ᐁᑭᓴᑕᔅ 29
29
ᑮᐅᓇᒋᑳᑌᓂᒃ ᐁᕒᐊᓐ, ᐅᑯᓯᓴᐞ ᑲᔦ ᐋᓃᓐ ᒪᔮ ᑫᐃᔑᒋᑫᓂᒡ
1ᒦᑕᔥ ᐅᐅᐌ ᑫᑑᑕᐗᒡ ᐁᕒᐊᓐ Aaron, ᐃᐃ ᑲᔦ ᐅᑯᓯᓴᐞ ᐊᐲ ᐃᔑ ᐸᑭᑎᓂᑰᐎᓯᐙᒡ ᒋᐊᓇᒥᐁᐎᑭᒫᐎᐙᒡ ᒋᐊᓄᑮᑕᐎᐙᒡ᙮ ᑭᑲ ᐅᑖᐱᓈ ᐯᔑᒃ ᐋᐯ ᐱᔑᑭ, ᓃᔑᓐ ᐃᑕᔥ ᐋᐯ ᒫᓇᒑᓂᔕᒃ ᑫᑰᓐ ᐁᔑ ᒫᔑ ᐊᔮᓯᒀ᙮ 2ᑭᑲ ᐋᐸᒋᐋ ᒫᐗᒡ ᐌᓂᔑᔑᒡ ᐸᑴᔑᑲᓐ, ᑳᐐᓐ ᐃᑕᔥ ᐐᓐ ᐅᐱᓯᑲᓐ ᑭᑲ ᐋᐸᒋᑑᓰᓐ᙮ ᑭᑲ ᐅᔑᐋᒃ ᐃᑕᔥ ᐋᓂᑕ ᐸᑴᔑᑲᓐ ᐋᓬᐃᑉ ᑎᓄ ᐱᒥᑌ ᒋᐋᐸᒋᑑᔭᓐ, ᐋᓂᑕ ᑕᔥ ᑳᐐᓐ ᑭᑲ ᐋᐸᒋᑑᓰᓐ᙮ ᐸᑴᔑᑲᓀᓴᒃ ᑳᐱᐸᑭᓯᐙᒡ ᑲᔦ ᑭᑲ ᐅᔑᐋᒃ ᒋᐴᓯᓇᑣ ᐋᓬᐃᑉ ᑎᓄ ᐱᒥᑌ᙮ 3ᒪᔥᑯᓰ ᒪᑲᑯᕽ ᐃᑕᔥ ᑭᑲ ᐃᔑ ᐲᓇᐙᒃ ᒋᑕᑯ ᐸᑭᑎᓈᓲᑕᒪᐎᔭᓐ ᐊᐲ ᐸᑭᑎᓈᓱᐙᑫᔭᓐ ᐋᐯ ᐱᔑᑭ, ᓃᔑᓐ ᑲᔦ ᐋᐯ ᒫᓇᒑᓂᔕᒃ᙮
4ᒦᑕᔥ ᑫᔑ ᐲᓇᒡ ᐁᕒᐊᓐ, ᐃᐃ ᑲᔦ ᐅᑯᓯᓴᐞ ᐃᐃᒫ ᐁᔑ ᐃᔥᒀᑌᒥᐗᓂᓂᒃ ᐸᒀᓀᑲᒥᒃ ᐁᑕᓀᑖᑯᓯᐗᒃ, ᑲᔦ ᑕᑭᓰᓯᐸᓱᐗᒃ᙮ 5ᒦᑕᔥ ᐁᕒᐊᓐ ᐃᐃ ᑲᔦ ᐅᑯᓯᓴᐞ ᑫᔑ ᐱᓯᑲᒨᓇᑣ ᐊᓇᒥᐁ ᑭᑭᔥᑭᑲᓇᓐ᙮ ᐸᐸᑮᐗᔮᓐ, ᒥᓯᐌ ᑲᔥᑮᑮᐎᓐ ᒋᐋᑲᐌᑭᓯᕽ ᐃᐃᒫ ᐅᑳᑭᑲᓂ ᓈᐱᔥᑭᑲᓂᕽ, ᐃᐃ ᑲᔦ ᐅᑳᑭᑲᓂ ᓈᐱᔥᑭᑲᓐ, ᐗᑮᒡ ᐅᑳᑭᑲᓂ ᓈᐱᔥᑭᑲᓐ, ᑭᑭᒋᒌᐱᓱᓐ ᑲᔦ᙮ 6ᒦᔥ ᑫᔑ ᐱᓯᑲᒧᓇᒡ ᑎᑎᐲᑭᓂᑲᓂᐎ ᐋᓄᒀᓐ ᐅᑎᒀᓂᕽ ᑳᑕᑯᐱᑌᓂᒃ ᐅᐅ ᑳᐃᔑ ᒪᓯᓈᐱᑲᐃᑳᑌᓂᒃ ᐃᔑ ᐸᑭᑎᓂᑰᐎᓯ ᑳᑎᐯᒋᑫᓂᒡ᙮ 7ᒦᑕᔥ ᑫᔑ ᐅᑖᐱᓇᒪᓐ ᐱᒥᑌ ᑎᓄ ᑳᐋᐸᑕᒃ ᐊᐎᔭ ᑮᐐ ᑭᑕᑭᒥᓐᒡ, ᒦᔥ ᑫᔑ ᓰᑭᓇᒧᐗᒡ ᐁᕒᐊᓐ ᐅᑎᒀᓂᕽ᙮
8ᑭᑲ ᐲᓂᒫᐞ ᐃᑕᔥ ᑲᔦ ᐅᑯᓯᓴᐞ ᒋᐱᓯᑲᒧᓂᒪᒡ ᐸᐸᑮᐗᔮᓇᓐ᙮ 9ᑭᑲ ᑭᑭᒋᒌᐱᓱᐋᒃ, ᑲᔦ ᑕᔥ ᑭᑲ ᐱᑖᓄᒀᓀᐋᒃ, ᒦᔥ ᐅᐅ ᓇᑫ ᑫᔑ ᐅᓇᑭᓱᐙᒡ ᐁᕒᐊᓐ, ᐃᐃ ᑲᔦ ᐅᑯᓯᓴᐞ᙮ ᐐᓇᐙ ᓴ, ᐃᐃ ᑲᔦ ᑫᓂ ᐅᐲᐌᓰᒥᐙᒡ ᓂᑲ ᐊᓄᑮᑖᑰᒃ ᒋᐊᓇᒥᐁᐎᑭᒫᐎᐙᒡ ᓀᐱᒡ ᐃᑯ᙮
10ᑭᑲ ᐲᓈ ᑕᔥ ᐋᐯ ᐱᔑᑭ ᐁᓈᓴᒪᑭᑌᒃ ᐸᒀᓀᑲᒥᒃ ᐁᑕᓀᑖᑯᓯᔮᓐ, ᒦᔥ ᐁᕒᐊᓐ, ᐅᑯᓯᓴᐞ ᑲᔦ ᑫᔑ ᓵᒥᓈᐙᒡ ᐅᑎᒀᓂᓂᕽ᙮ 11ᒦᔥ ᐃᐃᒫ ᑫᑕᔑ ᓂᓴᒡ ᐊᐊ ᐋᐯ ᐱᔑᑭ ᐁᔑ ᐃᔥᒀᑌᒥᐗᕽ ᐸᒀᓀᑲᒥᒃ ᐁᑕᓀᑖᑯᓯᔮᓐ᙮ 12ᑭᑲ ᐅᑖᐱᓇᒧᐙᓐ ᐃᑕᔥ ᐋᐯ ᐱᔑᑭ ᐅᒥᔅᑸᒻ ᐃᐃᒫ ᑭᓂᒌᕽ ᒋᔑ ᔑᔔᓇᒧᐗᒡ ᑮᑫᔮᕽ ᑳᔑ ᓴᓵᑲᑭᑌᑭᓐ ᑳᔑ ᐸᑭᑎᓈᓱᕽ᙮ ᒦᔥ ᑫᔑ ᓰᑭᓇᒪᓐ ᒥᔅᑶ ᑳᑮ ᐃᔥᑯᓇᒪᓐ ᐁᔑ ᑭᑕᑌᒃ ᑳᔑ ᐸᑭᑎᓈᓱᕽ᙮ 13ᒦᔥ ᑲᔦ ᑫᔑ ᒪᓂᔕᒪᓐ ᐁᔑ ᐱᒥᑌᐗᑭᓐ ᐲᒐᔭᐄ ᐲᐌᓰᓐ, ᒫᐗᒡ ᐃᑯ ᐁᔑ ᐅᓂᔑᔑᒃ ᐅᑯᓐ, ᐅᑌᑎᑾᓯᐗᒃ ᑲᔦ ᒋᑭᑭᐱᒥᑌᐎᐙᒡ᙮ ᒦᔥ ᑫᔑ ᒑᑭᓴᒪᓐ ᒋᐸᑭᑎᓈᓲᑕᒪᐎᔭᓐ᙮ 14ᑲᔦ ᑕᔥ ᑭᑲ ᒑᑭᓴᒧᐙᓐ ᐅᐐᔮᔅ ᐋᐯ ᐱᔑᑭ, ᐅᐸᔥᑴᑭᓄᒻ ᑲᔦ, ᐆᓇᑭᔥ ᑲᔦ᙮ ᒦ ᓴ ᑕᔥ ᐅᐅ ᐸᑭᑎᓈᓱᐎᓐ ᑫᐅᒋ ᐅᑖᐱᓂᑳᑌᓂᑭᓐ ᐅᒪᒋᑑᑕᒧᐎᓂᐙᓐ ᐊᓇᒥᐁᐎᑭᒫᒃ᙮ ᐌᑎ ᑕᔥ ᓵᑭᒐᔭᐄ ᐁᔑ ᑲᐯᔑᕽ ᐅᐅ ᑭᑲ ᑕᔑ ᐃᔑᒋᑫᒻ᙮
15ᑭᑲ ᐅᑖᐱᓈ ᑕᔥ ᐊᐊ ᐯᔑᒃ ᐋᐯ ᒫᓇᒑᓂᔥ, ᒦᔥ ᐁᕒᐊᓐ, ᐃᐃ ᑲᔦ ᐅᑯᓯᓴᐞ ᑫᔑ ᓵᒥᓈᐙᒡ ᐅᑎᒀᓂᓃᕽ᙮ 16ᒦᔥ ᑫᔑ ᓂᓴᒡ ᐊᐊ ᐋᐯ ᒫᓇᒑᓂᔥ, ᐅᒥᔅᑸᒻ ᐃᑕᔥ ᑭᑲ ᐃᔑ ᓰᓶᐲᑭᐌᐱᓇᒧᐙᓐ ᐋᓴᒪᔭᐄ ᐙᑳᔭᐄ ᐁᔑ ᐸᑭᑎᓈᓱᕽ᙮ 17ᐐᑫ ᑕᔥ ᑭᑲ ᐲᓯᔣ, ᒋᑭᓰᓯᐸᑖᐗᒡ ᐲᒐᔭᐄ ᐅᐲᐌᓰᓐ, ᐃᓂ ᑲᔦ ᐅᑳᑕᓐ᙮ ᐅᑎᒀᓂᕽ ᐃᑕᔥ ᑭᑲ ᐃᔑ ᐊᑑᓈᐙᓐ ᐃᓂ ᑲᔦ ᑳᑮ ᐃᔑ ᐲᓯᔡᒡ᙮ 18#Eph 5.2; Php 4.18. ᒦᑕᔥ ᑫᔑ ᒥᓯᐌ ᒑᑭᓱᓐᒡ ᐃᐃᒫ ᑳᔑ ᐸᑭᑎᓈᓱᕽ ᒋᐃᓍᑌᒃ ᒦᒋᒥ ᐸᑭᑎᓂᑫᐎᓐ᙮ ᐃᐃ ᓴ ᑳᐃᔑ ᒫᓱᒡ ᐐᑫ ᓂᒥᓄᒫᑖᓐ᙮
19ᐊᐊ ᑕᔥ ᑯᑕᒃ ᐋᐯ ᒫᓇᒑᓂᔥ ᑭᑲ ᐅᑖᐱᓈ, ᐁᕒᐊᓐ ᐃᑕᔥ, ᐃᐃ ᑲᔦ ᐅᑯᓯᓴᐞ ᐅᑲ ᓵᒥᓈᐙᓐ ᐅᑎᒀᓂᓃᕽ᙮ 20ᑭᑲ ᓂᓵ ᑕᔥ ᐊᐊ ᐋᐯ ᒫᓇᒑᓂᔥ᙮ ᐅᒥᔅᑸᒻ ᐃᑕᔥ ᑭᑲ ᐅᑖᐱᓇᒧᐙᓐ ᒋᔑᔔᓇᒧᐗᒡ ᐁᕒᐊᓐ ᐅᑕᐗᑳᕽ, ᐃᐃ ᑲᔦ ᐅᑯᓯᓴᐞ᙮ ᑭᑲ ᔑᔔᓇᒧᐙᓇᓐ ᑲᔦ ᐅᒥᒋᒋᓃᕽ, ᐅᑭᒋᓯᑖᓂᓃᕽ ᑲᔦ ᐅᑭᒋᓂᑳᓂᕽ ᐃᓇᑫ᙮ ᐃᐃ ᑕᔥ ᑳᑮ ᐃᔥᑯᓇᒪᓐ ᒥᔅᑶ ᑭᑲ ᐃᔑ ᓰᓶᐲᑭᐌᐱᓇᒧᐙᓐ ᐃᐃᒫ ᐋᓴᒪᔭᐄ ᐙᑳᔭᐄ ᑳᔑ ᐸᑭᑎᓈᓱᕽ᙮ 21ᒦᔥ ᑫᔑ ᐅᑖᐱᓇᒪᓐ ᐃᐃ ᒥᔅᑶ ᐁᔮᒃ ᐃᐃᒫ ᑳᔑ ᐸᑭᑎᓈᓱᕽ, ᐃᐃ ᑲᔦ ᑭᑭᓇᐙᒋᐃᑰᐎ ᐱᒥᑌ, ᒦᔥ ᑫᔑ ᓰᓶᐲᑭᐌᐱᓇᒧᐗᒡ ᐁᕒᐊᓐ ᐅᑭᑭᔥᑭᑲᓂᕽ, ᐃᐃ ᑲᔦ ᐅᑯᓯᓴᐞ ᐅᑭᑭᔥᑭᑲᓂᓃᕽ᙮ ᒦᑕᔥ ᒋᐃᓇᑭᒥᑣ ᐁᑎᐱᓇᐌᐎᓰᒪᒀ᙮
22ᒦᑕᔥ ᑫᔑ ᒪᓂᔕᒧᐗᒡ ᐁᔑ ᐱᒥᑌᐎᒡ ᐋᐯ ᒫᓇᒑᓂᔥ, ᐁᔑ ᐱᒥᑌᐗᓂᓂᒃ ᑲᔦ ᐅᓱᐤ, ᐁᔑ ᐱᒥᑌᐗᑭᓐ ᐲᒐᔭᐄ ᐲᐌᓰᓐ ᒫᐗᒡ ᐃᑯ ᐁᔑ ᐅᓂᔑᔑᒃ ᐅᑯᓐ, ᐅᑌᑎᑾᓯᐗᒃ ᑲᔦ, ᐅᑭᒋᓂᑭᑆᒻ ᑲᔦ᙮ 23ᐃᐃ ᑕᔥ ᒪᔥᑯᓰ ᒪᑲᑯᕽ ᐸᑴᔑᑲᓇᒃ ᐁᔑ ᐲᓱᐙᒡ ᑳᑮ ᐸᑭᑎᓇᒫᑰᔮᓐ, ᒦ ᐃᒫ ᑫᐅᒋ ᐅᑖᐱᓇᑣ ᐸᑴᔑᑲᓇᒃ᙮ ᐯᔑᒃ ᐸᑴᔑᑲᓐ ᑳᑮ ᑕᑯᓂᑳᑌᒃ ᐋᓬᐃᑉ ᑎᓄ ᐱᒥᑌ, ᐊᐊ ᑕᔥ ᑲᔦ ᐯᔑᒃ ᐱᒥᑌ ᑳᑮ ᑕᑯᓂᑳᑌᓯᓄᒃ, ᐊᐊ ᑕᔥ ᑲᔦ ᐸᑴᔑᑲᓀᔅ ᑳᐱᐸᑭᓯᒡ᙮ 24ᑕᒦᓈᐗᒃ ᐃᑕᔥ ᒋᑕᑯᓇᒧᐙᒡ ᐅᐅ ᑲᑭᓇ ᒦᒋᒻ ᐁᕒᐊᓐ ᐃᐃ ᑲᔦ ᐅᑯᓯᓴᐞ, ᒦᔥ ᑫᔑ ᐙᐙᑕᐃᑳᑫᐙᒡ ᒋᐃᓇᑭᑌᒃ ᐙᐙᑕᐃᑫᐎ ᐸᑭᑎᓂᑫᐎᓐ᙮ 25ᒦᑕᔥ ᑫᔑ ᐅᑖᐱᓇᒪᐗᑣ ᒋᒑᑭᓴᒧᐗᒡ ᐃᐃᒫ ᑳᔑ ᐸᑭᑎᓈᓱᕽ, ᒋᐊᑖᐗᒡ ᐗᑭᒐᔭᐄ ᐃᐃᒫ ᐸᑭᑎᓈᓱᐎᓂᕽ ᑳᒑᑳᑭᓴᒫᑰᐗᒃ ᒦᒋᒥᐎ ᐸᑭᑎᓈᓱᐎᓐ᙮ ᐐᑫ ᐃᐃᐌ ᓂᒥᓄᒫᑖᓐ ᐃᐃ ᑎᓄ ᑮᒥᓈᑌᒃ᙮
26ᑭᑲ ᐅᑖᐱᓂᒫᓐ ᐃᑕᔥ ᐃᓂ ᐅᑖᓯᓈᑫᓐ ᐊᐊ ᐋᐯ ᒫᓇᒑᓂᔥ ᐁᕒᐊᓐ ᑳᐅᒋ ᐅᓇᑭᓱᒡ᙮ ᒦᔥ ᑫᔑ ᐙᐙᑕᐃᑳᑫᔭᓐ ᐁᓈᓴᒦᒡ ᑳᑎᐯᒋᑫᒡ ᒋᐃᓇᑭᑌᒃ ᐙᐙᑕᐃᑫᐎ ᐸᑭᑎᓈᓱᐎᓐ᙮ ᒦᑕᔥ ᑮᓐ ᐊᐊ ᑫᑎᐱᓇᐌᐎᓯᔭᓐ᙮
27ᐊᐲ ᑕᔥ ᐊᓇᒥᐁᐎᑭᒫ ᑮᐅᓇᑭᒥᓐᒡ, ᐃᐃ ᓴ ᐋᐯ ᒫᓇᒑᓂᔥ ᐅᑖᓯᓈᑫ, ᐃᐃ ᑲᔦ ᐅᑭᒋᓂᑭᑆᒻ ᑳᑮ ᐙᐙᑕᐃᑳᓂᐗᑭᓐ ᑳᑮ ᒦᓂᑯᔮᓐ ᐐᓇᐙ ᑮᐊᓂ ᒦᓈᐗᒃ ᒋᑎᐯᑕᒧᐙᒡ᙮ 28ᒦᑕᔥ ᐃᐃᐌ ᓂᑑᓀᑕᒧᐎᓐ ᐐᑳ ᑫᐋᒋᓭᓯᓄᒃ ᐊᐲ ᓂᐱᒫᑎᓰᒪᒃ ᐸᑭᑎᓇᒧᐙᒡ ᐐᒌᑎᐎᓂ ᐸᑭᑎᓈᓱᐎᓐ᙮ ᐃᐃ ᓴ ᐋᐯ ᒫᓇᒑᓂᔥ ᐅᑖᓯᓈᑫ, ᐅᑭᒋᓂᑭᑆᒻ ᑲᔦ ᑕᒦᓈᐗᒃ ᒋᑎᐱᓇᐌᐎᓯᐙᒡ ᐊᓇᒥᐁᐎᑭᒫᒃ᙮ ᒦ ᓴ ᐃ ᑫᐃᓇᑭᑌᓂᒃ ᓃᓐ ᑌᐯᒋᑫᔮᓐ ᐁᐸᑭᑎᓇᒪᐎᐙᒡ᙮
29ᐃᓂ ᑕᔥ ᐁᕒᐊᓐ ᐅᑕᓇᒥᐁ ᑭᑭᔥᑭᑲᓇᓐ ᑕᒦᓂᒫᐗᐞ ᐅᑯᓯᓴᐞ ᐊᐲ ᐃᔥᒀ ᐱᒫᑎᓯᒡ ᐁᑭᑭᔥᑲᒥᓂᒡ ᐊᐲ ᐅᓇᑭᓱᓂᒡ ᒋᐊᓇᒥᐁᐎᑭᒫᐎᓂᒡ᙮ 30ᐁᕒᐊᓐ ᐃᑕᔥ ᐅᑯᓯᓴᓐ ᑫᓈᐱᔥᑳᑯᒡ ᑫᐊᓇᒥᐁᐎᑭᒫᐎᓂᒡ ᐅᑲ ᑭᑭᔥᑲᒥᓂ ᓃᔣᓱᑮᔑᒃ ᐃᓂ ᐅᑕᓇᒥᐁ ᑭᑭᔥᑭᑲᓇᓐ ᐊᐲ ᐱᐲᑎᑫᓂᒡ ᐱᐊᑕ ᐗᓄᑮᓂᒡ ᐃᐃᒫ ᐸᒀᓀᑲᒥᑯᕽ ᐁᑕᓀᑖᑯᓯᐗᒃ᙮
31ᐅᑖᐱᓇᓐ ᐃᑕᔥ ᐃᐃ ᐋᐯ ᒫᓇᒑᓂᔥ ᐐᔮᔅ ᑳᑮ ᐋᐸᑕᒃ ᑮᐅᓇᑭᒥᓐᒡ ᐁᕒᐊᓐ ᐃᐃ ᑲᔦ ᐅᑯᓯᓴᐞ ᒋᑕᔑ ᑮᔑᓴᒪᓐ ᑳᔑ ᑯᑖᓀᑖᑾᒃ ᐲᑎᒃ᙮ 32ᐃᐃᒫ ᑕᔥ ᐁᔑ ᐃᔥᒀᑌᒥᐗᕽ ᐸᒀᓀᑲᒥᑯᕽ ᐁᑕᓀᑖᑯᓯᔮᓐ, ᒦ ᐃᒫ ᐁᕒᐊᓐ, ᐃᐃ ᑲᔦ ᐅᑯᓯᓴᐞ ᑫᑕᔑ ᒦᒋᐙᒡ ᐃᐃ ᐐᔮᔅ, ᑲᔦ ᒋᐊᒸᐙᒡ ᐃᓂ ᐸᑴᔑᑲᓇᓐ ᐁᔥᑯᓭᓂᒡ ᐃᐃᒫ ᒪᔥᑯᓰ ᒪᑲᑯᕽ᙮ 33ᒦᑕᔥ ᐃᐃ ᑫᒦᒋᐙᒡ ᑳᑮ ᐋᐸᑕᓂᓂᒃ ᑮᐅᓇᑭᓱᐙᒡ ᒋᐊᓇᒥᐁᐎᑭᒫᐎᐙᒡ ᑲᔦ ᑮᐴᓀᑕᒫᑰᐎᓯᐙᒡ᙮ ᐊᓇᒥᐁᐎᑭᒫᒃ ᐁᑕ ᐃᐃ ᐅᑲ ᒦᒋᓈᐙ ᐋᓃᔥ ᑭᑕᑭᑌᓂ ᐃᐃ ᒦᒋᒻ᙮ 34ᑮᔥᐱᓐ ᐃᑕᔥ ᐃᔥᑯᓭᒃ ᐃᐃ ᐐᔮᔅ, ᐊᐊ ᑲᔦ ᐸᑴᔑᑲᓐ ᐲᓂᔥ ᒋᐊᓂ ᑭᔐᐹᐗᑲᒃ, ᐃᑕᐙ ᐄᓴᓐ ᑕᒑᑭᓯᑳᑌᐗᓐ᙮ ᑳᐐᓐ ᐊᐎᔭ ᐅᑲ ᒦᒋᓰᓐ ᐃᐃ ᐐᔮᔅ ᑲᔦ ᐸᑴᔑᑲᓇᓐ ᐋᓃᔥ ᐅᓵᒻ ᑭᑕᑭᑌᓂ ᐃᐃ ᒦᒋᒻ᙮
35ᒦᑕᔥ ᐃᐃ ᑫᐃᔑᒋᑫᔭᓐ ᐅᓇᑭᒪᒡ ᐁᕒᐊᓐ, ᐃᐃ ᑲᔦ ᐅᑯᓯᓴᐞ, ᒋᐃᔑᒋᑫᔭᓐ ᑲᑭᓇ ᑫᑰᓐ ᑳᑮᐃᓂᓈᓐ ᓃᔣᓱᑮᔑᒃ ᒥᓂᒃ᙮ 36ᐁᑕᓱ ᑮᔑᒃ ᐃᑕᔥ ᑭᑲ ᐸᑭᑎᓈᓱᐙᑫᓐ ᐋᐯ ᐱᔑᑭ ᒋᐴᓀᒋᑳᑌᑭᓐ ᒪᒋᑑᑕᒧᐎᓇᓐ᙮ ᒦᔥ ᐃᐃᒫ ᑫᐅᒋ ᐯᑲᑭᒋᑳᑌᒃ ᑳᔑ ᐸᑭᑎᓈᓱᕽ᙮ ᒦᔥ ᑫᔑ ᑭᑕᑭᑕᒪᓐ ᒋᐋᐸᒋᑑᔭᓐ ᐋᓬᐃᑉ ᑎᓄ ᐱᒥᑌ᙮ 37ᓃᔣᓱᑮᔑᒃ ᐃᑕᔥ ᐅᐅ ᑭᑲ ᐃᔑᒋᑫᒻ ᐁᑕᓱ ᑮᔑᒃ᙮ ᒦᑕᔥ ᑳᔑ ᐸᑭᑎᓈᓱᕽ ᐐᑫ ᑌᑕᑯ ᒋᑭᑌᑖᑾᒃ᙮ ᐌᑯᓀᓐ ᐃᑕᔥ ᐃᑯ ᐃᐃᒫ ᐁᔑ ᓵᒥᓯᕽ, ᑯᒫ ᑲᔦ ᐊᐎᔭ ᓵᒥᔥᑲᕽ, ᑫᒋᓈᒡ ᑕᐃᔑᐊᔮ ᐁᑭᑌᑖᑯᓯᒡ᙮
ᑕᓱᑮᔑᒃ ᐸᑭᑎᓈᓱᐎᓇᓐ ᐁᑕᔑᑌᑭᓐ
38ᒦᑕᔥ ᐅᐅ ᑫᐃᔑᒋᑫᔭᓐ ᐁᑕᓱ ᑮᔑᒃ ᒨᔕᒃ ᐃᑯ᙮ ᑭᑲ ᐸᑭᑎᓈᔂᑫᓐ ᓃᔑᓐ ᑳᐯᔑᑯ ᑕᓱ ᐱᐴᓉᐙᒡ ᒫᓇᒑᓂᔐᓴᒃ᙮ 39ᐯᔑᒃ ᑭᑲ ᐸᑭᑎᓈᔂᑫᓐ ᑭᔐᐹᐗᑲᒃ, ᐊᐊ ᑕᔥ ᑯᑕᒃ ᐯᔑᒃ ᐊᓂ ᐅᓈᑯᔑᒃ᙮ 40ᐊᐊ ᑕᔥ ᓂᑕᒻ ᒫᓇᒑᓂᔐᔅ, ᑭᑲ ᑕᑯ ᐸᑭᑎᓈ ᒫᐗᒡ ᐌᓂᔑᔑᒡ ᐸᑴᔑᑲᓐ ᒋᑕᑯᓂᑳᑌᒃ ᐯᔑᑯ ᐅᒨᑕᔮᐱᒃ ᐋᓬᐃᑉ ᑎᓄ ᐱᒥᑌ᙮ ᐯᔑᑯ ᐅᒨᑕᔮᐱᒃ ᔔᒥᓈᐳ ᑕᔥ ᑭᑲ ᓰᑭᓈᓐ ᐃᐃᒫ ᒋᐸᑭᑎᓈᔂᑳᓂᐗᕽ᙮ 41ᐊᐊ ᑕᔥ ᑯᑕᒃ ᒫᓇᒑᓂᔐᔅ ᑫᐸᑭᑎᓈᔂᑲᓂᐎᒡ ᐅᓈᑯᔑᒃ, ᒦᔥ ᐯᔑᑾᓐ ᒥᓂᒃ ᒫᐗᒡ ᐌᓂᔑᔑᒡ ᐸᑴᔑᑲᓐ ᑫᐋᐸᑎᓯᒡ, ᐋᓬᐃᑉ ᑎᓄ ᐱᒥᑌ ᑲᔦ, ᔔᒥᓈᐳ ᑲᔦ᙮ ᓃᓐ ᑳᑎᐯᒋᑫᔮᓐ, ᐃᐃ ᓂᐸᑭᑎᓈᓲᑕᒫᑰ, ᐐᑫ ᐁᒥᓄᒫᑕᒫᓐ ᐁᒥᓈᑌᒃ᙮ 42ᒦᑕᔥ ᐅᐅ ᒨᔕᒃ ᐃᑯ ᑫᓂ ᐃᔑᒋᑫᓈᓂᐗᕽ ᒋᐸᑭᑎᓂᑳᑌᒃ ᑳᒑᑭᓯᑳᑌᒃ ᐸᑭᑎᓈᓱᐎᓐ ᒥᓂᒃ ᐃᑯ ᑫᓂ ᐊᔮᓂᑫ ᓂᑖᐎᑭᐙᒡ᙮ ᐃᐃᒫ ᑕᔥ ᐁᔑ ᐃᔥᒀᑌᒥᐗᕽ ᐸᒀᓀᑲᒥᑯᕽ ᐁᑕᓀᑖᑯᓯᔮᓐ ᑕᔑ ᐸᑭᑎᓂᑳᑌ᙮ ᒦᑕᔥ ᐃᐃᒫ ᑫᔑ ᓇᑭᔥᑲᐗᒀ ᓂᐱᒫᑎᓰᒪᒃ, ᒦᔥ ᑲᔦ ᐃᐃᒫ ᑫᔑ ᑲᑲᓅᓂᓈᓐ᙮ 43ᒦᑕᔥ ᐃᐃᒫ ᑲᔦ ᑫᔑ ᓇᑭᔥᑲᐗᒀ ᓂᐱᒫᑎᓰᒪᒃ ᐃᔅᕒᐃᔭᓬᐊᒃ, ᓃᓐ ᐃᑕᔥ ᐃᐃᒫ ᐊᔮᔮᓐ ᓂᑭᒋ ᐃᓀᑖᑯᓯᐎᓂᕽ ᑳᐙᓭᓈᑾᒃ ᑕᐅᒋ ᑭᑌᑖᑾᓐ ᐸᒀᓀᑲᒥᒃ᙮ 44ᓂᑲ ᐃᔑᑑᓐ ᐸᒀᓀᑲᒥᒃ, ᑳᔑ ᐸᑭᑎᓈᓱᕽ ᑲᔦ ᒋᑭᑌᑖᑾᑭᓐ᙮ ᐊᐊ ᓴ ᐁᕒᐊᓐ ᐃᐃ ᑲᔦ ᐅᑯᓯᓴᐞ ᐸᑳᓐ ᑕᐃᓇᑭᓱᐗᒃ ᒋᐊᓄᑮᑕᐎᐙᒡ ᒋᐊᓇᒥᐁᐎᑭᒫᐎᐙᒡ᙮ 45ᓃᓐ ᐃᓴ ᐱᑯ ᓂᑲ ᐐᒋᑖᒫᒃ ᒣᑴᔭᐄ ᐁᔑᐊᔮᐙᒡ ᐃᔅᕒᐃᔭᓬᐊᒃ, ᓃᓐ ᐃᑕᔥ ᓂᑲ ᐅᑭᔐᒪᓂᑑᒥᒥᑰᒃ᙮ 46ᓂᑲ ᑭᑫᓂᒥᑰᒃ ᐃᓴ ᓃᓐ ᐁᑎᐯᒋᑫᔮᓐ, ᐁᐅᑭᔐᒪᓂᑑᒥᒥᐙᒡ᙮ ᐁᑮ ᐱᐅᒋ ᓵᑭᒋᐎᓇᒀ ᐌᑎ ᐄᒋᐸᑮᕽ Egypt ᐁᐐ ᐐᒋᑖᒪᒀ᙮ ᓃᓐ ᐃᓴ ᑳᑎᐯᒋᑫᔮᓐ ᐅᑭᔐᒪᓂᑑᒥᐙᓐ᙮
Iliyochaguliwa sasa
ᐁᑭᓴᑕᔅ 29: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society