ᐁᑭᓴᑕᔅ 28
28
ᐊᓇᒥᐁᑭᑭᔥᑭᑲᓇᓐ ᐁᑕᔑᑌᑭᓐ
1ᐊᑐᒻ ᑮᒋᑭᐌᓯ ᐁᕒᐊᓐ Aaron, ᐅᑯᓯᓴᐞ ᑲᔦ ᓀᑖᑉ Nadab, ᐊᐹᐃᐆ Abihu, ᐁᓬᐃᐁᓴᕒ Eleazar, ᐃᑕᒫᕒ Ithamar᙮ ᐸᑳᓀᑖᑯᐞ ᑳᑕᔑᓂᒡ ᐃᔅᕒᐃᔭᓬᐊᐞ, ᐐᓇᐙ ᒋᐊᓄᑮᑕᐎᐙᒡ᙮ 2ᑭᑲ ᐅᔑᑕᒪᐙ ᓴ ᑭᒋ ᐊᓇᒥᐁᐎᑭᒫ ᑭᑭᔥᑭᑲᓇᓐ ᒋᐅᓂᔑᔑᓂᓂᑭᓐ, ᑫᐅᒋ ᑭᒋ ᐃᓀᑖᑯᓈᑯᓯᒡ ᑲᔦ ᑫᐅᒋ ᑭᑌᒋᑲᓂᐎᒡ᙮ 3ᐊᑐᒻ ᑲᑭᓇ ᐃᓂᓂᐗᒃ ᑳᓇᑲᒋ ᐅᔑᑑᐙᒡ ᑫᑰᓐ ᑳᑮ ᑑᑕᐗᒀ ᒋᑲᑮᑖᐌᑕᒧᐙᒡ᙮ ᒦᐗᒃ ᐃᑕᔥ ᐃᑭ ᑫᐅᔑᑕᒪᐙᐙᒡ ᐅᑭᑭᔥᑭᑲᓂᓂ ᐁᕒᐊᓅᓐ᙮ ᒦᔥ ᐁᕒᐊᓐ ᑫᔑ ᐸᑭᑎᓂᑎᓱᒡ ᒋᐊᓇᒥᐁᐗᓄᑮᑕᐎᒡ᙮ 4ᑲᓅᔥ ᒋᐅᔑᑑᐙᒡ ᑫᑭᑭᔥᑲᒥᓂᒡ ᐅᑳᑭᑲᓂᓃᕽ, ᐗᑮᒡ ᐅᑳᑭᑲᓂ ᓈᐱᔥᑭᑲᓐ, ᐅᑳᑭᑲᓂ ᓈᐱᔥᑭᑲᓐ, ᑲᔦ ᒥᓯᐌ ᑲᔥᑮᑮᐎᓐ, ᑲᔦ ᑕᔥ ᐸᐸᑮᐗᔮᓐ ᒋᒥᓍᓯᓈᑌᒃ, ᑎᑎᐲᑭᓂᑲᓂᐎ ᐋᓄᒀᓐ, ᑭᑭᒋᒌᐱᓱᓐ ᑲᔦ᙮ ᒦᐗᓐ ᐃᑕᔥ ᐅᓄ ᑫᐅᔑᑑᐙᒡ ᐊᓇᒥᐁ ᑭᑭᔥᑭᑲᓇᓐ ᑫᑭᑭᔥᑲᕽ ᑮᒋᑭᐌᓯ ᐁᕒᐊᓐ, ᐃᐃ ᑲᔦ ᐅᑯᓯᓴᐞ ᒋᐊᓇᒥᐁᐗᓄᑮᑕᐎᐙᒡ᙮ 5ᒦᐗᓐ ᐃᑕᔥ ᐅᓄ ᑫᐋᐸᒋᑑᐙᒡ ᑲᔥᑭᒀᒋᑲᓀᔮᐲᓐ ᐌᔖᐗᔥᑯᓯᓂᒡ, ᒣᑲᑌᒥᔅᑯᓯᓂᒡ, ᒣᔅᑯᓯᓂᒡ ᑲᔦ᙮ ᐅᓵᐎ ᔔᓂᔮ ᐙᐱᒃ ᑎᓄ ᑲᔥᑭᒀᒋᑲᓀᔮᐲᓐ, ᑲᔦ ᐌᓂᔑᔑᓂᓂᒃ ᐃᔒᑭᓐ᙮
6ᒦᐗᓐ ᐃᑕᔥ ᐅᓄ ᑫᐋᐸᒋᑑᐙᒡ ᐅᔑᑑᐙᒡ ᐅᑳᑭᑲᓂ ᓈᐱᔥᑭᑲᓐ, ᑲᔥᑭᒀᒋᑲᓀᔮᐲᓐ ᐌᔖᐗᔥᑯᓯᓂᒡ, ᒣᑲᑌᒥᔅᑯᓯᓂᒡ, ᒣᔅᑯᓯᓂᒡ ᑲᔦ᙮ ᐅᓵᐎ ᔔᓂᔮ ᐙᐱᒃ ᑎᓄ ᑲᔥᑭᒀᒋᑲᓀᔮᐲᓐ, ᑲᔦ ᐌᓂᔑᔑᓂᓂᒃ ᐃᔒᑭᓐ ᒣᓯᓈᑌᓂᒃ ᑫᐃᔑ ᒫᒌᐙᒡ ᐃᓂᓂᐗᒃ ᓀᑲᒋᒀᓱᐙᒡ᙮ 7ᓃᔑᓐ ᐊᓂᑲᒫᓀᐱᓱᓇᓐ ᒋᓴᑭᓯᑭᓐ ᐁᔑ ᑲᑮᑫᔮᒃ ᐅᑳᑭᑲᓂ ᓈᐱᔥᑭᑲᓐ᙮ 8ᑭᒋᐱᓱᓐ ᐯᔑᑾᓐ ᒋᐃᔑᒋᑳᑌᒃ, ᒋᔑ ᐯᔑᑯᒋᑳᑌᒃ ᐃᐃ ᐅᑳᑭᑲᓂ ᓈᐱᔥᑭᑲᓐ ᒋᐋᐸᑕᑭᓐ ᐅᓄ᙮ 9ᓃᔑᓐ ᐃᑕᔥ ᐅᑖᐱᓐ ᐋᓂᑭᔅ Onyx ᑎᓄᐗᓯᓃᒃ ᑫᔑ ᒪᓯᓈᐱᑲᐊᒧᐙᒡ ᐅᐐᓱᐎᓂᓂ ᒉᑲᑉ Jacob ᒥᑖᔑᓃᔑᓐ ᐅᑯᓯᓴᐞ᙮ 10ᐁᓂᔑᐊᔮᐱ ᑎᐱᔥᑲᒥᓂᒡ ᒋᐃᓇᑌᓂᑭᓐ ᐅᐐᓱᐎᓂᓂ᙮ ᓂᑯᑣᓱ ᐐᓱᐎᓇᓐ ᐃᐃᒫ ᐯᔑᒃ ᐊᓯᓃᕽ, ᐃᓂ ᑕᔥ ᑯᑕᒃ ᓂᑯᑣᓱ ᐐᓱᐎᓇᓐ ᐃᐃᒫ ᑯᑕᒃ ᐊᓯᓃᕽ᙮ 11ᑭᑲ ᐋᐸᒋᐋ ᐃᓂᓂ ᓀᑲᒌᒡ ᒋᒪᓯᓈᐱᑲᐊᕽ ᐃᐃᒫ ᐊᓯᓃᕽ ᐁᔑᓂᑳᓱᓂᒡ ᒉᑲᑉ ᐅᑯᓯᓴᐞ᙮ ᐅᓵᐎ ᔔᓂᔮ ᐙᐱᑯᕽ ᐅᒋ ᐅᔑᑑᓐ ᑫᐅᒋ ᑭᒋᐎᔑᓄᐙᒡ ᐃᑭ ᐊᓯᓃᒃ᙮ 12ᐃᐃᒫ ᑕᔥ ᐁᔑ ᐊᓂᑲᒫᓂᑲᑌᒃ ᐅᑳᑭᑲᓂ ᓈᐱᔥᑭᑲᓐ ᑭᑲ ᐃᔑ ᐊᑯᑳᓈᒃ ᑫᐅᒋ ᒫᒥᑲᐎᓄᑕᐎᑣ ᐃᔅᕒᐃᔭᓬᐊᒃ᙮ ᒦᔥ ᐃᐃ ᓇᑫ ᐁᕒᐊᓐ ᑫᔑ ᐱᒥᐎᑑᒡ ᐁᔑᓂᑳᓱᓂᒡ ᐅᑎᓂᒫᑲᓂᕽ᙮ ᒦᑕᔥ ᓃᓐ ᑳᑎᐯᒋᑫᔮᓐ ᒨᔕᒃ ᑫᔑ ᒫᒥᑲᐎᔮᓐ ᓂᐱᒫᑎᓰᒪᒃ᙮ 13ᓃᔑᓐ ᑭᑲ ᐅᔑᑑᓇᓐ ᐅᓵᐎ ᔔᓂᔮ ᐙᐱᑯᕽ ᑫᐅᒋ ᑭᒋᐎᔑᓄᐙᒡ ᐃᑭ ᐊᓯᓃᒃ᙮ 14ᓃᔑᓐ ᑲᔦ ᐅᓵᐎ ᔔᓂᔮ ᐙᐱᑯᐗᓯᓃᔮᐲᓐ ᑖᐱᔥᑰ ᔑᓅᑖᑲᓂᕽ ᐁᔑ ᑎᑎᐲᔮᐲᑭᓂᑳᑌᑭᓐ ᐃᐃᒫ ᐃᔑ ᑭᒋᐎᓯᑑᓐ ᑳᔑ ᑭᒋᐎᔑᓄᐙᒡ ᐃᑭ ᐊᓯᓃᒃ᙮
15ᑭᑲ ᐅᔑᑑᓐ ᐃᑕᔥ ᐗᑮᒡ ᐅᑳᑭᑲᓂ ᓈᐱᔥᑭᑲᓐ ᑫᑭᑭᔥᑲᕽ ᑭᒋ ᐊᓇᒥᐁᐎᑭᒫ ᑫᐅᒋ ᑭᑫᑕᕽ ᑭᔐᒪᓂᑑᓐ ᐁᓀᑕᒥᓂᒡ᙮ ᒦᑕᔥ ᐯᔑᑾᓐ ᑎᓄ ᑫᐋᐸᒋᒋᑳᑌᑭᓐ ᑫᑰᓇᓐ ᑳᑮ ᐋᐸᑕᑭᓐ ᑮᐅᔑᒋᑳᑌᒃ ᐅᑳᑭᑲᓂ ᓈᐱᔥᑭᑲᓐ᙮ 16ᒋᑲᑲᑫᔩᑲᒃ ᒋᓇᐺᑭᓂᑳᑌᒃ ᔖᑲᓱᒥᓂᓐᒡ ᒋᔑ ᑲᑲᑫᔮᒃ ᑭᑲ ᐃᔑᑑᓐ᙮ 17ᓃᐎᕽ ᐃᑕᔥ ᑭᑲ ᐱᒫᐲᑭᓯᒋᑫ ᐃᐃᒫ ᐅᑳᑭᑲᓂ ᓈᐱᔥᑭᑲᓂᕽ ᐊᓯᓃᒃ ᒋᐊᑯᑳᓇᑣ᙮ ᓂᑕᒻ ᐱᒫᐲᑭᓯᒋᑲᓂᕽ ᐅᕒᐆᐱ Ruby, ᑑᐹᔅ Topaz, ᑳᕒᓂᑦ Garnet ᑎᓄ ᐊᓯᓃᒃ ᑭᑲ ᐊᑯᑳᓈᒃ᙮ 18ᓃᔑᕽ ᐱᒫᐲᑭᓯᒋᑲᓂᕽ ᑭᑲ ᐊᑯᑳᓈᒃ ᐁᒪᕒᐊᓬᑦ Emerald, ᓵᐸᔭᕒ Sapphire, ᑖᐃᒪᓐᑦ Diamond ᑎᓄ ᐊᓯᓃᕽ ᑭᑲ ᐊᑯᑳᓈᒃ᙮ 19ᓂᓯᕽ ᐱᒫᐲᑭᓯᒋᑲᓂᕽ ᑭᑲ ᐊᑯᑳᓈᒃ ᑐᕒᑯᔨᔅ Turquoise, ᐁᑭᑦ Agate, ᐋᒪᑎᔅᑦ Amethyst ᑎᓄ ᐊᓯᓃᒃ ᑭᑲ ᐊᑯᑳᓈᒃ᙮ 20ᓃᐎᕽ ᐱᒫᐲᑭᓯᒋᑲᓂᕽ ᑭᑲ ᐊᑯᑳᓈᒃ ᐯᕒᐊᓬ Beryl, ᑳᕒᓃᓬᐃᔭᓐ Carnelian, ᒑᔅᐸᕒ Jasper ᑎᓄ ᐊᓯᓃᒃ ᑭᑲ ᐊᑯᑳᓈᒃ᙮ ᐅᑯ ᑕᔥ ᐊᓯᓃᒃ ᐅᓵᐎ ᔔᓂᔮ ᐙᐱᑯᕽ ᑕᔑ ᑭᒋᐎᔑᓅᒃ᙮ 21ᐃᐃᒫ ᑕᔥ ᒥᑖᔑᓃᔑᓐ ᐊᓯᓃᒃ ᑕᒪᓯᓈᐱᑲᐃᑳᑌᓂᐗᓐ ᑳᑮ ᐃᔑᓂᑳᓱᓂᒡ ᒉᑲᑉ ᐅᑯᓯᓴᐞ ᒋᐃᓍᓱᓂᒡ ᑳᔑ ᒥᑖᔑᓃᔗᐙᓇᑭᓯᐙᒡ ᐃᔅᕒᐃᔭᓬᐊᒃ᙮ 22ᐅᓵᐎ ᔔᓂᔮ ᐙᐱᑯᕽ ᐃᑕᔥ ᑭᑲ ᐅᒋ ᐅᔑᑑᓇᓐ ᔑᓅᑖᑲᓇᓐ ᒋᑎᑎᐲᔮᐲᑭᓂᑳᑌᑭᓐ ᑫᐋᐸᑕᑭᓐ ᐃᐃᒫ ᐗᑮᒡ ᐅᑳᑭᑲᓂ ᓈᐱᔥᑭᑲᓂᕽ᙮ 23ᓃᔑᓐ ᐃᑕᔥ ᑳᐐᐹᑲᑭᓐ ᐅᓵᐎ ᔔᓂᔮ ᐙᐱᑯᕽ ᑭᑲ ᐅᒋ ᐅᔑᑑᓇᓐ ᒋᓈᐱᓯᑭᓐ ᐁᔑ ᑲᑮᑫᔮᒃ ᐃᐃ ᐗᑮᒡ ᐅᑳᑭᑲᓂ ᓈᐱᔥᑭᑲᓐ ᐃᔥᐱᒥᕽ ᐃᓇᑫ᙮ 24ᒦᔥ ᐃᐃᒫ ᑫᔑ ᓴᑲᐱᑑᔭᓐ ᐃᓂ ᓃᔑᓐ ᐅᓵᐎ ᔔᓂᔮ ᐙᐱᑯᐎ ᔑᓅᑖᑲᓇᓐ᙮ 25ᐃᐃᒫ ᑕᔥ ᑭᑲ ᐃᔑ ᐊᑾᐱᑑᓐ ᐁᔑ ᐅᑕᓇᑲᒫᓂᐗᕽ ᐅᑳᑭᑲᓂ ᓈᐱᔥᑭᑲᓂᕽ ᐃᔑ ᓃᑳᓇᔭᐄ ᐃᓇᑫ᙮ 26ᐅᔑᑑᓐ ᓃᔑᓐ ᐅᓵᐎ ᔔᓂᔮ ᐙᐱᑯᕽ ᑳᐐᐹᑲᑭᓐ ᒋᔑ ᓈᐱᓯᑑᔭᓐ ᐁᔑ ᑕᐸᓰᑲᒃ ᐗᑮᒡ ᐅᑳᑭᑲᓂ ᓈᐱᔥᑭᑲᓐ ᐁᔑ ᑮᑫᔮᒃ ᐃᐃ ᐅᑳᑭᑲᓂ ᓈᐱᔥᑭᑲᓐ᙮ 27ᑫᔮᐱ ᑕᔥ ᓃᔑᓐ ᐅᓵᐎ ᔔᓂᔮ ᐙᐱᑯᕽ ᑳᐐᐹᑲᑭᓐ ᐅᔑᑑᓐ ᒋᔑ ᓴᑭᓯᑑᔭᓐ ᓃᑳᓇᔭᐄ ᐃᓇᑫ ᐁᔑ ᐅᑕᓇᑲᒫᓂᐗᕽ ᐅᑳᑭᑲᓂ ᓈᐱᔥᑭᑲᓐ ᐃᔑ ᐊᔑᒡ ᐁᔑᐊᔮᒃ ᑭᒋᐱᓱᓐ᙮ 28ᐁᔑ ᐐᐹᑲᑭᓐ ᐗᑮᒡ ᐅᑳᑭᑲᓂ ᓈᐱᔥᑭᑲᓐ, ᐃᐃ ᑲᔦ ᐅᑳᑭᑲᓂ ᓈᐱᔥᑭᑲᓐ ᐃᓴ ᑕᑕᑯᐱᒋᑳᑌᐗᓐ ᐅᓵᐗᔥᑯ ᔑᓅᑖᑲᓐ ᒋᐋᐸᑕᒃ᙮ ᐃᐃ ᐅᑳᑭᑲᓂ ᓈᐱᔥᑭᑲᓐ ᒋᓵᒥᓯᓯᓄᒃ ᑭᒋᐱᓱᓂᕽ, ᑫᒋᓈᒡ ᐃᑯ ᒋᑮᒋᑯᓭᓯᓄᒃ᙮
29ᐊᐲ ᑕᔥ ᐁᕒᐊᓐ ᐲᑎᑫᒡ ᑳᔑ ᑯᑖᓀᑖᑾᓂᓂᒃ ᐲᑎᒃ ᐅᑲ ᑭᑭᔥᑳᓐ ᐃᐃ ᐗᑮᒡ ᐅᑳᑭᑲᓂ ᓈᐱᔥᑭᑲᓐ ᐁᔑ ᒪᓯᓈᐱᑲᐅᒥᒡ ᐁᑕᓶᐙᓇᑭᓯᓂᒡ ᐃᔅᕒᐃᔭᓬᐊᐞ Israel᙮ ᓃᓐ ᐃᑕᔥ ᑌᐯᒋᑫᔮᓐ ᒨᔕᒃ ᓂᑲ ᒫᒥᑲᐤ ᓂᐱᒫᑎᓰᒪᒃ᙮ 30#Num 27.21; Deu 33.8; Ezr 2.63; Neh 7.65. ᑭᑲ ᐊᑑᓐ ᐃᓴ ᐃᔫᕒᐃᒻ Urim ᑲᔦ ᑕᒥᒻ Thummim ᐃᐃᒫ ᐗᑮᒡ ᐅᑳᑭᓇᓂ ᓈᐱᔥᑭᑲᓂᕽ ᐁᕒᐊᓐ ᒋᑕᑯ ᓈᐱᔥᑲᕽ ᐊᐲ ᐲᑎᑫᒡ ᐁᑕᓀᑖᑯᓯᐗᒃ᙮ ᒦ ᓴ ᐃ ᐊᐲ ᑫᑭᑭᔥᑲᕽ ᒨᔕᒃ ᐗᑮᒡ ᐅᑳᑭᑲᓂ ᓈᐱᔥᑭᑲᓐ ᑫᐅᒋ ᑭᑫᑕᕽ ᐁᓀᑕᒧᐗᒃ ᑫᐅᒋ ᒥᓄᓭᓂᒡ ᓂᐱᒫᑎᓰᒪᐞ ᐃᔅᕒᐃᔭᓬᐊᐞ᙮
ᑯᑕᒃ ᐊᓇᒥᐁᑭᑭᔥᑭᑲᓇᓐ
31ᐃᐃ ᑕᔥ ᑕᐅᒋ ᐅᔑᒋᑳᑌ ᐅᓵᐗᔥᑴ ᐲᓶᔩᑭᓄᕽ ᒋᐋᑲᐌᑭᓯᕽ ᐃᐃᒫ ᐅᑳᑭᑲᓂ ᓈᐱᔥᑭᑲᓂᕽ᙮ 32ᑕᐸᑯᓀᒋᑳᑌ ᓈᐗᔭᐄ ᐃᐃ ᑲᔥᑮᑮᐎᓐ᙮ ᑳᔑ ᐸᑯᓀᔮᒃ ᐃᑕᔥ ᑕᑕᑎᐲᑭᒀᑌ ᒋᐗᑫ ᐲᑯᓭᓯᓄᒃ᙮ 33-34ᐃᔑ ᐙᑳᔭᐄ ᑕᔥ ᑳᔑ ᑭᔥᑮᑲᒃ ᒋᐊᑯᒀᑌᑭᓐ ᐸᒪᑲᕒᐁᓀᑦ Pomegranates ᔒᐎᒦᒋᒻ ᑎᓄ ᑭᑎᑳᓇᓐ ᒋᐅᒋ ᐅᔑᒀᑌᑭᓐ, ᐅᓵᐗᔥᑴ ᐲᓶᔩᑭᓄᕽ, ᒪᑲᑌᒥᔅᑴ ᐲᓶᔩᑭᓄᕽ, ᒥᔅᑴ ᐲᓶᔩᑭᓄᕽ ᑲᔦ᙮ ᐃᔑ ᓀᓇᓴᐤ ᑕᔥ ᑕᐊᑰᑌᑭᓐ ᐅᓵᐎ ᔔᓂᔮ ᐙᐱᑯ ᔑᓇᐗᐆᒋᑲᓀᓴᓐ᙮ 35ᒦᑕᔥ ᐃᐃ ᐁᕒᐊᓐ ᑫᑭᑭᔥᑲᕽ ᐊᐲ ᐊᓄᑮᑕᐎᒡ᙮ ᑕᒪᑗᓯᓂᓂᐗᓐ ᑕᔥ ᔑᓇᐗᐆᒋᑲᓀᓴᓐ ᐊᐲ ᐲᑎᑫᒡ ᒫᐗᒡ ᐁᔑ ᑯᑖᓀᑖᑾᓂᓂᒃ ᐁᔑᐊᔮᓂᒡ ᑳᑎᐯᒋᑫᓂᒡ, ᑲᔦ ᑕᔥ ᐊᓂ ᓵᑲᐊᕽ᙮ ᑳᐐᓐ ᐃᑕᔥ ᑕᓂᐳᓰ᙮
36ᑭᑲ ᐅᔑᑑᓐ ᐃᑕᔥ ᐅᓵᐎ ᔔᓂᔮ ᐙᐱᑯ ᒪᓯᓂᒋᑲᓐ ᐅᐅ ᒋᔑ ᒪᓯᓈᐱᑲᐃᑳᑌᒃ, ᐃᔑ ᐸᑭᑎᓂᑰᐎᓯ ᑳᑎᐯᒋᑫᓂᒡ᙮ 37ᐃᐃᒫ ᑕᔥ ᐁᓈᓴᒥᐗᕽ ᐃᐃ ᑎᑎᐲᑭᓂᑲᓂᐎ ᐋᓄᒀᓐ ᑭᑲ ᐃᔑ ᐊᑾᐱᑑᓐ ᐅᓵᐗᔥᑯ ᔑᓅᑖᑲᓐ ᒋᐋᐸᒋᑑᔭᓐ᙮ 38ᐁᕒᐊᓐ ᐃᑕᔥ ᐅᑲ ᑭᑭᔥᑳᓐ ᐅᐅᐌᓂ ᐅᔅᑲᑎᑯᕽ᙮ ᒦᑕᔥ ᓃᓐ ᑌᐯᒋᑫᔮᓐ ᒋᒥᓍᐸᑕᒧᐗᒃ ᒥᓯᐌ ᐁᔑ ᐸᑭᑎᓈᓲᑕᒪᐎᐙᒡ ᐃᔅᕒᐃᔭᓬᐊᒃ, ᒥᓴᐙ ᑯ ᐯᒫᑎᓯᐙᒡ ᐗᐗᓃᐙᒡ ᐊᐲ ᐸᑭᑎᓈᓱᐙᒡ᙮
39ᐌᓂᔑᔑᒃ ᐃᔒᑭᓐ ᐃᑕᔥ ᑭᑲ ᐋᐸᒋᑑᓐ ᐅᔑᑕᒪᐗᒡ ᐁᕒᐊᓐ ᐅᐸᐸᑮᐗᔮᓐ ᐅᑖᓄᒀᓐ ᑲᔦ᙮ ᐃᐃ ᑕᔥ ᑲᔦ ᑭᑭᒋᒌᐱᓱᓐ ᑕᒪᒪᓯᓂᒀᑌ᙮
40ᑭᑲ ᐅᔑᑑᓇᓐ ᐃᑕᔥ ᑲᔦ ᐸᐸᑮᐗᔮᓇᓐ, ᑭᑭᒋᒌᐱᓱᓇᓐ, ᑎᑎᐲᑭᓂᑲᓂᐎ ᐋᓄᒀᓇᓐ ᑲᔦ ᑫᑭᑭᔥᑲᒥᓂᒡ ᐁᕒᐊᓐ ᐅᑯᓯᓴᐞ ᑫᐅᒋ ᑭᑌᑖᑯᓯᓂᒡ, ᑫᐅᒋ ᑭᒋ ᐃᓀᑖᑯᓈᑯᓯᓂᒡ ᑲᔦ᙮ 41ᒦᐗᓐ ᐃᑕᔥ ᐅᓄ ᑭᑭᔥᑭᑲᓇᓐ ᐁᕒᐊᓐ, ᐃᐃ ᑲᔦ ᐅᑯᓯᓴᐞ ᑫᑭᑭᔥᑲᒨᓇᑣ᙮ ᒦᔥ ᑫᔑ ᑭᑕᑭᒪᑣ ᒋᓰᑭᓇᒧᐗᒡ ᐋᓬᐃᑉ ᑎᓄ ᐱᒥᑌ ᐅᑎᒀᓂᐙᕽ ᒋᐃᔑ ᐸᑭᑎᓂᑰᐎᓯᐙᒡ ᓃᓐ ᒋᐊᓇᒥᐁᐎᑭᒫ ᐗᓄᑮᑕᐎᐙᒡ᙮
42ᐌᓂᔑᔑᒃ ᐃᔒᑭᓄᕽ ᐃᑕᔥ ᑭᑲ ᐅᔑᑕᒪᐙᒃ ᑫᐲᑕᐎ ᑖᓵᓄᑕᒧᐙᒡ ᐅᓅᑲᓂᐙᕽ ᒋᐊᑯᔑᓂᓂᒡ ᐲᓂᔥ ᐌᑎ ᐅᑆᒥᐙᕽ ᑳᐐᓐ ᐃᑕᔥ ᑕᐗᓈᒌᓰᐗᒃ᙮ 43ᐁᕒᐊᓐ ᐃᑕᔥ, ᐃᐃ ᑲᔦ ᐅᑯᓯᓴᐞ ᒨᔕᒃ ᐃᐃ ᐅᑲ ᑭᑭᔥᑲᐙᐙᐞ ᐊᐲ ᑯ ᐲᑎᑫᐙᒡ ᐸᒀᓀᑲᒥᑯᕽ ᐁᑕᓀᑖᑯᓯᐗᒃ, ᐊᐲ ᑲᔦ ᓈᓯᑲᒧᐙᒡ ᐁᔑ ᐸᑭᑎᓈᓱᐎᓐᒡ ᑲᔦ ᐁᔑ ᑯᑖᓀᑖᑾᓂᓂᒃ ᐲᑎᒃ ᐊᓄᑮᑕᐎᐙᒡ ᒋᐗᓈᒌᓯᒀ ᑫᐅᒋ ᓂᐳᐙᐸᓐ᙮ ᒦ ᓴ ᐱᑯ ᐅᐌᓂ ᓀᐱᒡ ᐁᐅᓇᑕᒪᐎᑣ ᐁᕒᐊᓐ, ᐃᐃ ᑲᔦ ᐅᐲᐌᓰᒪᐞ᙮
Iliyochaguliwa sasa
ᐁᑭᓴᑕᔅ 28: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society