Ngeera 20
20
1Maaci gatogolokira baganywi̱,
bagatamiira bafooka badoma.
2Mukama waakwatwa ki̱ni̱ga ahuruguma nka ntali,
amuzingaalya yeeleetera lu̱ku̱u̱.
3Kwehala kukuuta mpaka kya ki̱ti̱i̱ni̱sa,
yendya kuzongoba abba mudoma.
4Mugarei mu kibbaga,
atoolya kya kukesa mu kyanda atakukiwonaho.
5Mutima gwa muntu gwisana ndi̱ha,
mwetegerezi̱ agutoolamwo biteekerezu.
6Banene bazooka nka ba mbabazi̱,
ti̱kyangu̱hi̱ri̱ kwagya mwesigwa.
7Murungi agyendera mu b̯winganiza,
mu̱gi̱sa gwamwe guhondera baana baamwe.
8Mukama weicaara kusala misangu,
ali̱ngani̱a kirungi na kibiibi.
9Naani akusobora kukoba nti, “Mutima gwange gu̱syanu̱,
tindi na kibii kindi kyensei̱”?
10 Mukama, anoba
bakoresya ndengu na bi̱pi̱myo bya b̯u̱gobya.
11Bikorwa bya muto, byolokya kyani kyali,
okusobora kwetegereza yaabba nali murungi rundi mubiibi.
12Mapokopo geegwa na mei̱so gawona,
byensei̱ Mukama yooyo yaabi̱hangi̱ri̱.
13Alaala atakumala eicala mu nnaku,
abyoka naakora abba na bidyo binene.
14Mu̱gu̱li̱ aramura naakoba, “Oku̱syera, oku̱syera,”
b̯wamala kugula agyenda niyeehariiza kwakomi̱ri̱ b̯u̱komi̱.
15Kyamugasu hoi̱ kubba na kwetegereza,
kukira kubba na zaabbu na mahi̱ga ga muhendu.
16B̯wema b̯wa ategebeerwe, b̯uli na kusembwa musimbo,
asagika munyamahanga alinakumusasulira.
17Mudya byab̯u̱gobya bimunolira hoi̱,
hei̱nyu̱ma bimufokira nka musinyi mu mu̱nwa.
18Kyotoleerya magezi̱ mwa ku̱si̱ngu̱ra,
lwani̱sya otunge akukulamba.
19Mucwa makuru talinda nsita,
weehalenge wa ndimi ibiri.
20Mu̱lu̱ma bbaawe rundi maawe,
ali̱kwa nka taara gi̱lu̱mi̱ra mu nti̱ti̱.
21Itungu li̱i̱za b̯wangu,
hei̱nyu̱ma tilibba na mugasu.
22Leka kukoba, “Nkwi̱za kumusasula kibii nkyankoori̱!”
Bi̱kwatye Mukama, akwi̱za kukucungura.
23 Mukama annoba bi̱pi̱myo bya b̯u̱gobya,
ndengu zibiibi tazendya.
24 Mukama yooyo ategeka malibatire ga muntu,
muntu ki akusobora kwetegereza muhanda gwa b̯womi b̯wamwe?
25Otalikwatwa mutegu gwa ku̱rangu̱hi̱ri̱i̱rya kweraga hali Mukama,
hei̱nyu̱ma okezu̱zu̱kya!
26Mukama ali na magezi̱ ali̱ngani̱a muntu mubiibi,
naamufubira atakumuganyira.
27Mwozo gwa muntu gwisana taara gya Mukama,
gimuluka nsita za mu mutima.
28Ngonzi na b̯wesigwa bilinda mukama,
b̯u̱lemi̱ b̯wamwe b̯wemeera ku b̯urungi b̯wamwe.
29Maani ga basigazi googo ki̱ti̱i̱ni̱sa kyab̯u,
b̯urungi b̯wa bagu̱lu̱u̱su̱ b̯wicala mu mbwi̱ zaab̯u.
30Bihuta bya njunju bigorora ngesu zibiibi,
kukuutwa kujanjaba mutima.
Iliyochaguliwa sasa
Ngeera 20: LUGUNGU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025, Wycliffe Bible Translators, Inc. All rights reserved.