LEVIYEN 24
24
Ahulathu Kenoncca
(Bvü 27.20-21)
1Apvüwa na Mosa kiza nu 2Israel nyithu wi Nithsüjjen wi ahula tsü canki nu keshüthangla qheben thsüle kesalina oliv deli kemehai ntsawa sengholo khi thsü. 3Ghaja kaghapenla Aaron na tsü canki nu qhe wa ghanenwa cu thsüben, tsüna Kemetha ntsawa Pen non wi Cenkethenjüh Khitson tuwi keshonthsü na ameiwa Apvüwa ketenpen witsü. Matsü ghaketen tsüdi wi ayen ha nieben. 4Aaron na suna kemetha pi kesa ahula kedonpen wi ahulathu noncca nu tsüthu ya keshüthangla Apvüwa ketenpen wi qhe nben thsüthu yishü.
Amesa Pi Anyiza Kecü
5 #
Bvü 25.30. Awheng kilogram taghakeni khuya nu pi amesa abe taghakeni güya. 6Amesa tsüpi Apvüwa ketenpen wi suna pi meju ketheng miz miwi tughogho pi alen keni saya. 7Atsse pi Apvüwa wi kekinyi sa kechi zensu wina hankedemvu kemetha pahan pi amesa pi dan ketheng miwi zügüchi. 8Matsü ghaketen tsüdi wi Sabbath tsathang kaghapengla amesa tsüpi Apvüwa tuwi nchithu yishü. Hawa ha anuphan wila Israel nyi kekuli. 9#Mat 12.4; Mrk 2.26; Luk 6.4. Amesa tsüna Aaron nu ma shicüthu shei, mathu na kemetha pen wi tsü dsaben, kepaghenanye hawa ha atsse pi keqhaikedithu ghena Apvüwa wi kekinyi sa kechi kemetha ntsawa.
Ketsatan Nu Kemeshon Wina Kemeten Pi Kecü Tsütsonca
10-11Ciwi npvüza kesü na ben, ma ba na Ejipt nyi nu ma jja na Israel nyi Dan mizza wi Dibri nga Shelomith. Anyi hawa ha kemnanpen wi Israel nyi kesü ssikitagha. Kitagha keben wi ma Apvüwa kishencü, tsalina mathu na ma ssinu Mosa wi wa, 12ma ghan pi theng nu Apvüwa na ma ghena mangwale mathu kizaten khe hie.
13Apvüwa na Mosa kiza, 14“Anyi tsüwa ssinu kemnanpen na ameiwa wi shhulo. Ma kishencü keben za keyathu tsüdi ma sazzidha le khishi nu akwen chang pi ma miwi chi nu azitenti maben alon pi ma kecenthiaben. 15Tsaseng wi Israel nyithu wi anyi thowa na Anyiza kishencü khe ma tsüghena ketizensa ben 16nu pi shü thsüaben kizalo. Israel nyi sale asang na Israel nyi jawi hang keben sa lela thowa na Apvüwa theng khe azitenti mabenla alon pi ma kecenthiaben.
17 #
Bvü 21.12. “Anyi thowa na nyu pathi khe ma pi shü thsüaben, 18nu thowa na nyu ji asahang pathi khe tsü kuti pi cü nsathu yishü. Kahang kesü mithon kahang kesü, tsü yen kenie wina.
19“Keujüla anyi kesü nyu mesa-mena lethu, ma mangwa sachi khe ma miwi la tsü sachiaben. 20#Bvü 21.23-25; Aye 19.21; Mat 5.38. Ma nyu gü kesü pashü lethu, ma gü la kesü pashü cüben; ma nyu nyon kesü yasa lethu, ma nyon la kesü yasa cüben; ma nyu yha kesü shunsha lethu, ma yha la kesü shunsha cüben. Ma nyu miwi mangkhati mesa-mena cü khe ma miwi la tsüti sa cüben. 21Anyi thowa na asahang kesü pathi khe tsü kutimen pi cü, isala thowa na anyi kesü pathi khe ma pi shü thsüaben. 22#Scs 15.16. Ayen hawa ha Israel nyithu sale asang nthu jawi hang kebenthu sa lela tsüdi miwi ben, kepaghenanye hi Apvüwa nthu Nyiza.”
23Mosa na ha khipi Israel nyithu kekiza wi mathu na anyi tsüwa ssi shhula kemnanpen na ameiwa alon pi kecenthia. Hati nu Israel nyithu na Apvüwa na Mosa kekiza ti sa.
Iliyochaguliwa sasa
LEVIYEN 24: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.