Ura për te MarkuSample

Mjeku i shpirtit në veprim

Përgjigjja e Zotit për skribët dhe farisenjtë në vargun 17 na mëson diçka të mrekullueshme rreth Perëndisë: Ai dëshiron t’i shpëtojë mëkatarët! Çdo mjek i mirë dëshiron t’i ndihmojë të sëmurët të shërohen, por Zoti mezi pret t’i ndihmojë dhe t’i shpëtojë mëkatarët. Mëkati është i rrezikshëm dhe i dëmshëm. Është si një sëmundje e tmerrshme që ju bën të paaftë për të bërë vullnetin e Perëndisë dhe në fund përfundon në vdekje.

Zoti gjithashtu qortoi qëndrimin e farisenjve. Jo vetëm që i shihnin me përbuzje njerëzit që nuk bënin një jetë të shenjtë, por njëkohësisht nuk bënin asgjë për t’i ndihmuar. Ata nuk e miratonin faktin që Zoti Jezus hante me mëkatarët dhe u predikonte mesazhin e shpëtimit të Perëndisë. Ndërkohë që Jezusi i ndihmonte mëkatarët, ata e akuzonin për gjëra të liga. Por veprimet e Jezusit nxorrën në pah mëkatin e tyre dhe kjo gjë i bëri të ndiheshin fajtorë.

A shqetësoheni për njerëzit e tjerë që nuk e njohin Zotin? A ndodh t’i shihni me nënçmim ata që nuk jetojnë një jetë të krishterë? Atëherë po veproni si këta farisenj! Ne kurrë nuk duhet t’i shohim me përbuzje njerëzit që jetojnë një jetë mëkatare, sepse edhe ne kemi mëkat në zemrat tona. Mbase ata nuk kanë askënd që t’u mësojë se si Zoti dëshiron që të jetojnë. Shumë prej tyre janë të lënduar. Mendoni për mënyra se si mund t’i ndihmoni të tjerët në lagje, në shkollë ose në punë.