LEVIYEN 23
23
Keccüna Khothu
1Apvüwa na pi Mosa kecü, 2Israel nyithu na saghu nu kekinyi wi kemetha khothu kesa yen hathu ha. 3#Bvü 20.8-10; 23.12; 31.15; 34.21; 35.2; Aye 5.12-14. Ghanan tugho jüwi nthu kekuli saya, isala tagü ghananwa tsü chüyalo, tsüna Sabbath, kemnan tsathang kesü. Tsü ghanan wi kekuli nsala, isala nthu saghu nu kinyilo. Sabbath tsüna Apvüwa ji, nthu na kahe wi hang tenle khi lela. 4Matsü wina akho hathu pi thangchilo.
Shhukeya Kho nu Azimi Nkechi Mesa pi Kemishu
(Scs 28.16-25)
5 #
Bvü 12.1-13; Aye 16.1,2. Shhukeya kho, asha atuwa wi taghamejü ghanan aghani du meyi na tsü sashhu nu Apvüwa kinyiküben. 6#Bvü 12.14-20; 23.15; 34.18; Aye 16.3-8. Taghamanga ghanan wi azimi nkechi mesa pi kemishu kho tsü sashhu ben nu ghanan tagü nthu na azimi kechi mesa ndsala. 7Atsathang atuwa wi nthu na saghu nu kekinyi sa nu nthu na atsathang kekuliwa tsü mangla sa nben. 8Ghanan tagü nthu na atsse pi Apvüwa kekinyi tsü sa. Tagü ghanan wi la kheneng saghu nu kekinyi sa nu nthu na atsathang kekuliwa tsü mangla sa nben.
9-10Khathansha wi nthu Apvüwa na ayyi pi nthu cüle keben witsü ghoya nu nthu lli wwiya khe, handhi tegüwa tsü sen nu keqhaikediwa wi gholo. 11Nthu yaya thsüle kesalina ma tsüpi kekinyi kemehai kesü sapi Apvüwa cüben. Keqhaikediwa na Sabbath dhitsüwa wi tsü saben. 12Nthu na asu pi kekinyi ghanan wi tsü khaghaneni zza amapi kesü ji asüpon kesü nyu ghojünkeya mangla nkemi la pi ahhansha sala mecang pi kekinyi saben. 13Nthu na tsüpi oliv deli saghu ketheng awheng kilogram keni tsü gweghe atsse pi kekinyi saben. Apvüwa na kekinyi ha kemecang han nenten. Nthu na kisengtssü la liter kesü pi tsü gweghe kekinyi sa chiben. 14Nthu na kekinyi ha sen nu Anyiza wi npi kegho chu asu ketheü tsü kemeji, kennun, nyelela pi amesa la gü ndsala. Ayen hawa ha nthu shicüthu na matsü ghaketen tsüdi wila nieben.
Matheükedhi Kho
(Scs 28.26-31)
15 #
Bvü 23.16; 34.22; Aye 16.9-12. Sabbath tsathang wi nthu na asu handhi tegüwa sengho Apvüwa kecü dhitsüwa na si wa hapta tagü saya. 16Sabbath tagüwa sa nu dhitsüwa deni ghanan wi tsü asu ketheü pi Apvüwa kekinyi salo. 17Atheghi kesüsü amesa be kenini sengho aju kemehai ntsa sapi Apvüwa cü. Amesa kesüsü na awheng kilogram keni pi azimi pi chi nu güya, nu pi asu wwi keten kekinyi atuwa sapi Apvüwa wi chiben. 18Azitenti na amesa tsü gweghe khaghaneni zza amapi kesü ji tagü, amesü süpon kesü, aneni keni, tsüthu kesüla nyu ghojünkeya mangla nkemi khuchiben. Mathu na tsüpi asu pi kekinyi nu kisengtssü pi kekinyi gweghe mecang pi kekinyi sapi Apvüwa wi chiben. Apvüwa na ha kekinyi han nenden. 19Aneni süpon kesü pi kesami ghena kekinyi sachi nu khaghaneni zza amapi kesü ji keni pi kecca ghena kekinyi sachiben. 20Keqhaikediwa na khaghaneni zza keni nu amesa gweghe pi aju kemehai ntsa sala keqhaikedithu ghena pi Apvüwa cüben. Kekinyi hathu ha metha. 21Tsü ghanan wi nthu na atsathang kekuliwa tsü mangla nsala, isala saghu nu kekinyi salo. Nthu shicüthu na matsü ghaketen tsüdi wi kahe wi hang ten lela ayen ha nieben.
22 #
Lev 19.9-10; Aye 24.19-22. Nthu na khathansha wi nthu lli wwi khe alli khutsukhuna wi asu tsü nwwila, nu nthu kheneng wa amaseng tsü nbhala; tsüthu tsüpi ketha-uthu nu asangthu cülo. Apvüwa tsüna nthu Nyiza.
Amapi Ketheü Kho
(Scs 29.1-6)
23-24Asha tagüwa wi atsathang atuwa wi kemnan tsathang kesü sa nu tutuwa khou chi lethu saghuya nu kekinyi salo. 25Atsse pi kekinyi sapi Apvüwa cü nu nthu na atsathang kekuliwa tsü mangla nsala.
Ahhanshakesa Kho
(Scs 29.7-11)
26-27 #
Lev 16.29-34. Asha tagüwa tagha ghanan wi anyithu kesami sen bvüale kesalina amapi wi keccüna kesü salo, tsü ghanan wi mangla ndsala; saghuya nu kinyi, nu atsse pi kekinyi sapi Apvüwa cülo. 28Tsü ghanan wi kekuli nsala, kepaghenanye tsüna anyithu kesami sen bvüale kesalina keccüna kesa tsathang. 29Anyi thowa na tsü ghanan wi pala dsa khe ma pi Anyiza nyi kesüle nsa laben. 30Nu tsü ghanan wi thowa na kekuli sa khe Apvüwa na ma pi shü thsüaben. 31Nthu shicüthu na kahe wi hang lela ayen ha nieben. 32Asha tsüwa wi tugu ghanan aghani du meyi na wa tagha ghanan aghani kedu kecu kemnan tsathang kemehai ha sa nu tsü tsüwi mangla dsa nben.
Kelishu Kho
(Scs 29.12-40)
33-34 #
Aye 16.13-15. Asha taghawa taghamanga ghanan wi Kelishu Kho ha sashhu nu tsüna ghanan tagü saben. 35Atsathang atuwa wi saghuya nu kekinyi sa nu nthu atsathang kekuliwa tsü mangla nsala. 36Ghanan tagü jüwi tsü atsathangla nthu na atsse pi kekinyi tsü saben. Tazen ghanan wila saghuya nu kinyi nu atsse pi kekinyi sachi. Tsüna kekinyi tsathang tsalina nthu atsathang kekuliwa tsü nsala.
37(Hathu hana keccüna khothu nthu na gweghe saghuya nu Apvüwa kinyikü wi kekinyi sa nu atsathang wila nsathu keyishü wi atsse pi kekinyi, mecang pi kekinyi, asu pi kekinyi, ahhansha kesa, nu kisengtssü pi kekinyi saben. 38Nthu na keshüthangla nthu ju khukechi, Sabbath tsathang, nthu jühkhukechi kesacen kekinyi, nu nthu kenen wina kekinyi sapi Apvüwa kecüthu miwi akho hathu ha saben.)
39Khathansha wi nthu na alli wwi khe asha tagüwa wi taghamanga ghanan wi akho ha sashhu nu tsüna ghanan tagü saben. Atsathang atuwa tsüna kemnan tsathang kemehai ntsa saben. 40Tsü ghanan wi nthu na kedsauton wi ma bi kemehai ntsa, palm chan cüna, nu achanton pogho kesa wi ma cüna keti khuya, nu Apvüwa nthu Nyiza kekinyikü wi keccüna kho ha sashhulo. 41Ghanan tagü tsü salo. Nshicüthu na matsü ghaketen tsüdi wi ayen hawa ha nieben. 42Israel nyithu tsüdila ghanan tagü apon wi hangben, 43isa nu nthu shicüthu yala Apvüwa na Ejipt wina Israel nyithu ssishhu keten wi ma mathu ya apon wi hang thsüle kesa chüya thsüle kesalina. Ma Apvüwa nthu Nyiza.
44Tsalina hati nu Mosa na Apvüwa kekinyikü wina keccüna akho kesa yenthu pi Israel nyithu cü.
Iliyochaguliwa sasa
LEVIYEN 23: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.