LEVIYEN 25
25
Amapi Tagüwa
(Aye 15.1-11)
1 #
Bvü 23.10,11. Apvüwa na Sinai Yikha wi Mosa ccüneng nu ma kiza, 2nu ayen hathu pi Israel nyithu cü thsü. Nthu na khathansha wi Apvüwa na ayyi pi nthu cüle keben witsü duya khe, nthu na Apvüwa kekinyikü wina amapi tagüwa kaghapenla ayyiwa tsü cah nben. 3Nthu na amapi tugho ghena alli wi pala pi yang, kemeshentsse lli sametha, nu tsüthu bi saghuya. 4Isala tagüwa mapi tsüna ayyi na mapi chuli mnankeya, sametha pi Apvüwa cü kesa mapi. Pala pi nthu lli wi yang nyelela kemeshentsse lli sametha nsala. 5Asu pi n-yangla ma ketanla keshhugho tsü nwwila, nu nthu na sametha nketheng kemeshentsse ton wi ma bi tsü nsaghula; tsüna ayyi na mapi chuli mnankeya mapi. 6Tsü mapi alli ncah lela kedsakejjü muyaben, nthu nu nthu nssümaghathu, nthu wi mellidsa kebenthu, asang nthu jawi hang kebenthu, 7nthu sahangthu, nu alli wi aghangsathu tsüdi ghena. Alli wi mukeya tsüdila dsaya mehai.
Pi Ma Pvüwa Kecüneng Mapi
8Amapi tagügü tagü saghu pi jügha nu tugu mapi siya. 9Tsaseng wi asha tagüwa wi tagha ghanan, Ahhanshakesa Tsathang wi anyi kesü kesun pi ayyi maben wi tutuwa khou chi thsülo. 10Hati nu nthu na deni mapiwa tsü sapi makepa sa nu lishakechi pi ayyi wi kahangthu tsüdi wi thangchilo. Ha mapi wi kheni atsanqai pi jeü ketheng tsüdi khuneng pi ma pvüwa nyelela ma shicüthu cü, nu anyi pi nssümagha sala jeü kethengwa ya ma jjen wi whaneng thsülo. 11Nthu na pala pi alli wi n-yang nyelela asu ma ketanla keshhugho tsü wwi nyelela kemeshentsse lli sa nkemetha bithu tsü saghu nben. 12Amapi chuli tsüna nthu ghena kemetha; nthu lli wi mangwa muya khe nthu na tsü ketan dsaben.
13Ha mapi wi kheni atsanqai pi jeü ketheng tsüdi khuneng pi ma pvüwa cüaben. 14Tsalina nthu na Israel nyi wi ayyi shü nyelela pi jeü lethu, khokho nkemechuli lalo. 15Alli men tsüna pi Kecüneng Mapi tuwi khaju tughu cah nu asu khaju muya ben khe tsü kenie wina saben. 16Amapi kejon ben lethu ma men kejon saben, isala amapi zeng lethu ma men la zengben; kepaghenanye pi jeü kebenwa tsüna alli wi asu muya kemehai kenie wina saben. 17No Israel nyi khokho nkemechuli lalo, isala Apvüwa nthu Nyiza jühkina nu kinyikü tenlo.
Tagüwa Mapi Ghena Sakeyishü
18Apvüwa yenthu nu ma jühkhukechithu tsüdila nie yalo, isathu nthu na ayyi ciwi yazishu hang yaben. 19Alli wi asu kejon muya nu nthu na kedsa qo benya, nu nthu na yazishu hang yaben.
20Isala anyi pahan na “Amapi tagüwa wi alli ncah nu asu nwwithu mangwa dsa nu?” tsüti keüya mehai. 21Apvüwa na tugho mapi wi sawegü pi ayyi miwi chi nu tsüna amapi keni ghena kedsa qo muya thsüben. 22Tazen mapi wi nthu na alli cah wa lethu ciwi la nthu tugho mapi wi wwikeya tsü dsaben, nu tsüna wa tsü mapi nthu na cah keben alli npi wwikeya chu dsa qo ben.
Atsanqai Pi Kecüneng
23Nthu na ayyi tsüpi anuphan ghena njeüla, kepaghenanye tsüna nthu ji nye; tsüna Anyiza ji, nthu yala asangthu ti nu tsü sen thsü keben ketanle.
24Ayyi pi jeü lethu ma pvüwa ntsawa na shü nengya kesau tsü nchüthu yishü. 25Keujüla Israel nyi kesü na hatu ntsa nu ma yyi pi jeü lethu, ma shili ghatsanwa ya tsü hangshaya thsülo. 26Anyi ma shili na tsü hangshakeya, nkemiwa ma ashiseng wi meshu-mena wa nu tsü hangsha nengya kemehai benya ben. 27Tsüti lethu wa pi Kecüneng Mapi cule kesa amapi khaju ben khe ma ma men kenie wi khuneng pi anyi tsü hangshaya kesawa cü, nu ma tsanqai tsü hangsha nengya mehai. 28Isala ma ayyi tsü hangsha nengya kemehai apisa nmi lethu, tsüna pi Kecüneng Mapi npi kecu chu anyi tsü hangshaya kesawa kwen wi benben. Tsü mapi wi tsüpi ma pvüwa ntsawa cü neng shaben.
29Anyi kesü na anyunuti khweti ketheng wi ajjen pi jeü lethu, ma pi kejeü mapi atuwa wi tsü shü nengya kesau na ben. 30Isala tsü mapi jüwi shü neng meyala lethu, ma shü nengya kesau na nmidha, nu ajjen tsüna anuphanla shüya kesawa nu ma shicüthu ji sadha; pi Kecüneng Mapi wi lela khuneng nbendha. 31Isala anyu khweti nkemi wi ajjen tsüpi alli makesü saben; ma pvüwa ntsawa na tsüthu tsü shü nengya kesau na ben, nu pi Kecüneng Mapi wi tsüthu tsü khuneng shaben. 32Isani, Levi nyithu tsü mathu nyunuti wi matsü tsüdi wi mathu tsanqai tsü shü nengya kesau na ben. 33Anyunuti hathu wi Levi nyi kesü na ajjen kesü pi jeü nu shü neng meyala lethu, pi Kecüneng Mapi wi tsü khuneng nsathu yishü, kepaghenanye Levi nyithu na mathu nyunutithu wi Israel nyithu jawi ajjen keben tsüna anuphanla mathu ji. 34Isala Levi nyi nyunutithu kevü wi amou yyi tsüpi jeükeya nmi; tsüna anuphanla mathu ji.
Pi Ketha-u Kennathsü
35 #
Aye 15.7,8. Keujüla no Israel nyi kesü ketha-u sa nu ma ketanla ma ghanja meyala nkete wi hang lethu, nthu na mellidsa keten nyi kesü kenan ti pi ma la ncüthu yishü, isa nu ma nthu kete wi hangben den. 36Ma wi kekiyi meyala, isala Anyiza jühkina nu no Israel nyi ya nkete wi hang thsülo. 37#Bvü 22.25; Aye 23.19,20. Nthu na apisa pi ma kennathsü wi kekiyi meyala, nu kedsakejjü pi ma wi kejeü wi nthu kiyi yale nsala. 38Hawa ha Apvüwa nthu Nyiza na Kanaan yyi pi nthu cü nu nthu Nyiza sale kesalina Ejipt wina nthu ssi keshhughowa jühkhukechi.
Nssümaghathu Teshikechi
39 #
Bvü 21.2-6; Aye 15.12-18. Keujüla no Israel nyi kesü ketha-u sa nu ma pi nthu wi nssümagha sala jeüchi lethu nthu na ma pi nssümagha kekuli tsü nsa thsüla. 40Ma mellidsa keten nyi kesü ti nthu gweghe ben nu pi Kecüneng Mapi npi kecu chu nthu kekuli saben. 41Tsü tsüwi ma nu ma tsangathu na nthu teshi nu ma theghi wi whaneng nu ma bamyi keben tsü ghongya ben. 42Israel nyithu tsüna Apvüwa nssümaghathu, ma Ejipt wina mathu ssi shhugho; tsalina mathu pi nssümagha sala jeü yishü. 43Mathu n-nantizen nsala, isala Anyiza jühkinalo. 44Nthu na nssümaghathu nsenthu yishü lethu, nthu kevü wi keben mizzatentithu wi shüyalo. 45Nthu na asangthu nthu jawi hang kebenthu tsangathu la shüya mehai. Nthu yyi wi pvüghakeya hati kesa tsangathu na nthu ji saya mehai, 46nu nthu na mathu teshi pi nthu tsathu cü nu mathu hangkeben chu nthu tsathu kekuli nsathu yishü. Isala nthu na no Israel nyithu n-nantizenla sayishü.
47Keujüla nthu jawi hang keben asang kesü na keban saya, nu no Israel nyi kesü ketha-u sa nu ma ketanla ma pi asang tsüwa nyelela ma theghi kesü wi nssümagha sala jeüchi lethu; 48ma pi kejeü seng wi lela ma shü nengya kesau na ben. Ma cünyuthu kesü, 49nyelela ma biza, nyelela ma theghi, nyelela ma shili ma ketsaki nyi kesü na ma shü nengya mehai; nyelela ma benya lethu ma ketanla ma shü nengya mehai. 50Ma anyi ma shüya kesawa tsü ccüneng nu manyi ma pi jeüchi kesa mapi na wa pi Kecüneng Mapi kecu khaju sadha khe siya, nu ma teshichi keten men tsüna mellidsa keten kutimen kenie wina nsathu yishü. 51-52Ma shükeya men tsü amapi khaju na npi cen khe tsü kenie wina pahan khuneng nsathu yishü, 53tsüna ma amapi kesü kenie wi melli kewa ti sa. Ma pvüwa na ma n-nantizenla nsala. 54Hati kesa wi ma nteshi chila lethu, pi Kecüneng Mapi wi ma nu ma tsangathu teshichi nsathu yishü. 55Israel nyithu na Apvüwa nssümaghathu, Israel nyi kesü anuphan nssümagha kesü sakeya nmi. Ma Ejipt wina mathu ssi shhugho; ma Apvüwa mathu Nyiza.
Iliyochaguliwa sasa
LEVIYEN 25: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.