Ngeera 22
22
1Ibara lirungi balyendya kukira itungu,
ki̱ti̱i̱ni̱sa kikira kubba na feeza rundi zaabbu
2Mu̱gu̱u̱da na munaku bali na habarombi̱ra,
bensei̱ Mukama yooyo yaabahangi̱ri̱.
3Akwetegereza awona kabii ni̱kakwi̱za niyebbala,
bei̱tu̱ ntwarwa gyecoberab̯wecoberi̱ nigiwonawona nakyo.
4Mu kub̯undaara, na ku̱ti̱i̱na Mukama
heicalamwo mpeera gya b̯u̱gu̱u̱da, ki̱ti̱i̱ni̱sa, na kwomeera.
5Muhanda gwa babiibi gwicalamwo mahwa na mitegu,
mweri̱ndenge mumyehale.
6Weegesya mwana ngesu zaakusemeera kwicala nazo,
nab̯walibba ahandi̱ri̱ atalizeebeera.
7Ali neitungu afuga munaku,
mwehori̱ akoora mu̱mu̱hori̱.
8Asiga gitalimwo b̯winganiza, akesa mi̱hi̱to,
na b̯ubiibi b̯wamwe b̯ulimumalika.
9Kya mu̱gi̱sa kubba mwenda,
hab̯wakubba mwenda abagana bidyo byamwe na banaku.
10Abinga wa migayo abba abi̱ngi̱ri̱ ntaru,
izongobo na bi̱lu̱mo bi̱kwi̱za kumalika.
11Yendya mutima gu̱syanu̱, naakubaza na mbabazi̱,
yooyo mukama gyanywana.
12Li̱i̱so lya Mukama li̱tolereerya mananu,
kyokyo anuga b̯u̱nu̱gi̱ bigambu bya bagobya.
13Mugarei akuweera, “Ntali gili hanzei,
gi̱i̱za ku̱nzi̱ti̱ra mu ngu̱u̱do.”
14Kanwa ka mu̱kali̱ mwenzi̱ b̯u̱hya,
akyeneerwe Mukama, ali̱b̯u̱gwamwo.
15Kyab̯uhangwa mwana muto kukora byab̯udoma,
bei̱tu̱ kakubba afubirwa atungamwo kakwetegereza.
16Awonawonesya banaku mwa kugudahara, na agabira bagu̱u̱da bintu,
bensei̱ balinakuhara.
Bigambu bya Magezi̱
17B̯wegwanga bigambu bya magezi̱,
otenge mutima ha bi̱nyeegesya,
18hab̯wakubba kirungi b̯woli̱bi̱zu̱u̱ka,
okabyatulanga na kanwa kaamu.
19Nkwendya wesige Mukama,
kyokyo mbi̱ku̱wereeri̱ kiro kiki,
20Nku̱handi̱ki̱i̱ri̱ bigambu birungi maku̱mi̱ gasatu,
bikuhab̯ure kandi bikuhe kwetegereza.
21Bi̱kwegesye mananu na b̯wesigwa,
mwomwo oliweera banyakubikutuma byotoori̱mwo.
Kyakubanza
22Otalinyaga munaku hab̯wakubba talinaho,
kandi otali̱wonawonesya museege mwicwero lya musangu,
23hab̯wakubba Mukama alibatongoniira,
naanyaga bakubanyaga.
Kya kabiri
24Otalinywana muntu akwatwa ki̱ni̱ga,
habbe ku̱di̱da na wa b̯usungu b̯wa b̯wangu,
25aleke oteega mize myamwe,
okagwa mu kabii.
Kyakasatu
26Otalibba omwei̱ hali bab̯wo beehayo nibeeraga,
rundi nibeemeera mabanza ga bandi,
27b̯wolikalemwa kusasula,
ntabbu gyamu gyolalira gyogyo balitwala.
Kyakanei
28Otali̱segu̱li̱i̱rya mubaga gwa kadei na kadei,
gwa bahaaha baamu baateeri̱ho.
Kyakataanu
29Akora mulimo gwamwe kurungi yeetonera na bakama,
teicaara na bantu ba b̯uli kiro.
Iliyochaguliwa sasa
Ngeera 22: LUGUNGU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025, Wycliffe Bible Translators, Inc. All rights reserved.