Romanos 1
1
Chꞌin Pablo ikjin xroon kꞌuáyéhe̱ ti ni̱nko Roma
1Janhan Pablo ikjian ti xroon i, janhan tꞌa̱ha̱ ixra̱ Jesucristo kixin Díos kjueyána kixin si̱tꞌaha̱ chꞌan ixra̱ tsjàkua ti itan jína tsaáxini.
2Ti itan i tsíchronka Díos senó éxi nixja ti xroon nixja̱xi̱n ti sin tsíchronka itén chꞌan ósé. 3Tíhi mé chronka nkexrín itjen Ìnchéni Jesucristo Xje̱en Díos. Jehe chꞌan mé tsíkꞌóna chꞌan chojni la kꞌuaxrjeníxin chꞌan ti sin tsíkꞌaxrjeníxin ti rey David. 4Ti kjuachaxin ijié kuènté Ncha̱kuén Díos imá tjóá mé kjua̱ko̱xi̱n kixin Jesucristo mé chaxín Xje̱en Díos kixin ó xechón chꞌan. 5Kjuasáye Jesucristo la kꞌuáyéhe̱ni kjuachaxin kixin sátsjichronkani ti itén chꞌan kixin kaín chojni chjasintajni, chrókuinkáchónki sin chꞌan la ko chrókuitekaon sin. 6Jahara kja̱xin kꞌuéchonhñara Díos, a̱ndá Díos kjueyá ti jahara kixin chrókuitekáonra Jesucristo.
7Janhan ikjian ti xroon i chrꞌahánra kaínra tjejora chjasin Roma. Díos tjua̱hara la ko kjueyára kixin tjóá chrókꞌuejora. Itꞌéni Díos la ko Ìnchéni Jesucristo sintañaora la ko tsotjáhara chꞌan kjuaxróxin.
Pablo tjinkaon tsitsjehe ti chjasin Roma
8Sa̱o tja̱ha̱ Díos kjuasáya kjuachaxíen Jesucristo kixin ti jahara, kixin nkuíxín chjasintajni nixja sin nkexrín tinkachónkira Díos. 9Janhan tꞌa̱ha̱ ixra̱ Díos kaín a̱sená kixin xrja̱nká ti itan jína kuènté Xje̱en chꞌan. Díos mé nohe kixin xráxín xráxinka̱oan ti jahara ti ó nixja̱ha̱ chꞌan. 10Xráxín tjáncháha̱ Díos kixin, ti chrókjuajon chꞌan kjuachaxin, la chrókjuasántsjahára. 11Mé xi̱kaha tjínka̱oan chrókjuasántsjahára kixin chrókjuinki̱tsa ti jahara kixin chrókꞌuitjára nkexrín a̱ntsí ndoá chrókꞌuejora. 12Mé xi̱kaha tso̱cháhara la ko tso̱chàna kixin nkoko̱a tinkáchónkini Ìnchéni, jahara la ko janhan.
13 #
Hch. 19:21. *Kíchóni, tjínka̱oan chrókónohara kixin nchónhña ña̱o kjuénka̱yáxian chrókjuasántsjahára, kjánchó na̱xa̱ xitjahya tsjasán. Tjínka̱oan chrókjuasán kixin chrókjui̱tꞌa ixra̱ kuènté Ìnchéni kixin chrókjuácha nchónhña chojni chrókuinkáchónki Díos ti tjejora, éxi ti kjuácha kjuínki̱tsa itsjé chojni íso chjasin ti na̱xa̱ chónhña sin Díos. 14Ticháxi̱n tsjákoha̱ kaín chojni, á sin griego la o̱ jehya sin griego o̱ á chojni nohe o̱ chojni noehña. 15Mé xi̱kaha tóxakona chrókjuasán chrókjuákohara ti itan tsaáxinra jahara tjejora chjasin Roma.
Ti kjuachaxin kuènté ti itan jína
16 #
Mr. 8:38. *Tósuàna̱hña xrja̱nká ti itan jína kixin tíha chónta kjuachaxin kuènté Díos chrókuaáxin kaín ti chojni chrókuitekaon, mé sa̱oxín ti sin judío la ko kja̱xin ti sin jehya judío. 17#Hab. 2:4.*Kixin ti itan jína kuènté Díos tja̱kue̱xi̱n ti jeheni kixin Díos tꞌikon chꞌan kixin tjóá ti sin tinkáchónki Jesucristo. Éxi ndáchro ti xroon itén Díos: “Ti nkexro kótjóá kixin kuitekaon Díos mé tíha tsꞌejóchónxin sin.”
Ti ijie̱ chónta chojni
18Díos itjen nkaya nka̱jní mé tja̱ko̱xi̱n kixin imá nínkakohen chꞌan ti sin tjasin ijie̱, la nchekjasóte chꞌan ti sin tjenka̱yáxin ti nkehe jínahña kixin tꞌinkákonhe̱n sin kixin chrókónohe chojni ti nkehe chaxín jína. 19Jehe sin ó nohe sin jína nkexrín itjen Díos kixin jehe chꞌan kjua̱ko̱he̱ chꞌan ti jehe sin. 20Kjónté tꞌikonhñani Díos, la noexíni ti kjuachaxin kuènté chꞌan kixin ti nkehe kjuíchꞌéna chꞌan. Kixin ti kꞌóna ti chjasintajni kónoxín kixin jehó chꞌan mé Díos tꞌe̱to̱an la ko chónta chꞌan kjuachaxin nkochríxín. A̱ndá ti sin jínahña xitjahya tsondáchro sin kixin noehña sin tíha. 21#Ef. 4:17, 18.*Kjónté nohe sin kixin itjen Díos, la tjikosayéhya sin chꞌan éxi ijnko nkexro tꞌe̱to̱an, la ko chjéhya sin chꞌan kjuasáya. La sákjuichroexi̱n sin ti nkehe tjenka̱yáxin sin ninkehó sínkíhya, la kólo̱nti̱ sin, tjejó sin ti sítie. 22Ndáchro sin kixin imá nohe sin, kjánchó imá lo̱nti̱ sin. 23#Dt. 4:16-18.*La ó kjuinkí sin ti nkehe tjenka̱yáxin sin la í chjéhya sin kjuasáya ti Díos itjen nkochríxín. La kjuikosáyehe sin ti nkehe tsíkjano̱ña tsíkꞌóna éxi chojni itꞌen la ko tsjehe éxi koxroxe, konche la ko iko chónta noó to̱té.
24Méxra̱ Díos la kuíto̱he ti jehe sin kixin sichꞌe sin ti nkehe jínahña tjenka̱yáxin sin, ndá xi̱kaha chꞌehe sin kícho sin ijnko nkehe kjuatosuéhe̱. 25Kixin jehe sin kuítekakonhña sin ti nkehe chaxín kuènté Díos, la kuitekaon sin ti kjuachꞌia. Kjuíchꞌéna sin díos kuènté sin ti nkehe tsíkjichꞌéna Díos, la kjuikosáyehya sin ti Díos kjuíchꞌéna kaín nkehe. Ti nkexro tꞌáyéhe̱ kaín kjuasàya nkochríxín. Mé xi̱kaha tso̱hen.
26Mé xi̱kaha Díos kuíto̱he ti jehe sin kixin chrókjuíchꞌe sin ti nkehe chrókósuèxín sin. La ti chojnichjin la nkokón ichjin sin kóxríhi̱n kícho sin. 27La kja̱xin ti chojnindoa la kuíto̱he sin ti chojnichjin la tjinkaon sin ti nkehe nduáhya. La nkokón ndoa sin chónta kícho sin la tjasin sin ijie̱ chrókósuèxín sin. Mé xi̱kaha ijie la tsjasóte ti nto̱e sin kixin ti ijie̱ kjuasin sin.
28Méxra̱ tjinkakonhña sin chróxraxinkaon sin Díos, ndá jehe chꞌan kuíto̱he chꞌan ti jehe sin kixin xi̱kaha kjuénka̱yáxin sin ti nkehe jínahña la ko ichꞌe sin ti nkehe nduáhya chrókjuichꞌehya sin. 29Nchónhña ijie̱ chónta sin, la xi̱kaha ichꞌe sin ti nkehe nduáhya, takja sin íjnko chojnichjin jehya ichjién sin, la ko kaín nkehe náxrjónhña ichꞌe sin, tjinkaon sin jehó sin tsochónta sin itsjé nkehe, chjio sin, la ko tjinkaon sin chrókꞌóñá sin kícho sin, itje sin kjuanínkaon, la chꞌia sin la ko chji̱no̱xíhin sin la ko xriko sin kjuachꞌia. 30Tꞌántaxíhi̱n kícho sin la nínkakohen sin Díos, la tjinkaon sin jehó sin chrókꞌue̱to̱an sin, la imá ihnke sin, la ko jehó sin chꞌéna sin nkehe jínahña tjasixín chojni ijie̱, la ko tjikosayéhya sin itꞌé sin la ko ìñé sin. 31Tienxínhña sin la nchexiteyáhya sin ti nkehe nixja sin, la ko tjue̱hya kícho sin, la ko ti̱konoéhña kícho sin. 32Jehe sin ó nohe sin jína nkexrín kꞌue̱to̱an Díos, la ó nohe sin kixin ti ijie̱ kjuasin sin chrókꞌuenxín sin, la kjónté xi̱kaha la na̱xa̱ tjasin sin ijie̱, la kja̱xin chéhe̱ sin tꞌikon sin ti íso chojni tjasin ijie̱.
Iliyochaguliwa sasa
Romanos 1: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
