ᒉᓂᓯᔅ 47
47
1ᒎᓴᑉ ᐃᑕᔥ ᑮᐃᔖ ᐁᑮ ᐊᑕ ᐙᐸᒫᒡ ᐯᕒᐆᓐ ᐁᑮᐃᓈᒡ, ᓂᑌᑌ ᓴ, ᓃᒋᑭᐌᔭᒃ ᐃᑕᔥ ᑲᔦ, ᐅᒫᓇᒑᓂᔑᒥᐙᐞ ᐃᑕᔥ, ᐅᐱᔑᑮᒥᐙᐞ ᑲᔦ, ᑲᑭᓇ ᑲᔦ ᑫᑰᓇᓐ ᐁᔮᐙᒡ, ᑫᓇᓐ ᐊᑮᕽ ᑮᐱᐅᒋ ᑕᑯᔑᓅᒃ; ᐃᓇᔥᑫ ᑕᔥ ᐌᑎ ᑰᔑᓐ ᐊᑮᕽ ᐊᔮᐗᒃ, ᐅᑮᐃᓈᓐ᙮ 2ᓈᓇᓐ ᐃᑕᔥ ᐅᑮ ᐅᓈᐸᒫᐞ ᐐᒋᑭᐌᔭᐞ, ᐁᑮ ᐃᔑᐎᓈᒡ ᐁᔑᐊᔮᓂᒡ ᐯᕒᐆᓐ᙮ 3ᐯᕒᐆᓐ ᐃᑕᔥ ᐅᑮ ᑲᑴᒋᒫᓂ ᐅᐐᒋᑭᐌᔭᐞ, ᐋᓃᓐ ᐃᑕᔥ ᐁᓇᓄᑮᔦᒃ? ᐅᑮᐃᓈᓂ᙮
ᐅᐅ ᑕᔥ ᑮᐃᔑ ᓇᑴᑕᒨᐞ, ᓃᓇᐎᓐᑦ ᓴ ᓂᑎᓄᐎᒥᓐ ᐅᑲᓇᐎ ᒫᓇᒑᓂᔑᐌᒃ ᑖᐱᔥᑰ ᑳᑮ ᐱ ᐃᔑᒋᑫᐙᒡ ᓂᑫᑌᔭᐋᒥᓈᐸᓃᒃ, ᑮᐃᔑ ᓇᑴᑕᒨᐞ᙮ 4ᒦᔥ ᑲᔦ ᑳᐊᓂ ᐃᑭᑐᓂᒡ, ᓂᑮ ᐸᑲᒥ ᑯᓯᒥᓐ ᓴ ᐅᒫ ᐁᐐ ᐃᔑᑖᔮᕽ, ᐋᓃᔥ ᑰᐹᒋᓭ ᐁᐊᔮᓯᓄᒃ ᒦᒋᒻ ᐌᑎ ᑫᓇᓐ ᐊᑮᕽ, ᓃᓇᐎᓐᑦ ᐃᑕᔥ ᑭᑕᓄᑮᐋᑲᓇᒃ ᑳᐐᓐ ᐃᑯᒋ ᒪᔥᑯᓰᑳᓯᓅᓐ ᑫᑕᓇᔕᒪᑭᑣ ᓂᑕᐗᑳᓂᓈᓂᒃ᙮ ᑕᑲ ᓴ ᐱᓵᓐ ᐸᑭᑎᓂᔑᓈᒻ ᒋᑲᐯᔑᔮᕽ ᑰᔑᓐ Goshen ᐊᑮᕽ, ᐅᑮ ᐃᑯᓂ᙮ 5ᒎᓴᑉ ᐃᑕᔥ ᐯᕒᐆᓐ ᐅᑮᐃᑰᓐ, ᑭᑌᑌ ᓴ, ᑮᒋᑭᐌᔭᒃ ᑲᔦ ᑭᑮ ᐅᑎᓯᑰᒃ, 6ᐃᐃ ᓴ ᐄᒋᐸᑮᓂ ᐱᓵᓐ ᐅᑲ ᐊᔮᓈᐙ᙮ ᑕᑲ ᐱᓵᓐ ᑰᔑᓐ ᑕᔑ ᑲᐯᔑᐗᒃ, ᒫᐗᒡ ᐁᔑ ᐅᓂᔑᔑᓂᓂᒃ ᐄᒋᐸᑮᓂ᙮ ᑮᔥᐱᓐ ᐃᑕᔥ ᑭᑫᓂᒪᒡ ᐊᐎᔭ ᐁᔑᐊᔮᐙᒡ ᑫᑰᓐ ᓇᑲᒋᑑᒡ, ᐃᓇᓵᑲᓐ ᐃᓴ ᒋᓈᓈᑲᒋᐋᒡ ᓂᑕᐗᑳᓇᐞ, ᐅᑮᐃᑰᓐ᙮
7ᒎᓴᑉ ᐃᑕᔥ ᐅᑮ ᐃᔑᐎᓈᓐ ᐅᑌᑌᓐ ᒉᑲᐴᓐ Jacob ᐁᔑᐊᔮᓂᒡ ᐯᕒᐆᓐ; ᐅᑌᑌᓐ ᐃᑕᔥ ᐅᑮᐃᓈᓂ ᒋᒥᓄᓭᓂᒡ ᐯᕒᐆᓐ᙮ 8ᐯᕒᐆᓐ ᐃᑕᔥ ᐅᑮ ᑲᑴᒋᒥᑯᓂ, ᐋᓃᓐ ᐁᑕᓱ ᐱᐴᓉᔭᓐ, ᐅᑮ ᐃᑯᓂ᙮
9ᐅᐅ ᒉᑲᐴᓐ ᑮᐃᔑ ᓇᑴᑕᒨᓐ, ᒦ ᓴ ᐃ ᓂᑯᑣᒃ ᓂᓯᒥᑕᓇ 130 ᑕᓱ ᐱᐴᓐ ᐁᐸᐹᒥ ᐊᔮᔮᓐ᙮ ᐅᐅ ᒥᓂᒃ ᑳᐱᒫᑎᓯᔮᓐ ᐱᓴᓇᑲᓐ ᓂᐱᒫᑎᓯᐎᓐ, ᐋᐱᒋ ᑲᔦ ᐸᑮ ᐃᓀᑖᑾᓐ ᐃᑭ ᑯᑕᐐᓐ ᒥᓂᒃ ᑳᑮ ᐱ ᐱᒫᑎᓯᐙᒡ ᓂᑫᑌᔭᐋᒥᐸᓃᒃ, ᑮᐃᔑ ᓇᑴᑕᒨᓐ᙮ 10ᒦᑕᔥ ᒉᑲᐴᓐ ᑳᐃᔑ ᔕᐌᓂᒫᓂᒡ ᐯᕒᐆᓐ, ᒦᔥ ᑳᐃᔑ ᓇᑲᓈᓂᒡ᙮ 11ᒎᓴᑉ ᐃᑕᔥ ᐅᑮ ᐃᔑ ᑲᐯᔑᐋᓐ ᐅᑌᑌᓐ, ᐐᒋᑭᐌᔭᐞ ᑲᔦ, ᒫᐗᒡ ᐃᑯ ᐁᔑ ᐅᓂᔑᔑᓂᓂᒃ ᐄᒋᐸᑮᓂ, ᐌᑎ ᓇᑫ ᐆᑌᓈᕽ ᐅᕒᐁᒪᓯᔅ Rameses ᑳᑮ ᐃᒋᑳᑌᓂᒃ᙮ ᐅᑮ ᒦᓈᐞ ᑲᔦ ᐊᑮᓂ ᒋᑎᐱᓇᐌᐎᓯᓂᒡ, ᐁᑮ ᐃᔑᒋᑫᒡ ᑳᑮ ᐃᓈᑯᓂᑫᓂᒡ ᐯᕒᐆᓐ᙮ 12ᒎᓴᑉ ᐃᑕᔥ ᐅᑮ ᐊᔕᒫᓐ ᐅᑌᑌᓐ, ᐃᐃ ᑲᔦ ᐐᒋᑭᐌᔭᐞ, ᑲᑭᓇ ᑲᔦ ᐅᑌᑌᓐ ᐅᐙᑳᐃᑲᓂᓃᕽ ᑳᑮ ᐅᒌᓂᒡ ᐁᑮ ᒦᓈᒡ ᒦᒋᒻ ᑫᒦᒋᓂᒡ, ᒥᓂᒃ ᓴ ᑯ ᑳᑮ ᑕᔑᓂᒡ ᐅᓃᒑᓂᓯᓂ᙮
ᒦᒋᒻ ᑳᑮᓅᑌᓭᒃ ᐁᑮᓂᔑᐗᓈᒋᒋᑫᒪᑲᒃ
13ᐃᐃᐌ ᑕᔥ ᑳᑮ ᐊᔮᓯᓄᒃ ᒦᒋᒻ ᐃᐃᒫ ᒥᓯᐌ ᐊᑮᕽ ᐐᑫ ᑮᑲᒀᑕᑫᑖᑾᓐ᙮ ᐄᒋᐸᑭ Egypt, ᑫᓇᓐ Canaan ᐊᑮᕽ ᐁᔮᐙᒡ ᐯᒫᑎᓯᐙᒡ ᓴ ᑳᐐᓐ ᑮᐊᓂ ᓵᐹᑎᓯᓰᐗᒃ ᐅᓵᒻ ᐁᑮ ᐊᔮᓯᓄᒃ ᒦᒋᒻ᙮ 14ᐯᒫᑎᓯᓂᒡ ᐃᑕᔥ ᑳᑮ ᐊᑖᐌᓂᒡ ᒦᒋᒻ, ᒎᓴᑉ Joseph ᐅᑮ ᒫᐗᒋᐋᓐ ᑲᑭᓇ ᔔᓂᔮᓐ, ᒦᔥ ᑳᐊᓂ ᐃᔑ ᐃᔑᐎᓈᒡ ᐯᕒᐆᓐ Pharaoh ᐅᐙᑳᐃᑲᓂᓃᕽ᙮ 15ᐊᐲ ᑳᒑᑭᓈᓂᒡ ᐅᔔᓂᔮᒥᓂ ᐯᒫᑎᓯᓂᒡ ᑳᑮ ᐅᒌᓂᒡ ᐄᒋᐸᑮᕽ, ᑫᓇᓐ ᐊᑮᕽ ᑲᔦ, ᑲᑭᓇ ᐄᒋᑉ ᑳᐅᒌᓂᒡ ᐅᑮ ᐱ ᓈᓯᑳᑰᐞ ᒎᓴᑉ ᐁᑮᐃᑯᒡ, ᒦᔑᔑᓈᒻ ᒦᒋᒻ᙮ ᐌᑯᓀᓐ ᐃᑕᔥ ᑫᐅᒋ ᓂᐳᔮᑭᐸᓐ ᐁᔑᐊᔮᔭᓐ? ᓂᑮ ᒑᑭᓈᓈᓐ ᐅᔕ ᓂᔔᓂᔮᒥᓈᓐ, ᐅᑮᐃᑰᐞ᙮
16ᒎᓴᑉ ᐃᑕᔥ ᐅᑮ ᐃᔑ ᓇᑴᑕᐙᐞ, ᐲᓂᑾᒃ ᓴ ᑭᑕᔭᐋᐎᔑᒥᐙᒃ; ᑭᑲ ᒦᓂᓂᓂᒻ ᐃᑕᔥ ᒦᒋᒻ ᒣᔥᑾᒡ ᒦᔑᔦᒃ ᐊᔭᐋᐎᔕᒃ, ᑭᔔᓂᔮᒥᐙ ᑯᑕᐐᓐ ᐋᔕ ᐁᑮ ᒑᑭᓭᒡ, ᐅᑮᐃᓈᐞ᙮ 17ᒦᑕᔥ ᐃᑯ ᐃ ᐯᒫᑎᓯᓂᒡ ᑳᐃᔑ ᐲᓈᓂᒡ ᐅᑕᐗᑳᓂᒥᓂ ᐁᔑᐊᔮᒡ ᒎᓴᑉ᙮ ᒦᒋᒻ ᒣᔥᑾᒡ ᐅᑮ ᒦᓈᐞ ᒋᒦᓂᑯᒡ ᐅᒥᑕᑎᒨᒥᓂ, ᐅᒫᓇᒑᓂᔒᒥᓂ ᑲᔦ, ᐅᒫᓇᑎᑯᒥᓂ ᑲᔦ, ᐅᐱᔑᑮᒥᓂ ᑲᔦ, ᐃᐃ ᑲᔦ ᐅᒫᔑᒥᑕᑎᒨᒥᓂ᙮ ᐃᐃ ᑕᔥ ᐯᔑᑯ ᐱᐴᓐ ᐁᐃᔑᓭᓂᒃ ᐅᑮ ᐱᒪᔕᒫᐞ ᒦᒋᒻ ᐁᑮ ᒦᓈᒡ ᒣᔥᑾᒡ ᐃᑕᔥ ᐁᑮ ᒦᓂᑯᒡ ᑲᑭᓇ ᐅᑕᐗᑳᓂᒥᓂ᙮
18ᐊᐲ ᑕᔥ ᒦᓇᐙ ᐁᐊᓂ ᐱᐴᓂᓂᒃ, ᒦᓇᐙ ᐅᑮ ᐱ ᓈᓯᑳᑰᐞ ᐁᑮᐃᑯᒡ, ᑳᐐᓐ ᓴ ᓂᑖ ᑳᑕᒪᐙᓯᐙᓈᓐ ᓂᑑᑭᒫᒥᓈᓐ ᑌᐺ ᐁᑮ ᒑᑭᓭᒡ ᓂᔔᓂᔮᒥᓈᓐ, ᓂᑕᐗᑳᓂᓈᓂᒃ ᑲᔦ ᑮᓐ ᐁᑎᐯᓂᒪᑣ᙮ ᑳᐐᓐ ᐃᑕᔥ ᑫᑰᓐ ᓂᑕᔮᓰᒥᓐ ᑫᒦᓂᑰᔭᐸᓐ, ᒦᔦᑕᑯ ᓂᐐᔭᐎᓈᓂᓐ, ᓂᑕᑮᒥᓈᓂᓐ ᑲᔦ᙮ 19ᐌᑯᓀᓐ ᐃᑕᔥ ᑫᐅᒋ ᑲᐗᔅᑲᑌᔮᑭᐸᓐ ᐅᐅᒫ ᑭᑕᑮᒥᕽ? ᒋᒪᔕᔥᒀᑭᐸᓐ ᐃᑕᔥ ᓂᑕᑮᒥᓈᓂᓐ! ᐊᑖᐙᓂᔑᓈᒻ, ᐊᑖᐌᓐ ᑲᔦ ᓂᑕᑮᒥᓈᓂᓐ ᒣᔥᑾᒡ ᒋᒦᔑᔮᕽ ᒦᒋᒻ᙮ ᓃᓇᐎᓐᑦ ᐃᑕᔥ ᐯᕒᐆ ᓂᑲ ᑎᐯᓂᒥᑯᓈᓐ ᒋᐸᒦᑕᐗᑭᒡ, ᓂᑕᑮᒥᓈᓂᓐ ᑲᔦ ᐅᑲ ᑎᐯᑖᓇᓐ᙮ ᒦᔑᔑᓈᒻ ᑭᑎᑳᓀᓴᓐ ᒋᑭᑎᑳᑕᒫᕽ ᒋᐱᒫᑎᓯᔮᕽ ᒋᓂᐳᓯᐙᕽ, ᐃᐃ ᑕᔥ ᐊᑭ ᑳᐐᓐ ᑕᒥᒋ ᐹᔥᒀᓯᓅᓐ, ᐅᑮᐃᑰᐞ᙮ 20ᒎᓴᑉ ᐃᑕᔥ ᐅᑮ ᐊᑖᐌᑕᒪᐙᓐ ᐯᕒᐆᓐ ᑲᑭᓇ ᐄᒋᐸᑮᓂ᙮ ᑲᑭᓇ ᓴ ᐄᒋᑉ ᑳᐅᒌᐙᒡ ᐁᑕᔑᐙᒡ ᐅᑮ ᐊᑖᐙᑫᓈᐙᓐ ᐅᑭᑎᑫᐗᑲᒥᑯᐙᓐ, ᐅᓵᒻ ᐋᓃᔥ ᑮᑯᐹᒋᓭᐗᒃ ᐁᑮ ᐊᔮᓯᓂᓂᒃ ᒦᒋᒻ᙮ ᑲᑭᓇ ᑕᔥ ᐃᐃ ᐊᑮᓂ ᐯᕒᐆ ᑭᒋᐅᑭᒫ ᐅᑮ ᑎᐯᑖᓐ᙮ 21ᒦᑕᔥ ᐃᐃ ᓇᑫ ᒎᓴᑉ ᑳᐃᔑ ᑲᔥᑭᐋᒡ ᑲᑭᓇ ᐯᒫᑎᓯᓂᒡ ᒋᓀᐱᒋ ᒥᑕᓄᑮᑕᐙᓂᒡ ᑭᒋᐅᑭᒫᓐ ᒥᓯᐌ ᐃᐃᒫ ᐊᑮᕽ᙮ 22ᐃᐃᐌᓂ ᐊᑮᓂ ᐁᑕ ᑳᑮ ᐃᔑᑖᓂᒡ ᐊᓇᒥᐁᐎᑭᒫᐞ ᑳᐐᓐ ᑮᐊᑖᐌᓰ, ᐋᓃᔥ ᐯᕒᐆᓐ ᐅᑮ ᐸᑭᑎᓈᓂ ᐃᒫ ᒌᔑᑖᓂᒡ, ᐯᕒᐆᓐ ᐄᑐᒃ ᐅᑮ ᒦᓈᓂ ᑫᐅᑖᑎᓯᓂᒡ᙮ ᒦᑕᔥ ᑳᑮ ᐅᒋ ᐊᑖᐙᑫᓯᓂᒃ ᐅᑕᑮᒥᓂ᙮ 23ᒎᓴᑉ ᐃᑕᔥ ᐅᑮᐃᓈᐞ ᐯᒫᑎᓯᓂᒡ, ᐃᓇᔥᑫ ᑕᔥ ᓅᑯᒻ ᑳᑮᔑᑲᒃ ᑭᑮ ᐊᑖᐙᓂᓂᒻ, ᑭᑕᑮᒥᐙ ᑲᔦ ᐯᕒᐆ ᒋᑎᐯᑕᕽ, ᐃᓇ ᐃᑕᔥ ᐅᓄᐌᓂᐗᓐ ᑭᑎᑳᓀᓴᓐ ᑫᑭᑎᑳᑕᒣᒃ ᑭᑭᑎᑳᓇᑮᐙᕽ᙮ 24ᐊᐲ ᑕᔥ ᑮᔑᓂᑖᐎᑭᑭᓐ ᑫᑰᓇᓐ, ᐁᑕᓱ ᓈᓇᓐ ᓀᑖᐎᑭᑑᔦᒃ, ᐯᔑᒃ ᐃᐃᒫ ᑭᑲ ᐅᒋ ᒦᓈᐙ ᐯᕒᐆ᙮#47.24 ᐁᑕᓱ ᓈᓇᓐ ᓀᑖᐎᑭᑑᔦᒃ, ᐯᔑᒃ ᐃᐃᒫ ᑭᑲ ᐅᒋ ᒦᓈᐙ ᐯᕒᐆ: ᒦ ᓴ ᐃᐃᐌ ᑳᐃᒋᑳᑌᒃ, ᐯᒫᑎᓯᐙᒡ ᐁᑮ ᐃᓈᑯᓂᑣ ᒋᒦᓈᐙᒡ ᑭᒋᐅᑭᒫᓐ ᐯᔑᒃ ᑫᑰᓐ ᐁᑕᓱ ᓈᓇᓐ ᑫᑰᓐ ᑳᑮ ᓂᑖᐎᑭᑑᐙᒡ᙮ ᓂᑯᑎᕽ ᑲᔦ ᐅᐅ ᑕᐃᒋᑳᑌ ᐯᔑᒃ ᓈᓇᓐ᙮ ᑮᓇᐙ ᑕᔥ ᐐᓐ ᑭᑲ ᐊᔮᒻ ᑯᑕᒃ ᐃᐃ ᐁᑕᓱ ᓈᓇᓐ ᓃᐎᓐ ᑳᐃᔥᑯᓇᒣᒃ ᒋᑭᑎᑳᑫᔦᒃ, ᒋᐅᒦᒋᒥᒥᔦᒃ ᐃᑕᔥ, ᐃᑭ ᑲᔦ ᐁᔮᐙᒡ ᑭᑖᐎᓂᐙᕽ, ᑭᓃᒑᓂᓯᐙᒃ ᐃᑕᔥ ᑲᔦ, ᐅᑮᐃᓈᐞ᙮
25ᐅᐅ ᑕᔥ ᐅᑮᐃᑰᐞ, ᑭᑮ ᐱᒫᒋᑑᓇᓐ ᐃᓴ ᓂᐱᒫᑎᓯᐎᓂᓈᓂᓐ᙮ ᑕᑲ ᓴ ᒥᓍᐸᒥᔑᓈᒻ, ᑮᓐ ᐄᑐᒃ ᓂᑑᑭᒫᒥᓈᓐ; ᐯᕒᐆ ᑕᔥ ᓂᑲ ᑎᐯᓂᒥᑯᓈᓐ, ᐅᑮᐃᑰᐞ᙮ 26ᒎᓴᑉ ᐃᑕᔥ ᑮᐃᓈᑯᓂᑫ ᐃᐃᒫ ᐄᒋᐸᑮᕽ, ᐁᑕᓱ ᓈᓇᓐ ᑫᑰᓇᓐ ᑳᓂᑖᐎᑭᓂᓂᑭᓐ ᐯᔑᒃ ᐃᐃᒫ ᒋᐅᒋ ᒦᓂᒥᓐᒡ ᐯᕒᐆᓐ ᒋᑎᐱᓇᐌᐎᓯᓂᒡ᙮ ᐅᐅ ᑕᔥ ᐃᓈᑯᓂᑫᐎᓐ ᑫᔮᐱ ᓅᑯᒻ ᑳᑮᔑᑲᒃ ᐱᒥᓭ᙮ ᐃᐃ ᓴ ᐁᑕ ᐊᑮᓂ ᑳᑮ ᐃᔑᑖᓂᒡ ᐊᓇᒥᐁᐎᑭᒫᐞ ᑳᐐᓐ ᐅᑮ ᑎᐯᑕᓰᓂ ᐯᕒᐆᓐ᙮
ᒉᑲᑉ ᐃᔥᒀᒡ ᑳᑮᐃᔑᐸᑯᓭᓂᒧᒡ
27ᐃᑭ ᑕᔥ ᐐᓐ ᐃᔅᕒᐃᔭᓬᐊᒃ Israel ᑮᐃᔑ ᑲᐯᔑᐗᒃ ᑰᔑᓐ Goshen ᐃᓇᑫ ᐃᐃᒫ ᐄᒋᐸᑮᕽ Egypt, ᐁᑮ ᐊᓂ ᐌᓅᑎᓯᐙᒡ, ᐁᑮ ᐊᓂ ᓂᑖᐎᑭᐃᑎᐙᒡ ᐃᑕᔥ ᑲᔦ᙮ ᐐᑫ ᓴ ᑮᐊᓂ ᐹᑏᓄᐗᒃ᙮ 28ᒉᑲᑉ Jacob ᐃᑕᔥ ᒥᑖᔑᓃᔣᓱ 17 ᐱᐴᓐ ᑮᑕᔑ ᐱᒫᑎᓯ ᐄᒋᐸᑮᕽ, ᐲᓂᔥ ᐃᑕᔥ ᓂᑯᑣᒃ ᓃᒥᑕᓇᔑᓃᔣᓱ 147 ᐁᑮ ᑕᓱ ᐱᐴᓉᒡ᙮ 29#Gen 49.29-32; 50.6. ᐊᐲ ᑕᔥ ᐌᒋᒋᓭᓂᒃ ᐋᔕ ᑫᑳ ᐃᔅᕒᐃᔭᓬ ᒋᓂᐳᒡ, ᐅᑮ ᐊᑐᒫᓐ ᐅᑯᓯᓴᓐ ᒎᓴᐴᓐ Joseph ᐁᑮᐃᓈᒡ, ᑮᔥᐱᓐ ᓴ ᒣᓍᐸᒥᐗᓀᓐ, ᑕᑲ ᐃᔑᓂᒌᓂᓐ ᔒᐹ ᐃᐃᒫ ᓂᒻᑆᒥᕽ ᒋᐊᔓᑕᒪᓐ ᒋᒥᓄᑑᑕᐎᔭᓐ, ᒋᑌᐺᔭᓐ ᐃᑕᔥ ᑲᔦ᙮ ᑫᑯ ᐄᒋᐸᑮᕽ ᐃᔑ ᓂᑾᐅᔑᑫᓐ᙮ 30ᓂᓇᑕᐌᑖᓐ ᐃᓴ ᐊᐲ ᓂᐳᔮᓐ, ᐄᒋᐸᑮᕽ ᒋᐅᒋ ᒫᒌᓂᑰᔮᓐ ᒋᐊᐎ ᓇᐃᓂᑰᔮᓐ ᐁᔑ ᓇᐃᓂᑣ ᓂᑫᑌᔭᐋᒥᐸᓃᒃ, ᐅᑮᐃᓈᓐ᙮
ᒎᓴᐴᓐ ᐃᑕᔥ ᐅᑮᐃᑰᓐ, ᐁᔭᐞ, ᓂᑲ ᐃᔑᒋᑫ ᐃᐃ ᑳᐃᔑᔭᓐ᙮
31ᒉᑲᑉ ᐃᑕᔥ ᑮᐃᑭᑐ, ᐊᐱᒧᓐ ᓴ ᐃ ᒌᔑᒋᑫᔭᓐ, ᐅᑮᐃᓈᓐ᙮ ᒦᑕᔥ ᒎᓴᐴᓐ ᑳᐃᔑ ᐊᐱᒧᓂᒡ᙮ ᒉᑲᑉ ᐃᑕᔥ ᑮᐊᒋᑕᐎᑴᓂ ᐁᑮ ᒦᑴᒋᐌᑕᕽ ᐁᓂᑴᔑᕽ ᐃᓇᑫ ᐅᓂᐯᐎᓈᑯᕽ᙮
Iliyochaguliwa sasa
ᒉᓂᓯᔅ 47: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society