Sofonia 2
2
Thirrje për pendesë
1«Eja, mblidhu,
o popull i pacipë,
2para se të merret vendimi
e dita të firojë#2.2 të tjerë: të shpërndaheni porsi byku porsi byku,
para se t'ju përcëllojë zemërimi i Zotit,
para se të vijë dita e zemërimit të Zotit.
3Kërkojeni Zotin, të gjithë ju të përvuajturit e tokës,
ju që mbani urdhërimet e tij.
Kërkoni drejtësinë, kërkoni përulësinë,
ndoshta do të gjeni strehë ku të fshiheni,
në ditën e zemërimit të Zotit.
4Gaza do të jetë e shkretë,
Ashkeloni do të rrënohet,
Ashdodi do të zbohet në mes të ditës,
Ekroni do të çrrënjoset.
5Mjerë banorët e bregdetit,
kombi i Keretit.
Fjala e Zotit është kundër teje,
o Kanaan, tokë filistine,
do të të zhbij e banorë s'do të kesh më.
6Bregdeti do të bëhet kullotë,
livadh barinjsh, vathë dhensh.
7Do t'i përkasë tepricës së shtëpisë së Judës,
që për kullota ta përdorin.
Në shtëpinë e Ashkelonit,
do të shtrihen në mbrëmje,
se Zoti, Perëndia i tyre, do të kujtohet për ta
e fatin do t'ua kthejë.
8E dëgjova përbuzjen e Moabit,
përqeshjen e bijve të Amonit,
kur e fyen popullin tim
e ia kërcënuan kufijtë.
9Ndaj, pasha jetën time,
kumton Zoti i ushtrive, Perëndia i Izraelit,
Moabi do të bëhet si Sodoma,
bijtë e Amonit porsi Gomorra,
vend hithrash e gropë kripe,
shkreti e përhershme.
Tepricën e popullit tim do ta plaçkisin,
të mbeturit e kombit tim do t'i pushtojnë.
10Ky do të jetë shpërblimi i krenarisë së tyre,
se e përbuzën popullin e Zotit të ushtrive
dhe u mburrën para tij.
11I tmerrshëm do të jetë Zoti kundër tyre.
Ai do t'i mpakë gjithë perënditë e tokës.
Zotin do ta adhurojë
çdo komb e ishull,
secili në vendin e vet.
12Edhe ti, o Kush,
prej shpatës sime do të theresh.
13Ai do ta ngrejë dorën kundër veriut,
Asirinë do ta zhbijë.
Ninivën do ta bëjë djerrinë,
të thatë porsi shkretëtirë.
14Kopetë e çdo lloji,
në mes të saj do të shtrihen.
Në krythat e saj do të zënë vend
huta dhe iriqi.
Do të kuisë bufi në dritare,
korbi në prag të derës,
se u hoq veshja prej cedri.
15Ky është qyteti ngazëllues
që banonte i sigurt
e me vete thoshte:
“Unë, e tjetër s'ka!”.
Po si ndodhi që u shkretove
e strofull bishash u bëre?
Kushdo që kah ti kalon,
fërshëllen e bën gjeste me duar».
Aktualisht i përzgjedhur:
Sofonia 2: AL1
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Shoqëria Biblike Ndërkonfesionale e Shqipërisë 2020
© Interconfessional Bible Society of Albania 2020