ᐁᑭᓴᑕᔅ 27
27
ᑳᔑᐸᑭᑎᓈᓱᕽ ᐁᑕᔑᑌᒃ
1ᐅᔑᑑᓐ ᐃᑕᔥ ᑫᔑ ᐸᑭᑎᓈᓱᕽ ᐊᑫᔕ ᑎᓄᐙᑎᒃ acacia ᒋᐋᐸᒋᐊᒡ᙮ ᒋᑲᑲᑫᔮᒃ ᑭᑲ ᐃᔑᑑᓐ᙮ ᓃᔣᓱᒥᓯᑦ ᐋᐱᑕ ᑕᐊᒀ, ᓃᔣᓱᒥᓯᑦ ᐋᐱᑕ ᒋᐃᓂᑯᑾᑌᔮᒃ᙮ ᓃᐎᒥᓯᑦ ᐋᐱᑕ ᒋᐊᐲᑖᒃ᙮ 2ᐁᔑ ᓇᓃᐎᑮᑫᔮᒃ ᐃᑕᔥ ᑭᑲ ᐃᔑᑑᓐ ᑫᑰᓇᓐ ᒋᓴᓵᑲᑭᑌᑭᓐ᙮ ᑲᑭᓇ ᓴ ᒋᒥᓯᐌᔮᑰᒋᑳᑌᒃ, ᑲᔦ ᒋᒥᓯᐌᔑᕽ ᐅᓵᐙᐱᒃ bronze᙮ 3ᑭᑲ ᐅᔑᑑᓇᓐ ᐃᑕᔥ ᑲᔦ ᐅᓈᑲᓀᓴᓐ ᑫᔑ ᐱᓈᔐᓭᑭᓐ ᑭᔥᒀᑭᔐᓐ, ᐃᔅᐯᑌᓴᒃ ᑲᔦ, ᐅᓈᑲᓇᓐ ᑲᔦ ᑫᔑ ᐊᑌᒃ ᓯᓶᐲᑭ ᐌᐱᓂᑲᓐ, ᐐᔮᓯ ᒌᑕᐃᐳᓇᓐ, ᐃᔥᑯᑌᐎ ᐅᓈᑲᓇᓐ ᑲᔦ᙮ ᑲᑭᓇ ᑕᔥ ᐅᓄ ᐅᓵᐙᐱᑯᕽ ᑕᐅᒋ ᐅᔑᒋᑳᑌᐗᓐ᙮ 4ᐅᓵᐙᐱᑯᕽ ᐅᒋ ᐅᔑᑑᓐ ᑫᐅᒋ ᐱᓈᐗᑭᓭᒃ, ᑲᔦ ᑳᑕᓱ ᑮᑫᔮᒃ ᒋᐊᑯᑫᑭᓐ ᑳᐙᐐᐹᑲᑭᓐ᙮ 5ᐃᐃ ᑕᔥ ᑳᐅᒋ ᐱᓈᐗᑭᓭᒃ ᐃᔑ ᐊᑑᓐ ᐃᐃᒫ ᑳᔑ ᑳᒋᑖᒃ ᑳᔑ ᐸᑭᑎᓈᓱᕽ ᐋᐱᑕ ᒋᔑ ᐊᑯᓯᕽ ᑳᐊᐲᑖᒃ᙮ 6ᐊᑫᔕ ᑎᓄᐙᑎᑯᕽ ᐃᑕᔥ ᐅᒋ ᐅᔑᑑᓐ ᐱᒥᐎᒋᑲᓈᑰᓐ, ᒥᓯᐌ ᐅᓵᐙᐱᒃ ᒋᐊᑯᔑᕽ᙮ 7ᐃᐃᒫ ᑕᔥ ᑳᔑ ᐙᐐᐹᑲᑭᓐ ᑕᔑ ᐲᑖᑯᓯᓅᓐ ᐁᑰᑌᑭᓐ ᐃᔑ ᐊᔪᐱᒣ ᑳᔑ ᐸᑭᑎᓈᓱᕽ᙮ 8ᒋᐐᐹᒃ ᐃᑕᔥ ᑭᑲ ᐃᔑᑑᓐ, ᓇᐸᑭᓴᑰᒃ ᒋᐋᐸᒋᐊᑣ᙮ ᒪᔮ ᓴ ᑕᔥ ᐃᑯ ᑭᑲ ᐃᔑᑑᓐ ᑳᑮ ᐃᔑ ᑭᑭᓄᐊᒪᐎᓈᓐ ᐌᑎ ᑭᒋ ᐗᒌᕽ᙮
ᑳᐙᑳᐲᒋᐐᐱᒋᑳᑌᒃ
9ᑭᑲ ᐃᔑᑑᓐ ᐃᑕᔥ ᒋᐙᑳ ᐲᒋ ᐐᐱᒋᑳᑌᒃ ᑫᔑ ᐸᑕᑭᑌᒃ ᑭᒋ ᐊᓇᒥᐁ ᐸᒀᓀᑲᒥᒃ᙮ ᑭᑲ ᐋᐸᒋᑑᓐ ᐃᑕᔥ ᒫᐗᒡ ᐌᓂᔑᔑᒃ ᐃᔒᑭᓐ ᑫᐋᐸᑕᒃ ᐅᔑᑑᔭᓐ ᑫᐙᑳ ᑭᐲᑲᑰᑌᒃ᙮ ᐃᔑ ᔖᐗᓄᕽ ᐃᑕᔥ ᐃᓇᑫ ᑭᐲᑲᑰᒋᑲᓐ ᓈᓂᒥᑕᓇ 50 ᑕᓱ ᑎᐸᐃᑲᓐ ᑖᒀ᙮ 10ᐅᓵᐙᐱᑯᕽ ᒋᐅᒋ ᐅᔑᒋᑳᑌᑭᓐ ᑫᐃᔑ ᐸᑕᑭᓱᐙᒡ ᐁᔑ ᓃᔑᑕᓇᐎᐙᒡ ᐅᓵᐙᐱᑯᐎ ᐊᔂᑾᐃᑲᓇᒃ ᑫᔑ ᐊᑰᑌᒃ ᑭᐲᑲᑰᒋᑲᓐ᙮ ᐲᐙᐱᑰᓐ ᐌᔮᐹᐱᑯ ᔔᓂᔮ ᐙᐱᑲᑭᓐ ᑕᐋᔕᐙᑾᑰᑌᐗᓐ, ᑫᔑ ᐊᔭᑰᑌᑭᓐ ᑭᒋᐙᑾᐃᑲᓇᓐ᙮ 11ᒦᑕᔥ ᐯᔑᑾᓐ ᑫᐃᔑᑑᔭᓐ ᑮᐌᑎᓄᕽ ᐃᓇᑫ ᑳᔑ ᐙᑳ ᐲᒋ ᐐᐱᒋᑳᑌᒃ᙮ 12ᐃᔑ ᓂᑳᐲᐊᓄᕽ ᐃᑕᔥ ᐃᓇᑫ ᐃᐃ ᐙᑳ ᐲᒋ ᐐᐱᒋᑲᓐ ᑭᑲ ᐸᑕᑭᓈᒃ ᒥᑖᓱ ᐊᔂᑾᐃᑲᓇᒃ ᑲᔦ ᑫᔑ ᐸᑕᑭᓱᐙᒡ ᓃᔥᑕᓇᔑᓈᓇᓐ 25 ᑕᓱ ᑎᐸᐃᑲᓐ ᒋᐊᒀᒃ᙮ ᒦᑕᔥ ᐃᐃᒫ ᑫᔑ ᐊᑰᑑᔭᓐ ᑭᐲᑲᑰᒋᑲᓐ᙮ 13ᐌᑎ ᑕᔥ ᐃᓇᑫ ᐌᒋ ᒨᑲᐊᕽ ᑮᓯᔅ, ᐁᔑ ᐃᔥᒀᑌᒥᐗᕽ ᐙᑳ ᐲᒋ ᐐᐱᒋᑲᓐ ᓃᔥᑕᓇᔑᓈᓇᓐ 25 ᑕᓱᑎᐸᐃᑲᓐ ᑕᐊᒀ᙮ 14-15ᐃᔑ ᐄᑕᐗᔭᐄ ᐁᔑ ᐃᔥᒀᑌᒥᐗᕽ ᐃᓴ ᓂᓯᓐ ᑕᐸᑕᑭᓱᐗᒃ ᐊᔂᑾᐃᑲᓇᒃ ᑲᔦ ᑫᔑ ᐸᑕᑭᓱᐙᒡ᙮ ᓃᔣᓱ ᐋᐱᑕ ᑎᐸᐃᑲᓐ ᒋᐊᑴᑲᑭᓐ ᔩᑕᐎ ᐃᔥᒀᑌᕽ ᒋᐊᑰᑌᑭᓐ᙮ 16ᐃᐃᒫ ᑳᐅᒋ ᐲᑎᑫᕽ ᑭᑲ ᐊᑰᑑᒻ ᑭᐲᑲᐃᑲᓐ ᒥᑖᓱ ᑎᐸᐃᑲᓐ ᒋᐊᑴᑲᒃ ᑫᐅᒋ ᐅᔑᒋᑳᑌᒃ ᐌᓂᔑᔑᕽ ᐃᔒᑭᓐ ᐌᔖᐗᔥᒀᒃ, ᒣᑲᑌᒥᔂᒃ, ᒣᔅᑴᑲᒃ ᒋᐲᓶᔩᑲᒃ ᐐᑫ ᒋᒪᒪᓯᓂᒀᑌᒃ᙮ ᑫᓃᐎᐙᒡ ᐃᑕᔥ ᐯᑕᑭᓱᐙᒡ ᐊᔂᑾᐃᑲᓇᒃ ᑲᔦ ᑫᔑ ᐸᑕᑭᓱᐙᒡ, ᒦ ᐃᒫ ᑫᔑ ᐊᑰᑑᔭᓐ᙮ 17ᐙᐹᐱᑯ ᔔᓂᔮ ᐙᐱᑯᐗᑭᓐ ᐲᐙᐱᑰᓐ ᐃᓴ ᑕᑲᐯ ᐋᔕᐙᑾᑰᑌᐗᓐ ᐃᐃᒫ ᐙᑳ ᐲᒋ ᐐᐱᒋᑲᓂᕽ ᐁᔑ ᐸᑕᑭᓱᐙᒡ ᐊᔂᑾᐃᑲᓇᒃ ᒥᓯᐌ ᐙᑳ ᑭᐲᑭᐱᒋᑲᓂᕽ᙮ ᑭᒋᐙᑾᐃᑲᓇᓐ ᑲᔦ ᐃᒫ ᒋᐊᑰᑌᑭᓐ ᐌᔮᐹᐱᑯ ᔔᓂᔮ ᐙᐱᑯᐗᑭᓐ, ᒋᐅᓵᐙᐱᑲᑭᓐ ᑲᔦ ᐁᔑ ᐸᑕᑭᓱᐙᒡ ᐊᔂᑾᐃᑲᓇᒃ᙮ 18ᐃᐃᓴ ᐙᑳ ᑭᐲᑭᐱᒋᑲᓐ ᓈᓂᒥᑕᓇ ᑕᓱ ᑎᐸᐃᑲᓐ ᑕᐊᒀ, ᓃᔥᑕᓇᔑᓈᓇᓐ ᑕᓱ ᑎᐸᐃᑲᓐ ᒋᐃᓂᑯᑾᑌᔮᒃ, ᓃᔓᑎᐸᐃᑲᓐ ᐋᐱᑕ ᒋᐊᐲᑖᒃ᙮ ᑭᐲᑲᐃᑲᓐ ᐃᑕᔥ ᑕᐅᒋ ᐅᔑᒋᑳᑌ ᒫᐗᒡ ᐃᑯ ᐌᓂᔑᔑᒃ ᐃᔒᑭᓐ, ᐃᓂ ᑲᔦ ᑳᐅᒋ ᐸᑕᑭᓱᐙᒡ ᐅᓵᐙᐱᑯᕽ ᒋᐅᒋ ᐅᔑᒋᑳᑌᑭᓐ᙮ 19ᑲᑭᓇ ᑕᔥ ᐋᐸᒋᒋᑲᓇᓐ ᑫᐋᐸᑕᑭᓐ ᐃᐃᒫ ᑭᒋ ᐊᓇᒥᐁ ᐸᒀᓀᑲᒥᑯᕽ ᐋᓃᓐ ᐃᑯ ᐁᓇᑲᒥᑲᒃ ᐅᓵᐙᐱᑯᕽ ᑕᐅᒋ ᐅᔑᒋᑳᑌᐗᓐ, ᐃᓂ ᑲᔦ ᐸᒀᓀᑲᒥᑯᐎ ᑭᒋᐗᑾᐃᑲᓇᓐ ᑫᔑ ᑭᒋᐗᐱᑌᒃ᙮
ᑫᔑᓈᓈᑲᒋᒋᑳᑌᒃ ᐙᓴᑯᓀᒋᑲᓐ
20ᑲᓅᔥ ᐃᑕᔥ ᑲᑭᓇ ᐃᔅᕒᐃᔭᓬᐊᒃ Israel ᒋᐲᑕᒪᐎᒀ ᒫᐗᒡ ᐌᓂᔑᔑᓂᓂᒃ ᐋᓬᐃᑉ ᑎᓄ ᐱᒥᑌ ᑫᐋᐸᑕᒃ ᐙᓴᑯᓀᒋᑲᓂᕽ ᐁᑕᓱᓈᑯᔥ ᒋᓴᑲᐃᑳᑌᒃ᙮ 21ᐁᕒᐊᓐ Aaron ᐃᑕᔥ, ᐅᑯᓯᓴᐞ ᑲᔦ ᐅᑲ ᐅᓇᑑᓈᐙ ᐃᐃ ᐙᓴᑯᓀᒋᑲᓐ ᐃᐃᒫ ᐁᑕᓀᑖᑯᓯᐗᒃ ᐸᒀᓀᑲᒥᑯᕽ ᐃᔑ ᐊᑾᒌᕽ ᐃᓇᑫ ᑭᒋ ᑭᐲᑲᐃᑲᓂᕽ ᐁᓈᓴᒥᓯᓂᓂᒃ ᐊᔓᑕᒫᑫᒪᑲᒃ᙮ ᐃᐃ ᑕᔥ ᐙᓴᑯᓀᒋᑲᓐ ᑕᓴᑲᐃᑳᑌ ᐅᓈᑯᔑᒃ, ᐲᓂᔥ ᒋᑭᔐᐹᐗᑲᒃ ᒋᐙᓴᑯᓀᒃ᙮ ᐅᐅᓴ ᑕᔥ ᐅᓇᔓᐌᐎᓐ ᑳᐃᓂᓈᓐ ᒨᔕᒃ ᐃᑯ ᐃᔅᕒᐃᔭᓬᐊᒃ ᓀᐱᒡ ᐃᑯ ᑕᐃᔑᒋᑫᐗᒃ, ᐃᓂ ᑲᔦ ᑫᓂ ᐅᐲᐌᓰᒥᐙᒡ᙮
Iliyochaguliwa sasa
ᐁᑭᓴᑕᔅ 27: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society