1 KORINTHIAMI 16
16
Kupulumi Suqha
1Itehiye Judia lo Alhou timiqo ghenguno asuqha qhakepu shi akeulo, Galatia qhalo akukuhou akeqo vilo ino pivekeu toi nongu ghi titoi shimasake. 2Apinedo lakhilo atsala atughini nongu lakhikhino pututano aghikeu qhemi ikhithape qhakutsupe puaghilo, tishianguno ino ighi keloye asuqha qhamokepu shilo. 3Ino ighi kethiuno, nonguno timi kishe puaghikeqo gholo kilethisukeu yesu tsuno puwuni eno panongu pelo Jerusalem lo nongu gho puwu penike. 4Tsala nighi wukepu shive aghiaye panonguye igholono wulu nani.
Paul no Akukughu Shiju
5Niye Makedonia vechesu wunikeu kukughu shi anike ghenguno tipau vechesu nongu lau ighi nani. 6Kumsuju kelo niye nongu gholo ado ta ngo nanike, kutomu susu tsala kupuju kutolo ngove nanike, eno tithiuno ino khila wuni keno tilehiye nonguno ighuzulalo kuphu puwulu kepuke. 7Kughengu ino wuche kelo chokilhe shi nongu sasu kushonishi amoe, Ampeu pulou shi aghiaye niye nongu gholo ado ta ngonikeu pulo ani. 8Pentikost tsala kutolo niye Efesia lo ngo aghinikeu akupughu shi ani. 9kughengu hilehi amekuapu kumla kije shikulupu ado kivi khaqhitsu anike, eno mujochileni kemi qhe akhanike.
10Tsala Timothi no nongu lau ighiaye, pa pelo nongu gholo ighumono ngo pelo, kughengu pa ghi itoi Ampeu ghenguno mla acheni. 11Khuu pelomu pa thaigha pekevilo, ikemu nonguye pa ghuzulalo amlo kiqipushi kuphu puwulo, tishianguno paye ilau ideighi penike, kughengu niye athikuzumi gholo pa laju anike.
12Ningu thikuzuu Apollo vehu ghenguno niye athikuzumi kutami gholono nongu xujuwu lopi pa shikumto achenike, ikemu paye itodolo tilau ighinikeu kumsumono aphike. Tishimu pano adokivi ithulu kemtsa ighi nani.
Ashekha Tsa
13Tsukhuyi alo, nongu kupululo mutotoi puthugho alo, amlo kuloghi shi, mutotoi alo. 14Nonguno mla ithakeu kumtsulo kimiyekeu lono shilo.
15Athikuzumiqo, nonguye Stefana ngo pa kibolomi ithi anike; Akhaiya qhalo panongu paghino Khristomi laghilo xuluvekemi ke, panonguye Alhou timiqo kumla shinike akuxu ikhiphepe tsuveke. 16Ino nongu choha anike, nonguye timi hitoikeqono saphekeu papelo, eno khunoqono panongu gholo mla ani eno aghimeshi mlakuqha chenikeno tipaqo papelo. 17Niye Stefana,Fartunata eno Akhaiko noqono ighikeulo alokivishi ani, nongu zuqhulo panonguno ighitsu kehu, 18kughengu panonguno nongu ghuthi puxu tsucheke toi ighuthi puxu tsuke. Timi hitoikeqo gihu kuzupuke.
19Asia yeghi bocholo akukuhou qono petha nongu tsu ani. Akuila ngo Priskila pama eno pano kilo akukuho kuhochekemi kumtsuno Ampeu gholo alokivi petha nongu tsu ani. 20Athikuzumi hila akeqono petha tsu ani. Akimthe lono mumakeu pesu lakhino lakhi petha tsukilelo.
21Ni, Paul ampino i-u pesu petha hipau yepuku ani. 22Timi khuno Ampeu kimiyekeu kuhani keno, angusu pa shou apeni. Ningu Mipeu cheae!#Grik lo: “Maranatha!” 23Ampeu Jisu kupukini nongu gholo apelo. 24Khristo Jisu je lono ikikimiye nongu kumtsu gholo apelo. Amen.
Iliyochaguliwa sasa
1 KORINTHIAMI 16: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.