jumthi chekeno eno kiumu kuha kepi pichekemi qou Alhou no kisheluke, tishikeuno ayeghilo akhotokepi pichekeqo shipuhave niyeke. 29Tighenguno Alhou zulo timi khumu qhezamla penike. 30Alhou no nongu pelo Jisu Khristo sasu kimelupe, eno Alhou no Khristo pesu ningu wu suqekighithi shitsue; pa vechewo Alhou sasu achipi shiaghilupe, eno Alhou timiqo shilupe, eno ningu xaphetsuke. 31Tighenguno kuchoyesulo yepuakeu toi, “Khunono qhezani keno Ampeu no kiu mlavetsu keno tipaulo qheza pelo.” #Jere 9.24
Iliyochaguliwa sasa
1 KORINTHIAMI 1: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.