Romanos 2
2
Díos nchekito̱exín ti ijie̱ tjasin chojni
1 #
Mt. 7:1; Lc. 6:37. *Jahara tjénka̱yáxinra tjánchíára iji̱é íso chojni, kjánchó ti nkokón ti ijie̱ tjásinra, ¡la kohya nkehe tsjaxíra!, kixin ti tjéyára iji̱é íso chojni la tsjasótera kja̱xinra kixin jahara nkokón ti ijie̱ ichꞌera. 2Ó noheni kixin Díos la ndoá nchekito̱exín ti ijie̱ ti ó nchekjasóte chꞌan ti sin tjasin ijie̱. 3Jahara, la tꞌékara ijie̱ íso chojni, kjánchó jahara kja̱xin xi̱kaha ti ijie̱ tjásinra. ¿Á tjénka̱yáxinra kixin tsjachara tsinkehéra Díos ti ó sinchekjasótiara chꞌan ní? 4Díos la imá jína tja̱ko̱xi̱n kixin tjechóhen chꞌan, na̱xa̱ nínkakuanhñara chꞌan. A̱ndá jahara, ¿á kjo̱niehéra#2:4 kjo̱niehéra menospreciar chꞌan kixin tiénxinhñara kixin imá tjua̱hára chꞌan ní? Xi̱kaha tjokahya nínkaon chꞌan kixin tjinkaon chꞌan kixin chrókui̱to̱héra ti nkehe jínahña tjénka̱yáxinra. 5Kjánchó jahara la imá icha a̱sánra, la tjinkákonhñara chrókui̱to̱héra ti nkehe nduáhya tjénka̱yáxinra. Méxra̱ a̱ntsí nchekꞌánkíra ti ijie̱ kuèntára tsjasótiaxínra ti ña̱o tsjixixín ti ó tsja̱ko̱xi̱n Díos kixin chaxín sinchekjasóte chꞌan chojni. 6#Sal. 62:12; Pr. 24:12.*Ti ña̱o a la Díos tsje̱nke̱he nkojnko chojni éxi ti ixra̱ kjuíchꞌe sin. 7Tsjajon chꞌan kjuachón nkochríxín tsꞌáyéhe̱ ti sin kjuíchꞌe ixra̱ jína kixin xi̱kaha kjueyá sin ti nkehe náxrjón tjeje̱hya la ko ti kjuachaxin tsꞌitjáñahña. 8A̱ndá sinchekjasóte chꞌan kaín ti sin jínahña, tjinkakonhña kuitekaon ti nkehe chaxín, la a̱ntsí kóxríhi̱n sin ichꞌe sin ti nkehe jínahña. 9Mé xi̱kaha tsjasóte kaín ti sin kjuíchꞌe ti nkehe jínahña la kjuaxróxinhña tsꞌejó sin, sa̱o ti sin judío la ko kja̱xin ti sin jehya sin judío. 10A̱ndá Díos tsjajon kjuachaxin la ko kjuaxróxin, la ko tsjikosáyehe chꞌan kaín ti sin kjuínchexiteyá la ko kjua̱ko̱xi̱n ti nkehe jína, sa̱o ti sin judío la ko kja̱xin ti sin jehya judío, 11#Dt. 10:17.*kixin Díos la tꞌikon kixin kaín chojni la nkokón sínkí. 12Méxra̱ kaín ti sin tjasin ijie̱ chóntahya sin ti ley kꞌuáyéhe̱ Moisés la itsꞌen sin kixin ti ijie̱ kjuasin sin, kjónté chóxinhña sin ti ley. Kjánchó ti sin ó nohe ti ley kꞌuáyéhe̱ Moisés, ndá na̱xa̱ tjasin ijie̱, la ti ley mé tsjanchia ijie̱ tsjasótexín sin. 13Jehya ti sin tihón ti ley ndá chóntahya sin iji̱é. Náhí. Ti sin nchexiteyá ti nkehe kꞌue̱to̱an Díos tsjìin ti ijie̱ chónta sin. 14Kixin ti ijnko chojni jehya judío chónhña ti ley ndá a̱sén sin tꞌaxrjeníxin kixin sichꞌe sin ti nkehe tꞌe̱to̱an ti ley, kjónté jehya sin kꞌuáyéhe̱ sin ti ley. 15Mé xi̱kaha tja̱ko̱xi̱n sin kixin nkaya a̱sén sin chónta sin ti ley la ko a̱sén sin tsjanchankíhi sin á jína tjejó sin o̱ náhí. 16Ti ó itsi ti ña̱o tsjixixín, la kjuachaxíen Ìnchéni Jesucristo, Díos mé sinchekito̱exín kaín ti nkehe imó kjuénka̱yáxin chojni éxi nixja ti itan jína tjàkua janhan.
Ti sin judío la ko ti ley kꞌuáyéhe̱ Moisés
17A̱ndá ndáchrora kixin jahara la chojni judíora la titekáonra ti ley tsíkꞌayéhe̱ Moisés la ko nchehnkera kixin tinkachónkira Díos. 18Ó nohara ti nkehe tjinkaon Díos la ko ti ley ó tja̱ko̱hara kixin chrókjuéyára ti nkehe jína. 19Ihnkera kixin jahara mé nohara tsjákohéra ti sin tꞌikonhña la ko jahara mé ti xrohi tsꞌinkaséñaxín ti sin ixri ti nti̱a sítie, ichrora. 20Ndáchrora kixin nohara tsjákohéra ti sin noehña la ko tsjínki̱tsara ti sin tienxínhña kixin jahara chontara ti ley chronka ti kjuaxrexinkaon jína la ko ti nkehe chaxín. 21Jahara tjákohéra íso chojni ndá, ¿nkekuènté tjákoéhyara a̱sánra xi̱kaha? Jahara tjákohéra chojni kixin chrókueéhya sin, ndá jahara, ¿nkekuènté te̱era? 22Ti jahara ndáchrora kixin ijnko chojni ó tsíkóte̱he la í xitjahya tsochónta íjnko chojnichjin ndá, ¿nkekuènté xi̱kaha ichꞌera? Ndáchrora kixin titekákonhñara ti nkehe tsíkjano̱ña, kjánchó jahara te̱era ti nkehe tjete siín nkaxehen ni̱nkué sin. 23Nchehnkera kixin chontara ti ley, ndá chontehyara kjuasàya Díos kixin nchexiteyéhyara éxi tꞌe̱to̱an ti ley. 24#Is. 52:5.*Ndoá ndáchro ti xroon itén Díos: “Ti sin jehya judío la tꞌándaxíhi̱n sin Díos kixin ti ijie̱ tjásinra.”
25Ti chaxín chrókjui̱nchexiteyára ti ley kꞌuáyéhe̱ Moisés, la jehya chónkó ti xro̱ye tsíkara. A̱ndá ti nchexiteyéhyara ti ley la éxi tsíkahyara ninkehó xro̱ye xi̱kaha. 26A̱ndá ti sin tsíkahya ti xro̱ye, la ti tsitekaon sin ti nkehe tsíkꞌe̱to̱an Díos, la tjejó sin éxi ó tsíka sin xro̱ye, kjónté chóntahya sin. 27A̱ndá ti nkexro kuáhya ti xro̱ye a̱ndá nchexiteyá ti ley, mé tsjanchia sin ijie̱ kixin jahara kuitekákonhñara, kjónté chontara ti xroon ley la ko kjónté ó tsíkara ti xro̱ye ndá kjui̱nchexiteyáhyara. 28Kixin ti ndója ó chontara ti xro̱ye la chaxínhña judíora, la ko ti xro̱ye tsíkara ó la jehya chritaón cuerpo kuèntára ó chróchontara. 29#Dt. 30:6.*Náhí. Ti chojni chaxín judío la ticháxi̱n chróchónta sin ti xro̱ye nkaya a̱sén sin. Jehya ti ley chrókꞌue̱to̱an kixin xi̱kaha chrókóhen. Tíha la ijnko nkehe tsjajon Ncha̱kuén Díos. Ti nkexro xi̱kaha itjen la jehya chojni tsondáchro kixin ndoá tjejó sin; Díos mé tsondáchro tíha.
Iliyochaguliwa sasa
Romanos 2: poeNTplus
Kuonyesha
Shirikisha
Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.