LEVIYEN 22
22
Kekinyithu Kemetha
1Apvüwa na Mosa kiza nu 2Aaron nu ma tsathu wi khi thsü, “Nthu inyan kemethawa nyankenyen nsale kesalina Israel nyithu na hi wi kemetha kekinyi sa kechi tsü kinyikü tenlo. Hi Apvüwa. 3Nshicüthu kesüle kesü lela ma keccüna wi nmethala keben wi Israel nyithu na kemetha kekinyi sapi hi wi kechi tsü kete wi gho lethu, ma khiela kekinyipen wi kekuli sa neng nbendha. Matsü ghaketen tsüdi wi ha nieben. Hi Apvüwa.
4“Aaron shicü kesüla ma gwo wi agükedsakenaa nyelela ma gwotssü keji kebenwa ma keccüna wi npi kemetha chu kemetha kekinyi tsse tsü dsakeya nmi. Keqhaikedi kesüle kesü lela ma nkemetha kamang nyelela anyi kesü ma gwotssü keji keben 5nyelela asahang nyelela anyi nkemethawa pa lethu ma nmetha ladha. 6Anyi kesüle kesü lela nmethala kesawa ma minulen wi kecu nmethala benben, nu ma atssükizü nkesa chu kemetha kekinyi tssewa tsü dsaya nben. 7Aghani na kedu seng wi ma methadha, nu ma ma tsse kemetha kekinyiwa tsü dsaya mehai. 8Ma asahang ma ketanla keshü sa nyelela ameseng-maghang mangla dsa nben, tsüna ma sapi nmetha thsüla shaben. Hi Apvüwa.
9“Keqhaikedithu tsüdila hi ayen khukechithu ha nieben. Nyelethu mathu na sazzi lethu shüaben, kepaghenanye mathu na ayen kemetha tsü n-niela. Hi Apvüwa hi mathu sapi metha cüden.
10“Keqhaikedi theghi ketan khe kepa wi thola kemetha kekinyi tssewa tsü dsakeya nmi — keqhaikediwa gweghe benketen kijünyi le, ma denga sen keten nyi sa lela. 11Isala keqhaikediwa maghawa ma jjen wi kepvügha nyile nyelela ma apisa pi shükeya nyi sa lela keqhaikediwa na mukeya tsse tsü dsaya mehai. 12Keqhaikedi nga keqhaikedi nkenye wi n-nuwa kesawa na kemetha kekinyi tsse tsü dsakeya nmi. 13Isala ma nga nza denyile nyelela nyu ma yisha kesawa atsanga nmila kheneng gho ma ba jjen wi kheni ti hang wa lethu ma ba na keqhaikedi tsse mukeya tsü dsaya mehai. Keqhaikedi theghi ketan tsü dsaya mehai.
14“Keqhaikedi theghi nkenye anyi kesü aghandu nyela kemetha kekinyi tsse tsü dsaya lethu, ma tsü mithon tsü miwi gishü meza wi ngwe pi keqhaikediwa dhineng nsathu yishü. 15Keqhaikedi na Israel nyithu na pi Apvüwa kecüthu kemetha kekinyi tsse tsü nakhi thsü yishü, 16tsüna anyi ghameme yala tsüthu kedsa wina: hana kesazzi nu kemeten sengho anyi tsüwa cüben. Hi Apvüwa nu hi kekinyi tsü sapi metha cüden.”
17Apvüwa na Mosa kiza nu 18ayen hathu pi Aaron, ma tsathu, nu Israel nyithu tsüdi cü thsü. Khathansha wi Israel nyithu le asang Israel nyithu jawi hang kebenthu sa lela mecang pi kekinyi sa khe, tsüna ajühkhukechi kesacen sale kenen wina kekinyi sa lela, asahangwa tsüna nyu ghojünkeya mangla nkemi nsathu yishü. 19Kekinyiwa tsü yaya thsüle kesalina asüpon nyu ghojünkeya mangla nkemi nsathu yishü. 20#Aye 17.1. Keujüla nthu na asahang nyu ghojünkeya kepvü pi kinyi lethu Apvüwa na tsü ya nben. 21Khathansha wi anyi kesü kecca ghena kekinyi sapi Apvüwa cü khe tsüna ajühkhukechi kekinyi sale kenen wina kekinyi sa lela tsü keya sa thsü qo lethu asahang nyu ghojünkeya mangla nkemi pi nsathu yishü. 22Asahang anyon nkemu, accü nkemehai, nyelela accükiccü, nyelela ma gwo wi ayisü, nyelela kekhuma kaghapvüwa keben pi Apvüwa nkinyila. Asahang hati kesa pi kekinyipen wi atsse pi kekinyi ti nsala, 23Nthu kenen wina kekinyi kesa wi asahang bvüccenwa nyelela nyu ghojünkeya la pi kinyiya, isala ajühkhukechi kesacen kekinyi witsü tsüthu tsü yaya nben. 24Asahang ma mca sa nyelela pacha kesa pi Apvüwa nkinyila. Nthu yyi wi hati sakeya nmi.
25Atsse pi kekinyi kesa wi asahang asang wi sen kegho pi nkinyila. Asahang tsüti kesa tsüna nyu ghojünkeya le sa nu tsü ya nben.
26-27Khathansha wi amesü zza nyelela khaghaneni zza nyelela aneni zza ca khe ghanan tagü npi kecen tsü ma bvü wina tsü ssi nbvüla, isala tazen ghanan nten tsüpi atsse pi kekinyi sathu yaya mehai. 28Atsathang kesü wi amesü, khaghaneni, aneni lela bvütsanyi pi ahhansha nsala. 29Nthu na Apvüwa nkesengcha ghena ahhansha kesa wi nthu kekinyi tsü yaya thsüle kesalina mayenthu tsü mehaitsü nielo, 30atsse tsü dsatu pi dhitsüwa wi nthengla nu tsü ghanan dsakhilo.
31Apvüwa na khi, “Iyen khukechithu tsü nie yalo; Hi Apvüwa. 32Inyan kemethawa tsü nyankenyen nsala. Hi methale kesa Israel nyithu tsüdila nchüthu yishü. Hi Apvüwa, hi nthu sapi metha cüden; 33nu nthu Nyiza sale hi Ejipt wina nthu ssi shhugho le. Hi Apvüwa.”
Iliyochaguliwa sasa
LEVIYEN 22: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.