Romanos 3
3
1¿Xá nkekuènté kixin imá tjetoan ti sin judío la ko xá nkekuènté kixin imá sínkí ti tsíka sin xro̱ye? 2Chaxín imá tjetoan tíhi kixin Díos kjuajon ti itén chꞌan sa̱oxín kꞌuáyéhe̱ ti sin judío. 3A̱ndá, ¿nkehe tso̱hen ti nkojín ti jehe sin chrókjuinchexiteyáhya sin? Ti xi̱kaha la, ¿á chrókjuinchexiteyáhya Díos ti nkehe tsíndáchro chꞌan ní? 4#Sal. 51:4.*Kjá náhí. Díos la sinchexiteyá kaín ti nkehe tsíndáchro kjónté kaín chojni chrókjuichꞌia sin. Ndáchro xroon itén Díos:
Tsondáchro chojni kixin jína ti nkehe ndáchrua, jaha Díos.
La tsjácha kjónté chojni tsꞌeka ijie̱ ti jaha.
5Chaxín kixin ti ijie̱ chóntani mé tja̱ko̱xi̱n kixin Díos la jína, ¿a̱ndá nkehe chróchroni? ¿Á nduáhya chrókjuíchꞌe Díos kixin chrókjuinchekjasóte chꞌan ti jeheni ní? (Janhan níxja éxi nixja chojni ó.) 6Kjá náhí. Kixin ti chrókójehya ijnko nkexro jína ti jehe chꞌan, ¿ndá nkexrín chrókjuinchekito̱exín chꞌan iji̱é chojni chjasintajni? 7A̱ndá nkojín chojni chróndáchro: “Ti tjinki̱tsa ti nkehe nduáhya ichꞌeni kixin xi̱kaha a̱ntsí ti kjuachaxin kuènté Díos, ¿ndá nkekuènté chrókjuanchia Díos ijie̱ ti jeheni?” 8Ti xi̱kaha la, ¿á ncho̱xon chrókjuíchꞌeni ti nkehe jínahña kixin chrókui ti nkehe jína ní? Mé xi̱kaha iso chojni tꞌeka ijie̱ ti jeheni kixin ndáchro sin kixin xi̱kaha tjakoni; méxra̱ ti sin a la chrókjuasóte sin kixin xi̱kaha ichro sin.
Kaíni chóntani ijie̱
9¿A̱ndá nkexrín? Jeheni judíoni la, ¿á a̱ntsí jínani ke ti íso ní? Kjá náhí kixin ó ndáxrja̱n kixin kaíni, á chojni judío o̱ náhí, la kaíni nkokón tjasini ijie̱. 10#Sal. 14:1-3; 53:1-3.*Ndáchro xroon itén Díos:
Kohya ninkexró chrókjuíchꞌe ti nkehe jína, ni ijnko sin kohya.
11Kohya ninkexró tienxín,
kohya ninkexró chrókjueyá Díos.
12Kaín chojni kjuíchròe sin la ko kaín chojni sákjuí sin ti nti̱a jínahña.
Kohya ninkexró chrókjuíchꞌe ti nkehe jína, kohya ni ijnko chojni jína.
13 #
Sal. 5:9;
Sal. 140:3. *Ti chríkojin isin ti chojni la éxi ijnko tòye̱ tsíkji̱xravá chojni tsíxitje̱he̱ xi̱kaha
kixin ti ñejen sin chꞌiyaxín sin.
La ti irꞌua sin la chónta éxi ti veneno kuènté konche.
14 #
Sal. 10:7. *Ti irꞌua sin la síkaón nkehe jínahña la ko kjuanínkaon,
15 #
Is. 59:7, 8. *la xritinká sin kixin tjinkaon sin chrókꞌóñá sin chojni.
16Ti nkehe jínahña tjasin sin mé sinchekꞌitjáña chojni la ko tsji̱ka̱o ti kjuaxróxinhña
17la chónhña sin ti nti̱a tjajon kjuaxróxin,
18 #
Sal. 36:1. *la ko chrakuenhña sin Díos.
19Ó noheni kixin ti nkehe ndáchro ti ley la tꞌe̱tue̱hen kaín ti sin tinkáchónki tíhi, kixin kaín chojni chjasintajni tsotání sin kixin ó nohe sin kixin chónta sin ijie̱ la Díos sinchekito̱exín ti iji̱é sin. 20#Sal. 143:2; Gá. 2:16.*Ninkexró tsjachahya tsꞌóxika ti iji̱é ti jehó nchexiteyá ti ley. Ti ley la jehó tjinki̱tsa kixin tso̱noexíni kixin chóntani ijie̱.
Tsaáni kixin tinkáchónkini Cristo
21Méxra̱ jehya ti ley tsaáxini. Náhí. Ó kónoxín kixin Díos sinchekaá ti jeheni la kja̱xin ti xroon chónta ley la ko ti nkehe nixja ti sin profeta la ó chrónka xi̱kaha. 22#Gá. 2:16.*Tso̱xika iji̱éni kixin titekaoni Jesucristo, mé xi̱kaha sinchekaá Díos kaín ti chojni tsitekaon, kixin tꞌikon chꞌan kixin nkokón sínkí kaín chojni. 23Kixin kaín chojni kjuasin ijie̱ la tsjachahya sin tsꞌikon sin ti kjuachaxin ijié kuènté Díos chrókuaáxin sin. 24A̱ndá kjuasáye Díos kixin Cristo Jesús kꞌuenyákohe̱n ti jeheni la xi̱kaha tsoxika ti iji̱éni. 25Díos mé ichrꞌán chꞌan Cristo, la kuamá chꞌan ti iji̱éni, kꞌuenyákohe̱n chꞌan ti jeheni kixin chrókuitekaoni chꞌan ndá chrókuaáni. Mé xi̱kaha Díos kjua̱ko̱xi̱n kixin ndoá kjuénka̱yáxin chꞌan kixin kónínkakonhña chꞌan, kjónté nchónhña ijie̱ kꞌuéchóntani senó. 26La kja̱xin kjua̱ko̱xi̱n Díos kixin jína chꞌan kixin na̱xa̱ tjechóhen chꞌan tsꞌóxika chꞌan iji̱é ti sin tsitekaon Ìnchéni Jesús.
27A̱ndá, ¿nkekuènté chrókjuinchejié a̱séni? Kixin xitjahya sinchejié a̱sén chojni nkayakon Díos kixin jehya jeheni kjuachani kjuínchexiteyáni ti nkehe kꞌue̱to̱an ti ley kuènté Moisés, ndá kuaáni. Náhí. Kuaáni kixin titekaoni Ìnchéni. 28Mé xi̱kaha ó noheni kixin tsoxika ti iji̱éni kixin titekaoni Díos kixin Díos la tahya kuentá á kjuínchexiteyáni ti nkehe kꞌue̱to̱an ti ley o̱ náhí.
29¿Á Díos la Díos kuènté ti sin judío ó ní? ¿Á kja̱xinhña Díos kuènté ti sin jehya judío ní? Kjá kja̱xin. 30#Dt. 6:4; Gá. 3:20.*Kixin kohya íjnko Díos la Díos mé tsꞌóxika iji̱éni kixin tinkáchónkini chꞌan la ko tsjehya chꞌan á chóntani xro̱ye o̱ náhí. 31A̱ndá ti tinkáchónkini Ìnchéni la, ¿á sínkíhya ti ley ní? Kjá na̱xa̱ sínkí. Ti titekaoni Díos mé xi̱kaha tja̱ko̱xi̱ni kixin imá sínkí ti ley.
Iliyochaguliwa sasa
Romanos 3: poeNTplus
Kuonyesha
Shirikisha
Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.