Ngeera 21
21
1 Mukama afuga mu̱lemi̱ nka meezi̱ ga mugira,
aguragira guheete haakendeerye.
2Kyensei̱ kya muntu akora akyeta kirungi,
bei̱tu̱ Mukama api̱ma mutima.
3 Mukama yendya akora birungi na byab̯winganiza,
kukira kumuhongera.
4Bantu babiibi bafugwa myehembo na myepanku,
byensei̱ bibyala kibii.
5Kutegeka na kwekamba kurugamwo byamugasu,
bei̱tu̱ yangu̱hi̱ri̱i̱rya kukora afooka munaku.
6Itungu lya b̯u̱gobya li̱tu̱u̱ka nka mwi̱ca,
litwala bantu mu ku̱zi̱ka.
7Mubiibi ei̱twa bikorwa byamwe,
hab̯wakubba azira kukora birungi.
8Ngesu za babiibi tiziterekeera,
bei̱tu̱ barungi bagyendera hasyanu̱.
9Hakiri oicala mu ki̱si̱i̱si̱ra,
kukira kwicala mu nnyu̱mba gi̱mwei̱ na mu̱kali̱ weizongobo.
10Babiibi beicala ni̱banyu̱mi̱rwa kukora bibiibi,
tibali na gibakwatirwa kisa.
11Mu̱gayi̱ wafubirwa ntwarwa nigimwegiraho,
Mu̱gezi̱ b̯wahab̯urwa niyetegereza.
12Ruhanga eicala murungi yeegi̱ri̱ bya mu maka ga gabiibi,
kandi alibafubira.
13Muntu yensei̱ asuula kwegwa kutaaga kwa munaku,
nayodede alitaaga atali naaku̱mwi̱ramwo.
14Muntu wakuzingalira,
weegu̱lab̯wegu̱li̱ ki̱cei̱cei̱ ku̱mu̱holaholya.
15Bantu barungi basemereerwa bintu b̯ubikorwa mu b̯winganiza,
bei̱tu̱ babiibi babaleetera b̯u̱ti̱i̱ni̱.
16Akweti̱ gutalimwo ka b̯untu,
alyezagya nali mu kitebe kya baku̱u̱.
17Eicala mu kwegonza alinakuhara,
anolerwa maaci na bi̱syeke tali̱gu̱dahara.
18Babiibi bagweb̯waho b̯ujune
b̯ubabba ni̱bakwendeerya barungi.
19Hakiri oicala mwihamba,
kukira kubba na mu̱kali̱ weizongobo kandi wa ki̱ni̱ga.
20Muntu wa magezi̱ abba neitungu na bintu bya muhendu,
bei̱tu̱ badoma nsimbi zaab̯u bazimala nibacakazitunga b̯u̱tu̱ngi̱.
21Yogwo afaaho kukora birungi na bya mbabazi̱,
alitunga b̯womi b̯urungi, hamwei̱ na ki̱ti̱i̱ni̱sa.
22Muntu wa magezi̱ asi̱ngu̱ra rub̯uga lwa ba maani,
naabinya kigo kyalwo kibesiganga.
23Muntu yeegyendereza mu bigambu byabaza,
yeejuna yenkei kuruga mu kabii.
24Mu̱gayi̱ lyolyo ibara lya muntu yeetembatembya,
kandi wa myebbuno yooyo akukora bintu na myepanku.
25Mugarei ei̱twa kwegomba kwamwe,
hab̯wakubba ti̱yendya kukora.
26Muntu mubiibi abba na mururu gwakutunga bintu binene b̯uli kiro,
bei̱tu̱ muntu murungi eicala nagaba.
27 Mukama ti̱yendya kihongwa kya muntu mubiibi,
kukira maani b̯ukileetwa na kigyendeerwa kitali kirungi.
28Kei̱so wa b̯u̱gobya ali̱zi̱ka,
bei̱tu̱ wa mazima, balyetegeerya bigambu byakubaza.
29Muntu mubiibi yeetwala kubba murungi,
bei̱tu̱ kandi murungi yeegyendereza mihanda myamwe.
30Tihaloho magezi̱, kwetegereza, rundi kyakulamba kya muntu,
kukusobora ku̱si̱ngu̱ra Mukama.
31Muntu naasobora kutekaniza mbaraasi zaaku̱lwani̱sya b̯ulemu,
bei̱tu̱ b̯u̱si̱ngu̱zi̱ b̯uruga hali Mukama.
Iliyochaguliwa sasa
Ngeera 21: LUGUNGU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025, Wycliffe Bible Translators, Inc. All rights reserved.