Populära bibelverser från aMatiyu 6

Dela

Kamok anong, tse̱r yin rigwo̱m Adakunom ne i nye ike̱ng iya wu ta shim, a tà ka no̱o̱k yin ike̱re̱'me cice̱r.

Kamok anong, sang yin tu daam yin be katson baꞌ, katson tà nye rikan rice wu. Koakye kunom be kudaam wu.

“Kamok anong, mi fe̱ be yin ye, sang yin tu daam yin ka ane̱ ne yin tà sor yin baꞌ, natoon ike̱ng iya yin tana ya yin ka ike̱ng iya yin tana so̱ yin baꞌ, ka ike̱ng iya yin tana te yin baꞌ. Kutser nar naya, ne kuro̱m nar ares aꞌa?

Amma ke wan tà nye aduwa, no̱ kaye̱e̱r kutu wan ne i whe̱e̱n kanukutu ne i nye aduwa wan be Ada wan aya a tu ku di baꞌ. Ada wan aya a ta di ike̱re̱ iya a tá nye nune̱re̱ng, tà ka no̱o̱k wan ishorong wan.

“Ana ne yin ta nye yin aduwa, “ ‘Ada yir afe a ta se kaye̱e̱r kaza, won riyerek wan tu sor zhe̱l, rigwo̱m wan tu be̱, a tu nye ike̱ng iya wan ta shim kaye̱e̱r kazatse, kyo̱ndi a ta nye kaye̱e̱r kaza.

Ni nang yir naya kuya koakye katuk

Ni re̱ng yir rine̱n yir, kyo̱ndi yir tá re̱ng yir áya afe a tin nye yir rine̱n.

Sang tu tseng be yir naro̱ kaya yir tana taam yir baꞌ, ni shesh yir nubo̱k Amaan Aner. [Kamok rigwo̱m be kukyem ne kuyiik nye kufuan ma izen izen. Anong!]’

“Kamok ke yin re̱ng yin áya afe a ta ka nye yin rine̱n, Ada yin afe a ta se kaye̱e̱r kaza tà ka re̱ng yin rife yin gip.

Ye̱re̱k yin nanon ta di yin, ba tse̱k ka á tusung ni ingme̱ baꞌ, amma gip be anong, Ada yin afe a ta se kaye̱e̱r kaza tu ta ba. Yin tu ku nar yin ba yiik aꞌa?

“Sang tu tusung yin kurum yin kaye̱e̱r kazatse, naro̱ íwhe̱e̱s be ítse̱ tana beseng'e baꞌ ka naro̱ kaya ákpatang tana fo nong a tà kok baꞌ. Amma tusung yin kurum yin kaye̱e̱r kaza, naro̱ iwhe̱e̱s be itse̱ tana ya baꞌ, naro̱ ákpatang tana fo nong á ta kok baꞌ. Kamok karo̱ kaya ne kurum wan tu ku se, azong ne riye̱ wan tà se.

“Koakak kuse a tana kyem a nye átekasa afa itomong ni izen izining baꞌ. Ke a nye anong, a ta shim akak ne a rawu akak, ka ne a tiyiik akak ne a zhe̱e̱sh akak. Yin ta kyem i ti te yin riye̱ ni ikuus Adakunom ne i bun i ni te yin riye̱ ni itso̱m baꞌ.

Ke i nye ye Adakunom nye agam iwe̱ng izem anong, aya a ta di katuur amma natson ne a te kaye̱e̱r kuro̱ng shita yin a? Yin áfe sang kuno̱o̱k katsak yin ta gop baꞌ.

Amma ke yin ta tobok yin aner aya a tase kaye̱e̱r kutser, to̱, sang akak tu ren ike̱ng iya wan ta sen nye'me baꞌ, nong ase̱ kutobok yin ta se nune̱re̱ng. Ada yin afe a ta di ike̱ng iya a tá nye nune̱re̱ng tà ka no̱o̱k yin ishorong yin.

“Nye yin tatan, fan kunye kutek yin bu se nong ánerawe tà di. Ke yin nye yin anong yin ta se̱ yin ishorong nufe Ada yin aya a tase kaye̱e̱r kaza baꞌ.

“Izen iya ne yin ta nye yin azumi, sang tu rosom yin kanyisi yin kyo̱ndi ákardak aner ta nye baꞌ. Kamok ba rosom kanyisi ba nong á ta tonong ánerawe ye ba sen nye azumi. Won ta ka tak yin katsak'e, ba n se̱ ishorong ba cei nakuruk. Amma ke wan sen nye azumi, to̱, ne i kusu kanyisi wan nong ti te name nanu, nong fan ánerawe bu ren ye wan sen nye azumi. Ada wan aya a tu ku ba, amma a di ike̱ng iya a tá nye nune̱re̱ng, ta ka no̱o̱k ishorong wan.