ᒉᓂᓯᔅ 49
49
ᐃᔅᕒᐃᔭᓬ ᐃᔥᒀᒡ ᑳᑮᐃᓈᒡ ᐅᑯᓯᓴᐞ
1ᒉᑲᑉ Jacob ᐃᑕᔥ ᐅᑮ ᐊᑐᒫᐞ ᐅᑯᓯᓴᐞ ᐁᑮᐃᓈᒡ, ᒫᒪᐎᐲᔖᒃ ᐁᐐ ᐐᑕᒪᐎᓇᑰᒃ ᐋᓃᓐ ᑫᓂ ᐃᔑᓭᔦᒃ ᐊᓂ ᑲᑮᔑᑲᒃ ᓃᑳᓇᔭᐄ ᐃᓇᑫ᙮
2ᒫᒪᐎᐲᔖᒃ, ᐱᓯᑕᐎᔑᒃ, ᑮᓇᐙ ᒉᑲᑉ ᑳᐅᑯᓯᓯᒥᓀᒃ;
ᐱᓯᑕᐎᒃ ᐃᑕᔥ ᐃᔅᕒᐃᔭᓬ Israel ᑭᑌᑌᐙ᙮
3ᐅᕒᐆᐱᓐ Reuben, ᑮᓐ ᓴ ᓂᑕᒻ ᑳᑮ ᓂᑖᐎᑭᔭᓐ,
ᑮᓐ ᓴ ᒦ ᐃ ᐁᓀᑖᑯᓯᔭᓐ, ᓂᒪᔥᑲᐎᓰᐎᓐ,
ᑳᑮ ᐅᒋ ᒫᒋᓭᒃ ᓂᑎᓂᓃᐌᑖᑯᓯᐎᓐ,
ᐐᑫ ᑭᑭᑌᑖᑯᔅ,
ᐐᑫ ᑲᔦ ᑭᒪᔥᑲᐌᑖᑯᔅ᙮
4ᒦ ᓴ ᐃ ᐁᔑᓈᑯᓯᔭᓐ
ᑖᐱᔥᑰ ᑳᐱᒥᒋᐗᕽ ᐁᐐ ᒨᔥᑲᐊᕽ,
ᑳᐐᓐ ᐃᑕᔥ ᐊᐗᔑᒣ ᑭᑲ ᑭᑌᑖᑯᓯᓰ,
ᐅᓵᒻ ᐋᓃᔥ ᑭᑮ ᐐᐯᒫ ᓂᑖᓂᑫᐐᐤ,
ᓅᒋᑯ ᐁᑮ ᐃᓀᑖᑯᑖᐗᒡ ᑭᑌᑌ ᐅᓂᐯᐎᓈᒃ᙮
5ᐃᓇᔥᑫ ᓯᒥᔭᓐ Simeon,
ᓬᐄᐹᐃ Levi ᐃᑕᔥ ᐐᒋᑭᐌᑎᐗᒃ᙮
ᒦ ᓴ ᐃ ᐁᓈᐸᒋᑑᐙᒡ
ᐅᒦᑳᓱᐎ ᐋᐸᒋᑖᑲᓂᐙᓐ
ᐁᐅᒋ ᑭᒋ ᐅᒻᐺᑲᒥᑭᓯᐙᒡ᙮
6ᑳᐐᓐ ᓴ ᓂᑲ ᐃᔖᐙᓰᓐ ᐁᔑ ᑮᒨᒋ ᑲᑲᓅᓂᑎᐙᒡ,
ᑳᐐᓐ ᑲᔦ ᓂᑲ ᐐᑑᑳᓱᐙᓰᓐ ᑳᑕᔑ ᐅᓈᑯᓂᑫᐙᒡ,
ᑮᓂᔥᑳᑎᓯᐙᒡ ᐅᔕ ᒦ ᐃ ᐁᔑ ᓂᓵᐙᒡ ᐃᓂᓂᐗᐞ,
ᐅᒫᑭᐋᐙᐞ ᑲᔦ ᐋᐯ ᐱᔑᑭᐗᐞ ᐁᒥᒋ ᐅᑕᒥᓄᐙᒡ᙮
7ᑕᒪᒋᐃᒋᑳᑌᓂ ᓴ ᐅᓂᔥᑳᑎᓯᐎᓂᐙ,
ᐋᓃᔥ ᐅᓵᒻ ᐋᑴᑖᑾᓂᓂ,
ᐅᑖᑯᑭᑖᓱᐎᓂᐙ ᑲᔦ
ᐅᓵᒻ ᑲᒀᓂᓴᑫᑖᑾᓂᓂ;
ᒥᓯᐌ ᓴ ᐃᔅᕒᐃᔭᓬ ᐊᑮᕽ ᓂᑲᔑ ᒥᓯᑌᔮᒪᐙᒃ,
ᒥᓯᐌ ᑲᔦ ᓂᑲ ᐅᒋ ᐃᔑᓂᔕᐙᒃ
ᐁᔑ ᐊᔭᔮᓂᒡ ᐯᒫᑎᓯᓂᒡ᙮
8ᒎᑕ, ᑮᒋᑭᐌᓯᐗᒃ ᐃᓴ ᑭᑲ ᒥᓍᐸᒥᑰᒃ᙮
ᐅᑴᑲᓂᐙᕽ ᐃᑕᔥ ᑭᑲ ᑕᓂᓈᒃ
ᐃᑭ ᑳᔒᑫᓂᒥᒀ᙮
ᑮᒋᑭᐌᓯᐗᒃ ᐃᓴ ᑕᐊᓂᒥᑯᑖᐗᒃ ᐁᓈᓴᒦᔭᓐ᙮
9 # Num 24.9; Rev 5.5. ᒎᑕ ᓴ ᒥᔑᐱᔑᐎᕽ ᐃᓀᑖᑯᓯ,
ᐁᐃᔥᒀ ᓂᔑᐌᒡ, ᒦ ᐃ ᐁᔑ ᑮᐌᒡ ᐅᐙᔑᕽ᙮
ᐁᔒᐲᑭᒌᔑᕽ ᐃᑕᔥ, ᐁᐱᒥᔑᕽ ᑲᔦ,
ᐊᐌᓀᓐ ᐃᑕᔥ ᑫᑲᔥᑭᑌᐁᓂᐸᓐ ᒋᒥᑯᔥᑳᒋᐃᑯᒡ᙮
10ᒎᑕ ᐅᑕᑯᓈᓐ ᑭᒋᐅᑭᒫᐎ ᓴᑲᐅᓈᒃ
ᔑᑾᔥ ᐅᐲᐌᓰᒪᐞ ᑕᓂ ᐅᑭᒫᐎᐗᐞ,
ᐲᓂᔥ ᑕᑯᔑᕽ ᐊᐌᓀᓐ ᑳᑎᐱᓇᐌᐎᓯᒡ᙮
ᐐᓐ ᑕᔥ ᐃᓀᑖᑯᓯ ᒋᓇᓇᐃᑖᑯᒡ
ᑲᑭᓇ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ᙮
11ᔔᒥᓈᑎᑯᕽ ᓴ
ᐅᑎᔑ ᑕᑯᐱᓈᓐ ᐅᒫᔑᒥᑕᑎᒨᒪᓐ,
ᐅᒫᔑᒥᑕᑎᒨᒣᓴᓐ ᐃᑕᔥ
ᒫᐗᒡ ᐁᔑ ᐅᓂᔑᔑᓂᓂᒃ ᔔᒥᓈᑎᑯᕽ᙮
ᔔᒥᓈᐴᕽ ᐃᓴ ᐅᑎᔑ ᑭᓰᓯᐸᑑᓇᓐ ᐅᑭᑭᔥᑭᑲᓇᓐ,
ᐅᑑᑭᒫᐗᔮᓇᓐ ᑕᔥ
ᐅᑎᔑ ᑭᓰᓯᐸᑑᓇᓐ ᔔᒥᓇᐞ ᑳᔑ ᒥᔅᒀᑲᒥᔥᑭᑫᓂᒡ᙮
12ᐅᔥᑮᔑᑰᓐ ᓴ ᓇᐗᒡ ᒥᔅᑯᓈᑾᓂᓂᐗᓐ
ᑳᐊᐲᒋ ᒥᔅᒀᓂᒃ ᔔᒥᓈᐴᓂ,
ᐐᐱᑕᓐ ᑲᔦ ᓇᐗᒡ ᐙᐱᔥᑳᓂᐗᓐ
ᐋᐲᒡ ᐐᓐ ᐁᔑ ᐙᐱᔥᑳᓂᒃ ᒎᒎᔖᐳ᙮
13ᓭᐸᓬᐊᓐ Zebulun ᐃᑕᔥ ᐐᓐ ᒌᑭ ᑭᒋᑲᒦᕽ ᑕᐃᔑ ᑲᐯᔑ᙮
ᓃᐱᐗᐞ ᓴ ᐃᐃᒫ ᒌᑫᐤ
ᑕᔑ ᑕᐱᓇᐎᔑᒨᒪᑲᓅᓐ ᑭᒋ ᒌᒫᓇᓐ,
ᐌᑎ ᑕᔥ ᑭᑲ ᐊᑯ ᑎᐯᑖᓐ ᐃᐃ ᐊᑭ
ᐁᔑᐊᔮᒃ ᓵᐃᑕᓐ Sidon ᐆᑌᓇ᙮
14ᐃᓴᑳᕒ Issachar ᓴ ᐃᔑᓈᑯᓯ
ᒫᔑᒥᑕᑎᒨᔅ ᑳᓲᑭᓯᒡ,
ᐁᐸᐱᒥᔑᕽ ᓇᓴᐗᔭᐄ
ᐁᔑ ᐊᑌᓂᑭᓐ ᓃᔑᓐ ᐱᒥᐗᓈᓂᐗᔕᓐ᙮
15ᐊᐲ ᐁᐙᐸᑕᕽ ᐃᐃ ᑳᔑ ᐊᓉᔑᕽ ᐁᐅᓂᔑᔑᓂᓂᒃ,
ᐃᐃ ᑲᔦ ᐊᑮᓂ ᐁᒥᓄᓈᑾᓂᓂᒃ,
ᒦᑕᔥ ᐁᔑ ᐱᒋᐗᓈᑕᕽ ᐃᓂ ᐱᒥᐗᓈᓇᓐ ᐁᐐ ᐱᒥᐎᑑᒡ,
ᒦᔥ ᑫᐃᔑ ᑲᔥᑭᑕᒫᓱᒡ
ᒋᑎᓄᐎᒡ ᑳᑲᒀᑕᑭ ᐸᒦᑖᑫᒡ᙮
16ᑌᓐ Dan ᓴ ᐅᑲ ᑎᐯᓂᒫᐞ ᐅᐱᒫᑎᓰᒪᐞ,
ᑖᐱᔥᑰ ᐃ ᐯᔑᑴᐙᓐ ᐃᔅᕒᐃᔭᓬᐊᐞ᙮
17ᑌᓐ ᑖᐱᔥᑰ ᓴ ᑭᓀᐱᒃ ᑳᐊᔮᒡ ᒦᑲᓈᕽ,
ᑳᒌᓱᐌᒡ ᑎᓄ ᑭᓀᐱᒃ ᑳᐊᔮᒡ ᐁᓇᒧᓂᓂᒃ ᒦᑲᓇ,
ᒦᑕᔥ ᐁᔑ ᒌᔂᒡ ᒥᑕᑎᒨᓐ ᐅᐯᒥᑳᑎᓃᕽ,
ᒦᔥ ᐁᔑ ᐋᔐᑭᑕᑰᒋᓂᓂᒡ ᐃᓂ ᑳᐱᒥᐗᓈᓱᓂᒡ᙮
18ᐆ ᑌᐯᒋᑫᔭᓐ, ᓂᐲᑑᓐ ᓴ ᑭᐱᒫᒋᐃᐌᐎᓐ!
19ᑳᑦ Gad ᐃᑕᔥ ᐐᓐ ᐅᑲ ᒦᑳᓂᑰᐞ
ᒋᐹᑏᓄᓂᒡ ᓀᑖ ᒪᑲᑗᓂᒡ,
ᑕᑴᑭᐸᓂᐅ ᓴ ᑕᔥ ᒋᒫᒌᔮᒪᐙᒡ᙮
20ᐋᔕᕒ Asher ᐃᑕᔥ ᐐᓐ, ᐅᒦᒋᒥᒻ ᐐᑫ ᐅᑲ ᐌᓅᒋᑑᓐ,
ᑫᓂᑖᐎᑭᑑᒡ ᓴ
ᑕᑌᐊᐲᑌᑖᑾᓂᓂ ᒋᒦᒋᓂᐸᓐ ᑭᒋᐅᑭᒫᓐ᙮
21ᓈᐱᑕᓬᐋᐃ Naphtali ᐃᑕᔥ ᑖᐱᔥᑰ ᓅᔐ ᐗᐙᔥᑫᔑ
ᑳᐸᑭᑎᓂᓐᒡ ᒋᐸᐹᒥᐸᑑᒡ,
ᑳᐊᔮᐙᒡ ᐃᑕᔥ ᐌᓂᔑᔑᓂᒡ ᐗᐙᔥᑫᔒᓴᐞ᙮
22ᒎᓴᑉ Joseph ᐃᑕᔥ ᐐᓐ ᐃᔑᓈᑯᓯ
ᑖᐱᔥᑰ ᑳᐌᓅᒋ ᓂᑖᐎᑭᒋᑫᒡ ᔔᒥᓈᑎᒃ
ᑳᐸᑕᑭᓱᒡ ᒌᑲᔭᐄ ᐁᔑ ᒨᑭᒋᐗᓂᓂᒃ ᓂᐱ,
ᐅᐗᑎᑾᓇᓐ ᑳᐊᒀᑕᐌᑭᓂᓂᑭᓐ ᐋᓴᒫᐱᒃ᙮
23ᐃᐃ ᑕᔥ ᐅᐱᒧᒋᑫᐞ ᐐᑫ ᐅᑭᒋ ᒦᑳᓂᑰᐞ,
ᐁᐸᐲᒧᑯᒡ, ᐁᒥᑯᔥᑳᒋᐃᑯᒡ ᑲᔦ᙮
24ᐅᒥᑎᒀᐲᓐ ᐃᑕᔥ ᐊᐙᒡ ᐸᑮ ᒋᒫᒋᔥᑳᓂᒡ,
ᐅᓂᑲᓐ ᑲᔦ ᐊᓂ ᒪᔥᑲᐎᓰᒪᑲᓂᓂᐗᓐ᙮
ᐅᒪᔥᑲᐎᓰᐎᓂᓃᕽ ᐁᐅᒋ ᒪᔥᑲᐎᓰᔥᑳᑯᒡ
ᒣᔥᑲᐎᓰᓂᒡ ᑭᔐᒪᓂᑑᓐ ᐌᒪᓂᑑᒥᑯᓂᒡ ᒉᑲᐴᓐ Jacob,
ᑌᓄᐎᓂᒡ ᐅᑲᓇᐎ ᒫᓇᒑᓂᔑᐌᓐ,
ᑳᓈᑕᒪᐙᓂᒡ ᐃᔅᕒᐃᔭᓬᐊᐞ,
25ᑭᑌᑌ ᐅᔕ ᐅᑭᔐᒪᓂᑑᒪᓐ ᑳᐐᒋᐃᒥᒃ,
ᑳᒫᐗᒋ ᒪᔥᑲᐎᓰᒡ ᑭᔐᒪᓂᑑ ᑳᔕᐌᓂᒥᒃ,
ᑮᔑᑯᕽ ᐁᐅᒋ ᔕᐌᓂᒥᒃ,
ᐙᓴ ᑲᔦ ᐊᓈᒦᑎᒻ ᐁᐅᒋ ᔕᐌᓂᒥᒃ᙮
ᑭᑲ ᔕᐌᓂᒥᒃ ᐌᒋ ᓂᑖᐎᑭᐃᒪᒡ ᔑᑾ ᑳᐅᒋ ᓅᓂᐃᒪᒡ ᐊᐱᓅᒌᔕᐞ᙮
26ᑭᑌᑌ ᓴ ᑳᔑ ᔕᐌᓂᒥᒃ ᓇᐗᒡ ᑭᒋ ᐃᓀᑖᑾᓂᓂ
ᐊᐲᒡ ᐐᓐ ᐅᔕᐌᒋᑫᐎᓂᐙ ᓃᓐ ᑳᑮ ᐅᑫᑌᔭᐋᒥᔮᓐ,
ᓇᐗᒡ ᑲᔦ ᐁᔑ ᔕᐌᒋᑫᒪᑲᑭᓐ ᓀᐱᒡ ᐁᔮᑭᓐ ᐗᒌᓐ;
ᑕᑲ ᐅᓄ ᔕᐌᑖᑯᓯᐎᓇᓐ ᒎᓴᑉ ᐅᑲ ᐅᑎᓯᑰᓇᓐ ᐅᑎᒀᓂᕽ
ᑲᔦ ᐅᔥᑳᑎᑰᕽ ᐐᓐ ᐁᐅᑭᒫᐌᑖᑯᓯᒡ ᑳᑕᔑᓂᒡ ᐐᒋᑭᐌᔭᐞ᙮
27ᐯᒋᒪᓐ Benjamin ᐃᑕᔥ ᐃᔑᓈᑯᓯ ᑖᐱᔥᑰ ᑳᐋᒀᑎᓯᒡ ᒪᐄᑲᓐ,
ᐁᑭᔐᐹᐗᑲᓂᓂᒃ ᑳᑭᑖᒡ ᑳᓂᑑᒡ,
ᐁᐅᓈᑯᔑᓂᓂᒃ ᐃᑕᔥ ᐁᓀᓈᐗᐆᑮᒡ ᐅᓂᑖᑲᓐ,
ᒦ ᐃ ᑳᐃᑭᑐᒡ ᐃᔅᕒᐃᔭᓬ᙮
28ᒦᐗᐞ ᓴ ᐃ ᑳᑮ ᒥᑖᔑᓃᔗᐙᓇᑭᓯᓂᒡ ᐃᔅᕒᐃᔭᓬ᙮ ᒦᑕᔥ ᐅᐅ ᑳᑮᐃᑯᐙᒡ ᐅᑌᑌᐙᓐ ᑮᔕᐌᓂᒥᑯᐙᒡ, ᐁᑕᔑᐙᒡ ᐁᑮᐃᑯᐙᒡ ᑫᔑ ᓇᐃᔥᑳᑯᐙᒡ᙮
ᐁᑕᔑᑌᓂᒃ ᒉᑲᑉ ᑮᐃᔥᒀᐱᒫᑎᓯᒡ, ᐋᓃᑎ ᑲᔦ ᑳᐃᔑᓇᐃᓂᓐᒡ
29ᒉᑲᑉ ᑕᔥ ᐅᑮᐃᓈᐞ ᐅᑯᓯᓴᐞ, ᒦ ᐅᔕᐃ ᐋᔕ ᐁᐅᑎᓵᐸᑕᒫᓐ ᒋᐐᒌᐗᒀ ᓂᑎᓇᐌᒫᑲᓇᒃ ᑳᐱᒫᑎᓯᓯᒀ᙮ ᐊᐊ ᓴ ᐄᐸᕒᐊᓐ Ephron ᐁᑦ Hittite ᑳᑎᓄᐎᒡ, ᑳᔑ ᑎᐯᑕᕽ ᒥᔕᐗᑲᒥᑯᓂ, ᐊᔮᓂ ᐁᐐᐹᐱᑳᓂᒃ᙮ ᒦ ᓴ ᐌᑎ ᐃᔑ ᓇᐃᓂᔒᑫᒃ ᑳᔑ ᓇᐃᓂᑣ ᑳᑮ ᐅᑌᑌᔮᓐ᙮ 30#Gen 23.3-20. ᐃᐃ ᑕᔥ ᑳᐐᐹᐱᑳᒃ ᐌᑎ ᒪᒃᐲᓬᐊ Machpelah ᐃᔑᐊᔮ, ᐙᐸᓄᕽ ᐃᓇᑫ ᒪᒻᕒᐃ Mamre ᐃᐃᒫ ᑫᓇᓐ Canaan ᐊᑮᕽ᙮ ᐁᐸᕒᐊᐋᒻ Abraham ᑮᐊᑖᐌᑯᐸᓐ ᐃᐃ ᐐᐹᐱᒃ, ᐃᐃ ᑲᔦ ᐊᑮᓂ ᐁᐐ ᐃᓍᑕᕽ ᑳᔑ ᓇᐃᓂᑣ ᑳᓂᐳᐙᒡ᙮ ᐃᓂ ᑕᔥ ᐃᓂᓂᐗᓐ ᐄᐸᕒᐊᓅᓐ ᑮᐊᑖᒫᑯᐸᓐ᙮ 31#Gen 25.9,10; Gen 35.29. ᒦ ᓴ ᐌᑎ ᑳᐃᔑ ᓇᐃᓂᓐᒡ ᐁᐸᕒᐊᐋᒻ, ᐃᓂ ᑲᔦ ᐐᐗᓐ ᓭᕒᐊᐗᓐ Sarah᙮ ᒦ ᑲᔦ ᐌᑎ ᐋᐃᓯᒃ Isaac, ᐐᐗᓐ ᑲᔦ ᐅᕒᐃᐯᑲᐗᓐ Rebekah ᑳᐃᔑ ᓇᐃᓂᑣ᙮ ᒦᑕᔥ ᑲᔦ ᐌᑎ ᓃᓐ ᑳᐃᔑ ᓇᐃᓇᒃ ᓬᐄᔭ Leah᙮ 32ᐃᐃ ᑕᔥ ᐊᑮᓂ ᑳᑮ ᐊᑖᒥᑣ ᐃᑭ ᐃᓂᓂᐗᒃ ᐁᑦ ᑳᑎᓄᐎᐙᒡ, ᒦ ᓴ ᐃᒫ ᐁᔮᒃ ᐃᐃ ᑳᐐᐹᐱᑳᒃ᙮ 33#Act 7.15. ᐊᐲ ᑕᔥ ᑳᐃᔥᒀ ᐙᐐᑕᒪᐙᒡ ᐋᓃᓐ ᑫᐃᔑᒋᑫᓂᒡ ᐅᑯᓯᓴᐞ, ᑮᐗᑮᒋᑖ ᐅᓂᐯᐎᓂᕽ᙮ ᒦᔥ ᑳᐃᔑ ᐃᔥᒀᓈᒧᒡ ᐁᑮ ᐃᔥᒀ ᐱᒫᑎᓯᒡ᙮
Iliyochaguliwa sasa
ᒉᓂᓯᔅ 49: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society