1 KORINTHIAMI 15
15
Khristo Xuchilethughikeu
1Athikuzumiqo, ino atsakiviu khikhi nongu vilo pikulhache keno, eno khikhi nonguno ikhiluvea keno eno khipau shou nongu kupulu bepe ani keno 2eno khipau vechewo nongu xalukeno tipau nongu vilo piputo nishi ani. Nonguye abokumsa lono pulumo puzu nongu vilo kishekulu pivekeu tsa mutotoi tsuqupe aghiaye tipau vechewo nongu xalu nanike. 3Kughengu ino kiu ithulukeno ighono akhotou kepi nongu lau ino ikhiphe pesu tsuke: ike kuchoyesu kiqi loye Khristo no ningu xine ghenguno thivetsu, #Isa 53.5-12 4ike kuchoyesu kiqi loye paye qhove eno akuthunino xuputhuve; #Leshe 16.8-10; Aposto 2.24-32 5ike paye Pitor zulo ipeghipiye; eno tithiuno apostolmi chighikini zulo ipeghipiye. #Mt 28.16-17; Mk 16.14; Lk 24.34,36; Jn 20.19 6Tithiu ghuthu lakhi loye athikuzumi 500 shou zulo ghi ipeghi piyeke, panongu khamiye thivea kemu panongu kutomono itehi ghi xuaphike. 7Tithiu paye Jems zulo ipeghipiye eno tipathiuno apostolmi kumtsu zulo ipeghi piye. 8Kumtsu shekhashi ni lhonima nga toikeu lau ghi ipeghi piye. #Aposto 9.3-6 9Kughengu niye apostolmi gholo anipau ke eno apostolmi kepi ku kuzupu ghi kumoe, kughengu niye Alhou kukuhou shikighime cheke. 10Ikemu Alhou kupukini lono niye kiukeno tike, eno pa kupukini ilau tsukeu huye adou shivepemoe, tike kumo puzu, niye apostolmi kutami nguno alau ghichhe ghime kumla shi cheni, kuchouno ino shilu anike kumo puzu Alhou kupukini igholo akeu huno shilu anipeke. 11Tighenguno ilauno ighikeu pina panongu launo ighikeu pinamu, ninguno asheshu eno puluchekeuye hike.
Akithi lono Xuchilethughi
12Khristo akithi lono xuputhuvekeu sutsa pesu asheshu cheni aye, nongu gholo khamiye kishino kithimi xuputhu mla kepi picheni kya? 13Ikemu kithimi xuputhu mlake piaye Khristo ye xuputhupe puamovae; 14eno akithi lono Khristo xuputhu puamo aye ninguye kiumu asheshu akepu kuha eno nongu ghi kiumu puluakepu kuhae. 15Tinguno alauno, ninguye Alhou ghili akumo akukuhau pesu piakeu shivae, kughengu pano akithi lono Khristo xuputhu kepi ninguno pichenike, ikemu kithimiye xuputhu chemo pikeuno kuchou shi aghi aye Alhou ye Khristo xuputhumoe. 16Kughengu kithimi xuputhu chemo aye Khristo pinamu xuputhumoke. 17Khristo xuputhumonapi aye nonguno puluche keu adouke eno nonguye no xinelo achephike. 18Tishinikeloye Khristo kupulumi thivekeqoye puhavae. 19Khristo lono ninguno lajupu achekeuye hipa yeghilo kuxu kivipu ghengu likhino kenapi aye, ninguye timi kumtsu nguno alau ahakusapu shiauvae.
20Ikemu mutsuqheyino Khristo ye akithi lono xuputhuvae, thiveno zuakemi ghi xuputhuve nikeu shi pano axathi amsuu hutoike. 21Kughengu timi lakhi vechewo akithi ighike toi, timi lakhi vechewono akithi lono xuputhuvekeu ighike. 22Kughengu Adam gholo kimepe akeu lono timi kumtsu thiveke toi, Khristo gholo kimepe akeu lono kumtsu puxuve nani. 23Khristo no axathi amsuu hutoi kumtsu nguno atughiu shi ideghike lo pa kupulumi qono pa shelo kithikiyi kupasu ighi nani; 24Khristo no ayehkipe jeli, akuka pepimhekeu jeli, akuka jeli kumtsu shipuhaveno akukaqha pesu Apu Alhou lau tsuve kethino ashekha tsala ighi nani. 25Kughengu Alhou no aghumi kumtsu leluveno pa pukhu qholo qhitsumoke kutolo Khristo no ayehpe masae. #Leshe 110.1 26Aghumi lelu kepushi akeu ashekhauye akithike. 27Kughengu kuchoyesu kiqi loye, “Alhou no thwokha pa pukhu qholo qhitsu.” Ikemu khileno tipaulo “Thwokha pa pukhu qholo qhitsu” ipi keno mutsuqheyino tipauye Alhou kihisuamoe, kughengu tiye Alhou no thwokha Khristo qholo qhitsuke. #Leshe 8.6 28Ikemu kughono thwokha Khristo qholo qhivetsu nikeno, tileno Anu ampi ghi thwokha pa qholo qhitsukeu Lhou qholo ngove nani, tishianguno Alhou no kumtsu shou ayehpe nani.
29Tishimo aye, khunoqono kithimi ghenguno baptiz lupuani keno tipaqoye kiu shiniye kya? Kithimi khilemu xuputhu chemo aye timiqoye kushiye kithimi ghenguno panonguno baptiz lucheni kya? 30Tishimoaye, kushiye ninguye atuqhudo kumtsulo akumsapu sasu kusho ani kya? 31Athikuzumiqo, tsalakipetsu niye akithi sasu kusho acheni, ningu Mipeu Jisu Khristo gholono ino nongu jupesu ikijivilo achekeu huno ipelo hipau pilu anipeke! 32Tsala timi kuxu kiqi lono, hila Efesia lo tughashi sasu kichighike aye niye kiu alla shiluniche kya? Kithimi xuputhu chemo aye, pichekeu toi, “Ningu kuchukusho shi ani nolo, kughengu thoghiu ninguye thini ake.” #Isa 22.13
33Nongu sakughuzupe kevilo: “Akusami alhoksano ghushoghili kivi shipusa cheni.” 34Nongu kukumsu achipiulo ighivelo eno axine shikithe akevelo. Kughengu nongu khamiye Alhou mthake, nongu shikukujo nike niye hipau piani. #Isa 25.8
Xuchileputhukeu Phimpi
35Ikemu timi khamino ishi inijuluvi, “Kithimiye kishi xuputhu cheni kya? Panonguye kiu toi keu phimpi pua nani kya?” 36Oghuzu anikha! Nono kiu yisu keno tipau thimphi loye akuxu akeu bo lhoipeghi chemoe. 37Nono alothi yisu chekeu huye athiuno anipa amzu pupuzu ipeghi chekeu bo kumoe, ikemu aghi lothi momu kutau jeli pimu alothi likhi yisu chenike. 38Ikemu Alhou no pa pulou lono alothi tipau pesu abo ipeghipe cheni; pano pututa lothi shelo pututa bo pepipe cheni. 39Lhoxu kumtsu ashi ahji aphiphike kumoe. Timi shiahjiye pakutae, tughashi shiahji kuta, aghauqo shiahji kuta, eno akhaqo shiahji kutake. 40Atsutsulo akeqo phimpino ajuvi akeu kuta eno ayeghilo akeqo phimpino ajuvi akeu kutake. 41Tsukinheno ajuvi akeu kuta, aqhino ajuvi akeu kuta, ayepuqono ajuvi akeu kuta ishike; eno ayepuqo dolo ghi ajukivi ajeli kutuqukeu anike.
42Kithimi xuchileputhu kelo ghi titoi nani. Alothi toi, ashikumoye tsumavekepushi qhove cheni, kughono ti xuputhuveni keno tsumave moae. 43Aphimpi ye jukusapu shi qhove cheni, eno tipau xuputhuve keloye jukighilepu shive nani. Hiye tomochhimo keushi qhove cheni, eno tipau xuputhuve keloye akuka kumto shive nani. #Bothu 2.7 44Hiye ashikumo aphimpi shino qhove cheni, tipau xuputhuve keloye angugha phimpi shive nani. Ashikumo phimpi ani aye angugha phimpi ghi aniputsake. 45Tighenguno kuchoyesulo ishi pipuani: “Timi atughiu Adam ye akuxu kua lhoxu shi lhopheke.” Ikemu ashekhau Adam ye akuxu tsuchekeu ngughapuke. 46Angugha akeu huno atughiuke kumoe, ikemu ashi ahji shikumo paghi ke eno tipathiuno angugha akeu ke. 47Timi atughiuye ayeghimukhuno lhoke; timi akiniuye kungugha launo ighike. 48Khunoqono ayeghi laumi keno panonguye ayeghi mukhuno lhokeu timi toike; khunoqono kungugha laumi keno panonguye kungugha launo ighikeu timi toike. 49Ninguye ayeghi mukhuno shikeu timi juhi pepu ake toi ninguye kungugha launo ighikeu timi juhi pepu ani.
50Athikuzumiqo, ino piakeu kiqiye hike: ashi eno ahjiye Alhou yehkipe kusaje mla nani, momu tsu- mavekepuye tsu-mavemla kepu kusaje mlae.
51-52Ino muzamughaleyi kepu tuqhou lakhi nongu vilo pinike inijulo: ningu kumtsu thimo nani, ikemu kughou afuko ashekhau igha nikeno pai anhekutsu khavino ningu kumtsu kilive aghi nani. Kughengu afuko igha nani, eno kithimiqoye tsu-mavemokepu shi xuputhuve nani eno ninguye kilive nani. #1 Thesa 4.15 53Kughengu hi tsu-mavekepu lhoaye huye tsu-mave mlakepu pepuve masa, eno thivenikuau huye thivemla kepu pepuve masae. 54Kughou tsu-mavekepu huno tsu-mave mlakepu pepuve eno thivenikuau huno thivemla kepu pepuve nikeno, tilehino kuchoyesulo ishi pipuakeu tsa kupu nani:
“Tokuluno akithi munovae!”
55“O akithio, noye tokulupu khile ani kya?”
“ O akithio, noye ghuzakulupu sahu khile ani kya?” #Hosi 13.14 56Akithi ghuzakepu sahuye axine ke, eno axine kukaye Ayezahke. 57Ikemu Alhou shikimthi ani, kughengu ningu Mipeu Jisu Khristo vechewo pano tokulupu ningu tsuke!
58Tighenguno ino kimiye chekemi athikuzumiqo, mutotoi puthugholo, ithakevilo, kihikutha kuhano pulhapuju Ampeu kumla shialo, nonguno ithianike Ampeu kumla kiu shiani keno khilemu adou shivemoe.
Iliyochaguliwa sasa
1 KORINTHIAMI 15: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.