ᒉᓂᓯᔅ 46
46
ᐃᔅᕒᐃᔭᓬ ᑲᑭᓇ ᐁᑕᔑᒡ ᑮᐃᔖᒡ ᐄᒋᐸᑮᕽ
1ᐃᔅᕒᐃᔭᓬ Israel ᑕᔥ ᐅᑮ ᐅᔑᐗᓂᑳᑖᓇᓐ ᑲᑭᓇ ᐅᑕᔭᐄᒪᓐ ᐁᑮ ᐃᔖᒡ ᐲᐊᕒᔒᐸ Beersheba, ᒦᑕᔥ ᐌᑎ ᑳᐃᔑ ᐸᑭᑎᓈᓲᑕᒪᐙᒡ ᑭᔐᒪᓂᑑᓐ ᑳᑮ ᐅᒪᓂᑑᒥᓂᒡ ᐅᑌᑌᐸᓃᓐ ᐋᐃᓯᑰᓐ Isaac᙮ 2ᑮᐃᔑᓇᒻ ᑕᔥ ᐁᑎᐱᑲᓂᓂᒃ ᑭᔐᒪᓂᑑᓐ ᐁᑲᓅᓂᑯᒡ ᐁᑮᐃᑯᒡ, ᒉᑲᑉ, ᒉᑲᑉ᙮ ᒦᔥ ᑳᐃᔑ ᓇᑴᑕᐙᒡ, ᐅᐅᒫ ᓂᑕᔮ᙮
3ᑭᔐᒪᓂᑑᓐ ᑕᔥ ᐅᑮᐃᑰᓐ, ᓃᓐ ᑭᔐᒪᓂᑑ, ᑭᑌᑌ ᐅᑭᔐᒪᓂᑑᒪᓐ, ᑫᑯ ᓭᑭᓯᑫᓐ ᒌᔖᔭᓐ ᐌᑎ ᐄᒋᐸᑮᕽ Egypt᙮ ᓂᐐ ᐃᔑᐋᒃ ᐅᔕ ᑭᐲᐌᓰᒪᒃ ᐌᑎ ᒋᑕᔑ ᐹᑏᓄᐙᒡ᙮ 4ᑭᑲᔑ ᐐᒌᐎᓐ ᓴ ᐌᑎ ᐄᒋᐸᑮᕽ, ᓂᑲ ᐱᑮᐌᐎᓈᒃ ᐃᑕᔥ ᒦᓇᐙ ᐃᑭ ᑭᐲᐌᓰᒪᒃ ᐅᐅᒫ ᐊᑮᕽ᙮ ᒎᓴᑉ Joseph ᑭᑲ ᐐᒌᐎᒃ ᐊᐲ ᐊᓂ ᓂᐳᐗᒡ, ᐅᑮᐃᑰᓐ᙮
5ᒉᑲᑉ Jacob ᑕᔥ ᑮᐅᒋ ᒫᒑ ᐃᐃᒫ ᐲᐊᕒᔒᐸ᙮ ᐅᑯᓯᓴᐞ ᐁᑮ ᐴᓯᐃᑯᒡ, ᐁᑮ ᐴᓯᐋᓂᒡ ᑲᔦ ᐅᓃᒑᓂᓯᓂ, ᐐᐎᓂ ᑲᔦ ᐃᐃᒫ ᐅᑖᐹᓈᑯᕽ ᑭᒋᐅᑭᒫᓐ ᑳᑮ ᐲᒋᓂᔕᐙᓂᒡ ᒋᐱᒥᐎᓂᑯᐙᒡ᙮ 6#Act 7.15. ᐅᑮ ᒫᒌᓈᐞ ᑕᔥ ᑲᔦ ᐅᑕᐗᑳᓇᐞ, ᐅᑕᔭᐄᒪᓐ ᑲᔦ ᑫᓇᓐ Canaan ᐊᑮᕽ ᑳᑮ ᐅᑎᓇᒧᐙᒡ, ᐁᑮ ᐃᔖᐙᒡ ᐄᒋᐸᑮᕽ᙮ ᒉᑲᑉ ᑕᔥ ᐅᑮ ᒫᒌᓈᐞ ᑲᑭᓇ ᐅᐲᐌᓰᒪᐞ: 7ᐅᑯᓯᓴᐞ, ᑳᑮ ᑸᐎᓭᓯᐎᓂᒡ ᐆᔑᓴᐞ ᑲᔦ, ᐅᑖᓂᓴᐞ, ᑳᑮ ᐃᑴᓭᓯᐎᓂᒡ ᐆᔑᓴᐞ ᑲᔦ᙮ ᑲᑭᓇ ᓴ ᑯ ᐅᐲᐌᓰᒪᐞ ᐅᑮ ᐸᑲᒥ ᐐᒌᐙᐞ ᐃᐃᒫ ᐄᒋᐸᑮᕽ᙮
8ᒦᐗᒃ ᐃᑕᔥ ᐅᑯ ᐃᔅᕒᐃᔭᓬᐊᒃ ᑳᑮ ᐃᔖᐙᒡ ᐄᒋᐸᑮᕽ᙮ ᒦᐗᐞ ᐄᑐᒃ ᐃᐃ ᒉᑲᑉ ᐅᐲᐌᓰᒪᐞ᙮ ᐅᕒᐆᐱᓐ Reuben ᒉᑲᑉ ᓂᑕᒻ ᐅᑯᓯᓴᓐ᙮ 9ᒦᐗᐞ ᐃᑕᔥ ᐅᐅ ᐅᕒᐆᐱᓐ ᐅᑯᓯᓴᐞ: ᐁᓇᒃ Hanoch, ᐸᓬᐆ Pallu, ᐄᓯᕒᐊᓐ Hezron ᑲᔦ ᒑᕒᒦ Carmi᙮ 10ᒦᔥ ᐅᐅ ᓯᒥᔭᓐ Simeon ᐅᑯᓯᓴᐞ: ᒌᒥᔪᐌᓬ Jemeul, ᒉᒥᓐ Jamin, ᐆᐋᑦ Ohad, ᒉᑭᓐ Jakin, ᓲᐋᕒ Zohar ᑲᔦ ᔐᔪᓬ Shaul, ᑳᑮ ᐅᒫᒫᒡ ᐃᑴᐗᓐ ᑫᓇᓐ ᐊᑮᕽ ᐌᒌᓂᒡ᙮ 11ᒦᔥ ᐅᐅ ᓬᐄᐹᐃ Levi ᐅᑯᓯᓴᐞ: ᑫᕒᔕᓐ Gershon, ᑰᐊᑦ Kohath ᑲᔦ ᒦᕒᐁᕒᐋᐃ Merari᙮ 12ᒦᔥ ᐐᓐ ᐅᐅ ᒎᑕ Judah ᐅᑯᓯᓴᐞ: ᐁᕒ Er, ᐆᓇᓐ Onan, ᔒᓬᐊ Shelah, ᐲᕒᐃᔅ Perez, ᑲᔦ ᓰᕒᐊ Zerah᙮ ᐁᕒ ᐊᐊ ᑲᔦ ᐆᓇᓐ ᑮᑕᔑ ᐃᔥᒀ ᐱᒫᑎᓯᐗᒃ ᑫᓇᓐ ᐊᑮᕽ᙮ ᐲᕒᐃᔅ Perez ᐅᑯᓯᓴᐞ: ᐄᓯᕒᐊᓐ Hezron ᑲᔦ ᐁᒪᓬ Hamul᙮ 13ᒦᐗᐞ ᐃᑕᔥ ᐅᐅ ᐄᓴᑳᕒ Issachar ᐅᑯᓯᓴᐞ᙮ ᑑᓬᐊ Tola, ᐱᔫᐊ Puah, ᒉᔕᑉ Jashub ᑲᔦ ᔑᒻᕒᐊᓐ Shimron᙮ 14ᒦᔥ ᐅᐅ ᓭᐸᓬᐊᓐ Zebulun ᐅᑯᓯᓴᐞ: ᓰᕒᐁᑦ Sered, ᐄᓬᐊᓐ Elon ᑲᔦ ᒑᓬᐄᐁᓬ Jahleel᙮ 15ᒦᐗᐞ ᐃᑕᔥ ᐃᐃ ᒉᑲᑉ Jacob ᐅᑯᓯᓴᐞ ᐃᓂ ᑲᔦ ᐅᑖᓂᓴᓐ ᑖᔨᓇᐗᓐ Dinah ᑳᑮ ᐅᒋ ᓂᑖᐎᑭᓂᒡ ᐃᓂ ᐐᐗᓐ ᓬᐄᔭ Leah ᐁᔑᓂᑳᓱᓂᒡ ᐌᑎ ᒣᓱᐳᑌᒥᔭ Mesopotamia ᐊᑮᕽ᙮ ᐃᐃ ᓴ ᐅᑯᓯᓴᐞ ᑕᑯ ᑲᔦ ᐅᑖᓂᓴᐞ ᒫᒪᐤ ᓂᓯᒥᑕᓇᔑᓂᓯᓐ 33 ᑮᑕᔑᐗᐞ᙮
16ᒦᔥ ᐅᐅ ᑳᑦ Gad ᐅᑯᓯᓴᐞ: ᓰᐳᓐ Zephon, ᐋᑳᐃ Haggi, ᔔᓈᐃ Shuni, ᐁᔅᐸᓐ Ezbon, ᐄᕒᐋᐃ Eri, ᐁᕒᐊᑎ Arodi ᑲᔦ ᐊᕒᐄᓬᐋᐃ Areli᙮ 17ᒦᔥ ᐅᐅ ᐋᔕᕒ Asher ᐅᑯᓯᓴᐞ: ᐃᒻᓇ Imnah, ᐃᔔᐊ Ishuah, ᐃᔔᐋᐃ Ishui ᑲᔦ ᐲᕒᐋᐃᔭ Beriah᙮ ᐅᑖᓂᓴᓐ ᐃᑕᔥ ᓰᕒᐊ Serah ᑮᐃᔑᓂᑳᓱᐗᓐ᙮ ᐲᕒᐋᐃᔭ ᐅᑯᓯᓴᐞ: ᐄᐸᕒ Heber ᑲᔦ ᒫᓬᑭᐁᓬ Malkiel᙮ 18ᒦᐗᐞ ᐃᑕᔥ ᐃᐃ ᒉᑲᑉ ᐅᓃᒑᓂᓴᐞ ᑳᑮ ᐅᒋ ᓂᑖᐎᑭᓂᒡ ᐃᓂ ᐃᑴᐗᓐ ᓯᓬᐸ Zilpah ᐁᔑᓂᑳᓱᓂᒡ᙮ ᒥᑕᔑᓂᑯᑣᓱ 16 ᒫᒪᐤ ᑮᑕᔑᐗᐞ᙮ ᓬᐁᐸᓐ Laban ᐄᑐᒃ ᑮᒦᑭᐌᑯᐸᓐ ᓯᓬᐸᐗᓐ, ᐁᑮ ᒦᓈᑯᐸᓀᓐ ᐅᑖᓂᓴᓐ ᓬᐄᔭᐗᓐ᙮
19ᒦᐗᐞ ᐃᑕᔥ ᐅᐅ ᒉᑲᑉ ᐅᑯᓯᓴᐞ ᐅᕒᐁᒐᓬᐗᓐ Rachel ᑳᑮ ᐅᒋ ᓂᑖᐎᑭᓂᒡ: ᒎᓴᑉ ᑲᔦ ᐯᒋᒪᓐ Benjamin᙮ 20#Gen 41.50-52. ᐌᑎ ᓴ ᐄᒋᐸᑮᕽ ᒎᓴᑉ ᐐᐗᓐ ᐋᓯᓈᑦ Asenath ᐁᔑᓂᑳᓱᓂᒡ ᑮᐅᒋ ᓂᑖᐎᑭᐗᐞ ᐅᑯᓯᓴᐞ ᒪᓈᓴ Manasseh ᑲᔦ ᐄᐸᕒᐃᔭᒻ Ephraim ᐁᑮ ᐃᔑᓂᑳᓱᓂᒡ᙮ ᐋᓯᓈᑦ ᓴ ᐹᑎᐱᕒᐊ Potiphera ᑮᐃᔑᓂᑳᓱᐗᓐ ᐅᑌᑌᓐ ᐊᓇᒥᐁᐎᑭᒫᓐ ᐅᓐ On ᐆᑌᓈᕽ᙮ 21ᒦᔥ ᐅᐅ ᐯᒋᒪᓐ ᐅᑯᓯᓴᐞ: ᐲᓬᐊ Bela, ᐲᑲᕒ Beker, ᐋᔥᐯᓬ Ashbel, ᑮᕒᐊ Gera, ᓀᐊᒪᓐ Naaman, ᐄᐋᐃ Ehi, ᕒᐊᔥ Rosh, ᒪᐱᒻ Muppim, ᐊᐱᒻ Huppim ᑲᔦ ᐋᕒᑦ Ard᙮ 22ᒦᐗᐞ ᐃᑕᔥ ᐃᐃ ᐅᑯᓯᓯᐙᐞ ᐊᐊ ᐅᕒᐁᒐᓬ ᐊᐊ ᑲᔦ ᒉᑲᑉ᙮ ᒥᑖᔑᓃᐎᓐ 14 ᒫᒪᐤ ᑮᑕᔑᐗᐞ᙮
23ᒦᐗᓐ ᑕᔥ ᐅᓄ ᑌᓐ Dan ᐅᑯᓯᓴᓐ: ᐆᔑᒻ Hushim᙮ 24ᒦᔥ ᐐᓐ ᐅᐅ ᓇᐱᑕᓬᐋᐃ Naphtali ᐅᑯᓯᓴᐞ: ᒐᓰᐁᓬ Jahziel, ᑰᓈᐃ Guni, ᒌᓴᕒ Jezer ᑲᔦ ᔑᓬᐁᒻ Shillem᙮ 25ᒦᐗᐞ ᐃᑕᔥ ᐃᐃ ᒉᑲᑉ ᐅᑯᓯᓴᐞ ᑳᑮ ᐅᒋ ᓂᑖᐎᑭᓂᒡ ᐃᓂ ᐃᑴᐗᓐ ᐱᓬᐊ Bilhah ᐁᔑᓂᑳᓱᓂᒡ᙮ ᓃᔣᓱ 7 ᒫᒪᐤ ᐁᑮ ᑕᔑᓂᒡ᙮ ᓬᐁᐸᓐ ᐄᑐᒃ ᑮᒦᑭᐌᑯᐸᓐ ᐱᓬᐊᐗᓐ, ᐁᑮ ᒦᓈᑯᐸᓀᓐ ᐅᑖᓂᓴᓐ ᐅᕒᐁᒐᓬᐗᓐ᙮
26ᐃᑭ ᑕᔥ ᑲᑭᓇ ᒉᑲᐴᓐ ᑳᑮ ᐃᔑ ᐐᒌᐙᐙᒡ ᐄᒋᐸᑮᕽ; ᐃᐃ ᓴ ᑎᐱᓇᐌ ᐅᐲᐌᓰᒪᐞ, ᓂᑯᑣᓯᒥᑕᓇᔑᓂᑯᑣᓱ 66 ᑮᑕᔑᐗᐞ᙮ ᑳᐐᓐ ᐐᓐ ᐅᑯᓯᓴᐞ ᐐᐎᓂ ᑮᑕᑾᑭᒫᓰᐗᐞ᙮ 27#Act 7.14. ᐃᐃ ᑕᔥ ᓃᔑᓐ ᒎᓴᐴᓐ ᐅᑯᓯᓯᓂ ᑳᑮ ᓂᑖᐎᑭᓂᒡ ᐄᒋᐸᑮᕽ, ᒦ ᐃ ᒫᒪᐤ ᓃᔣᓯᒥᑕᓇ 70 ᒉᑲᑉ ᑮᑕᔑᐙᒡ ᑮᐃᔖᐙᒡ ᐄᒋᐸᑮᕽ᙮
ᒉᑲᑉ ᐁᑕᔑᒡ ᑮᐃᔖᒡ ᐄᒋᐸᑮᕽ
28ᒉᑲᑉ Jacob ᐃᑕᔥ ᐅᑮ ᓃᑳᓂᓂᔕᐙᓐ ᒎᑕᐗᓐ Judah ᒋᐊᑕ ᐙᐸᒫᓂᒡ ᒎᓴᐴᓐ Joseph ᒋᑭᑭᓄᐊᒫᑯᐙᒡ ᐋᑎ ᐃᓇᑫ ᐁᔑᐊᔮᓂᒃ ᑰᔑᓐ Goshen᙮ ᒦᑕᔥ ᑳᑮ ᑕᑯᔑᓄᐙᒡ ᑰᔑᓐ ᐊᑮᕽ᙮ 29ᒎᓴᑉ ᐃᑕᔥ ᑮᐴᓯ ᐅᒦᑳᓱᐎ ᐅᑖᐹᓈᑾᓐ ᐁᑮ ᐃᔖᒡ ᑰᔑᓐ ᒋᓇᑭᔥᑲᐙᒡ ᐅᑌᑌᓐ ᐃᔅᕒᐃᔭᓬᐊᓐ Israel᙮ ᐊᐲ ᑕᔥ ᐃᑯ ᑳᓈᑯᓯᒡ ᐁᔑᐊᔮᓂᒡ, ᐅᑮ ᑭᑭᒋᑴᐱᓈᓐ, ᑭᓉᔥ ᐃᑕᔥ ᑮᒪᐎ ᐁᑮ ᑭᑭᒋᑴᓈᒡ᙮ 30ᐃᔅᕒᐃᔭᓬᐊᓐ ᐃᑕᔥ ᐅᑮᐃᑰᓐ, ᒦᑕᔥ ᐃᐃ ᓅᑯᒻ ᐱᓵᓐ ᒋᓂᐳᔮᓐ, ᓃᓐ ᐄᑐᒃ ᐃᑯ ᑭᐙᐸᒥᓐ ᑫᔮᐱ ᐁᐱᒫᑎᓯᔭᓐ, ᐅᑮᐃᑰᓐ᙮
31ᒎᓴᑉ ᐃᑕᔥ ᐅᑮᐃᓈᐞ ᐐᒋᑭᐌᔭᐞ, ᐃᐃ ᑲᔦ ᐅᑌᑌᓐ ᐅᐙᑳᐃᑲᓂᓃᕽ ᑳᑮ ᐅᒌᓂᒡ, ᓂᐐᐃᔖ ᓴ ᐯᕒᐆ Pharaoh ᐅᐅ ᐁᐐ ᐊᐎᐃᓇᒃ, ᓃᒋᑭᐌᔭᒃ ᓴ, ᐃᑭ ᑲᔦ ᓂᑌᑌ ᐅᐙᑳᐃᑲᓂᕽ ᐌᒌᓂᒡ, ᑳᑮ ᐃᔑᑖᐙᐸᓐ ᑫᓇᓐ Canaan ᐊᑮᕽ, ᓂᑮ ᐅᑎᓯᑰᒃ᙮ 32ᓂᑲ ᐐᑕᒪᐙ ᑲᔦ ᐁᑲᓇᐎ ᒫᓇᒑᓂᔑᐎᓂᓃᐎᔦᒃ, ᐁᑲᓇᐌᓂᒣᒀ ᐊᔭᐋᐎᔕᒃ᙮ ᓂᑲ ᐐᑕᒪᐙ ᑲᔦ ᐁᑮ ᐲᓂᒣᒃ ᒫᓇᒑᓂᔕᐞ, ᐱᔑᑭᐗᐞ ᑲᔦ, ᑲᑭᓇ ᑲᔦ ᑫᑰᓐ ᐁᔮᔦᒃ᙮ 33ᐊᐲ ᑕᔥ ᐃᔑᓭᓂᒃ ᐯᕒᐆ ᐊᑐᒥᓀᒃ ᐅᐅ ᑕᔥ ᐃᔑ ᑲᑴᒋᒥᓀᒃ ᐋᓃᓐ ᐁᓇᓄᑮᔦᒃ? 34ᐅᐅ ᑕᔥ ᑭᑲᐃᓈᐙ, ᓃᓇᐎᓐᑦ ᓴ ᑭᑕᓄᑮᐋᑲᓇᒃ, ᒣᐎᔕ ᓴ ᑯ ᑮᐱ ᑸᐎᓭᓯᐎᔮᕽ ᓂᑮ ᐱᐅᒋ ᐃᓇᓄᑮᒥᓐ ᐁᑲᓇᐌᓂᒪᑭᑣ ᐊᔭᐋᐎᔕᒃ, ᑖᐱᔥᑰ ᓂᑫᑌᔭᐋᒥᓈᐸᓃᒃ ᑳᑮ ᐱ ᐃᔑᒋᑫᐙᒡ᙮ ᒦᑕᔥ ᐃᐃ ᒋᐸᑭᑎᓂᑰᔦᒃ ᒋᔑ ᑲᐯᔑᔦᒃ ᑰᔑᓐ ᐃᓇᑫ ᐊᑮᕽ, ᐋᓃᔥ ᐄᒋᑉ Egypt ᑳᐅᒌᐙᒡ ᐅᑲᒀᓂᓴᑫᓂᒫᐙᐞ ᑲᑭᓇ ᐅᑲᓇᐎ ᒫᓇᒑᓂᔑᐌᐞ, ᒎᓴᑉ ᑮᐃᑭᑐ᙮
Iliyochaguliwa sasa
ᒉᓂᓯᔅ 46: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society