ᐁᑭᓴᑕᔅ 26
26
ᑭᒋᐊᓇᒥᐁᐸᒀᓀᑲᒥᒃ ᑫᐃᔑᒋᑳᑌᒃ
1ᒦᑕᔥ ᐅᐅ ᑫᐃᔑᑑᔭᓐ ᑭᒋ ᐊᓇᒥᐁ ᐸᒀᓀᑲᒥᒃ᙮#26.1 ᑭᒋ ᐊᓇᒥᐁ ᐸᒀᓀᑲᒥᒃ: ᒦ ᐃᒫ ᑳᑕᔑ ᐊᓇᒥᐋᕽ, ᑳᑮ ᒣᒀᔥᑲᐙᒡ ᑭᔐᒪᓂᑑ ᐅᐱᒫᑎᓰᒪᐞ᙮ ᒦ ᐃᒫ ᑳᐃᔑᐊᔮᒡ ᐁᑮ ᐊᓂ ᓃᑳᓃᑕᒪᐙᒡ ᐱᑾᑕᑲᒥᒃ ᑳᑮ ᐊᓂ ᐃᔖᓂᒡ᙮ ᑮ ᐋᐸᒋᒋᑳᑌ ᐲᓂᔥ ᐊᐲ ᔂᓬᐊᒪᓐ Solomon ᑳᑮ ᐅᔑᑑᒡ ᑭᒋ ᐊᓇᒥᐁᐎᑲᒥᒃ ᐃᐃᒫ ᒉᕒᐆᓴᓬᐊᒥᕽ Jerusalem᙮ ᒥᑖᓱ ᐯᐸᑳᓃᑭᓅᓐ ᒫᐗᒡ ᐌᐙᓂᔑᔑᑭᓐ ᑫᑭᓂᑲᐎᓂᑳᑌᒃ ᐲᓶᔩᑭᓅᓐ ᑳᐅᓵᐗᔥᑴᑲᑭᓐ, ᑳᒪᑲᑌ ᒥᔅᑴᑲᑭᓐ, ᑲᔦ ᑕᔥ ᑳᒥᔅᑴᑲᑭᓐ ᐊᐎᔭ ᑕᔥ ᑳᐙᐐᑫᓯᒡ ᐁᒪᓯᓃᑕᐃᑫᒡ ᐁᒪᓯᓃᑕᐙᒡ ᒉᕒᐊᐲᐞ cherub᙮ 2ᑲᑭᓇ ᓴ ᑭᐲᑲᐃᑲᓇᓐ ᐯᔑᑾᓐ ᑕᐃᓂᑯᑴᑲᓅᓐ᙮ ᒥᑖᔑᓃᐎ ᑎᐸᐃᑲᓐ 14 ᒋᐊᑴᑲᑭᓐ, ᓃᔓᑎᐸᐃᑲᓐ 2 ᒌᓂᑯᑾᑌᔩᑲᒃ᙮ 3ᓈᓉᒃ ᐃᑕᔥ ᐃᔒᑭᓅᓐ ᐯᔑᑾᔦᒃ ᐃᔑ ᐅᑯᒀᑕᓐ᙮ ᒦᑕᔥ ᐯᔑᑾᓐ ᑫᑑᑕᒪᓐ ᐃᓂ ᑯᑕᒃ ᓈᓇᓐ ᐃᔒᑭᓅᓐ᙮ 4ᑳᐅᓵᐗᔥᒀᒃ ᐃᔒᑭᓐ ᐃᑕᔥ ᑭᑲ ᐋᐸᒋᑑᓐ ᒋᐅᔑᑑᔭᓐ ᑳᐐᐸᐲᑲᑰᑌᑭᓐ ᐁᔑ ᑭᔑᐲᑲᒃ ᐃᐃ ᐯᔑᒃ ᑭᐲᑲᐃᑲᓐ᙮ ᒦᑕᔥ ᐯᔑᑾᓐ ᑫᑑᑕᒪᓐ ᐃᐃ ᑯᑕᒃ ᑭᐲᑲᐃᑲᓐ᙮ 5ᓈᓂᒥᑕᓇ 50 ᑳᐐᐸᐲᑲᑰᑌᑭᓐ ᑭᑲ ᐅᔑᑑᓇᓐ ᐃᐃᒫ ᓂᑕᒻ ᑭᐲᑲᐃᑲᓂᕽ᙮ ᒦᔥ ᑲᔦ ᑯᑕᒃ ᓈᓂᒥᑕᓇ ᑳᐐᐸᐲᑲᑰᑌᑭᓐ ᒋᐅᔑᑑᔭᓐ ᒋᔑᐊᔮᑭᓐ ᐃᐃᒫ ᑯᑕᒃ ᑭᐲᑲᐃᑲᓂᕽ᙮ 6ᒦᔥ ᑫᔑ ᐅᔑᑑᔭᓐ ᓈᓂᒥᑕᓇ ᑭᒋᐙᑾᐃᑲᓇᓐ ᒋᐄᑕᐎ ᐙᑳᑭᓐ ᒋᐅᓵᐎ ᔔᓂᔮ ᐙᐱᑲᑭᓐ, ᒦᔥ ᐃᓂ ᑫᐋᐸᒋᑑᔭᓐ ᒋᓃᔓ ᐊᒀᑾᐊᒪᓐ ᑭᐲᑲᐃᑲᓇᓐ ᒋᐯᔑᑴᑲᒃ᙮
7ᒦᔥ ᑲᔦ ᒋᐅᔑᑑᔭᓐ ᑫᐋᐸᑕᒃ ᒋᐊᑾᓃᑲᐃᑳᑌᒃ ᑭᒋ ᐊᓇᒥᐁ ᐸᒀᓀᑲᒥᒃ᙮ ᒥᑖᔑᐯᔑᑾᔦᒃ 11 ᐃᔒᑭᓅᓐ ᐌᒋ ᐅᔑᒋᑳᑌᑭᓐ ᒫᓇᑎᑯᐲᐗᔨᕽ ᐃᓴ ᑭᑲ ᐋᐸᒋᑑᓇᓐ᙮ 8ᐃᔑᑑᓐ ᐯᔑᑾᓐ ᒋᐃᓂᑯᑴᑲᑭᓐ᙮ ᒥᑖᔑᓈᓄ ᑎᐸᐃᑲᓐ 15 ᒋᐊᑴᑲᒃ, ᓃᔓᑎᐸᐃᑲᓐ 2 ᒋᐊᓂᑯᑾᑌᔩᑲᒃ᙮ 9ᐃᓂ ᑕᔥ ᓈᓇᓐ ᐃᔒᑭᓅᓐ ᐯᔑᑾᔦᒃ ᑕᔑ ᒫᒪᐎᒀᑌᐗᓐ᙮ ᐃᓂ ᑕᔥ ᑯᑕᒃ ᓂᑯᑣᓱ ᐯᔑᑾᔦᒃ ᑕᔑ ᒫᒪᐎᒀᑌᐗᓐ᙮ ᐃᐃ ᑕᔥ ᓂᑯᑣᓱᐌᑭᓐ 6 ᑕᓇᐺᑭᓂᑳᑌ ᐃᓇᑫ ᑫᐃᓈᓴᒪᑭᑌᒃ ᐃᐃ ᑭᒋ ᐊᓇᒥᐁ ᐸᒀᓀᑲᒥᒃ᙮ 10ᑭᑲ ᐅᔑᑑᓇᓐ ᐃᑕᔥ ᓈᓂᒥᑕᓇ 50 ᑳᐐᐸᐲᑲᑰᑌᑭᓐ ᐃᐃᒫ ᐁᔑ ᑭᔑᐲᑲᒃ ᐃᐃ ᐃᔥᒀᒡ ᑭᐲᑲᐃᑲᓐ, ᑲᔦ ᑕᔥ ᓈᓂᒥᑕᓇ ᐃᐃᒫ ᑯᑕᒃ ᑭᐲᑲᐃᑲᓂᕽ᙮ 11ᒦᔥ ᑫᔑ ᐅᔑᑑᔭᓐ ᓈᓂᒥᑕᓇ ᑭᒋᐙᑾᐃᑲᓇᓐ ᒋᐄᑕᐎ ᐙᑳᑭᓐ ᒋᐅᓵᐙᐱᑲᑭᓐ, ᒦᔥ ᐃᓂ ᑫᐋᐸᒋᑑᔭᓐ ᒋᓃᔓ ᐊᒀᑾᐊᒪᓐ ᑭᐲᑲᐃᑲᓇᓐ ᒋᐯᔑᑴᑲᒃ ᐋᑲᐌᑲᐃᑲᓐ᙮ 12ᐃᐃ ᑕᔥ ᐁᔥᑯᓭᒃ ᐌᑎ ᑕᔑ ᐸᑭᒌᑲᑰᑌ ᐁᔑ ᐅᑖᓈᐗᕽ ᐃᐃ ᐸᒀᓀᑲᒥᒃ᙮ 13ᐃᐃ ᑕᔥ ᐐᓐ ᐋᐱᑕ ᑎᐸᐃᑲᓐ ᑳᐃᔥᑯᓭᒃ ᑕᐸᑭᒌᑲᑰᑌ ᐗᐙᐱᒣᐊᔭᐄ ᑫᐅᒋ ᑭᐲᑭᓯᕽ ᐃᐃ ᐸᒀᓀᑲᒥᒃ᙮
14ᑫᔮᐱ ᑕᔥ ᓃᔑᓐ ᑭᑲ ᐅᔑᑑᓇᓐ ᐊᑾᓃᑲᐃᑲᓇᓐ᙮ ᐯᔑᒃ ᑕᐅᒋ ᐅᔑᒋᑳᑌ ᐊᔮᐯᐎ ᒫᓇᒑᓂᔑᐗᔮᓂᕽ ᒋᒥᔅᑾᑎᑌᓂᒃ, ᐃᐃ ᑕᔥ ᑯᑕᒃ ᐌᓂᔑᔑᕽ ᐸᔥᑴᑭᓐ ᒋᐋᐸᑕᒃ᙮ ᒦᐗᓐ ᐃᑕᔥ ᐅᐅ ᑫᐋᐸᑕᒃ ᐊᑾᒌᕽ ᒋᐊᑾᓃᑲᐃᑳᑌᒃ᙮
15ᑭᑲ ᐅᔑᑑᓇᓐ ᑲᔦ ᑫᐸᑕᑭᑌᑭᓐ ᐸᒀᓀᑲᒥᒀᑎᑰᓐ ᐊᑫᔕ acacia ᑎᓄᐙᑎᒃ ᒋᐋᐸᒋᐊᒡ ᑫᐋᐸᑕᑭᓐ ᑭᒋ ᐸᒀᓀᑲᒥᑯᕽ᙮ 16ᒥᑖᔑᓈᓄᒥᓯᑦ 15 ᑕᐊᒀᐗᓐ, ᓃᔥᑕᓇᔑᓃᔣᓱᒥᓂᓐᒡ 27 ᒋᐊᓂᑯᑾᑌᔮᑭᓐ᙮ 17ᐃᐃᒫ ᑕᔥ ᐸᒀᓀᑲᒥᒀᑎᑯᕽ ᓃᔑᓐ ᓈᐱᓴᑰᓐ ᑕᓃᐌᔮᑯᓴᑲᐃᑳᑌᐗᓐ ᐯᔑᑾᓐ ᒋᐊᑾᑾᑭᓐ᙮ ᑲᑭᓇ ᓴ ᐅᓄ ᑎᓄ ᐸᒀᓀᑲᒥᒀᑎᑰᓐ ᐯᔑᑾᓐ ᑕᐃᔑᒋᑳᑌᐗᓐ᙮ 18ᓃᔥᑕᓇ ᐸᒀᓀᑲᒥᒀᑎᑰᓐ ᑕᐋᐸᑕᓅᓐ ᐃᔑ ᔖᐗᓄᕽ ᐃᓇᑫ᙮ 19ᓃᒥᑕᓇ ᑕᐅᔑᒋᑳᑌᐗᓐ ᑫᐙᐹᐱᑯ ᔔᓂᔮ ᐙᐱᑯᐗᑭᓐ ᑫᔑ ᐸᑕᑭᑌᑭᓐ ᐸᒀᓀᑲᒥᒀᑎᑰᓐ᙮ ᓀᓃᔑᓐ ᐃᑕᔥ ᑕᐋᐸᑕᓅᓐ ᑫᔑ ᐸᑕᑭᑌᒃ ᐯᔑᒃ ᐸᒀᓀᑲᒥᒀᑎᒃ ᑫᐅᒋ ᑭᒋᐎᓯᑭᓐ ᐃᓂ ᑳᓃᔑᓐᑭᓐ ᓃᐌᔮᑯᓴᑲᐃᑲᓇᓐ᙮ 20ᓃᔥᑕᓇ ᑕᔥ ᐅᔑᑑᓐ ᐸᒀᓀᑲᒥᒀᑎᑰᓐ ᑫᐋᐸᑕᑭᓐ ᐃᔑ ᑮᐌᑎᓄᕽ ᐃᓇᑫ ᑭᒋ ᐸᒀᓀᑲᒥᑯᕽ᙮ 21ᓃᒥᑕᓇ ᑕᐅᔑᒋᑳᑌᐗᓐ ᑫᐙᐹᐱᑯ ᔔᓂᔮ ᐙᐱᑯᐗᑭᓐ ᑫᔑ ᐸᑕᑭᑌᑭᓐ ᐸᒀᓀᑲᒥᒀᑎᑰᓐ᙮ ᓀᓃᔑᓐ ᐃᑕᔥ ᑕᐋᐸᑕᓅᓐ ᑫᔑ ᐸᑕᑭᑌᒃ ᐯᔑᒃ ᐸᒀᓀᑲᒥᒀᑎᒃ᙮ 22ᓂᑯᑣᓱ ᐸᒀᓀᑲᒥᒀᑎᑰᓐ ᑭᑲ ᐅᔑᑑᓇᓐ ᑫᐋᐸᑕᑭᓐ ᐁᔑ ᐅᑖᓈᐗᕽ ᐸᒀᓀᑲᒥᒃ ᓂᑳᐲᐊᓄᕽ ᐃᓇᑫ᙮ 23ᓃᔑᓐ ᐃᑕᔥ ᑭᑲ ᐅᔑᑑᓇᓐ ᐸᒀᓀᑲᒥᒀᑎᑰᓐ ᑫᐋᐸᑕᑭᓐ ᐁᔑ ᑲᑮᑫᔮᒃ᙮ 24ᐅᓄ ᑕᔥ ᓃᔑᓐ ᐸᒀᓀᑲᒥᒀᑎᑰᓐ ᑕᐋᔩᒋ ᐊᓯᒋᓯᓅᓐ ᐁᔑ ᑲᑮᑫᔮᒃ᙮ ᐌᑎ ᑕᐸᔒᔥ ᑕᔑ ᐋᔩᒋᒋᑳᑌᐗᓐ ᒋᓴᑭᓯᑭᓐ, ᐌᑎ ᑲᔦ ᐗᑭᒐᔭᐄ᙮ ᒦᑕᔥ ᐅᐅ ᓇᑫ ᑫᐃᔑᒋᑳᑌᑭᓐ ᐸᒀᓀᑲᒥᒀᑎᑰᓐ ᑫᓀᓃᔓᓯᑭᓐ ᐁᔑ ᑲᑮᑫᔮᒃ ᐃᐃ ᐸᒀᓀᑲᒥᒃ᙮ 25ᐃᓇᔥᑫ ᑕᔥ ᐃᔑ ᒫᒪᐤ ᓂᔣᓱ 8 ᐸᒀᓀᑲᒥᒀᑎᑰᓐ ᑕᐋᐸᑕᓅᓐ, ᒥᑖᔑᓂᑯᑣᓱ 16 ᑫᐙᐹᐱᑯ ᔔᓂᔮ ᐙᐱᑯᐗᑭᓐ ᑫᔑ ᐸᑕᑭᑌᑭᓐ ᐸᒀᓀᑲᒥᒀᑎᑰᓐ᙮ ᓀᓃᔑᓐ ᐄᑐᒃ ᑕᐋᐸᑕᓅᓐ ᑫᔑ ᐸᑕᑭᑌᒃ ᐯᔑᒃ ᐸᒀᓀᑲᒥᒀᑎᒃ᙮
26ᒥᑖᔑᓈᓇᓐ 15 ᐃᑕᔥ ᑭᑲ ᐅᔑᐋᒃ ᐊᔕᐙᑾᑰᒋᑲᓇᒃ ᐊᑫᔕ acacia ᑎᓄᐙᑎᒃ ᒋᐋᐸᒋᑑᔭᓐ᙮ ᒦᐗᒃ ᐃᑕᔥ ᐅᑯ ᑫᐋᐸᑎᓯᐙᒡ ᑳᔑ ᓈᓇᓂᑭᓐ 5 ᐸᒀᓀᑲᒥᒀᑎᑰᓐ ᐃᔑ ᓇᐸᓀᔩᒃ ᐃᐃ ᐸᒀᓀᑲᒥᒃ᙮ 27ᓈᓇᓐ ᑲᔦ ᑫᐋᔕᐙᑾᑰᒋᓄᐙᒡ ᑫᐋᐸᑎᓯᐙᒡ ᐁᔑ ᓈᓇᓂᑭᓐ 5 ᐸᒀᓀᑲᒥᒀᑎᑰᓐ ᑯᑕᒃ ᐃᔑ ᓇᐹᒋᓇᑫ, ᓈᓇᓐ ᑲᔦ ᑫᐋᐸᑎᓯᐙᒡ ᐃᔑ ᓂᑳᐲᐊᓄᕽ ᐃᓇᑫ, ᐁᔑ ᐅᑖᓈᐗᕽ ᐃᐃ ᐸᒀᓀᑲᒥᒃ᙮ 28ᐊᐊᐌ ᑕᔥ ᑫᐋᔕᐙᑾᑰᒋᕽ, ᐁᔑ ᐋᐱᑕᐗᔭᐄ ᐸᒀᓀᑲᒥᒀᑎᑰᓐ ᐃᐃᒫ ᑫᔑ ᒥᓯᐌ ᐋᔕᐙᑾᑰᒋᕽ᙮ 29ᐅᓵᐎ ᔔᓂᔮ ᐙᐱᒃ ᑕᔥ ᑕᒥᓯᐌᔑᓐ ᐸᒀᓀᑲᒥᒀᑎᑯᕽ, ᒋᐊᑯᑲᑑᔭᓐ ᑳᐗᐐᐹᑲᑭᓐ ᐅᓵᐎ ᔔᓂᔮ ᐙᐱᑯᕽ ᑫᐅᒋ ᑭᒋᐎᔑᓄᐙᒡ ᑳᐋᔕᐙᑾᑰᒋᓄᐙᒡ᙮ ᒦᐗᒃ ᐃᑕᔥ ᐃᑭ ᑲᔦ ᑫᐅᓵᐎ ᔔᓂᔮᐗᑲᑕᐎᑣ᙮
30ᒪᔮ ᑕᔥ ᐃᑯ ᑭᑲ ᐃᔑᑑᓐ ᑭᒋ ᐊᓇᒥᐁ ᐸᒀᓀᑲᒥᒃ ᑳᑮ ᐃᔑ ᑭᑭᓄᐊᒪᐎᓈᓐ ᐌᑎ ᑭᒋ ᐗᒌᕽ᙮
31ᑭᑲ ᐅᔑᑑᓐ ᐃᑕᔥ ᑲᔦ ᑭᐲᑲᐃᑲᓐ ᒋᐋᐸᒋᑑᔭᓐ ᐌᓂᔑᔑᒃ ᐃᔒᑭᓐ ᒋᑭᓂᑲᐎᓂᑳᑌᒃ ᐲᓶᔩᑭᓅᓐ ᐌᔖᐗᔥᑴᑲᒃ, ᒣᑲᑌ ᒥᔅᑴᑲᒃ, ᒣᔅᑴᑲᒃ ᑲᔦ᙮ ᐊᐎᔭ ᑕᔥ ᑳᐙᐐᑫᓯᒡ ᐁᒪᓯᓂᑕᐃᑫᒡ ᐁᒪᓯᓂᑕᐙᒡ ᒉᕒᐊᐲᐞ᙮ 32ᒦᑕᔥ ᑫᔑ ᑮᒋᐗᑰᑑᔭᓐ ᑭᐲᑲᐃᑲᓐ ᐃᐃᒫ ᐌᓵᐎ ᔔᓂᔮ ᐙᐱᑯᐗᑭᓐ ᑭᒋᐙᑾᐃᑲᓂᕽ ᑳᔑ ᑭᒋᐎᓯᑭᓐ ᓃᐎᓐ ᐊᑫᔕ ᑎᓄᐙᑎᑯᕽ ᐌᒋ ᐅᔑᒋᑲᓂᐎᐙᒡ ᐊᔂᑾᐃᑲᓇᒃ ᒋᐎᐗᑴᔑᕽ ᐅᓵᐎ ᔔᓂᔮ ᐙᐱᒃ᙮ ᓃᐎᓐ ᑳᐙᐹᐱᑯ ᔔᓂᔮ ᐙᐱᑯᐗᑭᓐ ᐁᔑ ᐋᐸᑕᑭᓐ ᑫᔑ ᐸᑕᑭᓱᐙᒡ ᐃᑭ ᐊᔂᑾᐃᑲᓇᒃ᙮ 33#Heb 6.19; 9.3-5. ᐃᐃᒫ ᑕᔥ ᐃᔑ ᑲᑮᒋᐗᑰᑑᓐ ᐃᐃ ᑭᐲᑲᐃᑲᓐ ᑭᒋᐙᑾᐃᑲᓂᕽ᙮ ᐊᐙᓯᓇᑫ ᑭᐲᑲᐃᑲᓂᕽ ᐃᑕᔥ ᑭᑲ ᐃᔑᐊᑑᓐ ᐊᔓᑕᒫᑫᒪᑲᒃ᙮ ᐃᐃ ᑭᐲᑲᐃᑲᓐ ᐃᓴ ᑕᐋᐸᑕᓐ ᐸᑳᓐ ᒋᐅᒋ ᐊᔮᒪᑲᒃ ᑳᔑ ᑯᑖᓀᑖᑾᒃ ᐲᑎᒃ, ᐃᐃ ᑲᔦ ᒫᐗᒡ ᐃᑯ ᑳᔑ ᑯᑖᓀᑖᑾᒃ᙮ 34ᒦᑕᔥ ᑫᔑ ᑭᐸᐊᒪᓐ ᐊᔓᑕᒫᑫᒪᑲᒃ ᐊᑾᓈᐳᐌᐃᑲᓐ ᒋᐋᐸᒋᑑᔭᓐ ᑳᔑ ᐴᓀᒋᑳᑌᑭᓐ ᒪᒋᑑᑕᒧᐎᓇᓐ ᐃᐃᒫ ᒫᐗᒡ ᑳᔑ ᑯᑖᓀᑖᑾᒃ᙮ 35ᐃᐃᒫ ᑕᔥ ᐊᐗᓯᓇᑫ ᑭᐲᑲᐃᑲᓂᕽ ᑕᔑ ᐊᑌ ᐊᑑᐳᐎᓈᒃ ᐃᔑ ᑮᐌᑎᓄᕽ ᐃᓇᑫ, ᐃᐃ ᑕᔥ ᐐᓐ ᐙᓴᑯᓀᒋᑲᓈᒃ ᐃᔑ ᔖᐗᓄᕽ ᐃᓇᑫ ᑕᔑ ᐸᑕᑭᑌ᙮
36ᑭᑲ ᐅᔑᑑᓐ ᐃᑕᔥ ᐃᔥᒀᑌᒥᐎ ᑭᐲᑲᐃᑲᓐ ᑫᐅᒋ ᐲᑎᑫᕽ ᑭᒋ ᐸᒀᓀᑲᒥᑯᕽ᙮ ᑭᑲ ᐋᐸᒋᑑᓐ ᒫᐗᒡ ᐌᓂᔑᔑᒃ ᐃᔒᑭᓐ ᑫᑭᓇᐎᓯᕽ ᐌᔖᐗᔥᑴᑲᒃ, ᒣᑲᑌ ᒥᔅᑴᑲᒃ, ᒣᔅᑴᑲᒃ ᑲᔦ ᐲᓶᔩᑭᓐ ᒋᐗᐌᔑᓈᑾᒃ, ᒋᒪᓯᓂᒀᑌᒃ ᑲᔦ᙮ 37ᑭᑲ ᐅᔑᐋᒃ ᐃᑕᔥ ᓈᓇᓐ ᐊᔂᑾᐃᑲᓇᒃ ᐊᑫᔕ ᑎᓄᐙᑎᑯᕽ ᒋᐅᒋ ᐅᔑᒋᑲᓂᐎᐙᒡ ᒋᐎᐗᑴᔑᕽ ᐅᓵᐎ ᔔᓂᔮ ᐙᐱᒃ ᒋᑭᑭᓯᑭᓐ ᐌᓵᐎ ᔔᓂᔮ ᐙᐱᑯᐗᑭᓐ ᑭᒋᐙᑾᐃᑲᓇᓐ ᑫᔑ ᐊᑰᑌᒃ ᐅᐅ ᑭᒋ ᑭᐲᑲᐃᑲᓐ᙮ ᓈᓇᓐ ᑲᔦ ᑭᑲ ᐅᔑᑑᓇᓐ ᐌᓵᐙᐱᑲᑭᓐ ᑫᔑ ᐸᑕᑭᓱᐙᒡ ᐊᔂᑾᐃᑲᓇᒃ᙮
Iliyochaguliwa sasa
ᐁᑭᓴᑕᔅ 26: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society