للسنة كاملة؛ رحمات جديدة كل صباحSample

نوض وواجه الحياة بشجاعة حيت نت بصفتك ولد الله، راك مابقيتيش بوحدك مع قوتك وحكمتك المحدودين.

غلاطية 2: 20 كتورّي مزيان شكون نت كولد الله وشنو تعطا ليك:

1. بيان ديال الحقيقة التاريخية ديال الفداء. "مْعَ الْمَسِيحْ تّْصْلَبْتْ." هادشي اللّي كيقول بولس هنا هو مهم بزّاف. على صليب الجلجثة، ماشراش يسوع النجاة العامة. ماماتش باش تكون النجاة كاينة. لا، يسوع خدا أسماء لعند الصليب. راه مات من أجلي ومن أجلك بشكل خاص وبشكل فعّال. كان موته فعّال بالنسبة لينا بحال لو كنّا حنّا اللّي متنا. وحيت هو مات في بلاصتنا، فراه موته طفا غضب الله علينا، باش مانواجهوش هاد الغضب مرة خرا.
2. بيان ديال الواقع ديال الفداء في الوقت الحاضر. "مَاشِي أَنَا اللِّي كَنْعِيشْ دَابَا، وَلَكِنْ الْمَسِيحْ هُوَ اللِّي كَيْعِيشْ فِيَّا." هادي حاجة جدّية وصعيب نفهموها، ولكن راه مهم نفكرو فيها. راه أنا ونت متنا مع المسيح باش هو يقدر يعيش فينا دابا. بولس ماكيهدرش هنا على الحياة المادية، هو كيهدر على الحياة الروحية. راه القوة اللّي كتحرّك حياتك الروحية وكتحفزها وكتدفعها دابا ماشي هي نت، ولكن هي المسيح! بالنعمة كيخلّيك تكون نت هو البلاصة فين هو كيسكن. هادشي كيعني بلّي ماعمرّك كتكون في شي موقف، بلاصة، أولا علاقة بوحدك. هو ديما معاك. وحيت هو ديما معاك، فراه ماعمرك تبقا بوحدك مع الموارد المحدودة ديال حكمتك وقوتك والتقوى ديالك (قرا أفسس 3: 20-21)
3. النتيجة اللّي كتغيّر الحياة. "وْالْحَيَاةْ اللِّي كَنْعِيشْهَا دَابَا فْالدَّاتْ، كَنْعِيشْهَا فْالْإِيمَانْ بْوَلْدْ اللَّهْ اللِّي كَيْبْغِينِي وْعْطَى حْيَاتُه عْلَى وْدِّي." كندير إيماني في الحق بلّي هو مات من أجلي وكيسكن فيّا، وكنعيش على هاد الأساس. كنعيش بسلام وأمل وشجاعة، ولكن ماشي حيت كنفهم كل ماكيوقع فيّا أولا قريب ليّا. ولكن حيت ماشي غير تغفرو ليّا دنوبي، ولكن حتى تباركت بموارد كتفوق خيالي حيت ملك الملوك ورب الأرباب، الخالق المُنجّي، كيعيش دابا فيّا. أنا ماكنفهمش بزّاف، ولكن أنا متأكد من هادشي- هو معايا، وهو فيّا، وهو ديالي. مانقدرش نخلّي راسي نفكّر بلّي أنا فقير ملّي وجوده كيخلّيني نكون غني. لا مانقدرش نقول لراسي أنني ماعنديش القدرة ملّي هو كيقوّيني بالنعمة. هاهي الخلاصة النهائية- أنا مرتاح باش مانعرفش، حيت هو كيعرف وهو معايا للأبد.

من أجل دراسة وتشجيع كتر: حبقوق 3: 17-19