ᒉᓂᓯᔅ 45
45
ᒎᓴᑉ ᑮᑭᑫᑖᑯᐃᑎᓱᒡ ᐊᐌᓀᓐ ᑌᓄᐎᒡ
1 # Act 7.13. ᒎᓴᑉ Joseph ᐃᑕᔥ ᑳᐐᓐ ᐊᐗᔑᒣ ᐅᑮ ᑲᔥᑭᑑᓰᓐ ᒋᒪᓈ ᐅᒻᐺᔦᑕᕽ ᐃᐃᒫ ᑳᑮ ᐃᔑᐊᔮᓂᒡ ᐃᐃ ᐅᑕᓄᑮᐋᑲᓇᐞ, ᒦᔥ ᑳᐃᑭᑐᒡ, ᑕᑲ ᑲᑭᓇ ᐊᐎᔭ ᐅᐅᒫ ᐁᔑᐊᔮᐗᒃ ᑕᐅᒋ ᓵᑲᐊᒻ, ᑮᐃᑭᑐ᙮ ᑳᐐᓐ ᐃᑕᔥ ᐊᐎᔭᐞ ᐃᐃᒫ ᑮᐊᔮᓰᐗᐞ ᐊᐲ ᒎᓴᑉ ᑮᑭᑫᑖᑯᐃᑎᓱᒡ ᒋᑭᑫᓂᒥᑯᒡ ᐐᒋᑭᐌᔭᐞ ᐊᐌᓀᓐ ᑌᓄᐎᒡ᙮ 2ᑮᑭᔒᐌ ᑕᔥ ᐁᒪᐎᒡ, ᒦ ᐃ ᑳᑮ ᓅᑖᑯᒡ ᐄᒋᑉ Egypt ᑳᐅᒌᓂᒡ, ᐯᕒᐆ Pharaoh ᑕᔥ ᑲᔦ ᐅᐙᑳᐃᑲᓂᕽ ᑳᑮ ᐊᔮᓂᒡ ᑮᓅᑕᒨᐞ᙮ 3ᒎᓴᑉ ᐃᑕᔥ ᐅᑮᐃᓈᐞ ᐐᒋᑭᐌᔭᐞ, ᓃᓐ ᐅᔕ ᒎᓴᑉ! ᑫᔮᐱ ᓇ ᐱᒫᑎᓯ ᓂᑌᑌ? ᐅᑮᐃᓈᐞ᙮ ᐐᒋᑭᐌᔭᐞ ᐃᑕᔥ ᑳᐐᓐ ᐅᑮ ᓇᑴᑖᑯᓰᐞ, ᐋᓃᔥ ᑮᓭᑭᓯᐗᐞ ᐃᐃᒫ ᑳᐃᔑᐊᔮᒡ᙮ 4ᐅᐅ ᑕᔥ ᐅᑮᐃᓈᐞ ᐐᒋᑭᐌᔭᐞ, ᑕᑲ ᐯᔓ ᓈᓯᑲᐎᔑᒃ᙮ ᐯᔓ ᑕᔥ ᐅᑮ ᐱ ᓈᓯᑳᑰᐞ᙮ ᒦᑕᔥ ᑳᐃᓈᒡ, ᓃᓐ ᐅᔕ ᒎᓴᑉ ᑮᒋᑭᐌᔨᐙ, ᐄᒋᐸᑮᕽ ᐃᓇᑫ ᑳᑮ ᐃᔑ ᐊᑖᐙᑳᔑᔦᑭᐸᓐ᙮ 5ᑫᑯ ᑕᔥ ᓅᑯᒻ ᐃᐃ ᐅᒋ ᒫᓈᐸᑎᓱᑫᒃ, ᑫᑯ ᐅᒋ ᓂᔥᑫᓂᑎᓱᑫᒃ ᐅᐅᒫ ᓴ ᐃᓇᑫ ᑳᑮ ᐃᔑ ᐊᑖᐙᑳᔑᔦᒃ; ᑭᔐᒪᓂᑑ ᐄᑐᒃ ᑳᑮ ᐱ ᓃᑳᓂᓂᔕᐅᒡ ᒋᐱᒫᒋᐃᒪᒃ ᐯᒫᑎᓯᓂᒡ᙮ 6ᐃᓇᔥᑫ ᐋᔕ ᓃᔓᐱᐴᓐ ᑳᐐᓐ ᐅᐅᒫ ᐊᔮᓯᓅᓐ ᒦᒋᒻ, ᑫᔮᐱ ᑕᔥ ᓈᓄᐱᐴᓐ ᑳᐐᓐ ᑕᐲᑾᑲᒥᑭᐱᒋᑫᓈᓂᐗᓯᓅᓐ, ᑳᐐᓐ ᑕᒪᓂᔑᑫᓰᒻ᙮ 7ᑭᔐᒪᓂᑑ ᑕᔥ ᐐᓐ ᓂᑮ ᓃᑳᓂᓂᔕᐅᒃ ᒋᑆ ᐲᔖᔦᒃ ᐅᐅᒫ ᑮᓇᐙ ᐅᐅ ᓇᑫ ᒋᔑ ᑭᒋ ᐱᒫᒋᐃᑰᔦᒃ, ᑫᒋᓈᒡ ᐃᑯ ᑲᔦ ᑭᐲᐌᓰᒥᐙᒃ ᒋᐊᓂ ᐱᒫᑎᓯᐙᒡ᙮ 8ᐃᓇᔥᑫ ᑕᔥ ᑳᐐᓐ ᑮᓇᐙ ᑳᑮ ᐲᒋᓂᔕᐅᔦᒃ ᐅᐅᒫ, ᑭᔐᒪᓂᑑ ᐅᔕ᙮ ᓂᑮ ᐃᔑᐃᒃ ᐅᔕ ᒋᐋᓂᑫ ᐅᑭᒫᑲᑕᐎᒪᒃ ᐃᓂ ᐯᕒᐆᓐ᙮ ᓃᓐ ᑲᔦ ᓂᑮ ᑎᐯᑕᒧᐃᒃ ᑲᑭᓇ ᑫᑰᓐ ᑳᑎᐯᑕᕽ᙮ ᒥᓯᐌ ᓴ ᑯ ᐄᒋᐸᑭ ᓂᑎᐯᑖᓐ᙮
9 # Act 7.14. ᐌᔩᑉ ᐃᑕᔥ ᒫᒑᒃ ᑮᐌᒃ ᒌᔖᔦᒃ ᓂᑌᑌ, ᐅᐅ ᑭᑲᐃᓈᐙ, ᒦ ᓴ ᐅᐌᓂ ᑭᑯᓯᔅ ᒎᓴᑉ ᐁᑭᑐᒡ: ᑭᔐᒪᓂᑑ ᐅᔕ ᓂᑮ ᐃᔑᐃᒃ ᒥᓯᐌ ᒋᑎᐯᑕᒧᐗᒃ ᐄᒋᐸᑮᓂ; ᑕᑲ ᐲᔖᓐ ᐅᐅᒫ ᑳᔑ ᐊᔮᔮᓐ, ᑫᑯ ᑆᑕᐐᑫᓐ᙮ 10ᐌᑎ ᓴ ᑭᑲ ᐃᔑᑖ ᑰᔑᓐ Goshen ᐊᑮᕽ ᑳᐃᒋᑳᑌᒃ, ᐯᔓ ᑭᑲ ᐃᔑᐊᔮ ᐁᔑᐊᔮᔮᓐ, ᑭᓃᒑᓂᓴᒃ ᑲᔦ, ᑰᔑᓴᒃ ᑲᔦ, ᑭᑖᓂᑰᐱᓴᒃ ᑲᔦ, ᑭᒫᓇᒑᓂᔑᒪᒃ ᑲᔦ, ᑭᐱᔑᑮᒪᒃ ᐃᑕᔥ ᑲᔦ, ᑲᑭᓇ ᓴ ᑯ ᑫᑰᓇᓐ ᐁᔮᔭᓐ᙮ 11ᒦᑕᔥ ᐌᑎ ᑫᑕᔑ ᓈᓈᑲᒋᐃᓈᓐ, ᑫᔮᐱ ᐄᑐᒃ ᓈᓄᐱᐴᓐ ᑳᐐ ᐊᔮᓯᓄᒃ ᒦᒋᒻ᙮ ᒫᑭᔖ ᒫᐐᓐ ᑭᑖᐗᓯᑖᐎᓭ, ᐃᑭ ᑲᔦ ᑭᑖᐎᓂᕽ ᐁᔮᐙᒡ, ᐃᑭ ᑲᔦ ᑲᑭᓇ ᑳᐊᔮᐗᑣ ᑕᑲᐗᔅᑲᑌᐗᒃ᙮
12ᑮᓇᐙ ᓴ ᑯ ᑭᐙᐸᒥᒻ, ᐯᒋᒪᓐ Benjamin ᓂᐙᐸᒥᒃ, ᓃᓐ ᓴ ᑌᐺ ᒎᓴᑉ ᐁᔮᐎᔮᓐ ᑳᑲᑲᓅᓂᓇᑰᒃ᙮ 13ᐐᑕᒪᐎᒃ ᐃᑕᔥ ᑲᔦ ᓂᑌᑌ ᑲᑭᓇ ᐁᔑ ᑭᑌᑖᑯᓯᐗᒃ ᐅᐅᒫ ᐄᒋᐸᑮᕽ, ᑲᑭᓇ ᑲᔦ ᑫᑰᓂᓂ ᑳᐙᐸᑕᒣᒃ᙮ ᐌᔩᑉ ᐃᑕᔥ ᐲᓈᑫᒃ ᓂᑌᑌ ᐅᐅᒫ, ᑮᐃᑭᑐ᙮
14ᒦᑕᔥ ᑳᐃᔑ ᑭᑭᒋᑴᐱᓈᒡ ᐐᒋᑭᐌᔭᓐ ᐯᒋᒪᓇᓐ ᐁᑮ ᒪᐎᒡ, ᒦᔥ ᐯᒋᒪᓇᓐ ᑳᐃᔑ ᑭᑭᒋᑴᐱᓂᑯᒡ ᐁᑮ ᒪᐎᓂᒡ᙮ 15ᑲᑭᓇ ᑕᔥ ᐅᑮ ᐅᒌᒫᐞ ᑯᑕᒃ ᐐᒋᑭᐌᔭᐞ, ᐁᑮ ᑭᑭᒋᑴᓈᒡ᙮ ᒦᑕᔥ ᓈᓈᑫ ᑳᐃᔑ ᑲᑲᓅᓂᑯᒡ᙮
16ᐊᐲ ᑳᐅᒋᒋ ᓅᑖᑳᓂᐗᕽ ᐯᕒᐆ ᐅᐙᑳᐃᑲᓂᕽ ᒎᓴᑉ ᐐᒋᑭᐌᔭᐞ ᐁᑮ ᑕᑯᔑᓂᓂᒡ, ᐯᕒᐆ ᓴ ᑮᒥᓉᑕᒻ, ᐃᐃ ᑲᔦ ᐅᑖᓂᑫ ᐅᑭᒫᒪᐞ᙮ 17ᐅᐅ ᑕᔥ ᐅᑮᐃᓈᓐ ᒎᓴᐴᓐ, ᐅᐅᐌᓂ ᓴ ᐃᔑ ᑮᒋᑭᐌᔭᒃ, ᐅᐅ ᐃᔑᒋᑫᒃ; ᐱᒋᐗᓀᐃᑾᒃ ᑭᑕᐗᑳᓂᐙᒃ ᒌᔖᔦᒃ ᑫᓇᓐ Canaan ᐊᑮᕽ᙮ 18ᐲᓈᑫᒃ ᑭᑌᑌᐙ, ᐃᑭ ᑲᔦ ᑭᑖᐎᓂᐙᕽ ᐁᔮᐙᒡ ᐲᓈᑫᒀᓂᒃ ᐅᐅᒫ ᐁᔑᐊᔮᐗᒃ᙮ ᑭᑲ ᒦᓂᓂᓂᒻ ᓴ ᒫᐗᒡ ᐌᓂᔑᔑᕽ ᐊᑭ ᐅᐅᒫ ᐄᒋᐸᑮᕽ, ᒦᑕᔥ ᐃᐃᒫ ᑫᐅᑕᒋᑫᔦᒃ ᐁᔑ ᐌᓅᑕᒃ ᐅᐅ ᐊᑭ᙮ 19ᒦᑕᔥ ᑲᔦᐅᐌ ᑫᐃᓇᑣ, ᐅᐅᐌ ᓴ ᐃᔑᒋᑫᒃ; ᐅᐅᒫ ᓴ ᐄᒋᐸᑮᕽ ᐅᒋ ᒫᒌᓂᑾᒃ ᐅᑖᐹᓈᑾᒃ ᑫᔑ ᐴᓯᐙᒡ ᑭᓃᒑᓂᓯᐙᒃ, ᑭᐐᐎᐙᒃ ᑲᔦ, ᒋᐲᓀᒃ ᐃᑕᔥ ᑲᔦ ᑭᑌᑌᐙ, ᒦᔥ ᐃᐃ ᐃᔑ ᐲᔖᑫᒃ᙮ 20ᑫᑯ ᐐᓐ ᐸᐹᐱᓯᔅᑫᑕᑫᒃ ᑫᑰᓇᓐ ᑌᐯᑕᒣᒃ, ᐋᓃᔥ ᒫᐗᒡ ᐃᑯ ᐌᓂᔑᔑᕽ ᒥᓯᐌ ᐄᒋᐸᑮᕽ ᑭᑲ ᑎᐱᓇᐌᐎᓯᒻ, ᐅᑮᐃᓈᓐ᙮
21ᒦᑕᔥ ᐃᐃ ᐃᔅᕒᐃᔭᓬ Israel ᐅᑯᓯᓴᐞ ᑳᐃᔑᒋᑫᓂᒡ᙮ ᒎᓴᑉ ᐅᑮ ᒦᓈᐞ ᐅᑖᐹᓈᑾᐞ ᐁᑮ ᐃᔑᒋᑫᒡ ᐯᕒᐆᓐ ᑳᑮᐃᑯᒡ᙮ ᐅᑮ ᒦᓈᐞ ᑲᔦ ᑫᓇᐗᐳᓂᒡ ᐊᓂ ᐱᒥ ᐊᔮᓂᒡ᙮ 22ᐁᑕᓱ ᐯᔑᑯᓂᒡ ᐃᑕᔥ ᐅᑮ ᒦᓈᐞ ᑭᑭᔥᑭᑲᓇᓐ ᑫᒣᔥᑯᓯᑲᒥᓂᒡ᙮ ᐯᒋᒪᓇᓐ ᐃᑕᔥ ᐐᓐ ᓃᔣᒃ 300 ᐙᐹᐱᑯ ᔔᓂᔮᐞ ᐅᑮ ᒦᓈᓐ, ᓈᓉᐙᓐ ᑲᔦ ᑭᑭᔥᑭᑲᓇᓐ ᐅᑮ ᒦᓈᓐ᙮ 23ᒦᑕᔥ ᐅᐅᐌᓂ ᑳᐃᔑᓂᔕᐊᒪᐙᒡ ᐅᑌᑌᓐ: ᒥᑖᓱ ᒫᔑᒥᑕᑎᒨᐞ ᐁᑮ ᐱᒥᐎᑑᓂᒡ ᐁᑯᑌᐲᓂᒡ ᐃᐃ ᒫᐗᒡ ᐌᓂᔑᔑᓂᓂᑭᓐ ᑫᑰᓐ ᐄᒋᐸᑮᕽ ᐌᒌᓂᑭᓐ, ᒥᑖᓱ ᑲᔦ ᓅᔐ ᒫᔑᒥᑕᑎᒨᐞ ᐁᑮ ᐱᒥᐎᑑᓂᒡ ᐁᑯᑌᐲᓂᒡ ᒦᒋᒻ, ᐸᑴᔑᑲᓇᓐ ᑲᔦ, ᑯᑕᒃ ᑲᔦ ᑫᑰᓐ ᑫᐋᐸᒋᑑᓂᒡ ᐱᒥ ᐊᔮᓂᒡ᙮ 24ᒦᑕᔥ ᒎᓴᑉ ᑳᐃᔑ ᒫᒋᓂᔕᐙᒡ ᐐᒋᑭᐌᔭᐞ, ᐁᐊᓂ ᒫᒑᓂᒡ ᐃᑕᔥ ᐅᐅ ᐅᑮᐃᓈᐞ, ᑫᑯ ᐊᓂ ᑮᑳᑎᑫᒃ ᐊᓂ ᐱᒥ ᐊᔮᔦᒃ, ᐁᑮᐃᓈᒡ᙮ 25ᒦᑕᔥ ᐃᐃᒫ ᐄᒋᐸᑮᕽ ᑳᐊᓂ ᐅᒋ ᒫᒑᓂᒡ ᐁᑮ ᐃᔖᓂᒡ ᐅᑌᑌᓂ ᒉᑲᐴᓐ Jacob ᐁᔑᐊᔮᓂᒡ ᑫᓇᓐ ᐊᑮᕽ᙮ 26ᐅᐅ ᑕᔥ ᐅᑮᐃᓈᐙᓐ ᐅᑌᑌᐙᓐ, ᒎᓴᑉ ᐅᔕ ᐄᓴᓐ ᑫᔮᐱ ᐱᒫᑎᓯ! ᐐᓐ ᐅᔕ ᒥᓯᐌ ᐄᒋᐸᑮᓂ ᐅᑎᐯᑖᓐ, ᐅᑮᐃᓈᐙᓐ᙮ ᐐᑫ ᑕᔥ ᑮᑯᔥᑴᑕᒨᓐ, ᑳᐐᓐ ᐅᑮ ᑌᐺᑖᑯᓰᐙᓐ᙮
27ᐊᐲ ᑕᔥ ᑳᐐᑕᒪᐙᐙᒡ ᑲᑭᓇ ᑫᑰᓐ ᑳᑮᐃᑯᐙᒡ ᒎᓴᐴᓐ, ᐁᐙᐸᒫᓂᒡ ᐃᑕᔥ ᑲᔦ ᐅᑖᐹᓈᑾᐞ ᒎᓴᐴᓐ ᑳᑮ ᐱ ᐃᔑᓂᔕᐙᓂᒡ ᑫᐊᓂ ᐃᔑ ᐱᒥᐎᓂᓐᒡ, ᒦᑕᔥ ᐅᑌᑌᐙᓐ ᒉᑲᐴᓐ ᑳᑮ ᑮᐌ ᒪᔥᑲᐙᑎᓯᓂᒡ᙮ 28ᐃᔅᕒᐃᔭᓬ ᑕᔥ ᑮᐃᑭᑐ, ᒦᐃ ᐁᑌᐺᑕᒫᓐ! ᓂᑯᓯᔅ ᒎᓴᑉ ᑫᔮᐱ ᐄᓴᓐ ᐁᐱᒫᑎᓯᒡ᙮ ᓂᑲ ᐃᔖᐙᓐ, ᒋᐊᐎ ᐙᐸᒪᒃ ᒋᑆ ᓂᐳᐗᒃ, ᑮᐃᑭᑐ᙮
Iliyochaguliwa sasa
ᒉᓂᓯᔅ 45: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society